Xota̱ Roma̱ 14

Bi̱ tsꞌén íni̱jmì Pabloo̱ kjo̱a̱a̱ xota̱ xi tajájín síndo ngi̱yaa̱ ni xi tsi̱ꞌe̱ Néná

1Kó ti̱ꞌanjo̱ꞌojnú kui xota̱ xi kji̱e̱ tajájín síndojin nii̱ Néná, ta̱nga ngata̱ ndokjo̱a̱tijo̱jínjnú kjo̱a̱a̱ xikótsꞌèn bee̱ko̱n. 2Ngatꞌa̱ tjín xota̱ xi sꞌijii̱n nga ngayeje to̱ko̱ya nii̱ máa kjinie, tji̱e̱nga kje̱ꞌe xí kji̱e̱ tajájín síndojin nii̱ Néná xi ta̱ xka̱, ko̱jo ni xi maxchaá tꞌanangii̱ xí kjinie. 3Kui xota̱ xi ngayeje nii̱ xi kjinie, chjiénjín nga chꞌo ka̱maa̱ xota̱ xi ta̱ káꞌá tsí nii̱ xi kjinie, kó kui xota̱ xi ta̱ chiboa tsí má ni xi kjinie, chjiénjín nga skotsíjee̱n tsi nda ko̱jo tsi ndajín ndyi̱tsꞌèn xota̱ xi ngayeje nii̱ xi ma kjinie, ngatꞌa̱ Néná ngayeje xotaa̱ nga katsꞌénjo̱ꞌo. 4Kó ꞌyání jí nga titsitsijinkóo̱n tsi nda ko̱jo tsi ndajín ndyi̱tsꞌèn mosoo̱ kje̱ꞌe xota̱. Tsi tajá tikón ko̱jo tsi kꞌo̱ka nga tjítsꞌén xaá kui mosoo̱, ndi̱a̱a̱ xí be tsi nda ko̱jo tsi ndajín katsꞌén, ta̱nga tajá kꞌuijñá kui mosoo̱, ngatꞌa̱ Ndi̱a̱ná tjínrií ngaꞌniú nga ka̱maa̱ ko̱síko̱jo.

5Tjín xota̱ xi tsó nga tjín ni̱xtjii̱n xi nda ngase ta̱bo̱a̱jiín kje̱ꞌe ni̱xtjin, kó ti̱ tjín xota̱ xi tsó nga ngayeje ni̱xtjii̱n nga ta̱ ngo ndse̱je̱n, nga ngo nga ngo ñá chjiéngá ngayeje takón ni xi ndyi̱niꞌánkjó. 6Kui xota̱ xi ndyi̱bendikón ngo ni̱xtjii̱n, ndyi̱tsꞌèn kuí nii̱ ngatꞌa̱ ndyi̱bendikón Ndi̱a̱ná, kó xi ndyi̱bendikónjín ngo ni̱xtjin, ndyi̱tsꞌènjín kui nii̱ ta̱ngatꞌaa̱ Ndi̱a̱ná. Kó kui xi ndyi̱kjinie ngayeje to̱ko̱ya nichiniee̱, ta̱ngatꞌanií Ndi̱a̱ná nga ndyi̱kjinie ngatꞌa̱ ndyi̱tsja̱á ndokꞌóchjì, kó xi ndyi̱kjiniejín ngayeje to̱ko̱ya nichiniee̱, ta̱ngatꞌanii̱ Ndi̱a̱ná nga bo̱a̱ ndyi̱tsꞌèn, kó ti̱ tsjaá ndokꞌóchjì nga.

7Ngatꞌa̱ nde ngojín ñá xi tindyión nga̱sondiee̱ ta̱ngatꞌanii̱ ñá, kó ti̱nde ngojín xi fesón ta̱ngatꞌanii̱ kui soboá. 8Tsi tindyión nga̱sondie ko̱jo tsi kjimaya, ta̱ngatꞌanií Ndi̱a̱ná, kuíni nga tsi tindyión nga̱sondie ko̱jo tsi kjimaya, Ndi̱a̱ná ndokjo̱a̱ ñá. 9Ngatꞌa̱ kuí kjo̱a̱a̱ nga Kristoo̱ kꞌien, kó jaꞌáꞌyaá, kó kisꞌijña nginí, tsi̱ꞌe̱ nga kui xi ka̱ma Ndi̱a̱ xi tsi̱ꞌe̱ xota̱ xi je jesoón ko̱jo xota̱ xi síndoo̱.

10Ta̱nga ji, míkjo̱a̱a̱ nga titsitsijinkóo̱n tsi nda ko̱jo tsi ndajín tjítsꞌén ntsꞌie. Axa̱ ji, míkjo̱a̱a̱ nga tiniꞌínchꞌí ji ntsꞌie. Ngayeje ñá nga kongín ngindyi̱ko̱n Kristoo̱ tsi̱ꞌe̱ nga kui ka̱tso̱yà tsi nda ko̱jo tsi ndajínkjiꞌi ni xi kiniꞌán, 11ngatꞌa̱ jè kjitꞌa xo̱jo̱n eén Néná nínga bi̱ tsoó:

Ja̱koxi̱ boá nga an xi tikòn an, tsó Ndi̱a̱ná, kó ngindyikón an, ngayeje xotaa̱ ko̱siéntikoó,

kó ngayeje xota̱ sa̱ꞌínkie yojoo̱ nga ku̱i̱chji̱a̱ nga án boá xi Ndi̱a̱a̱.

12Ja̱ kuíni nga, nga ngo nga ngo ñá si̱ꞌankꞌasꞌiée̱n xki̱ Néná kjo̱a̱a̱ ni xi kiniꞌán.

13Kó kuíni nga ngiti̱ ko̱ndókjo̱a̱taꞌinján ñá xingi̱ tsi nda ko̱jo tsi ndajín ndyi̱tsꞌèn, ta̱sá si̱ꞌankjó cha̱n cha̱n tsi̱ꞌe̱ nga ta̱xkiya si̱ꞌán jàn ngo ni xi sa̱ꞌín nga ngo ntsꞌie xi ngiti̱ ka̱maꞌniátakónjín Néná. 14Be án kó ꞌniátakón an Ndi̱a̱ná Kjisoo̱ nga nde ngojín nichiniee̱ xi ndándí ngindyi̱ko̱n Néná, ta̱nga tsi ngo xota̱ xi sa̱ꞌínkjó nga ngo nichiniee̱ xi ndándí, ja̱ ndándí ka̱maa̱ kui. 15Ta̱nga tsi ta̱ngatꞌanii̱ nichiniee̱ nga ntsꞌie ndasen kꞌuijñá ngindyi̱ko̱n Néná, ja̱ jè ngiti̱ tjójiín ntsꞌie. Ngata̱ niꞌínjín ji ngo ni nga ta̱ngatꞌanii̱ nichiniee̱ xcha̱ja xota̱ xi Kristoo̱ kꞌientjéni. 16Ngata̱ boeꞌéndièjínjnú nga chꞌo tsꞌén ko̱ndókjo̱a̱ kjo̱a̱a̱ ni xi nda kjimajnú jún xi ndyi̱niꞌánjnú. 17Ngatꞌa̱ nínga botixómá Néná jmí tsi nichiniee̱ ko̱jo tsi ni ꞌyoó xi ꞌniú chjínií, kjo̱a̱kixi̱i̱, ko̱jo kjo̱a̱xioó, ko̱jo kjo̱a̱tsjaa̱ A̱si̱énni̱xtjii̱n Néná xí chjínií. 18Ngatꞌa̱ Néná tsjá kjimaa̱ kjo̱a̱a̱ xota̱ xi ndyi̱tsꞌèn xaá Kristoo̱, kó ngayeje xota̱ xi ngasee̱ ndyi̱tsꞌènjóꞌo.

19Kó kuíni nga ki̱a̱ kjuíntjíngíi̱ ni xi tsja̱aná kjo̱a̱xió, ko̱jo ni xi ja̱kꞌi̱e̱ ja̱ngaján tsja̱ngaꞌniúná nga tjitjóninkꞌaná yojoná ngindyi̱ko̱n Néná. 20Ngata̱ niꞌínkjatsénjín ji nii̱ Néná ta̱ngatꞌanii̱ nichiniee̱. Nga ja̱koxi̱ ngayeje nii̱ xi tsjie, ta̱nga kui ni xi ndajínkjiꞌi kjiꞌá boá nga ta̱ngatꞌanii̱ nichinie sa̱ꞌínkꞌáka jé kje̱ꞌe xota̱. 21Ta̱sá ndatsi jmí yojo xi̱ni̱e̱ jàn, ko̱jo tsi jmí bino̱ sꞌi̱o̱ jàn, ko̱jo tsi ta̱ jmíjín ni xi si̱ꞌán tsi ngo ntsꞌié kꞌo̱ka nga sa̱ꞌínjé, ko̱jo tsi chꞌo ka̱maa̱ ko̱jo tsi ngiti̱ sꞌi̱jinjiín Néná. 22A sꞌijin maá. Ja̱ kui kjo̱a̱sꞌijii̱n ngatꞌieé ngindyi̱ko̱n Néná. Achichíra̱ tsjaa̱ ngo xota̱ xi tsꞌén ngo ni, kó jmí jé tsꞌénkiejín yojoo̱. 23Ta̱nga kui xi jó ko̱jo tsi xi ján tikónnii̱ kjo̱a̱a̱ ni xi skji̱ni̱e̱, jé tsꞌénkáꞌá yojoo̱, ngatꞌa̱ jmí tsi bo̱a̱ tjítsꞌén xikótsꞌèn sꞌijii̱n, ngatꞌa̱ ngayeje ni xi ki̱a̱jín ndibánií xikótsꞌèn sꞌijinná, jé boá.

Currently Selected:

Xota̱ Roma̱ 14: MAIX

Highlight

Copy