قصة الأنبياء 25

نسل قطورة زوجة النبي إبراهيم

1بعد وفاة سارة حصل أن النبي إبراهيم اتجوز امرأة اسمها قطورة (واسمها معناه: بخور). 2وخلفت قطورة 6 أولاد للنبي إبراهيم، وهم مدين وزمران ويشباق ومدان وشوحا ويقشان. 3ويقشان خلف ولدين: وهم شبا وددان، ومن أولاد ددان خرجت قبائل الآشوريين واللطوشيين واللأميين. 4وخلف مدين خمس أولاد وهم عيفة وعفر وحنوك وأبيداع وألدعة. دول كلهم هم ذرية قطورة زوجة النبي إبراهيم، اللي سكنوا في المنطقة العربية. 5‏-6وكان النبي إبراهيم وهب لأولاده من هاجر وقطورة هدايا كثير في حياته، وبعدين خلاهم يرحلوا ويسكنوا في المنطقة العربية بعيد عن ابنه إسحاق. وبعد موت النبي إبراهيم ورث النبي إسحاق كل أملاك النبي إبراهيم.

وفاة النبي إبراهيم

7‏-8(كان النبي إبراهيم عنده 75 سنة لما خرج مع زوجته سارة ولوط ابن أخوه من مدينة حاران في بلاد ما بين النهرين. وبعدها فضل 100 سنة يتنقل من مكان لمكان في بلاد الكنعانيين.) وعاش النبي إبراهيم حياة الصالحين وتوفاه الله شيخ تقي لما كان عمره 175 سنة ولحق بالسلف الصالحين. 9‏-10فدفن إسحاق وإسماعيل أبوهم في كهف المكفيلة اللي كان اشتراه النبي إبراهيم من عفرون بن صوحر علشان يدفن فيه زوجته سارة في حبرون الخليل. 11وبعد موت النبي إبراهيم بارك ربنا لإسحاق، ورجع علشان يسكن عند البير الي سمته هاجر بير «الحي القدير بحالي بصير».

مواليد إسماعيل

12ومن نسل إسماعيل ابن النبي إبراهيم وهاجر المصرية اتولد اتناشر ولد، 13ودي أسماؤهم حسب ترتيب ولادتهم: نبايوت، وقيدر وأدبئيل ومبسام 14ومسماع ودومة ومسا، 15وحيدار وتيما ويثور ونافيش وقدامة. 16‏-18وكل أولاد إسماعيل الأثنى عشر أصبحوا رؤساء قبائل، وعاشوا في مناطق اتسمت بأسمائهم في الأراضي العربية. ولما مات إسماعيل كان عمره 137 سنة.

نسل إسحاق

19‏-20ودي قصة النبي إسحاق لما اتجوز وهو في سن الأربعين من رفقة أخت لابان وبنت بَتوئيل اللي كانوا عايشين في آرام أرض ما بين النهرين. 21لكن رفقة عاشت عشرين سنة مع النبي إسحاق من غير ما تخلف له أولاد، فدعا النبي إسحَق لله علشان زوجته تحمل، واستجاب الله للنبي إسحاق. 22وحملت رفقة في توأمين، واتزاحم في بطنها الولدين، فقالت: «يا الله، أنا ليه كل ده بيحصل لي؟» 23فقال لها الله تعالى: «يا رفقة، في بطنك ولدين، من كل واحد منهما هيخرج شعب، الصغير أقوى من الكبير، والكبير يخضع للصغير».

24ولما جات ساعة ولادة رفقة، 25خرج الولد الأوّل وكل جسمه متغَطي بشعر كثيف لونه أحمر، فسموه عيسو (معنى الأسم: الأحمر). 26وبعدها خرج الولد التاني وهو متعلق في عرقوب رجل أخوه، فسموه يعقوب (معنى الأسم: المُتعقب). وكان النبي إسحاق عمره 60 سنة لما خلفت له رفقة الولدين.

27وكبر الولدين، عيسو بقى صياد ماهر بيميل لحياة البرية، لكن يعقوب كان راعي غنم بيميل للحياة الهادية. 28وكان النبي إسحاق بيفضل عيسو وبيحب يأكل من الصيد اللي بيصطاده عيسو من البرية، أما رفقة فكانت بتفضل يعقوب.

عيسو يستهون بحق الابن البكر.

29وفي يوم من الأيام، كان يعقوب بيطبخ شوربة عدس، ورجع عيسو من الصيد في البرية وهو جعان. 30فقال لأخوه: «يا يعقوب، أنا ميت من الجوع فاديني اكُل من الشوربة الحمرا اللي بتعملها». علشان كده كان لقب عيسو «أدوم»، ومعناه الاحمر. 31فرد عليه يعقوب: «يا عيسو، لو اتنازلت لي عن حق الابن البكر، هديلك تاكل». 32فقاله عيسو: «أنا الجوع بيموتني، وحق الابن البكر دلوقت بأيه ينفعني؟» 33‏-34فقال له يعقوب: «مش هديلك حاجة إلا بعد ما تحلف لي الأول». فاستهون عيسو بحق الابن البكر وحلف ليعقوب وتنازل له عن حق البكورية. فعطى يعقوب لأخوه عيسو عيش وشوربة عدس، فَأكل عيسو وشرب وبعدين قام ومشى في طريقه.

Currently Selected:

قصة الأنبياء 25: EAT

Highlight

Compare

Copy