Ni xi akakoo̱ 20

Nga ngo mi̱ noó

1Kó kamábe an ngo ndítsjie xi tsꞌénfotjajen ndiꞌakꞌajmii̱ xi yaꞌa yibii̱ ti̱xa̱na̱nga̱a̱ tꞌanangii̱, kó ngo ńꞌniúki̱cha̱ je tjiyátsjà. 2Kó katsoboá kui cho̱ tamá xí yito to̱koo̱, kui ye̱ xchá xi xindajín kui xi ꞌmí ndiabloo̱ ko̱jo Satanaa̱, kó ngo mi̱ nó ítꞌa ńꞌniúki̱cha̱, 3kó tsꞌajmiyá ti̱xa̱na̱nga̱a̱ tꞌanangii̱ nínga íchjáꞌyá, kó ngo seyo̱ íjñaá nga̱ntjo̱a̱a̱, tsi̱ꞌe̱ nga ngiti̱ kꞌo̱ṉcha̱jojín ngase na̱xi̱ńdaá ngaskande ngije kjo̱a̱ꞌa nga ngo mi̱ noó, kó ngije kjo̱a̱ꞌa kui noó chjándó nginí ngi chiboa ni̱xtjin.

4Kó kamábe an nínga botíxoma, kó ki̱a̱ kisꞌińdosón kui xi katseꞌeé xá tsi̱ꞌe̱ nga ko̱tíjeé, kó ti̱ kamábe an a̱si̱énni̱xtjii̱n kui xota̱ xi ikichásén to̱ko̱ ta̱ngatꞌanii̱ nga jmíni̱xtjin íjñámasien ni xi akóyá Kjisoo̱ ko̱jo eén Néná, kuí xotaa̱ xi katsꞌéndikónjín cho̱ chꞌokjiꞌii̱ ko̱jo a̱sie̱én, ti̱nde katsjandièjín nga ikꞌíjñaá chi̱bo̱a̱a̱ kui cho̱o̱ xtjien ko̱jo tsja, kó kui xotaa̱ jaꞌáꞌyá nginií, kó nijan atíxomajo̱ Kristoo̱ ngo mi̱ nó. 5Ta̱nga xota̱ xi jesón xi ngasee̱, ngiti̱ kisꞌińdojín ngaskande ngije jaꞌa xi ingo mi̱ noó. Kó kuí bí xi̱ꞌbi̱ kjo̱a̱foaꞌáꞌyá xi tjoón. 6¡Achichíra̱ tsjaa̱ ko̱jo achichíra̱ tsjie kui xota̱ xi tjón kjo̱a̱ꞌáꞌyaá, ngatꞌa̱ ki̱a̱ chji̱a̱ni xota̱ na̱xi̱ńdá tsjiee̱ Néná! Kjo̱a̱bo̱ya xi ma joó, jmí ngaꞌniújiín kjo̱a̱a̱ kui xotaa̱, ta̱sá chináꞌmii̱ Néná ko̱jo chináꞌmii̱ Kristoo̱ ka̱ma, kó ki̱a̱ nijan ko̱tíxomajo̱ nga ngo mi̱ noó.

7Kó ngije jaꞌa xi ngo mi̱ noó, xindajín Satanaa̱ ko̱ꞌna̱xié ndo̱bo̱a̱yà xí tikón, 8kó kjo̱tjo tsi̱ꞌe̱ nga kꞌo̱ṉcha̱jo xi botixómaá na̱xi̱ńdá Ngoo̱j ko̱jo Mangoo̱j, kui xi ta̱jñà nanginí tsoó, tsi̱ꞌe̱ nga ku̱i̱ꞌítikó nga skja̱n juún, kui xi ta̱nisién kjín má xikó maá tsomií ndáchíkoón. 9Kó kijí ngayeje xikó kjiꞌi nga tiyaá tꞌanangii̱, kó ki̱a̱ kixindyia nga ngo foaꞌatjiyajoo̱n nínga síndo xota̱ tsjiee̱ Néná ko̱jo na̱xi̱ńdá xi tjoó kui, ta̱nga ndiꞌí ixóni ndiꞌakꞌajmii̱ kó ítí, 10kó kui xindajín ndiabloo̱ kui xi tsꞌenṉcha̱jo, ki̱a̱ ikichijmijin ndáchíkón ndiꞌí xí ta̱nisién ꞌniú jee̱ ko̱jo ndso̱ko̱a̱n asufree̱, nínga ikichijmijin cho̱ chꞌokjiꞌii̱ ko̱jo nda̱chji̱ni̱e̱ꞌén ndísoó, kó ki̱a̱ boá nínga si̱ꞌankjaꞌatio kjo̱a̱ni̱ma̱ nga ni̱xtjin ko̱jo nga ni̱xtji̱e̱n ngatsjéni̱xtjin.

Kjo̱a̱botíjé xi tikón kje̱n xi botixómaá

11Kó kamábe an xi botixómaá, tiboa ko̱jo je ngi̱ndie nínga tikón, ngindyi̱ko̱n kui, kichajá ngayeje nga̱sondiee̱ ko̱jo ndiꞌakꞌajmii̱, kó nginijánjín kamáyà tsi tjín nínga kisꞌijña. 12Kó kamábe an ngayeje xota̱ xi jesón xi xchá xí kjindí nga ndyi̱a̱kixi̱ kje̱n nínga tikón xi botixómaá, kó katjoxꞌá kjín chꞌo̱ xo̱jo̱o̱n ko̱jo ingo xo̱jo̱n, kui xi xo̱jo̱o̱n kjo̱a̱mindyioo̱n, kó xota̱ xi je jesoón akatíjeé ta̱ xikó kjiꞌi ni xi katsꞌén ko̱jo xikó kjiꞌi ni xi kjitꞌa kui xo̱jo̱n nínga tjítꞌa jaꞌeén xota̱ xi kꞌuíndo ngatsjéni̱xtjii̱n. 13Kó ndáchíkoón katsꞌénkꞌasꞌien xota̱ xi je jesón xi síndoo̱, kó kjo̱a̱bo̱yaa̱ ko̱jo nínga ꞌbíndo xota̱ xi je jesoón katsꞌénkꞌasꞌien xota̱ xi jesón xi síndo ngi̱ndiee̱, kó ngayejee̱ nga akatíjeé, nga ngo nga ngo ta̱ xikó kjiꞌi ni xi katsꞌén. 14Kó kjo̱a̱bo̱yaa̱ ko̱jo ngi̱ndie nínga ꞌbíndo xota̱ xi je jesoón kiniꞌánkjaꞌajin ndáchíkón ndiꞌí xí ta̱nisién ꞌniú jee̱. Kuí bí kui ngi̱jin ndiꞌií xi kjo̱a̱bo̱ya xi ma joó. 15Kó kui xota̱ xi kjitꞌajín jaꞌeén ki̱a̱ xo̱jo̱n nínga tjítꞌa jaꞌeén xota̱ xi kꞌuíndo ngatsjéni̱xtjin, ti̱ ki̱a̱ ikichijmijin ndáchíkón ndiꞌí xí ta̱nisién ꞌniú jee̱.

Currently Selected:

Ni xi akakoo̱ 20: MAIX

Highlight

Compare

Copy