Wloma 3
3
1Nɛ̀ɛ̍, dɛ̍ ɛ̍ mu̍-o nyɔ̍ po̍ ɔ̍ Juu jǔ nu̍ tìh ɛ̀ sìì ùh se̍-a Juu nyɔ̍ ɛ? Nɛ̀ plɔ̀n gbǎ-a chɛ̀ dɛ̍ ɛ̍ gbǎ kɛ̍n ɛ? 2Ɛ̍ gbǎ dɛ̍kɛ̍n kaa̍ dǒ dɛ̍ᵻ kli̍hgbɛ̍ we̍. Sàǐtòò dɛ̍-ɛ, dě Juu nyɔ̍ ja̍a̍ bo Nyɔsoa-a tu̍owli jii. 3Nɛ̀ pò u̍h-a nyɔ̍ duuh ja u̍h-a wlu̍ kɛ̍n gblìh-ɛ, nɛ̀ dɛ̍ ɛ̍ mu̍ nu̍ ɛ? Ɛ̍ bo ɛ̀ mu̍ ɛ̍ nu̍ wɛ̀ Nyɔsoa iě ɔ̍ naɛ wlu̍ kɛ̍n gblìh ke ae? 4Iěe tììh, pò nyɔ̍ kli̍hgbɛ̍-a jɛ ja si̍h tmɔ̌-ɛ, Nyɔsoa nɔ̀ɔ̍ ɔ̍ kɔn ɔ̍ iě tìh-a taǐn nyɔ̍ nu̍ kleǐn. Ɛ̍ kɔn ɛ̍ chlǐh-ɛ dě ɔ̍ wlu̍ di̍i̍, ɛ̍ la̍a̍,
“Àn wlu̍ kɔn ɛ̍ iě ɛ̍ to ka ìn slɛ̌-a i̍-ɛ,
wɛ̀ ìè kɛ̀n gba̍ dǒ sàwi̍h sì la̍.”
5Jɛ pò à kà gblɛ̍n sà Nyɔsoa-a i̍ slɛ̌-ɛ tà te̍gbe̍i̍n-ɛ, nɛ̀ ka à mu̍ dǎ ɛ? Jlu̍h Nyɔsoa gbǎ-ɛa àɔ̀-ɛ, ɛ̍ se̍ i̍ slɛ̌ ae? (Ǎn wlu-i kmɔ̌ nyɔ̍-a flɔ̍nwlùh-u.) 6Iěe tììh, pò Nyɔsoa se̍ i̍ slɛ̌ de-ɛ, nɛ̀ ka ɔ̍ mu̍ kmɔ̌ la ɛ̍ sàwi̍h sì-ɛ nu̍ ɛ?
7Jɛ nyɔ̍-a mu̍ ka dǎ, “Ǎn wlu̍ kɛ̍n gblìh-ɛ bo ɛ̀ to ɛ̍ ka Nyɔsoa nu̍-a tìh-a taǐn wɛ̀ ɔ̍ tìh-a i̍ bɛ̌-ɛ dǔ-a kɛ̍n gbǎ-aɛ. Nɛ̀ dɛ̍ bo ɛ̀ mu̍ ǐn kɛ̀n sà ke̍ dǒ ǎn gblɛ̍n sɔ̀ɛ̀n we̍ ɛ? 8Nɛ̀ dɛ̍nu̍ à-a nu̍ dɛ̍ sɔ̀n wɛ̀ dɛ̍ chɛ̀ iě ji̍ ɛ?” Nyɔ̍ ùh-a tè-a à tìh dlǔ i̍ ùh-a kɔ̌-ɛa à nynɛ̌-ɛ, u̍h la̍ kǎ à dǎ. U̍h nɔ̀ɔ̍ ɛ̍ slɛ̌ i̍ u̍h iě kɛ̀n sà-ɛɛ.
I̍-i slɛ̌-nyɔ̍ se̍ nɛ
9Nɛ̀ kaka la̍, àɔ̀ Juu nyɔ̍ à gbǎ dɛ̍kɛ̍n à sìì ùh se̍-a Juu nyɔ̍-ɛ ae? Iěe tììh, ɛ̍ nɔ̀ɔ̍ à chɛ̍n ɛ̍ i̍ wɛ̀ se̍e̍. À la̍ Juu nyɔ̍ ke nyɔ̍ ùh se̍-a Juu nyɔ̍-ɛ gblɛ̍n sɔ̀ɛ̀n kɔn u̍h wlu̍ i̍. 10Ɛ̍ kɔn Nyɔsoa-a wlu̍ la̍a̍,
“I̍ slɛ̌-nyɔ̍ se̍ nɛ, ɛ̍ se̍ nyɔ̍ due-a chɛ̀ kɔn.
11Dɛ̍ɛ̍ i̍ wɔ̌n nyɔ̍ se̍ nɛ.
Nyɔsoa i̍ pɔ̀n nyɔ̍ se̍ nɛ.
12U̍h poe Nyɔsoa kɛ̍n i̍ kli̍hgbɛ̍,
u̍h kli̍hgbɛ̍ sì dɛ̍ i̍.
Dɛ̍ chɛ̀ nu̍ nyɔ̍ se̍ nɛ, ɛ̍ se̍ nyɔ̍ due-a chɛ̀ kɔn.
13U̍h-a wɔ̍i̍n wlu̍ wɔ̀ gbà-a plu̍h.
Nyɔ̍ i̍ boe-ɛ jǐ dǒ u̍h mɛɔ kɛ̍n.
U̍h-a wɔ̍n blě chɛ̌n-nǐ ka sɛ̍-ɛ.
14Nyɔ̍-ɔ nyɛ̌ wlu̍ ke nyɔ̍ wlu̍we̍i̍ po̍-ɛ jǐ dě u̍h wɔ̍ɔ̍n.
15U̍h-a sɔ̍n fěle kwa̍ dǒ nymɔ̍ i̍ wlǎ-a we̍.
16Dɛ̍-ɛ gbɔ̀lɔ-ɛ ke nyɔ̍ jua̍i̍ sàɛ̀ bo u̍h-a na-ɛ.
17Dɛ̍ ɛ̀ ja-a kmɔ̌ i̍ gbe̍ɛ̍ɛn, u̍h se̍ ɛ̍ wìè juo.
18U̍h-a jlǐh se̍-e Nyɔsoa-a faɔn ple̍ dɛ we̍ nɛ.”
19Kaka la̍ à juo ɛ̍-ɛ, dɛ̍ ɛ̀ Nyɔsoa-a telě sà-aɛ, nɛ̀ ɛ̍ sà ɛ̍-ɛ dǒ nyɔ̍ ùh nɛ-a dǒ ɛ̍ sɔ̀n-ɛ we̍. Wɛ̀ ɛ̍ iě wɔ̍nᵻ kli̍hgbɛ̍ ka̍n, iě kmɔ̌ kli̍hgbɛ̍ iě sàwi̍h sì dǒ Nyɔsoa jǔ. 20Ɛ̍ tìh-ɛ, telě i̍ tè-ɛ se̍ nyɔ̍ i̍ slɛ̌-ɛ bɛ̌ɛ dě Nyɔsoa jlǐh. Dɛ̍nu̍ɛ, telě nɔ̀ɔ̍, ɛ̍ to-e àɔ̀ sǔh ka à nu̍-a gblɛ̍n sɔ̀ɛ̀n nyɔ̍-ɛ.
Nyɔ̍-a slɛ̌ i̍ dě wlùh gbaɛ blě-ɛ di̍i̍
21Jɛ kaka la̍, i̍ slɛ̌-ɛ ɛ̀ sɔ-a dě Nyɔsoa we̍-ɛ, ɛ̍ wlǔh tà wɛ̀. Ɛ̍ nɛ dǒ ɛ̍ naɛ blǐ dǒ telě we̍. Telě ke Nyɔsoa-a tu̍owli po̍ nyɔ̍ nu̍ ɛ̍ sàànsi̍i̍h. 22Nyɔsoa-a slè-e nyɔ̍ i̍ slɛ̌-nyɔ̍ dě nyɔ̍-a Jusu Klai wlùh gbaɛ di̍i̍. Ɔ̍ nu̍ ɛ̍-ɛ dǒ nyɔ̍ kli̍hgbɛ̍ ùh blě-a wlùh gbaɛ-ɛ we̍, ɔ̍-ɔ chlɛ̌-e nyɔ̍ i̍. 23Dɛ̍nu̍ɛ, nyɔ̍ kli̍hgbɛ̍ nu̍ gblɛ̍n sɔ̀ɛ̀n, iě u̍h ti̍ɛ̍ɛn Nyɔsoa-a tìh-a i̍ bɛ̌-ɛ we̍ i̍. 24Nyɔsoa-a bu̍ɛ̍i̍ blɛ ɔ̍ nu̍-a u̍h pùn-ɛ bo ɛ̀ slɛ̌-ɛ u̍h i̍ dě ɔ̍ jlǐh. Jusu Klai ɔ̀ sà-a u̍h dě kàn kwa̍a̍-a dě ɔ̍ ja̍a̍ bo ɛ̍ jii. 25Nyɔsoa to ɔ̍-ɛ ɔ̍ iě slaǎ sà-ɛɛ, wɛ̀ nyɔ̍ ɔ̀ mu̍-a Jusu wlùh gbaɛ-ɛ ɔ̍ gblɛ̍n sɔ̀ɛ̀n-a tìh iě i̍ tǎli-ɛ. Nyɔsoa to ɔ̍ ɛ̍ iě ɛ̍ to ka ɔ̍ slɛ̌-a i̍-ɛ. Dɛ̍nu̍ɛ, ɔ̍ gbɛ̍n wlùh i̍, ɛ̍ kɔn ɔ̍ se̍ nyɔ̍ɔ kàn gbɛ̍n tɛin dǒ gblɛ̍n sɔ̀ɛ̀n u̍h nu̍-a we̍. 26Nyɔsoa to Jusu wɛ̀ ɔ̍ iě ɛ̍ ti̍laa nyɔ̍ i̍ to ka ɔ̍ chɛ̀ slɛ̌-a i̍ iě nyɔ̍ ùh gbaɛ-a Jusu wlùh-ɛ, ɔ̍ slɛ̌-ɛa u̍h i̍-ɛ.
27Na̍a̍, nɛ̀ dɛ̍ kɔn wɔ̍n à mu̍ ka i̍ po̍ ɛ? Dɛ̍ kɔn tìh à iě-a wɔ̍i̍n po̍-ɛ, ɛ̍ se̍ nɛ. Iě nɛ̀ dɛ̍ kɔn tìh à-a po̍ wɔ̍i̍n ɛ? À tè-o telě i̍ dɛbo ae? Iěe tììh, à gbaɛ Klai wlùh dɛbo. 28Ɛ̍ kɔn à la̍ Nyɔsoa-a slè-e nyɔ̍ i̍ slɛ̌-nyɔ̍ dě nyɔ̍-a wlùh gbaɛ blě-ɛ di̍i̍, ɛ̍ se̍-o nyɔ̍-a telě i̍ tè tìh. 29Nɛ̀ Nyɔsoa-a chɛ̀ la lee̍, Juu nyɔ̍ nɛ due-a Nyɔsoa bo ae? Ɔ̍ se̍ ùh se̍-a Juu nyɔ̍-ɛ u̍h-a Nyɔsoa ke ae? Iěe, ùh se̍-a Juu nyɔ̍-ɛ u̍h-a Nyɔsoa bo ke. 30Nyɔsoa nɛ due gbài̍, ɔ̍-ɔ due laa̍ bo ɔ̀ mu̍ Juu nyɔ̍ i̍ slɛ̌-ɛ dě u̍h-a wlùh gbaɛ blě-ɛ di̍i̍. Ɔ̍ mu̍ ùh se̍-a Juu nyɔ̍-ɛ i̍ slɛ̌-ɛ ke dě u̍h-a wlùh gbaɛ blě-ɛ di̍i̍. 31Nɛ̀ɛ̍, wlùh gbaɛ bo à iě nu̍ la̍ sǔh wɛ̀ à iě telě de̍ po̍ ae? Iěe tììh, wlùh gbaɛ bo à nu̍ wɛ̀ à gbɛ̍n telě i̍ klìmàtàìn.
Currently Selected:
Wloma 3: KDNT
Highlight
Copy
Compare
Share
Want to have your highlights saved across all your devices? Sign up or sign in
The New Testament in Western Krahn published as KU̍O̍ DELEE © The Bible Society in Liberia, 1999.