I-Roma 10

1Si‐kayon a‐akik shi pamati, say ẃared nemnem ko ni olay, sota maypangkep ni kait kon Hodiyos. Naka ishawshawat so nen Apo Shiyos ey maysedakan ngo ira. 2Waray mapteng mango son si‐kara, ta say ẃared nemnem sha, kowan sha ey mansilbi ira son Apo Shiyos. Nem aliẃen kostoy shaka pansilbi, ta bimaki ira. 3Ta eg sha amtay koston pesing sha say kosto‐an ira nen Apo Shiyos. Say ẃared nemnem sha, kowan sha ey sota pandekara ni mapteng, si‐katoy kosto‐an so ira nen Apo Shiyos, jet si‐katoy shaka pespesing; eg sha i‐onod nodta kowan nen Apo Shiyos ey dag‐en sha koma. 4Sota bilin nen Apo Shiyos nonta bayag da, eg ma mansilbi niman ta binediwan to ni indaw ali nen Cristo; isonga si Cristoy singa engintegan ni sakop nonta sigod ja bilin. Jet niman, emin na memati son si‐kato, kosto‐an nen Apo Shiyos.

5Isonga ẃaray insolat nen Moises nonta bayag da maypangkep nonta toon kowan to ey mengonod nonta bilin nen Apo Shiyos say kosto‐an to; kowan nen Moises ey, “Ampet tongpalen mon emin sota bilin nen Apo Shiyos, asan ka may‐akni ni biyag.” Kowan nen Moises. 6Nem aliẃen sajay i kosto‐an so nen Apo Shiyos so ni too niman, no diket sota pamati to son Cristo. Isonga ẃara pay i inkowan nonta naysolat ey,

“Aliẃen mo nemnemen ja ondaw shi dangit (eg mesepol tep dimespag alis Cristo); 7aliẃen mo nemnemen ja ondaw shima nayshalem ja kawad‐an ni etey (eg mesepol tep nan‐ongal alis Cristo). 8Sota esel nen Apo Shiyos, ẃaren nay‐esop son si‐kam, ẃaren mismo shita nemnem mo, tan shita bongot mo.”

Kowan to, jet sotan na mismon esel to, si‐katoy mika pan‐itoro so ni angken sipa. 9Jet sajay sotan na esel: no ikowan mon mismo, ja eg mo ibaing, ey si Jesus bengat i Apom, tan pati‐en mo ey si Apo Shiyos ket inpan‐ongal to si Jesus, maysedakan ka. 10Ta no mismon si Cristoy ẃared nemnem mo ja pinatim, kosto‐an toka nen Apo Shiyos; jet no mismon pa‐amtam ngo shi eshom i inpamatim, maysedakan ka. 11Jet say kowan nonta naysolat nonta bayag da, kowan to ey, “Sota ira memati son Apo Shiyos, sigoradon metongpal ali sota namnama shen mekaasi‐an.” Kowan nonta naysolat. 12Jet sajay, enshiy nandasinan ni angken sipen too — Hodiyos ono aliẃen Hodiyos. Ta say Apo shen emin, saksakey ja si Cristo, jet si‐katoy emengaasi so ni emin na manbeka son si‐kato, jet sobda pay i toka i‐akan son si‐kara. 13Ta say kowan met laeng nonta naysolat nonta bayag da, kowan to ey, “Angken sipen too ja manbeka ni kaasi son Apo Shiyos, kaasi‐an ton isalakan.”

14Nem eg amta ni too no sipay koston panbeka‐an sha ni kaasi no eg ira nin emati. Jet enshiy pesing shen memati, no eg sha nin itenengan i toro pangkep son Cristo. Jet enshi ngoy pesing shen mengitneng, no enshiy en mengitosho. 15Jet enshi pay i toon en mengitosho, no eg ibetkag nen Apo Shiyos. Nem ẃara met i inbetkag ton en mengitosho. Si‐katoy kaytoshongan nonta naysolat nonta bayag da, ja kowan to ey, “No itenengan tayo diy shanapshap ni katin ira nonta mengitosho ni mapteng nga shamag, kitoka man‐imdeng.” Isonga ẃaray mebedin na memati. 16Nem aliẃen emin na mengitneng so ket, memati ira. Ta sotan met laeng i inpadto nen Isaias nonta bayag da, ja kowan to ey, “Apo, manmanoy ememati nonta intoro mi son si‐kara.” 17Jet niman ma, sota mengitneng ni toro maypangkep son Cristo, si‐kara bengat i mebedin na memati, jet say itenengan sha so, sota ondaw wa en mengitosho son si‐kara.

18Jet say kowan ko, sigod ja intenengan sha met; isonga enshiy pangbal sha ni eg sha pemati‐an so. Ta say kowan nonta naysolat nonta bayag da, kowan to ey, “Angken towen dogad, ẃaray engitneng ni inkowan sha, jet nayẃaris sotan shi intiron dobong.”

19Jet kowan ko pay ey sota ira kait kon Hodiyos, mebedin na ineẃatan sha sota sigod ja banshaan son si‐kara ey sota ira aliẃen Hodiyos et ngo mowan i kaasi‐an nen Apo Shiyos. Ta angken nonta timpo nen Moises nonta bayag da, kowan nen Apo Shiyos ey, “Sota ira toon aliẃen took, ẃaray dag‐en ko son si‐kara, say si‐kayon sigod ja took, ma‐epal kayo son si‐kara. Angken enshiy pamatira, kaasi‐an ko say onbonget kayo.” 20Jet si Isaias nonta bayag da, intoled ton inkowan sota inkowan nen Apo Shiyos ey, “Sota toon aliẃen si‐kak i pangkep shen amta‐en, inamta‐an sha‐ak et ngo mowan, jet sota ira eg manbeka pangkep son si‐kak, si‐kara et ngo mowan i inpa‐amta‐an ko so met laeng maypangkep son si‐kak.” Kowan nen Apo Shiyos maypangkep nonta ira aliẃen Hodiyos. 21Nem no maypangkep nonta ira Hodiyos, kowan nen Apo Shiyos nonta bayag da ey, “Naka ipa‐sas ni olay ey piyan kon on‐oli iray took son si‐kak, nem eg sha kosto, shaka et ipilit i piyan sha.”

Currently Selected:

I-Roma 10: DMP

Highlight

Copy

Compare