Yohane 1 2
2
Yesu Kristo Unye-bu Kenye Uuvele Katɔti Teete-bu
1Mina bebi bayɔne, muunweni ɔmɛni lite-mii kalɛ na bilabla ekpidi. Nsu si ɔdi ɔ́bla likpidi lɛdi ni, bubo ukyuli ɔni nnye-bu kenye uuvele Katɔti teete-bu. Na anwu ndi Yesu Kristo ɔni nse siin. 2Na Kristo ɔmmɔ ɔlati úti nwuna ngba ɔ́kpa na bula lili, kalɛ na ɔklibi abu ku Katɔti ntɛ. Nsu ɔɔɔdi abu lɛti ekpidi lili, mmomu ku bayawine ƒui ekpidi lili.
3Si bɔɔdi Katɔti ɔda bubo lɛlɔ ni, bɔgyi nwaa ka bɔ́ti-nwu. 4Si ɔdi ɔ́su ɔnii, “Ngyi-nwu,” nsu uládi nwuna etemila lɛlɔ ni, ukyuli ɔmmɔ ɔɔnyi ɔkɔ. Na litemi geen lɛmmɔ lítaƒɔ-nwu lɛlɔ kemmo. 5Nsu ukyuli ɔni mɔɔdi nwuna litemi lɛlɔ ni, bɔyɔ bɔni na ubo ute Katɔti búdu bɔ́wɔlɔ. Bɛya na lɛsu-mii kalɛ na bɔɔnu taati ka buliku Katɔti. 6Ukyuli ɔni mɔɔsu ɔnii uliku Katɔti ni, ɔlɛka ulie ngba aani kalɛ na Yesu Kristo úlie.
Bilie Ngba Na Bukeye Kemmo
7Mina bayɔne, ɔɔɔdi ɔda bubo bɔwɔdi na muunweni lite-mii. Mmomu ɔdi bɔni na bɛ́ƒɔ bɛ́si kalɔ kesekɔ. Ɔda bubo bɔkukudi bɔmɛni ndi lɛla lɛni na bɛ́ka bunu. 8Nsu ɔda bubo bɔni na muunweni lite-mii ɔƒɛni ni, bɔmu bɔdi bɔwɔdi. Na ɔkɛnku Kristo ku amii lɛnɔ lɛlɔ ni, bekyuli badubɔnu bati litemi geen lɛni nkya ɔda bubo bɔmmɔ kemmo. Ɔsika kayawi kamɛni lɛdisa uwi ɔdaku bɔvi, na litemi geen bukeye bɔmmɔ búuse kalɔ bɔdaku bukeye.
9Na ukyuli biala ɔni masu ɔnii ɔkya bukeye kemmo nsu uukisi nwuna ɔƒɔtaadine ɔkpana ni, ɔmu ɔkya lɛdisa kemmo. 10Na ukyuli biala ɔni mɔɔyɔ́ ɔƒɔtaadine ɔkpana ni, uli ngba na bukeye kemmo, na lɛla lɛdi liiibo-nwu lɛlɔ lɛni maya na weduo likpidi kemmo. 11Nsu ukyuli ɔni muukisi ɔƒɔtaadine ɔkpana ni, ɔkya lɛdisa kemmo ku nwuna ablala ƒui. Na ɔɔɔgyi likpo lɛni na úsela, ɔsika lɛdisa ablala ammɔ áya na use aani ɔnumbwɛne.
12Mina bebi bayɔne,
muunweni-mii ɔmɛni ɔsika mɔɔwia ka bɛti ka
Katɔti úti bina ekpidi ɔ́kyiɛ-mii na Yesu Kristo ɔsu.
13Na amii bati ni,
muunweni-mii ɔmɛni ɔsika mɔɔwia ka bɛti ka
bɛgyi Kristo ɔni nkya ɔ́si kayawi kalɔ kesekɔ.
Na amii bakloƒu ni,
muunweni-mii ɔmɛni ɔsika mɔɔwia ka
bɛti ka bɛ́di ukisine ɔmmɔ lɛlɔ.
Na amii, mina bebi bayɔne ni,
muunweni-mii ɔku ɔmɛni
ɔsika bɛ́ɛti Katɔti.
14Amii bebi bati ni,
muunweni-mii ɔku ɔmɛni
ɔsika bɛgyi Kristo ɔni nkya
ɔ́si kayawi kalɔ kesekɔ.
Na amii bakloƒu ni,
muunweni-mii ɔku ɔmɛni
ɔsika bibo ɔyikun
na Katɔti litemi lɛmmɔ
lɛ́ƒɔ-mii lɛlɔ kemmo,
na bɛ́ɛdi ukisine ɔmmɔ lɛlɔ.
15Bitayɔ kayawi ku kana lɛlɔ ala ani náta énye Katɔti lɛlɔ. Ɔsika ukyuli ɔni mɔɔyɔ́ kayawi lɛni ni, ulayɔ Katɔti geen. 16Ɔsika ala amɛni udu ani nkya kayawi ni, átasi Katɔti kudɔ. Adi ala ani mɔɔda bula likyulikpi ɔlɔna ɔmɛni ɔkwɛ, ku adikpi bɔdi ala ani na bɔɔnu na aada-bu ɔkwɛ, ku kayawi ala ani kemmo na ukyuli ɔɔkun lɛmɛnɛ. Ana akɔ lɛla lɛdi lítasi Katɔti kudɔ. Mmomu kayawi udunkpi kemmo na ana ƒui aasí. 17Kayawi ku kana lɛlɔ ɔkwɛ adala ƒui adaku bɔvi. Nsu ukyuli ɔni mɔɔbla Katɔti lɛƒɔyɔ ni, ɔdubulie ngba ku Katɔti uwi ƒui.
Bina Ƒui Bɛgyi Katɔti Litemi Geen
18Mina bebi bayɔne, mɔɔsu-mii nnii kayawi kadaku kawɔlɔkɔ budu. Na aani kalɛ na bínu ka Kristo ukisine ɔmmɔ ɔdububo ni, ɔƒɛni muedi Kristo bekisine pii béebo bakya. Na ɔmmɔ ndi kalɛ na búti bɔ́ti ka kayawi kawɔlɔkɔ kammɔ kéede. 19Na bekyuli bamɛni bálɛ bula lɛkpa lɛmɛni kemmo, ɔsika baaadi bula badi. Na si bula bekyuli na badi ni, nka bamu bakya-bu akɔ. Nsu bana bɔtɔlɔ bɔmmɔ bɔ́tina geen ka bana akɔ ɔdi biala ɔɔɔdi bula badi.
20Nsu amii ni, Kristo ɔ́ya na nwuna Kɔyu kɔ́ƒɔ-mii lɛlɔ kemmo, na bina ƒui bɛgyi Katɔti litemi geen. 21Ńtenweni-mii ɔmɛni ka bɛɛɛgyi litemi geen lɛmmɔ ɔsu, mmomu ka bɛgyi-ni ɔsu. Na bɛgyi lɛnɔ ka ɔkɔ ɔdi ulasi litemi geen lɛmmɔ kemmo.
22Na ɔma ndi ɔkɔ ɔnyine? Ɔkɔ ɔnyine ɔmmɔ ndi ukyuli ɔni muuní ka Yesu ndi Ukyuli Ɔƒunadi ɔmmɔ. Ukyuli ɔmmɔ udu ndi ukisine ute Kristo. Na ukyuli ɔmmɔ úni Katɔti ku Ubidi ɔmmɔ ƒui. 23Na ukyuli ɔni muuní Ubi ɔmɛni taasu ka ɔɔɔdi Katɔti Ubidi ni, anwu ku Katɔti beeebo kɔna. Na ukyuli ɔni muudie kenye taasu ka ɔ́ƒɔ Ubi ni, ɔ́ƒɔ Katɔti lɛnɔ.
24Bɛnu kaduɛ na bɛya na ala ani na bínu ɔ́si kalɔ kesekɔ mmɔ áƒɔ-mii lɛlɔ kemmo ƒui. Na si bɛda-nya kaduɛ ni, bɛdubulieku Ubidi ku Ɔti ɔmmɔ ƒui uwi biala. 25Na ngba bɔni naaadubo bɔsa ndi kenye kani na Kristo úse úte-bu.
26Bekyuli bani mɔɔkya ɔkplu ka batɔlɔ-mii ɔsu na muunweni-mii ɔmɛni. 27Nsu amii ni, Kristo Kɔyu kɔ́ƒɔ-mii lɛlɔ kemmo, na Kɔyu kɔmɛni kɔmu kɔkya-mii lɛlɔ kemmo. Anwuɔsu ni, bɛsɔ biláwia ka ukyuli ɔdi ɔsɔ ɔtina-mii ala adi lɛnɔ. Ɔsika nwuna Kɔyu kɔɔtina-mii ala amɛni ƒui. Na ala ani na kɔɔtina adi litemi geen lɛmmɔ, na ɔɔɔdi ɔkɔ. Anwuɔsu biliku Kristo aani kalɛ na Kɔyu kɔmmɔ kɔ́tina-mii.
28Mina bebi bayɔne, biliku Kristo kalɛ na si uwi ɔni na ɔ́da ɔ́lɛ ni, bɔdubɔkana na bunye-nwu anumi ku kaƒɔ ƒaa na kɔƒa kulékpo-bu limeyi lɛmmɔ lɛlɔ. 29Si bɛgyi ka Kristo use siin ni, ɔlɛka bɛti ka ukyuli ɔni mɔɔbla ala ani nse siin ni, ɔdi Katɔti ubidi aani Kristo kalɛ.
Currently Selected:
Yohane 1 2: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
