Daniel 10
10
Daniel Ɔ́nu Lɛla Lɛdi Na Tigris Ketu Kɔtu
1Na Persiaƒuɔ Ɔga Kores lɛga bɔdi lɛkwa lɛtɛdi kemmo ni, Daniel ɔ́kɛ linyesia lɛdi ɔ́siku Katɔti kudɔ. Na bédie-ni kalɔ na kɔyu kemmo ala bɔnu kemmo béte-nwu. Na linyesia lɛmmɔ lɛdanku kekpo kekpidi kadi, na ɔdi litemi geen lɛnɔ.
2Kwasida ɛtɛ sɔɔn kemmo na ami Daniel nkya kɔnyana buwulo kemmo. 3Na ńtadi lɛla lɛbuni lɛdi iye lɛkun lɛna. Na ńtani ntɛ bɔdi lɛnɔ, na ńtawɛɛ nnɔmii bɔdi anumi iye lɛkya-mu lili lɛnɔ.
4Ɔmmɔ kama ni, kɔbuli kudeedi na limeyi aavlanyɔ-linedi lɛlɔ ni, nnye Tigris Ketu kɔtu. 5Na ka lɛ́talaku anumi katɔ ni, lɛ́nu ukyuli ɔdi ka ɔkya awu ɔbunidi, na únyimi sika ugyiedi kabuli kani muukeye ɔda kavobi. 6Na nwuna ɔlɔna use aani lɛtabi lɛni náƒɔ kuye geen. Na nwuna anumi eekeye aani kalɛ na kayaa kaabwɛ ogya, na nwuna anumi ebi ese aani ogya ɔni mɔɔda na uudie linyemi. Na nwuna enu ku lɛgba lise aani abuala egyiedi ani na békuo-nya sɛɛn na eekeye. Na nwuna lɛdi lɛɛku aani kalɛ na bekyuli pii beete kudu.
7Ina ka bekyuli bani nnye-mi kudɔ ama balánu budie taatina bɔmɛni ni, liƒu lɛni náda-ma, na kɔku kɔmmɔ lɛti pɛ ɔsu ɔ́ya na békeli bátábɛ. 8Na ami lɛti kani nánu budie taatina bɔmɛni. Na lɛ́bla kpɛtɛ kpɛtɛ, na mina anumi ábla ƒuƒuu. 9Na uwi ɔni na línu-nwu lɛdi bɔku ni, líbuli na líti anumi ńtébi kalɔ, na líduo lɛlɛɛ kemmo lísie ɔgyu kɔnakunwi.
10Amu na útuku-mi na lɛ́ta nƒa enu ku mina akɔnkɔ lɛlɔ. 11Na ɔ́su-mi ɔnini, “Daniel, ƒula Katɔti ɔɔbla-a lɛlɔ kasusu kenengudi geen na anwu nátala-mi. Anwuɔsu ta nye, na enu lɛla lɛni na ndubo-ɔ bɔsu.” Mmɔ na lɛ́ta línye na lɛlɔ lɛɛtɔ́-mi kpakpaakpa. 12Na Katɔti ɔtu ɔmmɔ ɔnini, “Daniel, tayia! Katɔti únu ƒula bɔkpali ɔ́si limeyi lideedi lɛni lɛlɔ na évele-nwu ka enu ala kalɔ, anwuɔsu na ɔ́tala-mi mɛni. 13Nsu Persia kadi ɔtu úkpoku-mi emeyi aavlanyɔ-unwi. Na ɔmmɔ kama Mikael, batu bayikune bammɔ akɔ unegudi, úbo na úbedie-mi na Persiaƒuɔ baga enu kemmo. 14Na ɔƒaani ni, líbo mɛni kalɛ na lɛsɔ mbedie lɛla lɛni ndubo ƒula bekyuli bɔlɛku uwi ɔni ndubo kemmo lɛtina-a.”
15Amu na uwi ɔni ƒui na Katɔti ɔtu ɔmɛni unye ɔɔtɛmiku-mi ni, mina anumi alɛ kalɔ na muunú kpoo. 16Ɔmmɔ kama údie lɛlɔ nwaa aani ukyuli ɔyawine na útuku-mi enyekuli. Mmɔ na lɛ́su-nwu nnini, “Ati, ƒula ala budie taatina bɔmɛni bɔ́ya na muunú ɔlɛ geen, na mina kayi kemmo na ɔyikun biala ɔsɔ uuubo-mi lɛlɔ kemmo lɛnɔ. 17Ƒula kabla ɔblane kani na ndi na dɛ na ndubɔkana na lɛtɛmiku ukyuli ɔni na ubo ɔyikun ɔmɛni udu ka ubo-mi ɔkplu geen muedi asa na mɔɔkana bɔnwuna?”
18-19Katɔti ɔtu ɔmmɔ ɔ́sɔ útuku-mi kunyɔdi na ɔ́su-mi ɔnini, “Liƒu litada-a lɛni! Katɔti ɔɔbla kasusu kenengudi geen na ƒula lɛlɔ. Anwuɔsu kya kayi.”
Ka ɔ́su-mi lɛni ni, mina ɔyikun ɔ́sɔ únwini úbo-mi na lídie kenye nnini, “Buvele, taasu lɛla lɛni na ebo ete-mi! Ɔsika áaya na lɛ́sɔ línwini líbo mina lɛlɔ kemmo.”
20Amu na Katɔti ɔtu ɔmmɔ úye ɔnii, “Énu lɛla lɛni ɔsu na líbo mɛni kalɔ? Ndubo bɔtɔlɔ uwi klukwii kemmo ntékpoku Persiaƒuɔ kadi ɔtu. Na si uwi ɔni na lɛ́di-nwu lɛlɔ lɛ́wɔlɔ ni, Grikiƒuɔ kadi ɔtu lɛnɔ ɔdubo-mi bukpoku. 21Nsu kudeedi ni, ndubo-ɔ bɔsu lɛla lɛni na bénweni bákya Litemi Geen Ɔku ɔmmɔ kemmo. Na litemi lɛmmɔ lɛɛtina ka ukyuli ɔdi uuubo na unye-mi kama si ɔɔɔdi Mikael ɔni ndi Israel kadi ɔtu kani.”
Currently Selected:
Daniel 10: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
