Hibulu 1

Hibulu

Gode da Eagofe Asunasiba:le, Ea Sia: Olelei

1Musa: hemonega Gode da eso bagohame amola hou bagohame, amoga Ea balofede dunu ilia lafidili Ea Sia: olelesu. 2Be wali, soge wadela:mu eso da gadeneiba:le, E da Eagofe asunasili, Ea Sia:dafa ninima olelei dagoi. Gode da Eagofe Ea loboga osobo bagade, mu amola liligi huluane hahamoi. Gode da Eagofe amo soge wadela:mu eso doaga:sea, liligi huluane gaguma:ne, Ema ilegei dagoi. 3Yesu Gelesu da Gode Ea hadigi defele hadigi gala. E da Gode defele esala. E da Ea sia:ga, osobo bagade, mu amola liligi huluane, amo mae muguluma:ne gagulaligisa. Ea hawa: hamobeba:le, osobo bagade dunuma ima:ne gogolema:ne olofosu lai dagoiba:le, E da Hebene ganodini Gode, Hina Gasa Bagadedafa, amo Ea afodafa dafulili fi dagoi.

Gode Eagofe da Gasa Bagade

4Gode da Eagofe Ema Dio amo da a:igele dunu huluane ilia dio baligi, asuli. Amo defele, Gode Eagofe Ea hou da a:igele dunu ilia hou baligisa. 5#1:5 Gesami Hea:su 2:7; 2 Sa:miuele 7:14; 1 Hou Olelesu 17:13Gode da a:igele dunu ilima amane hame sia:i,

“Di da Nagofe.

Na da wali eso Dia Ada hamoi.”

Amola a:igele dunu Ea hou olelema:ne, Gode da amane hame sia:i,

“Na da Ea Ada esalumu.

E da Nagofe esalumu.”

6 # 1:6 Mousese ea Malasu 32:43 Be Gode da Ea magobo Manodafa osobo bagadega asunasimusa: dawa:loba, E amane sia:i,

“Gode Ea a:igele dunu huluane da Nagofe Ema nodone sia:ne gadoma:mu!”

7 # 1:7 Gesami Hea:su 104:4 Gode da a:igele dunu ilia hou olelema:ne, amane sia:i,

“Gode da Ea a:igele dunu fo agoane hamosa.

E da Ea hawa: hamosu dunu ili lalu gona:su agoane hamosa.”

8 # 1:8 Gesami Hea:su 45:6-7 Be Gode da Egefedafa, amo Ea hou olelema:ne, amane sia:i,

“Gode! Dia Hinadafa Hou da eso huluane dialalalumu.

Di da moloidafa Dia fi dunu ouligilalumu.

9Di da moloidafa hou amoma asigisa, amola wadela:i hou higasa.

Amaiba:le, Gode, amo Dia Gode, da Di ilegele,

Dia na:iyado dunu ili baligimusa:,

Dima hahawane baligili bagade sogebi ia dagoi.”

10 # 1:10 Gesami Hea:su 102:25-27 Gode da eno amane sia:i.

“Hina Gode! Di da bisi eso amoga osobo bagade hahamoi.

Disu Dia loboga mu hahamoi.

11Osobo bagade amola mu da mugululi hamedafa ba:mu.

Be Di da eso huluane esalalalumu.

Ilia da hea abula agoane nuini abubula masunu.

12Dia da ili abula agoane selefamu.

Ilia da abula agoane hea fadegale, gaheabolo sali dagoi ba:mu.

Be Di da afadenemu hame dawa:.

Di da eso huluane mae bogole, esalalalumu.”

13 # 1:13 Gesami Hea:su 110:1 Gode da a:igele dunuma amane hamedafa sia:i,

“Dia Na afodafa dafulili fima, amogainini Na da Di osa:le heda:musa:,

Dia ha lai dunu Dia emo haguduga ligisimu.”

14Amaiba:le, a:igele dunu ilia hou da adi houla:? Ilia da Gode Ea fidisu hawa: hamosu a:silibu. Gode da Ea gaga:su lamu dunu amo fidima:ne, a:igele dunu asuna ahoa.

Currently Selected:

Hibulu 1: BEO

Highlight

Compare

Copy