Ester 9
9
1Kɔbuli kɔtɛdi limeyi leevu-lɛtɛdi lɛni lɛlɔ na ɔlɛka ala amɛni alɛ lídu. Na nka Yudaƒuɔ bekisine bákali ka nka bekpo na badi Yudaƒuɔ bamɛni lɛlɔ na bakya-ma kalɔ. Nsu ala ammɔ ƒui ébo énwini na Yudaƒuɔ mmomu nádi bana bekisine lɛlɔ. 2Na kɔlɛkɛ kɔmmɔ lɛma linengudi kemmo ƒui na Ɔga Ahasweros lɛga kadikɔ ni, Yudaƒuɔ bammɔ básala lɛlɔ na báklibi lɛlɔ benye bete bana ukisine biala na mata mebo ɔnii ubékpo-ma, nsu ɔdi útakana-ma bɔni bude na bana lɛlɔ liƒu bonwu lɛni náda bekyuli ɔsu. 3Na geen ni, kɔlɛkɛ kɔmmɔ bakutine ku benengu ku bagadine ku batɔnkune ku aban kenye benyene ƒui ni, bénwini benye Mordekai kama, ɔsika baayia-nwu geen. 4Mordekai únwini ukyuli unengudi geen na úbaƒɔ lɛnyi na kɔlɛkɛ kɔmmɔ ƒui kemmo ɔni na bɔkɔ kani na nwuna ɔyikun ɔɔkɔ́ katɔ uwi biala.
5Anwuɔsu Yudaƒuɔ békpo bana bekisine na bádu-ma geen na báblaku bana bekisine kalɛ na baayɔ́. 6Na Susa ɔma unengudi ɔmmɔ kemmo alati ni, Yudaƒuɔ bádu nkyuli eti leevu, na báyila-ma udu ƒui. 7Na bana badi anyi ndi Parsandata ku Dalƒon ku Aspata 8ku Porata ku Adalia ku Aridata 9ku Parmasta ku Adrisai ku Aridai ku Waisata. 10Banana bamɛni ƒui badi Hamedata ubidi Haman Yudaƒuɔ ukisine ɔmmɔ bebi bananabi bani na ɔ́wɔ. Nsu béteti-ma adala adi bétenwini bana adi.
11Na bekyuli bani ƒui na bádu na Susa ɔma unengudi ɔmmɔ kemmo ƒui ni, bésie bátásu ɔga ɔmmɔ. 12Mmɔ na ɔga ɔmmɔ ɔ́su Beleku Ɔga Ester ɔnini, “Na Susa ɔma unengudi kemmo ni, Yudaƒuɔ bammɔ bádu nkyuli eti leevu, na bádu Haman bebi bammɔ lɛnɔ ƒui. Na kalɛ na bábla na kɔlɛkɛ kɔmmɔ lɛma linengudi lɛkladi kemmo na lɛɛɛgyi. Bi lɛnɔ na asɔ aawia iye evele-mi na lɛbla lite-ɔ?”
13Mmɔ na Ester údie kenye ɔnini, “Si ɔdi-ɔ lɛƒɔyɔ ni, na ete kuƒi na Yudaƒuɔ bani na bakya Susa bekpo kɔnaadi lɛnɔ aani kalɛ na békpo ɔmwi na aya na bakya Haman bebi leevu bammɔ ɔbuli limɔ baƒala akpa ku ɔta bonwu ɔmmɔ lɛlɔ.”
14Anwuɔsu ɔga ɔmmɔ údie lɛdi ɔnii babla lɛni na ɔ́ya na bébo ɔda na Susa ɔma kemmo, na báƒala Haman bebi leevu bammɔ. 15Ɔmmɔ ɔsu Yudaƒuɔ bani na Susa básɔ bása kɔbuli kɔtɛdi limeyi leevu-linedi lɛlɔ na bádu nkyuli eti aku na Susa mmɔ, nsu béteti lɛla bamba biala betenwini bana lɛdi.
16Yudaƒuɔ bani na bakya ɔga ɔmmɔ kalɛkɛ kammɔ kemmo ekpo bamba ƒui lɛnɔ básala lɛlɔ na békpo bédie lɛlɔ na kɔbuli kɔtɛdi limeyi leevu-lɛtɛdi lɛmmɔ lɛlɔ ɔni na bádu nkyuli mpim liti ku aavlanyɔ-ɛlɔ bani ndi bana bekisine mmɔ, nsu ama lɛnɔ béteti lɛla lɛdi bétenwini bana lɛdi. 17Kɔbuli kɔtɛdi limeyi leevu-lɛtɛdi lɛlɔ na ala amɛni álɛ. Na limeyi leevu-linedi lɛlɔ ni, bánwuna na bádi limeyi na ɔbla lɛlɔyɔ limeyi geen úte-ma.
18Nsu Yudaƒuɔ bani na bakya Susa ɔma unengudi ɔmmɔ kemmo ama ni, békpo limeyi leevu-lɛtɛdi ku leevu-linedi na limeyi leevu-lɛlɔndi lɛlɔ, mmomu na bánwuna na bádi limeyi. 19Ɔmɛni náya na Yudaƒuɔ lɛma libliidi kemmo ni, kɔbuli kɔtɛdi limeyi leevu-linedi na ama baadi limeyi lɛmmɔ aani lɛlɔyɔ limeyi na beete bekyuli ala.
20Na Mordekai únweni ala amɛni ƒui úse na úte Yudaƒuɔ bani na bakya Ɔga Ahasweros kalɛkɛ kammɔ ƒui lɛlɔ bɔti na ɔlɔgyu ku ekpo ani na ede ƒui ɔnii 21bataadi kɔbuli kɔtɛdi limeyi leevu-linedi ku leevu-lɛlɔndi aani bɔnwuna limeyi lɛkwa biala 22ku limeyi lɛni na Yudaƒuɔ békpo bana bekisine, na bákɛ bɔnwuna básiku-ma enu kemmo. Úte-ma bɔti ka badi limeyi lɛmmɔ ku ebiti na bete bana banwani etela ku adila, na batayiƒala bawabane.
23Anwuɔsu bádi Mordekai litemi lɛmmɔ lɛlɔ na emeyi amɛni énwini limeyi bɔdi emeyi éte Yudaƒuɔ ƒui lɛkwa ndi lɛkwa. 24Limeyi lɛmɛni lɛlɔ na Hamedata ubidi Haman ɔni ndi Ɔga Agag kaba kemmo ukyuli ɔni muukisi Yudaƒuɔ mmɔ únyimi ɔda bubo bɔdi ka badu Yudaƒuɔ ƒui. Na ɔ́tu egulabi adi na ɔ́nu ɔ́ti uwi ɔni na ɔlɛka badu Yudaƒuɔ bammɔ. 25Nsu uwi ɔni na Yudaƒuɔ lɛlɔ kelisa kekpidi kamɛni litemi líbeduo Ɔga Ahasweros kɔtu kemmo ɔkɛnku Beleku Ɔga Ester lɛlɔ ni, ɔ́ya na bénweni ɔku bamba bébile Haman lɛla lɛni na únyimi kemmo, na likpidi lɛmmɔ línwini líbo Haman ku nwuna bebi lɛlɔ mmomu ɔni na bákya-ma ɔbuli limɔ anwu ku nwuna bebi na báƒala-ma. 26Ɔmmɔ ɔsu na baalɔ emeyi amɛni bɔdi banii Egulabi Bɔtu Emeyi ɔ́si ɔku ɔni na Mordekai úbenweni ku ala ani nébo ábalɛ na ɔmmɔ kama ɔsu.
27Na Yudaƒuɔ ƒui bálɛ-nwu ugyii ka ama Yudaƒuɔ ku bana kaba kemmo bebi ku bekyuli bani néti lɛlɔ bénwini Yudaƒuɔ bataadi emeyi amɛni na uwi ɔmmɔ lɛlɔ aani kalɛ na Mordekai úbo-ma ɔda. 28Lɛla lɛmɛni línwini bunyimi búte Yudaƒuɔ ƒui ku bana kɔduli bekyuli úsela bana bawɔ bawɔ bani mebo kama ƒui na lɛma linengudi lɛmmɔ kemmo ku kɔlɛkɛ kɔmmɔ ƒui lɛlɔ ka bataadi Egulabi Bɔtu Emeyi amɛni.
29Na Abihail ubidi ɔni ndi Beleku Ɔga Ester ku Mordekai ɔmɛni básala bénweni ɔku bamba básia ɔni na Mordekai ɔ́ka bunweni ɔ́siku emeyi amɛni bɔdi lɛlɔ, béti baatina ka Ester na nwuna kenyekɔ kenye ɔ́sia litemi lɛmmɔ kɔnu. 30Na béti ɔku ɔmɛni bémene Yudaƒuɔ ƒui na kɔlɛkɛ eti anyɔ ku aavlanyɔ-maatɛ kɔmmɔ ƒui kemmo na Persia lɛga kɔdikɔ kɔmmɔ ƒui kemmo ka béti beete Yudaƒuɔ ƒui keyi buɛɛ ku bɔnwuna. 31Na bátina kalɛ na ɔlɛka bataadi emeyi amɛni kalɛ kani na ama ku bana kaba kemmo bebi baadi emeyi bamba ku kenye bunyimi ku kɔnyana buwulo emeyi. Na ɔmɛni ɔdi lɛla lɛni na Ester ku Mordekai bébo Yudaƒuɔ ƒui ɔda. 32Na bénweni Ester lɛla lɛni na únyimi mɛni bákya ɔku kemmo bése.
Currently Selected:
Ester 9: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.