1 I-Korinto 11
11
1Si‐kak komay onoran jo tep si Cristoy etod‐an ko.
2Ebadeg i naka pengiredjaw son si‐kayo, ta jowakka nemnemnema ni olay, jet angken pay sota intorok son si‐kayo, si‐katoy joka on‐onora. 3Nem piyan kon eẃatan jo koma ey emin na dag‐en jo, mesepol la na‐olnos. Say pangolo ni emin na daki, si Cristo, jet say pangolo ngo ni bii, sota dakin aseẃa to, jet say pangolo ngo nen Cristo, si Apo Shiyos. 4Isonga no mesa‐nop kayo, i‐nam jo sota joka pesing. Sota ira daleki ja emansheẃat son Apo Shiyos, ono emengitosho, ja nankadogong, singa eg to amten mengiredjaw nonta pangolo ton si Cristo. 5Nem sota bii ja emansheẃat son Apo Shiyos ono emengitosho, ja enshiy ta‐bon ni toktok to, singa eg to amten mengiredjaw ni pangolo ton daki. Enshiy baing to, ja inges to sota biin ekoskosan i toktok to. 6No sota bii ket, eg manta‐bon, pekoskos to et ngoy toktok to. Nem kenshat ta enshiy biin makapiyan nontan na kebebaingan to; isonga mesepol la manta‐bon i bii koma. 7Nem say daki, eg to koma ta‐bonan i toktok to, ta si‐katoy emengitakshel son Apo Shiyos ja Kangeto‐an. No manta‐bon, singa toka ibaba i bakdang to. Sota bii, si‐kato komay manta‐bon ta intorayan nonta daki. 8Ta say daki, nonta pinalsowa nen Apo Shiyos, aliẃen shi bii i edapo‐an to, no diket say bii, edapod daki. 9Say daki, aliẃen na epalsowa ja para kadẃa ni bii, no diket say bii epalsowa ta mesepol i kadẃa ni daki. 10Isonga mesepol la say bii, ta‐bonan shay toktok sha ta say sota ira anghil ja ẃara nodtan ja ekisa‐nop, asen sha ey sota ira bii, amtaren ishayaw sota daki ja pangolo sha. 11Nem say piyan nen Apo Shiyos ja dag‐en nonta toon emati son Cristo, sajay: say bii, eg to koma ikowan ey enshiy bibiyang ni daki son si‐kato; jet say daki ngo, eg to koma ikowan ey enshiy biyang ni bii son si‐kato. 12Ta say bii, edapod daki nonta inkapalsowa to, jet niman say daki emay‐enak ja medepod bii. Jet emin iyay ya banag, edapo so nen Apo Shiyos. 13Nemnem jo kari. Angken si‐kayo, amtayo ey aliẃen anam ni biin mansheẃat son Apo Shiyos no eg manta‐bon. 14Apay aliẃen sigod aya ja kowan tayo ey no enshokey i bowek ni daki ket kabebaing? 15Nem no say bii ket enshokey i bowek to, kayshedjawan to, ta sota bowek to ja enshokey, si‐katoy singa ta‐bon ja in‐akan nen Apo Shiyos.
16Nem no ẃared tan i toka ipilit i kosto to maypangkep niyay, say songbat ko, ampet medeka sota inkowan ko la, ta sajay bengat i mika ipalobos ja apostol ja pesing ni emati son Cristo no mesa‐nop iren manshedjaw. Asan say sakey pay, shi eshom ma dogad ja kawad‐an ni emati, enshiy eshom ma ogadin shaka dag‐a ni shaka panshedjaw son Apo Shiyos.
17Wara pay i naka bedawa son si‐kayo, ta no mesa‐nop kayo kono ja manshedjaw son Apo Shiyos, ngaaw et day toka panbenagi, aliẃen sota mapteng. 18Waray engikowan son si‐kak ey no mesa‐nop kayo kono, kayoka mandilinasin, ja eg kayo man‐i‐inawatan. Jet singa naka pati‐a sota eshom ma kowan sha ali, 19ta kenshat ni si‐katen too ja sajay i medeka. Jet ipalobos nen Apo Shiyos say ma‐on‐an nem sipay emepiyal la emati. 20Say nantongpalan nonta inpandilinasin jo, no mesa‐nop kayon mengan, aliẃen sota penginemneman jo son Apo Jesus i medeka; apil. 21Ta sota eshom kono son si‐kayo, epangdo la ja kinan toy si‐kato, jet sota eshom, na‐agang ja enshi anan, jet sota eshom pay kono, na‐aminan. 22Ngantoy pesingan jo so nitan? Apay enshiy baley jo aya ja jo penganan, ono penginoman? Apay endedamsis jo aya sota totoon esa‐nop pa manshedjaw son Apo Shiyos? Apay nga joka bebaingi sota ira enshiy mebedin ton ita‐jon na kenen? Jet ngaranto may ikowan ko son si‐kayo? Naka bedawa itan na joka pesing, eg takejo ishayaw.
23Nemnem jo sota intorok son si‐kayo maypangkep ni pandilikob tayon emati ja penginemneman son Apo Jesus. Ineẃat ko sotan na toro son Apo Jesus, ja epasemak nonta edabin en inbaag ni sakey ya too to so nodta makakontra son si‐kato. Nontan, engala ni tinapay, 24jet idi enaksheng ja nan‐iyaman son Apo Shiyos, shinoshowa to sotan na tinapay, jet say kowan to, “Sajay i bakdang kon bono‐en sha; si‐katoy kaysedakan jon took. Pandilikob kayon took jet shoshowa joy tinapay ja penginemneman jo son si‐kak.” Kowan to. 25Jet idi naksheng iren engan, inda to sota tasa jet kowan to ey, “Manshoki ma niman, badoy pesing nen Apo Shiyos ja mengisedakan ni totoo, jet saja inomen jon ẃared tasa, si‐katoy pengiroki to, ta sajay i shalak ka on‐ayos ali nem meteyak. No mandilikob kayon took, panginom kayo ja penginemneman jo son si‐kak, jet angken meminpigen dag‐en jo iyay.” Kowan to. 26Isonga niman na ka‐enshi nin nen Apo Jesus, ingkatod idaw to mowan ali, no mandilikob kayon emati ja mengan ni tinapay tan menginom shi tasa, joka panpa‐amta shi totoo i inkatey to la.
27Isonga sota ira mengan tan menginom ja shaka pandag‐a sota penginemneman sha so nen Apo Jesus, nem eg sha patkan kari, nanbasol ira so nen Apo Jesus ta endedamsis sha sota inkatey to, tan sota shaleton imayos shi koros. 28Isonga mesepol la nemnemen nin ni tooy itsora to shorog no toka met laeng patki sotan na penginemneman so nen Apo Jesus, asan mangan niyay ya tinapay tan menginom nonta ẃared tasa. 29Ta sota ira mekikan niyay tan meki‐inom ja eg sha bigbigen ey penginemneman ni bakdang nen Cristo ja naykoros, ja kowan sha ey pengan bengat, dingkara i eg kosto nen Apo Shiyos ja keshosa‐an sha met laeng. 30Isonga eshakel son si‐kayo i ekapoy tan emansekit jet etey pay sota ira eshom. 31Nem enshiy tayo ikaro no nemnemen tayo koma nin no kostoy pangkep tayo, asan kitoka makipangan. 32Nem no kaspangarigan ey ẃaray ipalobos met laeng nen Apo Jesus ja digat son si‐katejo, piyan ton say mebidin kito, jet say eg kito may‐a‐shom so nonta ira toon eg emati ni keshosara di.
33Isonga niman si‐kayon a‐akik shi pamati, no mesa‐nop kayon mandilikob ja dag‐en jo sota penginemneman jo son Apo Jesus, karekayo man‐a‐agag, seked joy kait jo. 34No bilang ey ẃaray na‐agang, mengan koma nin shi baley to asan makidikob, jet say metopog ga si Cristoy nemnemen jo. No sajay i pesing jon mesa‐nop, enshiy jo ikaro son Apo Shiyos.
Sota ira eshom ma piyan kon ikowan, asan naka ikowan da son si‐kayo, no onmotokak da.
Currently Selected:
1 I-Korinto 11: DMP
Highlight
Copy
Compare
Share
Want to have your highlights saved across all your devices? Sign up or sign in
© 1978, Wycliffe Bible Translators, Inc. All rights reserved.
