Matio 6
6
Jusu po̍ nyɔ̍ nǎ dǒ wlùh nmɔ dɛ we̍
1Ɔ̍ la̍a̍, “Mɔ̀ nu̍ nɛnɛ̌ dǒ dɛ̍ ɛ̀ mɔ̀ kɔn mɔ̀ iě-a nu̍ dě Nyɔsoa dɛ di̍i̍-ɛ we̍, wɛ̀ mɔ̀-ɔ je̍e ɛ̍ gbaɛ̍we̍ tè, nyɔ̍ duuh je̍e ɛ̍ jě. Jɛ pò mɔ̀ nu̍ la̍a̍n-a, nɛ̀ mɔ̀ se̍ dɛ̍ jě mu̍ dě mɔ̀ Baa Nyɔsoa nɛ-a dě ja̍i̍wlɔ̀-ɛ kwa̍a̍.
2“Ɛ̍ tìh-ɛ, pò ìn ja wlùh nmɔ-ɛ, nɛ̀ ìn bɔ̌ ɛ̍ gbaɛ̍we̍ tè-ɛ. Nyɔ̍ ùh nɛ-a mɛɔ sɔɔ̌n wɔ̍ɔ̍n-ɛ, kǎ u̍h-a nu̍ dě wɛɛ sà gbòᵻ sɔ̀n i̍ ke dǒ wlɔ̀gbàɛ̀, wɛ̀ nyɔ̍ɔ iě u̍h tìhwe̍ po̍. Bɔ̌ ǐn sèàɛ̍ mɔ̀ wlùh, nyɔ̍ kaɛn laa̍ nɛ̀ u̍h naɛ dɛ̍ jě ka̍ bo wɛ̀. 3Nɛ̀ pò ìn ja wlùh nmɔ-ɛ, dɛ̍ àn di̍na̍ sɔ̍n-a nu̍-aɛ, àn kwe̍na̍ sɔ̍n-a chɛ̀ bɔ̌ ɛ̍ juo-ɛ. 4Ɛ̍ tìh-ɛ, po̍ àn nu̍-dɛ̍ dě kwile-e. Nɛ̀ ìn Baa Nyɔsoa ɔ̀ jě-a ɛ̍ dě kwile-ɛ, àn mu̍ ɔ̍ dɛ̍ kwa̍a̍ jě.”
Jusu toe nyɔ̍ ba̍le-ɛ
(Luu 11.2-4)
5Ɔ̍ la̍a̍, “Pò mɔ̀ ja Nyɔsoa ba̍le-ɛ, nyɔ̍ ùh nɛ-a mɛɔ sɔɔ̌n wɔ̍ɔ̍n-ɛ, mɔ̀ bɔ̌ u̍h we̍ dɛ̍ nu̍-ɛ. U̍h jbɛɛ nyna i̍ dǒ wlɔ̀gbàɛ̀ ke dě wɛɛ sà gbo̍ᵻ sɔ̀n i̍ wɛ̀ ìè ba̍le, wɛ̀ nyɔ̍gbei iě u̍h jě. Tìh-a taǐn ǎn sèàɛ̍ mɔ̀ wlùh, nyɔ̍ kaɛn laa̍ nɛ̀ u̍h naɛ dɛ̍ jě ka̍ bo wɛ̀. 6Jɛ pò ìn ja ba̍le-ɛ, nɛ̀ ìn chɛn gbɔ̍i̍, ìè dě gbòju di̍i̍ pa̍. Nɛ̀ ìn ka̍n-o, wɛ̀ ìè ìn Baa Nyɔsoa ɔ̀ nɛ-a dě kwile-ɛ ba̍le-ɛ dǔ. Nɛ̀ ìn Baa ɔ̀ jě-a m̀ dě kwile-ɛ, àn mu̍ ɔ̍ dɛ̍ kwa̍a̍ jě.
7“Ɛ̍ tìh-ɛ, pò mɔ̀ ja ba̍le-ɛ, mɔ̀ bɔ̌ se̍o̍nɛ dɔu bla̍-a. Nyɔ̍ ùh se̍-a tìh-a taǐn Nyɔsoa juo-ɛ, kǎ u̍h-a nu̍. U̍h jajeɛ̍ pò u̍h wlu dɛ̍ tɔ̀ɔ̀n-ɛ, wɛ̀ Nyɔsoa iě u̍h-a wlu̍ wɔ̌n de. 8Jɛ mɔ̀ bɔ̌ u̍h we̍ dɛ nu̍-ɛ, dɛ̍nu̍ɛ, ìè-a ba̍le la̍ mu̍-ɛ, nɛ̀ ìn Baa Nyɔsoa juo dɛ̍ àn pɔ̀n-a wɛ̀ se̍e̍. 9Kǎ mɔ̀ iě ka ba̍le-ɛ nu̍,
‘À Baa mɔ̀ nɛ-a dě ja̍i̍wlɔ̀-ɛ,
àn nynɛ̌ bo nyɔ̍ iě ja̍ tè.
10Àn kmɔ̌ wlu̍ i̍ kɔn-ɛ iě ji̍.
Àn wlùh dɛ̍ iě nɛ nɔ̌ bloɔ̍, ka ɛ̍ nɛ-a dě ja̍i̍wlɔ̀-ɛ.
11Nyǐ àɔ̀ sèàn weɛ̍-a di̍-dɛ̍.
12Tǎli à gblɛ̍n sɔ̀ɛ̀n-a tìh i̍, ka à nu̍-a gblɛ̍n sɔ̀ɛ̀n nyɔ̍ duuh nu̍-a à pùn-ɛ i̍ tǎli-ɛ.
13Bɔ̌ à blu̍ja̍a̍ gbǎ tìh i̍ wɔ̌ɛn,
jɛ sèìe àɔ̀ dě Nyɔ̍ Sɔ̀n laa̍ kwa̍a̍.
[Nɛ̀ɛ̍, àn kmɔ̌, ɛ̍ ke àn gbǐh, àn tìh-a i̍ bɛ̌-ɛ, mɔ̀ kɔn i̍h nɔ̌ kmɔ̌-a kmɔ̌. Kǎ ɛ̍-ɛ nɛ.]’
14“Gblɛ̍n sɔ̀ɛ̀n nyɔ̍ duuh nu̍-a mɔ̀ pùn-ɛ, pò mɔ̀ tǎli i̍-ɛ, nɛ̀ mɔ̀ Baa nɛ-a dě ja̍i̍wlɔ̀-ɛ, ɔ̍ mu̍ mɔ̀ naɛ-a tìh i̍ tǎli ke. 15Jɛ pò mɔ̀ se̍ nyɔ̍ duuh naɛ gblɛ̍n sɔ̀ɛ̀n-a tìh i̍ tǎli-ɛ, nɛ̀ mɔ̀ Baa se̍ mɔ̀ naɛ-a tìh i̍ tǎli mu̍ ke.”
Kǎ nyɔ̍ iě ka Nyɔsoa dɛ-a jlǔh po̍-ɛ nu̍
16Jusu la̍a̍, “Pò mɔ̀ ja jlǔh po̍ dě Nyɔsoa dɛ di̍i̍-ɛ, mɔ̀ bɔ̌ mɔ̀-a chɛ̀-a pio nu̍-ɛ. Nyɔ̍ ùh nɛ-a mɛɔ sɔɔ̌n wɔ̍ɔ̍n-ɛ, kǎ u̍h-a nu̍ u̍h-a chɛ̀-a pio nu̍-ɛ, wɛ̀ ka u̍h-a po̍-a jlǔh-ɛ nyɔ̍ iě-o dɛ̍ i̍ juo. Bɔ̌ ǐn sèàɛ̍ mɔ̀ wlùh, nɛ̀ u̍h naɛ dɛ̍ jě ka̍ bo wɛ̀. 17Ɛ̍ tìh-ɛ, pò ìn ja jlǔh po̍ dě Nyɔsoa dɛ di̍i̍-ɛ, nɛ̀ ìn dle jua̍i̍ chɛ̀gbɛɛ ìè mǐ ja̍ po̍. 18Wɛ̀ nyɔ̍-ɔ je̍e-o dɛ̍ i̍ juo ka àn po̍-a jlǔh-ɛ. Jɛ ìn Baa Nyɔsoa nɛ-a dě kwile-ɛ bo ɔ̀ iě ɛ̍ i̍ juo. Nɛ̀ ìn Baa ɔ̀ jě-a ɛ̍ dě kwile-ɛ, nɛ̀ ɔ̍ mu̍ àn jě-dɛ̍ m̀ nyǐ.”
Dě Nyɔsoa we̍ bo pàn-a chɛ̀ nɛ
(Luu 12.33-34)
19Ɔ̍ la̍a̍, “Mɔ̀ bɔ̌ pàn-dɛ̍ᵻ nɔ̌ bloɔ̍ i̍ tè-ɛ. Dɛ̍nu̍ɛ, dǐkàsè ke kǐh nɛ-ɔ i̍h-a gbɔ̀lɔ dɛ̍ᵻ i̍. Nɔ̌ jlǐ-nyɔ̍ nɛ ke u̍h-a wa̍ gbòᵻ. 20Dě ja̍i̍wlɔ̀ bo dǐkàsè ke kǐh se̍ nɛ, jlǐ-nyɔ̍ se̍-e nɛ ke u̍h iě gbòᵻ wa̍. Dě-e bo mɔ̀ iě pàn-dɛ̍ᵻ i̍ tè. 21Dɛ̍nu̍ɛ, tà àn pàn-dɛ̍ᵻ nɛ-aɛ, nɛ̀ dě àn wlùh-a mu̍ nɛ ke.”
Jlǐh bo ìh nu̍ ku̍-a sɔ̀npli
(Luu 11.34-36)
22Jusu la̍a̍, “Jlǐh bo ìh nu̍ nape̍ dǒ nyɔ̍-a ku̍ pùn. Ɛ̍ tìh pò àn jlǐh nɛ blee-ɛ, nɛ̀ àn ku̍ kli̍hgbɛ̍-a mu̍ sɔ̀npli nu̍. 23Jɛ pò àn jlǐh se̍ blee nɛ-ɛ, nɛ̀ àn ku̍ kli̍hgbɛ̍-a mu̍ dě kwile-e nɛ. Nɛ̀ pò sɔ̀npli se̍ dě ìn ja̍a̍ nɛ-ɛ, nɛ̀ dě ìn di̍i̍-a mu̍ jlu̍jlu̍ nɛ.”
Jusu la̍ sèò bɔ̌ àɔ̀ nu̍-ɛ
(Luu 16.13; 12.22-31)
24Ɔ̍ la̍a̍, “Mɔ̀-a chɛ̀ juo ɛ̍-ɛ, nyɔ̍ due se̍ dlǔtuᵻ sɔɔ̌n jǔ dbee-ɛ bɛ̌ɛ. Nɛ̀ ɔ̍ mu̍ due faɛn, wɛ̀ ɔ̍ iě due-e jbɛɛ. Nɛ̀ ɔ̍ mu̍ due we̍ fòè ɔ̍ iě-o due i̍ si̍e̍. Kǎ ɛ̍ nɛ, mɔ̀ se̍ wlǐ-i jbɛɛ-ɛ ke Nyɔsoa wɛɛ sà-a tàdùè nui-ɛ bɛ̌ɛ.
25“Ɛ̍ tìh-ɛ, ǎn sèàɛ̍ mɔ̀ wlùh, sèò bɔ̌ mɔ̀ nu̍-ɛ dǒ mɔ̀-a feɛ-a tìh we̍, ɛ̍ ke dɛ̍ mɔ̀-a mu̍-a di̍-ɛ ke, dɛ̍ mɔ̀-a mu̍-a nǎ-ɛ ke dɛ̍ mɔ̀-a mu̍-a dǒ pùn tù-ɛ we̍. Mɔ̀-a feɛ-a chɛ̀ la ɛ̍ se̍ dɛ̍kɛ̍n gbǎ ɛ̍ se̍ di̍-dɛ̍ sìì ae? Iě mɔ̀-a ku̍-a chɛ̀ se̍ dɛ̍kɛ̍n gbǎ ɛ̍ se̍ pùn tù dɛ̍ sìì ke ae? 26Mɔ̀ gbɛ̀n na̍wɛ̍ᵻ la ja̍ mɔ̀ ìè jě. I̍h-i nu̍ klèᵻ, wɛ̀ i̍h iě kɔɔ chɛ̍n, wɛ̀ i̍h iě kɔɔ gbùlòᵻá chɛ̀ blě. Jɛ i̍h bo mɔ̀ Baa Nyɔsoa nɛ-a dě ja̍i̍wlɔ̀-ɛ, ɔ̍ nu̍ ɛ̍ wɛ̀ i̍h-a jě di̍-dɛ̍. Nɛ̀ mɔ̀ɔ̍ juh gbǎ-a dɛ̍kɛ̍n ùh sìì-a na̍wɛ̍ᵻɛ́, nɛ̀ à ji̍ mɔ̀ jě lě. 27Mɔ̀-a nyɔ̍we̍ bo ɔ̀ bɛ̌ɛ ɔ̍ chɛ̀-a wǐh kɛ̍n poe-ɛ dǒ sèò-a sǔh we̍ ɛ?
28“Nɛ̀ pùn tù dɛ̍-a sèò se̍ kɔn ɛ̍ iě mɔ̀ nu̍. Mɔ̀ gbɛ̀n pei-a fɔ̀ài̍n la ja̍ mɔ̀ iě ka i̍h-a nu̍-a ku̍-ɛ jě. I̍h-i nu̍ dbo̍, i̍h wɔ̍-ɔ nu̍ jlii̍ dǒ i̍h-a chɛ̀ we̍ ke. 29Jɛ bɔ̌ ǐn sèàɛ̍ mɔ̀ wlùh, Blǔh Baa Sɔlɔma-a chɛ̀ ɔ̀ blě-a pàn-dɛ̍ᵻ kli̍hgbɛ̍-ɛ, ɔ̍ jlii̍ ɔ̍ pa̍-aɛ, i̍h-a jii̍ nmɔ-ɛ se̍ pei la i̍h-a fɔ̀ài̍n due sìì. 30Pei pò ìh wlǔh sèàn-a nɛ̀ i̍h wlɔ̍-a klàe̍-ɛ, nɛ̀ u̍h fɔ̍n-a i̍h-ɛ, i̍h bo Nyɔsoa-a nu̍ ka pɛ̀ɛ̀-o, jɛ nɛ̀ mɔ̀ɔ̍ bo ɔ̍ se̍ dɛ̍-ɛ pa̍-ɛ mu̍ ae? Dɛ̍nu̍ mɔ̀-a wlùh gbaɛ-ɛ se̍ i̍ ku̍ ka ɛ?
31“Ɛ̍ tìh-ɛ, di̍-dɛ̍ᵻ ke, nǎ-dɛ̍ᵻ ke pùn tù dɛ̍ᵻá sèò bɔ̌ mɔ̀ nu̍-ɛ. 32Nyɔ̍ ùh se̍-a Nyɔsoa juo-ɛ, u̍h bo ìh la i̍h-a sèò-a nu̍. Jɛ mɔ̀ Baa nɛ-a dě ja̍i̍wlɔ̀-ɛ, ɔ̍ juo i̍h ka mɔ̀ kɔn mɔ̀ iě-a ìh kli̍hgbɛ̍ la blě-ɛ. 33Jɛ pɔ̀n Nyɔsoa-a kmɔ̌ wlu̍ i̍ kɔn-ɛ i̍ ke̍ sàǐtòò, ɛ̍ ke dɛ̍ ɔ̍ pɔ̀n-a mɔ̀ iě-a nu̍-ɛ ke. Nɛ̀ ɔ̍ chɛ̀-a mu̍ mɔ̀ ìh kli̍hgbɛ̍ la kwlǎ sà-ɛ. 34Ɛ̍ tìh-ɛ, klàe̍ weɛ̍-a sèò bɔ̌ mɔ̀ nu̍-ɛ. Dɛ̍nu̍ɛ, klàe̍ weɛ̍-a mu̍ sèò blě dǒ ɛ̍ chɛ̀ we̍. Sɔ nɛ̀ bɔ̌ weɛ̍ jɛ-ɛ, ɛ̍ iě ɛ̍ chɛ̀-a wɔ̍ɔ̍n i̍ bɛ̌ɛ blě.”
Currently Selected:
Matio 6: KDNT
Highlight
Share
Copy
Want to have your highlights saved across all your devices? Sign up or sign in
The New Testament in Western Krahn published as KU̍O̍ DELEE © The Bible Society in Liberia, 1999.