Israelƒuɔ Bɔlɛ 12
12
Kukpi Lili Bɔvia Limeyi
1Amu na Unwoti ɔ́su Mose ku Aaron na Egyipte ɔnini, 2“Kɔbuli kɔni kemmo bɛkya mɛni ndi kɔbuli kudeedi na lɛkwa lɛmɛni kemmo ute-mii. 3Anwuɔsu bibo ɔda ɔmɛni bite Israelƒuɔ ƒui ka ni, kɔbuli kɔmɛni limeyi leevudi lɛlɔ ni, ɔnana biala ɔwia koƒonubi iye ese ubi use ute nwuna kaduli bekyuli. 4Na si kaduli kadi bekyuli bánu ka beeemomo na balakana ebuo unwi bɔkun ni, kaduli kammɔ ku bana liku bekyuli bakana bele ebuo unwi na badu bakun. Nsu bele ebuo ɔmmɔ na ɔdi biala kaduli bekyuli bumomo kenye kalɛ na ɔdi biala wakana bɔkun bɔwɔlɔ. 5Nsu kaduli biala bekyuli bebo kuƒi ka beti koƒonubi kɔgyani iye ketukpa kani náƒɔ lɛkwa linwi.
6“Na bitaanu-ma lɛlɔ kaduɛ útédu kɔbuli limeyi leevu-linedi lɛlɔ useyi uwi asa na ɔdi biala ɔdu nwuna ebuo. 7Na biti bebuo bammɔ ubugya bɛkuna biwi bina kɔyakun ligyii lɛtɔdi ku amadɔ lɛdi lɛlɔ na kesii kani na bɛdubo lɛna lɛmmɔ bɔkun mmɔ. 8Na usien ɔmmɔ ni, ukyuli biala uƒi nwuna lɛna na ɔkun-ni ku evete ani mbo ɔdu ku bodobodo ɔni kemmo na bɔnyii buuubo. 9Nsu ukyuli biala uteƒulo lɛna lɛmmɔ lɛdi iye ɔkun lɛna lɛmmɔ ɔwɔdi, mmomu biƒi-ni ku lili ku lɛgba ku aƒɔla ammɔ ƒui na bɛkun. 10Na bɛnu ka lɛna lɛmmɔ lɛdi lítebu asa na kadi kégye. Na si ɔdi úbu ni, na bɛkyula-ni ɔtanta ɔmmɔ.
11“Na bɛda lɛlɔ asa bise kalɔ ku bɔdi, na bɛkya bina lɛwu ku agbanvuo na bɛwia bina ugyii ɔdadi bɛda. Na ɔlɛka bɛdi adila ammɔ pla pla. Ɔsika usien ɔmmɔ ɔdi Unwoti Kukpi Lili Bɔvia Limeyi.
12“Ɔsika usien ɔmmɔ ami Unwoti ndubo bɔvi Egyipte kalɔ ƒui lɛlɔ na lɛdu ubi udeedi biala na bekyuli ku bebuo ƒui báwɔ. Na ndubɔni Egyipteƒuɔ baƒiɔ ƒui kɔtu. Ami Unwoti mɔɔsu. 13Na uwi ɔni mɔɔní Egyipteƒuɔ kɔtu ni, ubugya ɔni bɛ́kuna bíwi bina kɔyakun ndubɔbla bina likposela ka amii nlie mmɔ. Na si lɛ́nu ubugya ɔmmɔ ni, ndububo lɛvi-mii lɛlɔ, na naaabla-mii lɛla lɛdi.
14“Bidie limeyi lɛmɛni bise bitaadi uwi ƒui amii ku bina kaba kemmo bebi ƒui, ɔsika ɔdi lɛla bonwu lɛni na ami Unwoti lɛ́bla líte-mii. 15Biti emeyi maatɛ bɛdi bodobodo ɔni kemmo na bátakya bɔnyii. Na emeyi maatɛ ammɔ limeyi lideedi ni, ukyuli biala na ubo bɔnyii na nwuna kaduli ubo-nwu uwiakun. Na Ukyuli biala madi bodobodo ɔni kemmo na bákya bɔnyii emeyi maatɛ ammɔ kemmo ni, ndubɔda-nwu lidie mina bekyuli akɔ. 16Na limeyi lideedi ku maatɛdi ni, bɛsa bɔsa kedee na mina lɛnyi lɛlɔ. Na ukyuli biala utabla kabla kadi emeyi ammɔ kemmo. Nsu bibo kuƒi ka bɛnwa adila bɛdi. Ɔmɛni kani na ɔlɛka bɛbla.
17“Bɛdi Bodobodo Ɔni Néteƒu Limeyi lɛmmɔ, ɔsika limeyi lɛmmɔ lɛlɔ geen na lídie-mii lɛ́lɛku Egyipte kalɔ lɛlɔ na bina adua adua ammɔ kenye. Bɛlɛ limeyi lɛmɛni ugyii na bitaadi-ni amii ku bina kaba kaba bekyuli úsela uwi ƒui. 18Bɛdi limeyi lɛmɛni úti ɔ́si kɔbuli kudeedi limeyi leevu-linedi useyi lɛlɔ úti útédu limeyi aavlanyɔ-unwi useyi. Na ɔdi utadi bodobodo ɔni kemmo na bɔnyii bɔkya na emeyi ammɔ kemmo. 19Na emeyi maatɛ ammɔ kemmo ɔdi uteti bɔnyii bɔdi utese nwuna kaduli. Na si Israelni iye ɔƒɔ ɔdi ɔ́di bodobodo ɔni bakya bɔnyii ni, ndubɔda-nwu lidie mina bekyuli akɔ. 20Bitadi lɛla biala kemmo na bákya bɔnyii. Bodobodo ɔni néteƒu kani na ɔlɛka bɛdi na kesi kesii na bɛdubɔkya na emeyi bɔdi bɔmmɔ kemmo.”
Kukpi Lili Bɔvia Limeyi Lideedi
21Amu na Mose ɔ́lɔ Israelƒuɔ benengu ƒui ɔ́sala na ɔ́su-ma ɔnini, “Bisie na ɔdi biala utáwia koƒonubi iye esebi na ɔdu, na ɔdi biala kaduli bekyuli beti ebuo ɔmmɔ badi Kukpi Lili Bɔvia Limeyi. 22Na si bɛ́du bebuo bammɔ ni, na biti bebuo bammɔ ubugya biwi ɔɔƒɛɛ ɔdi kemmo. Na bɛwia libu lɛni baalɔ hisope na biti bitákya ubugya ɔmmɔ kemmo na bɛkuna biwi kɔyaku ligyii lɛmmɔ eli ku amadɔ. Na ukyuli biala utalɛ keyi úti útédu ka kadi kégye. 23Kalɛ na si uwi ɔni na Unwoti úbo ɔɔví Egyipte kalɔ lɛlɔ kalɛ na ɔdu bebi bammɔ na ɔ́nu ubugya ɔmmɔ na ligyii lɛlɔ ni, na uláya na nwuna ɔtu ɔni mɔɔdú bekyuli bammɔ weduo bina kɔduli na ɔdu-mii.
24“Na bɛnu ka amii ku bina bebi bɛ́di ɔda bubo bɔmɛni lɛlɔ uwi ƒui. 25Na si bítéduo kalɔ kani na Unwoti ɔ́su úse ka wete-mii kemmo ni, na bitaadi ɔdi limeyi lɛmɛni. 26Na si bina bebi báta bákɔ na béye-mii banii, ‘Limeyi lɛmani udu bɔdi na bɔdi mɛni?’ ni, 27na bɛsu-ma bɛnini, ‘Unwoti Kukpi Lili Bɔvia Lɛkpa na bɔdi, ɔsika limeyi lɛmmɔ Unwoti ɔ́via Israelƒuɔ kɔduli na Egyipte kalɔ lɛlɔ na ɔ́du Egyipteƒuɔ, nsu útadu Israelni ɔdi ina unwi muedi.’ ” Amu ka Mose ɔ́su-ma ala amɛni ɔ́wɔlɔ ni, Israelƒuɔ benengu bammɔ bálɛ akɔnkɔ na bémwi Unwoti. 28Amu na bátɔlɔ bésie bana kɔduli na bátábla lɛla lɛni na Mose ku Aaron básu-ma aani kalɛ na Unwoti úbo-ma ɔda.
Egyipte Bebi Bedeedi Békpi
29Usien ɔmmɔ lɛdibantɛ kani na Unwoti ɔ́du Egyipteƒuɔ bebi bananabi bedeedi ƒui. Ɔ́du-ma ɔ́siku Ƒarao ubidi udeedi ɔni muulie-nwu kelekɔ úti útédu ukyuli ɔni ntɛ aban ɔtɔ ubidi lɛlɔ. Na ɔ́du bebuo bebi bedeedi bani na báwɔ ƒui lɛnɔ. 30Na ka Ƒarao ku nwuna benengu ku Egyipteƒuɔ bekyuli békeyi lɛlɔ bágyinya usien ɔmmɔ ni, ukyuli biala úse kalɔ uuwulo. Ɔsika Egyipte kaduli biala kemmo ni, ukpine ɔtɛ.
31Na usien ɔmmɔ Ƒarao ɔ́ya na bálɔ Mose ku Aaron béte-nwu. Na ɔ́su-ma ɔnini, “Bɛgyu bɛtɔlɔ, amii ku bina Israelƒuɔ ƒui! Na naaawia-mi na mina kalɔ lɛlɔ. Biteesie na Bitákpa Unwoti aani kalɛ na bívele-mi ulu. 32Na biti bina baƒonu ku bese ku ɔmantɛ bakɔ na bɛtɔlɔ. Na bivele Unwoti kusɛ kusɛ bite-mi asa na bɛtɔlɔ.”
33Amu na Egyipteƒuɔ bénye Israelƒuɔ lɛlɔ ka bababla na bagyu batɔlɔ. Na basu-ma banii, “Si bítatɔlɔ pla bula ƒui bɔdubo bukpi.” 34Anwuɔsu Israelƒuɔ béti bana bodobodo ɔni nátasa tɔ bɔnwu na bátakya tɔ bɔnyii nwuna kemmo bébi-nwu ala bákya bodobodo akyami ammɔ kemmo na béti bákya ala akɔ baƒala bana amangba. 35Na Israelƒuɔ bábla lɛla biala siin aani kalɛ na Mose úbo-ma ɔda. Na bévele Egyipteƒuɔ na béte-ma sika ugyiedi ku ɔƒualadi, na bévele-ma adi lɛnɔ. 36Na Unwoti ɔ́ya na Egyipteƒuɔ ƒui beeti ɔbu teete Israelƒuɔ kaduɛ. Na ɔmɛni ɔsu ala ani béye-ma ni, béte-ma. Na ulu ɔmɛni lɛlɔ na Israelƒuɔ béti bákɛ akɛla pii básiku Egyipteƒuɔ kudɔ na béti-nya bátɔlɔku.
Israelƒuɔ Bálɛ Egyipte Kalɔ Lɛlɔ Bátɔlɔ
37Israelƒuɔ bésie lɛgba ulu bási Rameses bétédu Sukot. Na banana bani nkɛ ulu ɔmmɔ bésela babla mpim eti leevu-inyɔ (600,000). Ɔni na beleku ku banamu bɔka buuubunku. 38Na bekyuli bamba pii lɛnɔ bebunku-ma akɔ. Na bakɛ bada baƒonu ku bese ku ɔmantɛ bakɔ pii lɛnɔ. 39Ka bɔbɔku na bábɔku-ma bálɛku Egyipte kalɔ lɛlɔ ɔsu ni, bátakɛ kɔnu na banwa adila adi bada. Mmomu bodobodo ɔni básiku Egyipte na bɔnyii buuubo-nwu kemmo mmɔ na béti béƒi bodobodo wɛlɛ wɛlɛ ɔdi.
40Uwi ɔni na Israelƒuɔ béti bélie Egyipte kalɔ lɛlɔ ƒui ɔdi akwa eti maane ku avlaatɛ (430). 41Na lɛkwa eti maane ku avlaatɛdi lɛlɔ pɛpɛɛpɛ ni, Unwoti ɔ́ya na Israel kaba bekyuli bammɔ ƒui bálɛ Egyipte kalɔ lɛlɔ. 42Ka Unwoti úlie usien umodi ɔmmɔ na ɔ́nu ka nwuna bekyuli bálɛ Egyipte kalɔ lɛlɔ ɔsu ni, úbo Israelƒuɔ ɔda ka bese limeyi lɛmmɔ likpo na beteelie teegye kadi.
Ɔda Bubo Na Kukpi Lili Bɔvia Lɛlɔ
43Amu na Unwoti ɔ́su Mose ku Aaron ɔnini, “Ɔda ɔmɛni na muubó-mii na Kukpi Lili Bɔvia lɛlɔ. Ukyuli biala na ɔɔɔdi Israelni utadi Kukpi Lili Bɔvia adila ammɔ adi. 44Nsu ukyuli uyedi ɔni na ɔkya-mii akɔ si úkulo nwuna lego ni, ubo kuƒi ka ɔdi adila ammɔ adi. 45Nsu bekyuli bani na bélie-mii akɔ uwi klukwii ɔdi kani iye buti na béti-nwu ka ɔbla kabla na baƒɔ-nwu kayu na unwini ɔtɔlɔ ni, utadi adila ammɔ adi.
46“Na Kukpi Lili Bɔvia adila ani na ukyuli biala ɔ́nwa ni, ɔnu ka ɔ́di-nya na nwuna kaduli kani. Ɔdi utabwɛ likubi linwi muedi. 47Anwuɔsu ɔlɛka Israelƒuɔ ƒui bitaadi limeyi lɛmɛni.
48“Nsu bɛnu ka ukyuli biala na útekulo lego útadi adila ammɔ adi. Na si baƒɔ bani nkya-mii akɔ ɔdi ɔɔwia ka ɔdi Kukpi Lili Bɔvia limeyi lɛmmɔ na uti ɔkɔliku Unwoti lɛnyi katɔ ni, ɔlɛka ɔka nwuna bebi bananabi ƒui ago bukulo. Na ɔmmɔ kama ukyuli ɔmmɔ unwini Israelni na ɔkana na ɔdi limeyi lɛmmɔ lɛdi. 49Na ɔda bubo bɔmɛni buse bute Israelni biala ku bani naaadi Israelƒuɔ na bákya-mii akɔ.”
50Na Israelƒuɔ bábla básia ɔda ɔni na Mose ku Aaron bébo-ma mmɔ lɛlɔ. 51Na limeyi lɛmmɔ Unwoti ɔ́da Israelƒuɔ ƒui údie Egyipte na bana adua adua kenye.
Currently Selected:
Israelƒuɔ Bɔlɛ 12: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
