Etemila 12
12
1Taakali ƒula udiene lɛlɔ taanu uwi biala
na ƒula lɛkloƒu uwi!
Ɔsika uwi ɔdubo ɔni na
kayawi ala adubukpi-ɔ ɔkwɛ
na etila ani nsia-a lɛlɔ ɔsu.
2Uwi ɔdubo ɔni na ɔƒɛ ku kɔbuli
ku ayabi bukeye ƒui bɔdubɔbla-a suu.
Na kayaa kadubɔbla-a aani ɔnantu kadi
na ƒula eli.
3Ƒula lɛlɔ ekpo adubɔyɔ na abla kpɛtɛ kpɛtɛ.
Na ƒula kenye anyi ese kalɔ atayii udu.
Na ƒula anumi asɔ alanu nwaa.
4Ƒula atu asɔ aaadubo buteenu kaduɛ
na ina kukɔ mɔɔkɔ́ ala muedi asɔ elénu.
Nsu aasɛ ɔnu budie muedi bɔdubɔya
na ekeyi lɛlɔ agyinya.
5Adubo butaayia ina lɛbinkpo na aakɔ́ iye bɔyu
na ada ulu ɔni nénwini ɔ́yu.
Ƒula lili linwini lɛdubɔta lɛƒuala
aani kɔdingyii anwula ƒuala ƒuala.
Na adubɔkɛ ataakpɛ lɛgba kalɔ aani kɔɔgyu
kɔni náabi na ɔɔyɔ́ ɔvumana livuo.
Bula ƒui bɔdubɔsɔ bunwini busie bula kasikɔ
na bekyuli bani muuwulo-bu
baƒɔ lɛblɔnu lɛmmɔ ƒui lɛlɔ.
6Nyimo ƒula Udiene asa na lɛkun lɛni nda-a
aani ɔkun mmɔ ukulo
iye sika ugyiedi lɛkyami lɛni náƒɔ-ɔ kuye mmɔ lɛbwɛ,
iye ƒula ketubui kabwɛ
iye ɔbuli ɔni na eeti taani ntu
taalɛku libiɔ kemmo mmɔ ukulo.
7Lɛni na bula ɔlɔna ɔɔsɔ teenwini teesie kalɔ kemmo
na ɔƒɛƒɛɛ ɔni nkya-bu lɛlɔ kemmo uute-bu ngba mmɔ
ɔsɔ uunwíni teesie Katɔti kudɔ.
8Ami lɛ́ɛnu lɛ́ti ka lɛla lɛdi
liiibo kalɔ bunu bɔdi.
9Ndi ala ɔtinane ɔni muunú ala kalɔ geen na lɛ́da anu na lɛ́sala agba adi na líduo mu kemmo kaduɛ. 10Ɔmmɔ kama lɛ́kya ɔkplu na lídie-mu kalɔ pɛpɛɛpɛ kalɛ na ɔ́manku.
11Lɛnunda etemila ese aani ugyii ɔni na umonsene uuti taakpanku nwuna bebuo. Asugba amɛni ási Katɔti ɔlati kudɔ na ese kɔbuɛlɛ ani na beeti taakana ligyii taadanku lɛlɔ. 12Ubi, mɔɔlɛ-ɔ kpakplaa nnii die ala bɔtina bamba biala atu na eti bɔmɛni kani.
Lɛku liiibo kawɔlɔkɔ. Na ala ƒui bulie taatɛya lɛnɔ ɔɔyá na ukyuli ɔɔyii udu.
13Ala ani ƒui na bátina-a ni,
akana na asala-nya akya
etemila klo klo amɛni kemmo anini,
“Di Katɔti litemi lɛlɔ na abu-nwu.
Lɛla lɛni ƒui na ngba bumodi bɔmmɔ
bɔdanku kani na lɛdi mmɔ.”
14Katɔti ɔdubɔtɛku-bu litemi
na lɛla biala na ukyuli ɔ́bla lɛlɔ
ina bɔbɛ na ábɛ ábla-nya
na adi likpidi iye lɛbuni.
Currently Selected:
Etemila 12: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
