Batalane Kabla 21

Paulo Ɔ́sɔ Úsie Yerusalem

1Amu na uwi ɔni na bɔ́kada lɛlɔ bɔ́wɔlɔ ni, bútéduo ɔkɔlɔ kemmo na bɔ́via búsie Ko. Amu na kadi kégye ni, bútéduo Rodo na bɔkɛ mmɔ bɔ́vi búsie Patara. 2Na mmɔ na bútéti ɔkɔlɔ ɔdi ɔni nésela Ƒoinike, na bɔ́tɔlɔ. 3Amu na bɔ́nu Kipro kalɔ, na bɔ́da mmɔ bɔ́va na búti bɔ́yu kada kakɛ búsie bútáyu Tiro. Na bútásia kesii kani na badubudie ala ani nkya ɔkɔlɔ ɔmɛni kemmo ƒui. 4Amu na bɔ́lɛ búsie ɔma kemmo bútánu baƒɔtaadine bani nkya mmɔ. Na ka bɔ́nu-ma ni, búlie-ma kudɔ emeyi maatɛ. Na ka Katɔti Kɔyu kúdie kɔ́tina baƒɔtaadine bamɛni lɛla lɛni mebo Paulo lɛlɔ ni, ama bálɛ Paulo banii ɔsɔ utesie Yerusalem. 5Amu na uwi ɔni na búlie-ma kudɔ bɔ́wɔlɔ na búsela ni, baƒɔtaadine bamɛni ku bana beleku ku bebi ƒui béti-bu bétésie ɛpu kɔtu, na bula ƒui bɔ́lɛ akɔnkɔ na bɔ́kpali katɔ. 6Amu na bɔ́kada lɛlɔ na bɔ́gyu bútéduo ɔkɔlɔ kemmo, na ama lɛnɔ bénwini bésie bana kɔduli.

7Amu ka bɔ́ta Tiro ni, bútédi búnye Ptolemai. Mmɔ na bútégyele baƒɔtaadine bani nkya mmɔ, na búlie-ma kudɔ limeyi linwi. 8Amu ka kadi kégye ni, bɔ́ta mmɔ búsie Kaesarea. Na bútéduo Litemi Buni Lɛsa Ɔkɔne Ƒilipo kesii. Anwu ndi bebunkune maatɛ bani na bédie na Yerusalem akɔ unwi. 9Na ubo bebi begblebi ine bani neeelie agya na badi Katɔti kenye bediene.

10Amu na búlie mmɔ emeyi pii adi. Na uwi ɔni na bɔkya mmɔ ni, Katɔti kenye udiene ɔdi ɔni baalɔ Agabo ɔ́si Yudea úbo mmɔ. 11Amu ka úbo-bu kudɔ ni, ɔ́ƒɛnimi kabuli kani nda Paulo kavobi na únyimi anwu ɔlati enu ku lɛgba na ɔ́su ɔnini, “Katɔti Kɔyu kɔɔsu ka lɛni na Yudaƒuɔ badubunyimi ukyuli ɔni mbo kabuli kamɛni na Yerusalem na beti-nwu bakya ama bani naaadi Yudaƒuɔ lɛlɔ badine enu kemmo.”

12Amu ka búnu etemila amɛni ni, abu ku bekyuli bani nkya mmɔ ƒui búvele Paulo bɔnii utesie Yerusalem. 13Mmɔ na ɔ́su-bu ɔnini, “Bi ɔsu na biiwulo na bɛɛƒɛ-mi enu lɛni? Ami lɛ́tuna ka benyimi-mi na Yerusalem, na likpi lite Blɔti Yesu lɛnyi.” 14Amu na uwi ɔni na bɔ́nu bɔ́ti ka bulakana-nwu kasusu bunwini ni, bɔ́da-nwu bɔ́nyonu na bɔ́su bɔnini, “Babla Unwoti lɛƒɔyɔ.”

15Amu na emeyi adi kama ni, bɔ́sala bula ala ƒui lisu na bɔ́tɔlɔ búsie Yerusalem. 16Na Kaesarea baƒɔtaadine badi básiaku-bu. Na bákpanku Kiproni unengu ɔni baalɔ banii Mnason bada banii butéduo-nwu kudɔ na mmɔ. Na unengu ɔmɛni ɔdi ɔƒɔtaadine ɔ́si kukuuku. 17Amu ka búduo Yerusalem ni, baƒɔtaadine bani nkya mmɔ báƒɔ-bu kaduɛ.

Paulo Úsie Útánu Yakobo

18Na ka kadi kégye ni, Paulo útiku-bu na búsie bútánu Yakobo ku Yerusalem baƒɔtaadine benengu. 19Na ka búgyele-ma bɔ́wɔlɔ ni, Paulo ɔ́su-ma ala ani ƒui na Katɔti ɔ́bla ɔ́kɛnku-nwu lɛlɔ na bekyuli bani naaadi Yudaƒuɔ akɔ.

20Ɔmɛni ɔsu ni, bana ƒui bémwi Blɔti. Amu na básu-nwu banini, “Ɔnwa ɔyɔne, agyi lɛla lɛni nálɛ Yerusalem mɛni. Yudaƒuɔ mpim mpim badi bakya bani náƒɔ bádi na bada Mose ɔda bubo bɔmmɔ kpakplaa. 21Badi básu-ma ka awɔ nátina Yudaƒuɔ bani nkya ekpo ekpo anii batasiaku Mose ɔda bubo ku bula ɔdi bɔbla kama, na ásu lɛnɔ ka betekulo bana bebi ago lɛnɔ. 22Ɔmɛni ɔsu bi na ɔlɛka bɔbla ɔƒaani? Bɔgyi ka badubutiku lɛlɔ na bebo. Ɔsika badubunu ka ébo-bu kudɔ mɛni.”

23Amu na béte-nwu kasusu kadi banini, “Bubo nkyuli ine badi na bula ɔma mɛni, bani nése kenye. 24Ti-ma sienku Yudaƒuɔ kakpakɔ mmɔ na ebunku-ma na bana lili bukpeyi kayu bɔƒɔ. Ɔmɛni ndubɔya na ukyuli biala ɔnu ka ɔkɔ na bányi básia-a, na awɔ lɛnɔ ada Mose ɔda bubo bɔmmɔ kaduɛ. 25Na ama bani naaadi Yudaƒuɔ na bénwini baƒɔtaadine ni, búnweni-ma ɔku na bɔ́su-ma ka ni, bada ala ani na béti bákpa béte baƒiɔ bɔdi baya ku ubugya bɔni baya, na batakun bebuo bani na bélii-ma amɔ bádu, na batadi kɔsɔnɔ.”

26Anwuɔsu ka kadi kégye ni, Paulo útiku banana bammɔ na bésie batábla lɛlɔ buveli ɔdi ɔmmɔ. Nwuna kama úsie Yudaƒuɔ kakpakɔ na útéte bakpane bɔti emeyi ani kama asa na lɛlɔ buveli ɔdi ɔmmɔ webo kawɔlɔkɔ kalɛ na beti etela beboku na babla akpala na bana lili.

Béƒie Paulo Na Yudaƒuɔ Kakpakɔ

27Amu ka kébu blii na emeyi maatɛ ammɔ edu ni, Yudaƒuɔ badi bási Asia kalɛkɛ bábanu Paulo na Yudaƒuɔ kakpakɔ mmɔ. Amu na bátásala bekyuli badi lisu na bétéƒie-nwu. 28Na bákya baava taasu banini, “Israelƒuɔ banana, bibebunku-bu o-o! Ɔnana ɔmɛni nkɛ mɔɔsu bekyuli ƒui taavi na kesi kesii ku mɛni lɛnɔ ɔnii batadi bula Yudaƒuɔ ɔda bubo lɛlɔ. Na lɛnɔ ni, uuti Grikiƒuɔ teeduoku Yudaƒuɔ kakpakɔ ɔni mɔɔtina ka bula Yudaƒuɔ kakpakɔ kammɔ keesé lɛlɔ!” 29Básu lɛni ɔsika uwi ɔdi kemmo ni, bánu ka Paulo ku Troƒimo ɔni ndi Eƒesoni bakɛ na Yerusalem. Anwuɔsu bákali banii útiku-nwu úsienku Yudaƒuɔ kakpakɔ mmɔ.

30Amu na bɔva bɔmmɔ ɔsu ni, bekyuli ƒui béƒu na báta ku lɛsɛ na békeli bátása kakpakɔ mmɔ. Badi báni Paulo bálɛku kakpakɔ na bákalɛ kɔyakun ƒui. 31Amu uwi ɔni na báwia ka badu-nwu ni, Romaƒuɔ bekpone unengu ɔdi únu ka Yerusalemƒuɔ ƒui báta baakya lɛsɛ. 32Kɔnakunwi ni, útiku bekpone badi na bésie lɛsɛ kanikɔ mmɔ. Amu ka lɛsɛ bakyane bammɔ bánu bekpone bamɛni ni, báda Paulo bubo báya.

33Mmɔ kani na bekpone bamɛni unengu ɔ́ya na béƒie Paulo na béti kɔgba inyɔ bébo báda-nwu. Amu na úye únu ukyuli ɔni na ɔnana ɔmmɔ ɔdi ku lɛla lɛni na ɔ́bla. 34Amu na bekyuli bamɛni kemmo ɔdi biala ɔɔsu litemi bamba. Na ka bekpone unengu ɔmɛni ulenu litemi ƒeelee lɛdi ulasiku-ma kudɔ ɔsu ni, ɔ́ya béti Paulo batákya bekpone ɔtɔ kemmo. 35-36Amu ka bédu kayakun kakɔkɔ ni, úbo úte ka bekpone bamɛni bagyu Paulo basiku mmɔ na lɛnungyie lɛni na otogyi ɔmmɔ úti ɔsiaku Paulo ɔsu. Na bakpɛ-ma kama ku lɛsɛ momoomo na baasu banini, “Bɛyila-nwu udu!”

Paulo Útemi Údie Lɛlɔ

37Nsu uwi ɔni na báwia ka beti-nwu bakya ɔtɔ kemmo ni, Paulo ɔ́su bekpone unengu ɔmɛni ɔnini, “Mɔɔyɔ́ ka lɛtɛmiku-ɔ blii.”

Amu na bekpone unengu ɔmɛni úye-nwu ɔnini, “Bi! Eenú Griki butemi?” 38Na ɔ́sɔ úye-nwu ɔnini, “Ɔɔɔdi awɔ ndi Egyipteni ɔni néti bekyuli badune mpim ine bani náta bénye aban lɛlɔ uyelu ɔdi mɛni, na békeli bésie ketele kemmo?”

39Amu na Paulo údie kenye ɔnini, “Yudani na ndi. Báwɔ-mi na Tarso na Kilikia kalɔ lɛlɔ. Na ɔma ɔmmɔ ni, ɔɔɔdi ɔma ubliidi na ɔdi. Anwuɔsu, buvele, ya na lɛtɛmiku bekyuli bammɔ.”

40Amu na unengu ɔmɛni ɔ́tuna ɔnii Paulo ɔtɛmiku-ma. Na Paulo úbenye kayakun ubili kakɔkɔ mmɔ na ɔ́kɔliku kɔnu katɔ na ɔ́bala bekyuli lisu lɛmɛni. Na ka báda lɛsɛ báya ni, útemi úte-ma na Yudaƒuɔ butemi kemmo ɔnini,

Currently Selected:

Batalane Kabla 21: lef

Highlight

Compare

Copy