Ni xi akakoo̱ 18

Nga kiniꞌánkjatsón na̱xi̱ńdá Babilonia̱

1Ngije kamá kui nii̱, kamábe an ingo ndítsjie xi tsꞌéndibájáyani ndiꞌakꞌajmii̱ xi achichí ngaꞌniú tjiín, kó kjo̱a̱jee̱ katsꞌéntsijenni ngayeje tꞌanangii̱. 2Kó ꞌniú askjandáyà nga bi̱ katsó:

–Jè kiniꞌánkjatsón, jè kiniꞌánkjatsón na̱xi̱ńdáꞌniú Babilonia̱, kui xi ndiꞌaa̱ xindajín je kamá, ko̱jo ngi̱ndie nínga síndo ngayeje to̱ko̱ya a̱siénni̱xtjin xi ndándí, ndo̱bo̱a̱a̱ ngayeje to̱ko̱ya cho̱ xi tjiín nga̱, ko̱jo ti̱xa̱a̱ cho̱ tamá xi chꞌo xi ka̱májín xi̱ni̱e̱, 3ngatꞌa̱ ngayeje na̱xi̱ńdá nga ti̱ bo̱a̱ ti̱ katsꞌén nga katsꞌéntsjajo̱ ne xi katsꞌénda xotaa̱, já re xi chji̱a̱ni tꞌanangii̱ ti̱ bo̱a̱ ti̱ katsꞌén, kó xota̱ xi botiñá ni xi chji̱a̱ni tꞌanangii̱ kamácho̱nni ta̱ngatꞌanii̱ nga kui naa̱ ta̱xkiya katsꞌénkjién to̱o̱n, nga tsꞌatsie ni nga katsꞌénkjatjosón ni xi ndajín xi kamámejeén.

4Kó tsintꞌie an ingo nda̱ ki̱a̱ ndiꞌakꞌajmii̱ xi bi̱ katsó:

–Tja̱tjójnú kui na̱xi̱ńdaá, jún xi xota̱ na̱xi̱ńdána jún, tsi̱ꞌe̱ nga ko̱jo júnjín nijan si̱ꞌanjéjo̱jnú, ti̱nde ko̱jo júnjín sa̱kójnú kjo̱a̱ni̱ma̱ xi kjo̱a̱ꞌajin, 5ngatꞌa̱ jeé jè jachó ngaskande ndiꞌakꞌajmii̱, kó Néná je jaꞌátsjiee̱n ni xi ndajín xi ndyi̱tsꞌèn. 6Te̱ꞌéjnúu̱ ti̱kuii ni xi katsjaá kje̱ꞌe, kó jó bo̱a̱ kjiꞌi tꞌíchjíjnúu̱ xikó kjiꞌi ni xi je katsꞌén, jó bo̱a̱ kjiꞌi ti̱ꞌankꞌájinjnúu̱ kui ni xi kꞌuí, xikó kjiꞌi katsꞌénkꞌájii̱n xi katsjaá kje̱ꞌe. 7Ti̱ꞌankjaꞌatiojnú kjo̱a̱ni̱ma̱ ko̱jo nga kjandá xikótsꞌèn tsja kamaá nga je kamaá yojoo̱, ko̱jo nga katseꞌeé kjo̱a̱je nga katsꞌénkjién to̱o̱n. Ngatꞌa̱ bi̱ tsó ini̱ma̱a̱: Kꞌi̱e̱ tikòn an xikoó ngo na̱ re, chjo̱on kꞌán xi je kꞌien xi̱ꞌii̱njín an, kó jmí xa̱ꞌya̱ skuiejín an, 8kuíni nga ta̱ ngo tsi ni̱xtjin nga sa̱ko̱ó ngayeje kui kjo̱a̱ni̱ma̱a̱: Xikoó kjo̱a̱bo̱yaa̱, ko̱jo kjo̱a̱ndasee̱n, ko̱jo kjindiaá, kó ngi̱jin ndiꞌií ku̱i̱ti̱, ngatꞌa̱ achichí ngaꞌniú tjiín Néná, kui Ndi̱a̱ xi botíjeé.

9Kó kui já ree̱ tꞌanangii̱ xi katsꞌéntsjajo̱ yojoo̱, ko̱jo kui naa̱, ko̱jo xi ta̱xkiya katsꞌénkjién to̱o̱n, skja̱ndá kó ni̱ma̱ ka̱tso̱ ta̱ngatꞌanii̱ kui, kjiꞌanga sku̱i̱e̱ ṉdi̱i̱ nga ku̱i̱ti̱, 10kjin kꞌuíndonii̱ ta̱ngatꞌanii̱ nga stsa̱kjo̱ón jeé, kó bi̱ ka̱tso̱:

–¡Ni̱ma̱ xò, Ni̱ma̱ xò ji, na̱xi̱ńdáꞌniú Babilonia̱, na̱xi̱ńdá xi tjiín ngaꞌniú! Ngatꞌa̱ nga ta̱ ngo tsi ora̱ jaꞌa nga akatíjeé.

11Kó ngayeje xotaa̱ kui tꞌanangii̱ xi botiñá nii̱ xi skja̱ndá ko̱jo ni̱ma̱ ku̱i̱chji̱a̱ ta̱ngatꞌanii̱ kui na̱xi̱ńdaá, ngatꞌa̱ ngiti̱ jmíjín xi kꞌo̱tsiee̱ ni xi ko̱tíñá, xikoó: 12Ni xi to̱nsinieé, ko̱jo ni xi to̱ntiboaa̱, ko̱jo ndi̱jo̱ tsjakoo̱n, ko̱jo to ixkiìꞌ, ko̱jo ńjño xi ndaa̱, ko̱jo ńjñoxiraa̱, ko̱jo ńjño xi koán, ko̱jo ńjño xi iní ꞌniú, ko̱jo ngayeje to̱ko̱ya yásije̱n, ko̱jo ni xi kamándani ndi̱ja̱a̱ ki̱ña̱, ko̱jo yá, ko̱jo bronse̱, ko̱jo ki̱cha̱, ko̱jo ndi̱jo̱ marmo̱l, 13ko̱jo tji̱bo̱a̱kanera̱, ko̱jo tosije̱n, ko̱jo nisije̱n xi niꞌánkjién nga niꞌándikón Néná, ko̱jo ndásíje̱n chjí xi ꞌmí mirra̱, ko̱jo ndásíje̱n xi kje̱ꞌe, ko̱jo bino̱, ko̱jo isti̱, ko̱jo ndso̱ko̱a̱n ṉño̱ xi kixꞌi, ko̱jo to ndso̱ko̱a̱n ṉño̱pan, ko̱jo cho̱ xi ꞌbiñájanjo̱ chꞌià, ko̱jo cho̱tsa̱nga̱, ko̱jo ndi̱je̱, ko̱jo karro̱, ko̱jo ngaskande moso̱ xi stiñá, ko̱jo ini̱ma̱a̱ xota̱. 14Kó bi̱ ka̱tso̱o̱ nangi Babilonia̱:

–¡Jè ngiti̱ jmíjiín kjo̱a̱cho̱n xi achichí kamátsjaá! ¡Jè kichajá ngayeje ni tsjakon xi kisꞌiee̱! ¡Kó nginijánjín sa̱ko̱ó kui nii̱!

15Kui xota̱ xi atíñá, ko̱jo xi tsꞌatsie ni, ko̱jo xi kamácho̱n ndokꞌóchji̱nií na̱xi̱ńdaá, kjin kꞌuíndonii̱ nga skja̱ndá ko̱jo nga ni̱ma̱ ka̱tso̱ ta̱ngatꞌanii̱ nga stsa̱kjonní nga sa̱tíjeé kui na̱xi̱ńdaá, 16kó bi̱ ka̱tso̱:

–¡Ni̱ma̱ xò, ni̱ma̱ xò ji, na̱xi̱ńdáꞌniú! Kui xi yajá ńjño nda, ńjño koán ko̱jo xi iní ꞌniú, xi kiniꞌánchonnii̱ ni to̱nsinié, to ixkìꞌ ko̱jo ndi̱jo̱ xi tsjakon, 17ngatꞌa̱ nga ta̱ ngo chií ora̱ nga kichajá ngayeje kui kjo̱a̱cho̱o̱n.

Kó ngayeje já xí tsꞌénxájo̱ tjotso yiꞌi ngi̱jin ndáchíkoón, ko̱jo ngayeje xota̱ xi ndyi̱tsꞌènxájin ngi̱jin ndáchíkoón kjin kisꞌińdoni, 18nga kamábe ṉdi̱i̱ nga kití kui na̱xi̱ńdaá, bi̱ katsó nga askjandáyà:

–Ñá na̱xi̱ńdá xi bo̱a̱ má kjiꞌi xikoó xi̱ꞌbi̱.

19Kó xa̱ iskjitjónjón to̱ko̱, ko̱jo askjandá, ko̱jo ni̱ma̱ katsó, kó bi̱ katsó nga askjandáyà:

–¡Ni̱ma̱ xò, ni̱ma̱ xò ji, na̱xi̱ńdáꞌniú! Kjo̱a̱cho̱n xi kamácho̱nni ngayeje xi kisꞌiee̱ tjotso yiꞌi ngi̱jin ndáchíkoón, ta̱ ngo tsí ora̱ nga kiniꞌánkjié. 20Ji, ndiꞌakꞌajmi, tsjangatamaa̱ ta̱ngatꞌanii̱ ni xi kamaá kui na̱xi̱ńdaá, kó tsjangatamajnú jún xi xota̱ na̱xi̱ńdá tsjiee̱, ko̱jo já apostro̱, ko̱jo jáchji̱ni̱e̱ꞌén, ngatꞌa̱ Néná ngije kixi̱ tsꞌén atíjeé, jè katsꞌéngojo̱ ni xi kiniꞌánjo̱jnú jún.

21Kó ngo ndítsjie xi ꞌniú tjiín ngaꞌniuú iskjininkꞌa ngo ndi̱jo̱ xi ja̱kjiꞌi ndi̱jo̱jee̱ molino̱ má kjiꞌi, kó tsꞌajmijin ngi̱jin ndáchíkoón, kó bi̱ katsó:

–Bi̱ tsꞌén si̱ꞌankjatsoón jí na̱xi̱ńdáꞌniú Babilonia̱, kó nginijánjín xcha̱ ngasee̱. 22Kó nginijánjín ko̱nda̱ꞌyá ngi̱ya ndi̱yàtiée̱ soó arpa̱, ko̱jo yána̱xo̱ ko̱jo tjio, ti̱nde ngiti̱ kꞌuiéjiín xota̱ xi sa̱ꞌín ngo xá, ti̱nde ngiti̱ ko̱nda̱ꞌyájín ndi̱jo̱o̱ molino̱, 23kó nginijánjín sa̱ꞌíntsijee̱n ndiꞌí xí tsꞌentsíjen, ti̱nde ngiti̱ ko̱nda̱ꞌyájín nda̱a̱ nda̱ xi ku̱i̱xaa̱n, ko̱jo nda̱a̱ na̱ xi ku̱i̱xaa̱n, ngatꞌa̱ xota̱ xi botiñá ko̱jo xi ꞌbotsie nii̱, kuí boá xi kisꞌiee̱ ngaꞌniú xí chji̱a̱ni tꞌanangii̱, kó kichꞌíṉche̱je ngayeje na̱xi̱ńdá ta̱ngatꞌanii̱ kjo̱a̱tjiꞌèe̱. 24Ngatꞌa̱ ki̱a̱ kui na̱xi̱ńdaá kasako jiín jáchji̱ni̱e̱ꞌe̱én Néná, ko̱jo xota̱ na̱xi̱ńdá tsjiee̱, ko̱jo ngayeje xota̱ xi kiniꞌánkꞌién ngayeje tꞌanangii̱.

Currently Selected:

Ni xi akakoo̱ 18: MAIX

Highlight

Compare

Copy