Petro 1 4
4
Bilie Ngba Aani Baƒɔtaadine Kalɛ
1Na ɔ́si ɔni na Kristo úbo abi na ɔlɔna kemmo na bula lili ɔsu ni, amii lɛnɔ bɛda lɛlɔ bise na biti kasusu kammɔ udu kani bɛda. Ɔsika ukyuli ɔni muubó abi na ɔlɔna kemmo ni, ɔɔɔda likpidi bɔbla taaya. 2Na si bɛ́da lɛlɔ bíse lɛni ni, ɔdubɔya na bilie ngba ɔ́si ɔƒɛni úsela bitaabla lɛla lɛni mɔɔyɔ́ Katɔti kaƒɔ. Na ɔlɔna kemmo ala asɔ alátaada-mii ɔkwɛ. 3Bɛya na kalɛ na bílie ngba bítaabla ala ekpidi uwi pii ɔni návi ɔwɔ ɔƒɛni. Bɛ́bla likyulikpi ku lɛyalɛ, na bítaani ntɛ teekpi. Bɛ́kpa baƒiɔ bɛ́vili ntu, na bɛ́di kɔkpana kukpidi, na bɛ́bla ala ekpidi lidu lidu aani bekyuli bani naaasiaku Katɔti.
4Na ka bɛsɔ biláblaku-ma unwi na bitaabla ala ammɔ udu ɔsu ni, ɔ́bla-ma kalɛ kadi! Anwuɔsu na beetemi teewi-mii lɛlɔ. 5Nsu badubudie lɛlɔ kenye na Katɔti ɔni ndubɔtɛku ngba beliene ku bekpine ƒui litemi anumi na ala ammɔ lɛlɔ. 6Ɔsika ɔmɛni ɔsu na Yesu Kristo ɔ́kɔ litemi buni lɛmmɔ lɛsa úte bekyuli bani nékpi lɛnɔ. Katɔti úti kukpi ɔ́ni-ma kɔtu aani kalɛ na ɔdubɔlɛku bekyuli ƒui. Nsu Yesu Kristo ɔ́kɔ litemi buni lɛmmɔ lɛsa úte-ma kalɛ na baƒɔ-ni na bakɛ kɔyu kemmo ngba aani kalɛ na Katɔti ɔɔwia.
Ɔlɛka Baƒɔtaadine Ƒui Buteebunku Lɛlɔ
7Kawɔlɔkɔ kammɔ kéede. Anwuɔsu bɛya na ukyuli biala kasusu kemmo kabla nwaa, na ɔda lɛlɔ use utaakpali katɔ. 8Na ɔni ntulo ƒui ni, bitaayɔ lɛlɔ ku kaƒɔ nwaa. Ɔsika si bɛɛyɔ́ lɛlɔ ni, bɛsɔ bilátaanu bina banwa ekpidi pii. 9Bɛbla lɛƒɔ bite bina bakpana na bɛƒɔ-ma na beduo-mii kudɔ ƒaa na bitakyaku-ma unyeƒi. 10Katɔti úte-ma etela lidu lidu na ukyuli biala ɔda nwuna lɛdi kaduɛ na uti ubunku nwuna bakpana ƒui. 11Lɛsa ɔkɔne biala ni, utaakɔ Katɔti litemi buni lɛmmɔ lɛsa. Na ukyuli ɔni muubunku bekyuli ni, uti ɔyikun ɔni na Katɔti úte-nwu ƒui uteebunku-ma. Na bekyuli basia Yesu Kristo lɛlɔ bemwi Katɔti na ulu biala lɛlɔ. Bumwi ku ɔyikun ɔdi Yesu Kristo ɔdi uwi ƒui. Ɔsia lɛni.
Biibó Abi Aani Kristo Kalɛ
12Banwa bayɔne, abi kpakplaa ani na biibó mɛni ni, anya ndubɔya na bɛkana binye kpakplaa. Na utabla-mii kalɛ kadi ka lɛla lɛni nétebo tɔ dii mɔɔlɛ́ku-mii. 13Mmomu ni, bɛya na lɛlɔ litaayɔ-mii ka amii lɛnɔ biibó abi aani Kristo kalɛ. Ɔsika ebiti adubɔda-mii na lɛlɔ lɛyɔ-mii geen uwi ɔni na wasɔ webo na nwuna bukeye bonwu kemmo.
14Lɛlɔ litaayɔ-mii si bekyuli beedumi-mii ka bɛsiaku Kristo ɔsu. Ɔsika Katɔti Kɔyu nsiaku-mii ku nwuna bukeye. 15Bitaya na bina kemmo ɔdi ubo abi aani bekyuli ɔdune iye uyune, iye likpidi ɔblane, iye ukyuli ɔni neeete bekyuli bɔnwuna kalɛ. 16Nsu ni, si eebó abi ka adi ɔƒɔtaadine ɔsu ni, taya na kɔƒa kukpo-ɔ. Mmomu gya Katɔti enu ka akya nwuna badi akɔ ɔsu. 17Litemi bɔtɛ limeyi lɛmmɔ líide, na Katɔti ɔdubɔka nwuna bekyuli litemi bɔtɛku. Na si abu nwuna bekyuli lɛlɔ na wese kalɔ lɛni ni, dɛ na ɔdubɔwɔlɔku bekyuli bani na bétemonku nwuna litemi buni lɛmmɔ bɔƒɔ bɔdi. 18Bénweni na Bunweni Kedee Ɔku kemmo banii,
“Si ɔdubɔyu bekyuli babuni muedi
ɔkplu geen asa na Katɔti waƒɔ-ma ni,
bi malɛku ala ekpidi bablane ama?”
19Anwuɔsu ni, bɛya na bekyuli bani muubó abi kalɛ na Katɔti uute kuƒi beti bana ayu bakya bana Ɔƒɔne ɔni mɔɔdi nwuna linyese lɛlɔ uwi ƒui lɛkɔkɔ.
Currently Selected:
Petro 1 4: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
