Én xí nda xi ꞌniú tsjatsó ngasee̱ 3
3
1Kjiꞌanga je jñoó, ki̱a̱ nga̱són ṉchanna mongase an kui xota̱ xi tjoó ini̱ma̱na,
tsangase an, ta̱nga kasakojínna.
2Kó kjo̱stjíe̱n an ngotꞌe̱, kó kjuín án ki̱a̱ na̱xi̱ńdáꞌniú,
kjuín án ndi̱yàtieé ko̱jo ndi̱tse̱e̱n,
chjiéngá sa̱kóna kui xota̱ xi achichí tjoó ini̱ma̱na.
Tsangase an, ta̱nga kasakojínna.
3Nga kasakoo̱ an xota̱jun xi konda na̱xi̱ńdáꞌniuú,
asíyáa̱ tsi ta̱ꞌaa̱ kamábe
kui xota̱ xi achichí tjoó ini̱ma̱na.
4Sꞌe̱ tsí kijíboaꞌá chií an,
kó ta̱tra kasakona kui xota̱ xi achichí tjoó ini̱ma̱na.
Janíkjá án, kó nde kintjuenjín an,
ngaskande nga kijíjo̱ an ndiꞌaa̱ na̱anna,
kó ki̱a̱ katsꞌenkꞌasꞌien an ki̱a̱ ngi̱yaꞌma nínga kamánda an.
Nda̱ xo̱ngo̱ò
5Jún ínchjín xo̱ngo̱ò xí chji̱a̱ni na̱xi̱ńdáꞌniú Jerusalee̱n,
mejénna nga si̱ꞌankjatjosónjnúꞌun ngo ni,
kó ta̱ngatꞌanii̱ ndí ndí ínchjiín ndi̱kꞌijñaá,
nga si̱ꞌanxtijínjnúu̱ na̱ xi mejénna an,
ti̱nde si̱ꞌankjaꞌájínjnúu̱ nga kjiꞌifé,
ngaskande nga kui xi kjo̱a̱ꞌá soboaá.
Xi ma jaán soó
Já amingoo̱
6Mí ni bo̱a̱ xi tsꞌéndibá ki̱a̱ nangi kixií xi ja̱kjiꞌi ngo yásé ṉdi̱ má kjiꞌi,
xi kjifoaꞌándá sije̱n sije̱n xikoó mirraa̱,
xikoó nisijee̱n, ko̱jo xikoó kjín to̱ko̱ya ndásíje̱n.
7¡Ṉchaa̱n nda̱ re Salomoo̱ boá!
Kó ichítié ko̱jo tie jáchꞌokón ndyi̱koo̱n,
¡Kuí boá jájún xi chꞌokon ngase xi chji̱a̱ni Israee̱l!
8Ngayejee̱ nga ndyi̱yaꞌa ki̱cha̱ndojó,
achichí ꞌniú maá kján kuí jájuún,
ngayejee̱ nga je ndáyaá kjitꞌa ki̱cha̱a̱,
ta̱ngatꞌanii̱ nga ndajín má nga jñoó.
9Nda̱ re Salomoo̱ kiniꞌándaa̱ ngo karro̱
xi yá nda xi chji̱a̱ni nangi Líbano̱ kamándani.
10Kó to̱ntiboa ikꞌíjñaá ngindiee̱,
to̱nsinié ikꞌíjñaá nínga fotꞌa nga̱xtón,
ńjño xi koán akjajon yáxíríee̱.
Kó ínchjín xí chji̱a̱ni Jerusale̱n boá
xi inda inda katsꞌénchoo̱n ngi̱yaa̱.
11¡Tja̱tjójnú ínchjín xí chji̱a̱ni na̱xi̱ńdáꞌniú Jerusalee̱n!
¡Ja̱bítsitsíjenjnúu̱ nda̱ re Salomoo̱!
Tikón maá to̱ko̱ kui korona̱ xi katsꞌéndaa̱ na̱aa̱n ni̱xtjin nga ixán,
¡kui ni̱xtjin xi ꞌniú tsjá ngase kamaá
nga kisꞌijña kui nga̱sondiee̱!
Currently Selected:
Én xí nda xi ꞌniú tsjatsó ngasee̱ 3: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
