قصة الأنبياء 38
38
يهوذا يتزوج ابنت شوع
1وبعد ما تخلص إخوات يوسف منه وباعوه للتجار الإسماعيليين، اللي باعوه لفوطيفار رئيس حرس فرعون مصر. حصل بعدها أن يهوذا ابن النبي يعقوب فارق أخواته ورحل علشان يعيش عند واحد صاحبه كنعاني أسمه حيرة اللي كان بيعيش في قرية عدلام القريبة من حبرون. 2وهناك شاف يهوذا بنت رجل من الكنعانيين أسمه شوع، فاتجوزها وعاش معاها. 3فحملت زوجة يهوذا وخلفت له ولد سماه عيرا. 4وبعدها حملت مرة تانية وخلفت له ولد فسماه أُونان. 5وبعدها حَمَلت مرة تالتة وولدت في قرية كزيب ولد وسمته شيلة. 6ولما كبر عيرا ابن يهوذا البكر جوزه بنت أسمها ثامار. 7لكن عيرا بكر يهوذا كان بيعمل الشر قدام ربنا، فقضَى الله بموته. 8فقال يهوذا لأونان ابنه الثاني: «ادخل على زوجة أخوك بحسب عاداتنا واتجوزها علشان يكون لأخوك نسل منها». 9وعرف أونان أن النسل مش هيتنسب إليه، فكان بيمنع نفسه عنها، علشان نسله مايبقاش لأخوه. 10فساءت فعلة أونان قدام ربنا فقضى بموته هو كمان. 11فقال يهوذا لثامار أرملة ولاده: «أفضلي أرملةٌ في بيت أَبـوكي لحد ما يكبر شيلة ابني واخليه يتجوزك». وكان يهوذا وصاها بالوصية دي لأنه خاف أن ابنه الصغير يموت هو كمان زي ما مات أخوته قبل منه. فمشت ثامار وقعدت تستنى في بيت أَبوها.
يهوذا وثامار
12ومرت الأيام وماتت بنت شوع زوجة يهوذا. وبعد العزا والحداد راح يهوذا على قرية تمنة علشان يتابع العمال وهم بيجزوا صوف غنمه، وكان معاه حيرة صاحبه العدلامي. 13فقالوا لثامار أن حماها جاي في الطريق لتمنة علشان يجز صوف غنمه. 14فخلعت هدوم حدادها، وغطت وشها بالحجاب وقعدت عند مدخل قرية عينايم اللي على طريق تمنة، لأنها عرفت أن يهوذا خائف على ابنه ومش هيخليه يتجوزها. 15فلما عدىَ عليها يهوذا في الطريق وشافها مغطية وشها، ظن أنها من عاهرات معابد الكنعانيين. 16فمعرفهاش ومال لجانب الطريق ناحيتها وقال لها: «تعالي اعاشرك»، فقالت له: «تديني أيه علشان تعاشرني؟» وما كشفتش وشها. 17فيهوذا قالها: «حبعت لك جدي من غنمي». فقالت: «حتديني أيه رهن لحد ما تبعث الحاجات الي وعدت بيها؟» 18فسأَلها: «رهن أيه اللي تطلبيه؟» فجاوبته: «خاتمك وعمتك وعصايتك». فعطها كل الي طلبته، فحملت منه بعد ما دخل بها وعاشرها. 19فقامت ورجعت لبيتها وخلعت الحجاب من على وشها ورجعت لبست هدوم حدادها. 20ولما بعت يهوذا الجدي مع صاحبه حيرة العدلامي علشان يرَّجع الرهن ملقاش أثر لها. 21فسأل أهل المكان عنها: «فين العاهرة الي كانت قاعده على الطريق في عينايم؟» فقالوا: «مفيش عاهرة كانت قاعده في المكان هنا». 22فرجع حيرة ليهوذا وقال له: «أنا دورت ومالقتهاش، أهل القرية قالوا: مفيش عاهرة كانت قاعده هنا». 23فرد عليه يهوذا: «خلاص طيب، خليها تحتفظ هي بالحاجات الي عندها، فأنا مش عايز الناس تضحك عليا. وأنا بعت معاك الجدي زي ما اتفقت معاها لكن أنت دورت ومفيش أثر لها».
مولد فارص وزارح
24وبعد مرور ثلاث شهور قالوا ليهوذا: «ألحق، ثامار زوجة ولادك زنت وحبلت من زناها». فقال لهم يهوذا: «هاتوها وأحرقوها». 25ولما خرجوها علشان يحرقوها بعتت ليهوذا حماها وقالت له: «أنا حبلى من صاحب الحاجات دي. بص كويس في الخاتم والعْمَّة والعصايا يمكن تعرف مين صاحبها.» 26فاتعرف يهوذا على حاجته وقال: «هي على حق وأصدق مني، لأنها كانت عايزة تحفظ أسم زوجها حسب الشريعة، وانا اللي خلفت وعدي ورفضت أجوزها من شيلة ابني». ومدخلش عليها يهوذا بعدها ولا عاشرها. 27ولما جه معاد ولادتها كان فيه توأمين فِي بطنها. 28وفي وقت ولادتها واحد من التوأمين خرج ايده فربطت الموَلده حوليها خيط أحمر، وقالت: «ده هو خرج الأول». 29لكنه سحب ايده فخرج أخوه، فقالت: «أزاي اقتحمت كده على أخوك؟» علشان كده سموه فارص. ومعناه المقتحم. 30وبعدها خرج أخوه الي كان ملفوف الخيط الأحمر على أيده فسموه زارح. ومعناه الأحمر. (وده نسل فارص لحد النبي داود: فارص خلف حصرون، وحصرون خلف رام، ورام خلف عميناداب، وعميناداب خلف نحشون، ونحشون خلف سلمون، وسلمون خلف بوعز، وبوعز خلف عوبيد، وعوبيد خلف يسَّى، ويسَّى خلف داود).
Currently Selected:
قصة الأنبياء 38: EAT
Highlight
Copy
Compare
Share
Want to have your highlights saved across all your devices? Sign up or sign in
Wycliffe Bible Translators, Inc.
