Sakariyaa̱ 10
10
Néná tsóyatjón nga sa̱ꞌínchikonñé xota̱ na̱xi̱ńdaá
1¡ꞌNiú chji̱a̱ꞌajnúu̱ Néná stsé xí xotí ko̱jo xi sájín boaꞌaa̱!
Kui Néná xí tsangiya nga foaꞌatꞌee̱ ko̱jo stséꞌniuú,
kuí boá xi tsja̱á nichinie xotaa̱, ko̱jo tsja̱á kꞌijñá tꞌanangii̱.
2Ta̱nga kui ne xi jmí ni chjíjiín, ta̱kjo̱a̱ndaní nga tsóyatjón ngo ni,
xota̱ xi kotꞌasoón be ni xi ta̱kjo̱a̱ndaní,
tsóyà ńjñá xí jmí ni chjíjiín, kó ta̱kjo̱a̱ndaní nga tsꞌéndajoón xotaa̱,
kuíni nga xota̱ na̱xi̱ńdaá ta̱xkiya tjimá kichajá,
xikoó cho̱tsa̱nga̱ xi ni̱ma̱kjo̱a̱ tjimá, ngatꞌa̱ jmíjiín nda̱ xi konda.
3Achichí tjítsꞌenxchán án kjo̱a̱a̱ já xí koón cho̱tsa̱nga̱a̱,
kó kotijée̱ kui xi síndotjoón xota̱ na̱xi̱ńdána,
Néná xí tsi̱ꞌe̱ jájuún ko̱e̱je̱katsijee̱n cho̱tsa̱nga̱a̱,
kui xi xota̱ tji̱e̱e̱ Jundáa̱,
kó tsja̱ndieè nga kui xi ka̱ma xikoó ngo ndi̱je̱ kjo̱a̱xchán xí chji̱a̱ni ndo̱bo̱a̱xa̱á.
4Ki̱a̱ kjo̱tjojinni ndi̱jo̱ ngaꞌniuú,
ki̱a̱ kjo̱tjojinni yá xí bosiénijiín,
ki̱a̱ kjo̱tjojinni yáchjonyaá nda̱ chꞌokoo̱n,
kó ko̱jo ki̱a̱ kjo̱tjojinni ngayeje xota̱ ngito̱ko̱ xi ko̱tíxomaa̱.
5Kuí boá xi ka̱ma xikoó xota̱ chꞌokon xi tsjájin ndásee̱ ndi̱yàtieé ki̱a̱ ngi̱jin kjo̱a̱xcha̱án,
kó skján, ngatꞌa̱ Néná ki̱a̱ tikónjii̱n,
kó já xí síndosoón ndi̱je̱e̱ si̱ꞌanchajà.
6Án boá xi tsjangaꞌniúu̱ xota̱ tji̱e̱e̱ Jundáa̱,
án boá xi sa̱ꞌin an nga xota̱ tji̱e̱e̱ Kosiee̱ xi sa̱ꞌín,
sa̱ꞌinkjíꞌoyá ngiñá an, ngatꞌa̱ achichí ni̱ma̱ mana,
kó kuí boá xi ka̱ma, xikoó tsi katsꞌenchꞌójín an,
ngatꞌa̱ Án boá xi Nee̱ kui ma an, kó kuintꞌièñáa̱.
7Xota̱ tji̱e̱e̱ Efraii̱n, ka̱ma xikoó xota̱ xi chꞌokon,
kó achichí tsjakꞌuieé ini̱ma̱a̱ xikó maá tsi bino̱ katsꞌe,
kó nga sku̱i̱e̱ ndií kui nii̱, achichí tsjá ka̱maa̱,
kó tsjakꞌuieé kjo̱a̱a̱ Néná.
8Kꞌuisiée̱ tsi̱ꞌe̱ nga kꞌuitiko án, ngatꞌa̱ jè tsꞌaxiéꞌá an,
kó ka̱makjín nginí xikoó ngasꞌe̱.
9Ndatsi kastsojoboa ki̱a̱ ngi̱jii̱n na̱xi̱ńdaá,
kó ndatsi na̱xi̱ńdá xí kjin síndo, ki̱a̱ kjo̱a̱ꞌátsjiee̱n an,
ki̱a̱ sa̱ꞌínxchá ndií, ta̱nga kji̱ndi̱bá nginí kꞌi̱e̱e̱.
10Sa̱ꞌinkjindibáꞌóyá nginí an nga kjo̱tjoni nangi Ejiptoo̱,
kó ki̱a̱ kꞌuitiko án ki̱a̱ nangi Asiria̱,
kó kji̱ndi̱bájo̱ ngiñá an ki̱a̱ nangi Ngalaa̱nd ko̱jo nangi Líbano̱,
ta̱nga ngayeje kui tꞌanangii̱ nde ka̱májínnii̱.
11Kósꞌe̱ ki̱a̱ kjo̱a̱ꞌaxtikjá ki̱a̱ ndáchíkoón nínga nda̱ ka̱maa̱,
kó kui ndáchíkoón ku̱i̱e̱ꞌétꞌaxchaán.
Kó si̱ꞌanxíyá ngaskande nínga na̱nga̱a̱ ndejèꞌ Niloo̱,
ngaskande nga kjo̱a̱nkꞌatakoón xota̱ xi chji̱a̱ni nangi Asiria̱ si̱ꞌanchajà,
kó chja̱ꞌáxín kjo̱a̱ꞌniuú ki̱cha̱ xí botixómáni nangi Ejipto̱.
12Ta̱ngatꞌanii̱ ngaꞌniuú Néná nga ko̱e̱je̱ra xtji̱e̱e̱n kje̱n nga sa̱ꞌínkjién jaꞌeén. Tsó Néná.
Currently Selected:
Sakariyaa̱ 10: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
