Рацыд 7

1Фӕлӕ Дунедарӕг загъта Моисейӕн: «Ӕз афтӕ бакӕндзынӕн, ӕмӕ ды фараонӕн Хуыцау уыдзынӕ, де ’фсымӕр Аарон та дӕ пехуымпар уыдзӕни. 2Ды-иу Ааронӕн дзур, Ӕз дын цы фӕдзӕхсон, уый, Аарон та фараонӕн зӕгъдзӕн, цӕмӕй израилӕгты рауадза Мысырӕй. 3Ӕз фараоны зӕрдӕ афтӕ ныддур кӕндзынӕн, ӕмӕ, Мысыры зӕххыл цасфӕнды диссӕгтӕ ӕмӕ ӕвдисӕйнӕгтӕ куы равдисон, 4уӕддӕр уӕм фараон нӕ байхъусдзӕн. Ӕмӕ уӕд Ӕз Мысырыл Мӕ цонджы хъару бавзардзынӕн. Мӕ адӕмы, израилӕгты ӕфсад, уырдыгӕй ракӕндзынӕн фӕд-фӕдыл, Мысыры бӕстӕ та Мӕ азары хай бакӕндзынӕн. 5Израилӕгты куы ракӕнон ӕмӕ Мысырыл Мӕ къухы уӕз куы ӕруадзон, уӕд мысырӕгтӕ базондзысты, Дунедарӕг Чи у, уый».

6Моисей ӕмӕ Аарон, Дунедарӕг сын куыд бафӕдзӕхста, афтӕ бакодтой. 7Фараонимӕ куы ныхас кодтой, уӕд Моисейыл цыди цыппарыссӕдз азы, Аароныл та — ӕртӕ ӕмӕ цыппарыссӕдз.

8Дунедарӕг загъта Моисей ӕмӕ Ааронӕн: 9«Фараон уӕ, диссаг равдисут, зӕгъгӕ, куы дома, уӕд-иу Ааронӕн йӕ лӕдзӕг фараоны раз аппарын кӕн, ӕмӕ лӕдзӕг калм фестдзӕн». 10Моисей ӕмӕ Аарон бацыдысты фараонмӕ ӕмӕ, Дунедарӕг сын куыд загъта, афтӕ бакодтой. Аарон йӕ лӕдзӕг фараон ӕмӕ йӕ дӕлдӕрты раз аппӕрста, ӕмӕ лӕдзӕг калм фестад. 11Уӕд фараон фӕсидти йӕ куырыхонтӕм ӕмӕ йӕ кӕлӕнгӕнджытӕм, ӕмӕ Мысыры дӕсныфӕрсджытӕ дӕр хин ӕмӕ кӕлӕны руаджы афтӕ бакодтой: 12алчи сӕ йӕ лӕдзӕг аппӕрста, ӕмӕ лӕдзджытӕ кӕлмытӕ фестадысты. Фӕлӕ Аароны лӕдзӕг иннӕ лӕдзджытӕ аныхъуырдта! 13Уӕддӕр фараон нӕ басаст ӕмӕ нӕ байхъуыста Моисей ӕмӕ Ааронмӕ, Дунедарӕг куыд дзырдта, афтӕ.

14Дунедарӕг Моисейӕн загъта: «Хивӕнд у фараон. Нӕ йӕ фӕнды Мӕ адӕмы рауадзын. 15Райсом сӕумӕйӕ доны былмӕ куы рацӕуа, уӕд ӕм бацу, йӕ разы Нилы былгӕрон ӕрлӕуу ӕмӕ, калм дын-иу цы лӕдзӕг фестад, уый дӕ къухы дар, 16афтӕмӕй ӕмӕ фараонӕн зӕгъ, уымӕ дӕ кӕй рарвыста Дунедарӕг, дзуттӕгты Хуыцау, цӕмӕй йын Йӕ фӕндон зӕгъай: „Мӕ адӕмы Мын рауадз, ӕмӕ Мӕм бакувой ӕдзӕрӕг быдыры. Нырмӕ ды коммӕ нӕ кастӕ, 17ӕмӕ дын афтӕ зӕгъы Дунедарӕг: Уӕдӕ ныртӕккӕ базондзынӕ, Дунедарӕг Чи у, уый. Мӕ къухы цы лӕдзӕг ис, уымӕй ӕз мӕнӕ Нилы дон ӕрцӕвдзынӕн, ӕмӕ туг фестдзӕни. 18Нилы кӕсӕгтӕ ныммӕлдзысты, ӕмӕ дон афтӕ сысмаг уыдзӕн, ӕмӕ мысырӕгтӕн нуазынӕн нал бӕздзӕни“».

19Дунедарӕг Моисейӕн бафӕдзӕхста: «Зӕгъ Ааронӕн, цӕмӕй йӕ лӕдзӕгӕй февзида Мысыры дӕттӕм — цӕугӕдӕттӕм, Нилы къабӕзтӕм, цадтӕм, донуӕттӕм, — ӕмӕ туг фестой. Мысыры зӕхх иууылдӕр туджы бын фӕуыдзӕн, туг уыдзӕни суанг хъӕдын ӕмӕ дурын мигӕнӕнты дӕр».

20Моисей ӕмӕ Аарон, Дунедарӕг сын куыд бафӕдзӕхста, афтӕ бакодтой. Аарон систа йӕ лӕдзӕг ӕмӕ дзы фараон ӕмӕ йӕ дӕлдӕрты цӕстыты раз Нилы дон ӕрцавта. Дон туг фестади. 21Нилы кӕсӕгтӕ ныххӕдмӕл сты, ӕмӕ дон афтӕ сысмаг ис, ӕмӕ дзы мысырӕгтӕ нуазын нал фӕрӕзтой. Мысыры зӕхх иууылдӕр туджы бын фӕци. 22Фӕлӕ Мысыры кӕлӕнгӕнджытӕн дӕр сӕ кӕлӕнты руаджы сӕ бон афтӕ бакӕнын баци, ӕмӕ та уӕд фараон ныддур кодта йӕ зӕрдӕ ӕмӕ нӕ байхъуыста Моисей ӕмӕ Ааронмӕ, Дунедарӕг куыд дзырдта, афтӕ. 23Цы ’рцыд, уый ӕппындӕр ницӕмӕ ӕрдардта, афтӕмӕй аздӕхт йӕ галуанмӕ. 24Мысырӕгтӕ цӕугӕдоны былгӕрӕтты цъайтӕ къахын байдыдтой, уымӕн ӕмӕ Нилы дон нуазынӕн нал бӕззыд.

25Дунедарӕг Нилы дон туг куы фестын кодта, ууыл рацыд авд боны.

Currently Selected:

Рацыд 7: ОссБ

Highlight

Copy