Yuoridagɩŋ 20

Ba bɔbɩna Sitaani bɩna tusiŋ dene

1Naa kʋaŋ chaaŋ maŋ bɩ ye malaka wʋnyɩ dɩ nyɩnna arɩzanna a keŋ sʋʋna, ta pɔgɩlɩ vɔrɩgoli dieke dɩ wone kpatɩkʋ saafɩbɩŋ aŋaŋ chɔrɩŋ kpeŋkpɩɩma ʋ nuuŋ me. 2Ta nyaŋŋɩ waakpɩɩbɩakʋ, ʋ yine Saaŋ chʋʋsɩrʋ wa yaa Sitaani wa ta die bɔbɩ wa aŋaŋ chɔrɩma, 3ta nagɩ wa a taaŋ yi vɔrɩgoliku me bɩna tusiŋ, ta kparɩ ka aŋaŋ saafɩka ta kpaasɩ ka marɩ, amʋ ʋ kaaŋ bɩ gaaŋ tɩŋgbaŋka gie vuosi bɩbra a ga tʋgɩ bɩna tusiri. Bɩna tusiri gie kʋaŋ chaaŋ, ʋ nan forisi wo a taaŋ saŋŋa bɩta.

4Ta die bɩ ye naagbaŋtɩ arɩzanna ma, ta Ŋmɩŋ dɩ yɩ vuodiekemba dɩ kalla a ma wa yiko dɩ ba dii sarɩya. Ta bɩ ye vuodiekemba die dɩ mʋʋlɩnana wusie dieke Yisa Masia die dɩ yuorine a dagɩ wa aŋaŋ Ŋmɩŋ wɩaha ta ba gobi ba sikpigilehe wo haalɩtɩ. Banɩŋ die ba ka jɩaŋ haagɩŋ dɔmbɩakʋ yaa ka buubu dieke dɩ nɩasɩna ka, yaa ta tuo ka magɩlɩkʋ ba die me yaa ba nuusi me. Ta Ŋmɩŋ dɩ vaa ba yiŋŋi keŋ ba mɩsɩ ma ta yɩ ba sieŋ dɩ ba lagɩŋ dii naaŋ aŋaŋ Masia bɩna tusiŋ. 5Bʋmbʋŋaŋ kuŋ hagɩŋ wone naa. Vuotɩalɩkaha mana die dɩ kpine wo die ka hagɩ kuŋ me a ga tʋgɩ saŋŋa dieke bɩna tusiri dɩ tʋgɩna. 6Sʋgɩfɩalɩŋ aŋaŋ alibarika bie vuodiekemba dɩ gʋtɩna bʋmbʋŋaŋ kuŋ hagɩkʋ ma wa. Kuŋ dieke dɩ gʋtɩna bule wo kaaŋ keŋ ba ma, ta ba nan yi Ŋmɩŋ aŋaŋ Masia kɩkaabɩtɩŋ ta nan lagɩŋ a dii naaŋ aŋaŋ Yisa bɩna tusiŋ.

Boliŋ dɩ chʋʋsɩna Sitaani dene

7Bɩna tusiri gie kʋaŋ chaaŋ, ba nan vʋarɩ Sitaani a nyɩŋ vɔrigoliku me a taaŋ 8ta ʋ nan keŋ nyɩŋ a gaaŋ buuri diekemba mana dɩ bene tɩŋgbaŋka gie me. Ba wasa banɩŋ vuosi mi dɩ Gogi aŋaŋ Magogi. Sitaani nan lagɩsɩ ba mana jigidieke ba balla ba tuoli tɔmbʋ. Ba nan faasɩ dala ta wo bɩɩsɩŋ. 9Ta nyɩŋ ga tɩŋgbaŋka gie jigiŋ mana a giliŋ tɩgɩdieke Ŋmɩŋ dɩ chone ta ʋ vuosi dɩ bie ka ma wa. Ama Ŋmɩŋ die dɩ vaa boliŋ die dɩ nyɩŋ arɩzanna ma a keŋ dii ba mana. 10Womi die ba nagɩ Sitaani vuodieke dɩ gaana vuosi gie wo a taaŋ yi boli dieke dɩ dinene aŋaŋ maafa jiribike me, jigidieke haagɩŋ dɔmbɩakʋ aŋaŋ ŋmɩnchɩbɩsɩ naazʋalɩba dɩ wone beri wo. Mi ba nan dɩ die wahala yuŋ aŋaŋ ŋmɩntʋasɩ yaa gamma haahuu.

Kpatɩŋ sarɩya diile wɩa

11Womi die maŋ bɩ ye Ŋmɩŋ dɩ kalla naagbanɩŋ kpeŋkpɩɩŋ dieke dɩ faasɩna yɩantɩ ma. Die ʋ kenne a nyɩŋ wa, tɩŋgbaŋka gie aŋaŋ ŋmɩŋsikpeŋ die dɩ bɩa ta vuoŋ dɩ ka bɩ yehe bɩbra. 12Ta die ye vuodiekemba die dɩ kpine, vuokpɩɩma aŋaŋ wabɩtɩ ta ba zie naagbaŋkʋ nɩŋŋa. Ta vuoŋ dɩ yuori gbaŋtɩ ta bɩ yuori gbanɩŋ kaanɩ ba maagɩna vuodiekemba dɩ yalla miivoli haalɩkʋ saara a yi. Ta Ŋmɩŋ dɩ dii vuodiekemba dɩ kpine wo sarɩya yaa gamma wudieke ba yine ta ba maagɩ yi gbaŋtɩ ma wa. 13Ta mʋgɩkpɩɩma dɩ vʋarɩ vuodiekemba dɩ kpine a ma wa, ta kuŋ aŋaŋ kpiile tigiŋ dɩaŋ dɩ vʋarɩ vuodiekemba dɩ kpine ta bie a ma wa. Ta Ŋmɩŋ dɩ dii ba wʋnyɩ mana sarɩya yaa gamma wudieke ba yine. 14Ta die nagɩ kuŋ aŋaŋ kpiile tigiŋ a taaŋ yi vɔrɩkpeŋkpɩɩŋ dieke dɩ suuline aŋaŋ bolibu me. Kuŋ dieke dɩ gʋtɩna bule wo yine vɔrɩkpɩɩkʋ aŋaŋ bolibu. 15Vuodieke nɩŋ mana saaŋ die dɩ kana ka maagɩ yi miivoli gbaŋkʋ ma, die ba nagɩ wa mɩŋ a taaŋ yi vɔrɩkpɩɩkʋ aŋaŋ bolibu me.

Currently Selected:

Yuoridagɩŋ 20: KMA

Highlight

Compare

Copy