Ni xi akakoo̱ 14

Só xi kisie nga úchán ko̱jo yichán nijón mi̱ xotaa̱

1Kó kamábe an cho̱tsa̱nga̱a̱ nga sikónsón nga̱soón tji̱ngi̱ Sioo̱n xi tikón na̱xi̱ńdáꞌniú Jerusale̱n, kó ki̱a̱ síndojo̱ úchán ko̱jo yichán nijón mi̱ xota̱ xi síndoo̱ xtjien jaꞌeén cho̱tsa̱nga̱a̱, ko̱jo jaꞌeén Na̱ꞌmii̱. 2Kó tsintꞌie an ngo nda̱ xi kjindibáni ndiꞌakꞌajmii̱, xi kandaꞌyaá xikó má tsꞌén fonie nga ꞌbóka nínga nkꞌaa̱ ndáfoaa̱ ngo ndejèꞌ, xikó má tsꞌén fonie ngo cho̱ꞌo̱n, nda̱ xi tsintꞌie an xikó maá tsi kjín xota̱ xi ndyi̱tsꞌènkjánié arpa̱. 3Kó ngo só tja̱tsi̱e̱ kisie kje̱n nínga tikón xi botixómaá, ko̱jo kje̱n nínga síndo nga nijón kui xi síndoo̱, ko̱jo kje̱n xota̱ xi xchaá, kó nde ngojín xota̱ xi kisꞌijinkon nga kamaá kui soó, ta̱kuítsí nga úchán ko̱jo yichán nijón mi̱ xota̱ xi je ikꞌíchjítjé nga kaꞌnaxiéꞌá ngi̱jii̱n xota̱ xi síndo kui tꞌanangii̱. 4Kuí bí xota̱ xi katsꞌéndándíjín yojoo̱ tsi ínchjín kisꞌiee̱, ngatꞌa̱ síndo xo̱ngò boá. Kuí bí xi kijítji̱ngii̱ cho̱tsa̱nga̱a̱ ta̱ nínga kijí. Kuí bí xi ikꞌíchjítjé nga kaꞌnaxiéꞌá ngi̱jii̱n jáxíꞌín xi xikoó tsi ngo ni xi tjón xi kiniꞌánkꞌasꞌiee̱n Néná ko̱jo cho̱tsa̱nga̱a̱, 5kó nde ngo kjo̱a̱ndiso tsíchji̱a̱jín tsꞌoa, ngatꞌa̱ ta̱nisién tsjie síndo ngindyi̱ko̱n xi botixómaá.

Eén nga ján ndítsjiee̱

6Kó kamábe an ingo ndítsjie xi tsoꞌbátji̱e̱n ngamasiee̱n ndiꞌakꞌajmii̱, kó ngo éntjatsi̱e̱ xi májiín fe tsꞌényaꞌa, tsi̱ꞌe̱ nga ku̱i̱ꞌíni̱jmi̱ì ngayeje xota̱ xi síndo tꞌanangii̱, ko̱jo na̱xi̱ńdá, ko̱jo xtín xota̱, ko̱jo én, ko̱jo xota̱ na̱xi̱ńdá, 7kó bi̱ katsó nga ꞌniú tsíchji̱a̱:

–Cha̱ndikónjnú Néná, kó te̱ꞌéjnúu̱ kjo̱a̱je, ngatꞌa̱ jè jachó oraa̱ nga kui xi ko̱tíjeé xota̱ nga̱sondiee̱, kó ti̱ꞌandikónjnú kui xi katsꞌénda ndiꞌakꞌajmii̱, ko̱jo tꞌanangii̱, ko̱jo ndáchíkoón, ko̱jo ndáńchꞌií.

8Kó kijítji̱ngii̱ ingo ndítsjie xi bi̱ katsó:

–¡Jè kiniꞌánkjatsón, jè kiniꞌánkjatsón na̱xi̱ńdá Babilonia̱, kui xi katsꞌénchꞌi̱ ngayeje xota̱ na̱xi̱ńdá nga katsjaá binoo̱ kjo̱a̱tondoo̱!

9Kó kui ndítsjie xi ma jaán jaskan kijítji̱ngii̱, kó achichí ꞌniú tsíchji̱a̱ nga bi̱ katsó:

–Tsi tjín xi sa̱ꞌíndikón kuí cho̱ chꞌokjiꞌii̱ ko̱jo a̱sie̱én, kó tsi tsja̱ndiè nga sꞌi̱jñaa̱ chi̱bo̱a̱a̱ xtjien ko̱jo tsi tsja, 10Néná sa̱ꞌínxchán, kó ꞌniú sa̱ꞌínjeé, ngo kjo̱a̱ni̱ma̱ xi ꞌniú sa̱ꞌínkjaꞌa ngi̱jin ndiꞌí, ko̱jo ngi̱jin asufre̱ xi tjítí ngindyi̱ko̱n ndítsjiee̱ ko̱jo cho̱tsa̱nga̱a̱. 11Kó ṉdi̱i̱ kui kjo̱a̱ni̱ma̱ xi kjo̱a̱ꞌatio, ngatsjéni̱xtjin nga ko̱e̱je̱nijíngí. Kó sa̱ꞌínkjaꞌyájín nga ni̱xtjin ko̱jo nga ni̱xtji̱e̱n kui xi katsꞌéndikón kuí cho̱ chꞌokjiꞌii̱, ko̱jo a̱sie̱én, ko̱jo xi iskjíbé chi̱bo̱a̱a̱ jaꞌeén.

12Kꞌi̱e̱ bí nínga xcha̱ kjo̱a̱chiyákoón xota̱ na̱xi̱ńdá tsjiee̱, kui xi tsꞌénkjátjosón kjo̱a̱botíxomaa̱ Néná, ko̱jo xi sꞌijii̱n Kjisoo̱.

13Kó tsintꞌie an ngo nda̱ xi kjindibáni ndiꞌakꞌajmii̱ xi bi̱ katsóna:

–Títꞌe ji xo̱jo̱n kui nii̱: “Achichíra̱ tsjaa̱ kui xota̱ xi ko̱yà nga je katsꞌéngojo̱ yojoo̱ Ndi̱a̱ná ngayeje kui ni̱xtjin xi fií.”

“Jo̱o̱n, tsó A̱si̱énni̱xtjii̱n, sa̱ꞌínkjaꞌyájo̱ kjo̱a̱ni̱ma̱ ko̱jo kjo̱a̱niꞌii̱n, ngatꞌa̱ Néná tsja̱á ngo chjí kjo̱a̱a̱ ni nda xi je katsꞌén.”

Tꞌanangii̱ je ikichá ni xi kamátji̱e̱e̱

14Kó kamábe an ngo ṉdi̱ tiboa, kó nga̱soón kui ṉdi̱i̱ tikónsón ngo xi ja̱kjiꞌi ndií nda̱ xi̱ꞌii̱n má kjiꞌi, kui xi tikoón ngo korona̱ xi to̱nsinié to̱ko̱, kó ngo ki̱cha̱ntꞌi̱u̱a̱ kjiya tsja. 15Kó ingo ndítsjie jatjoxieni ngi̱ya na̱ngo̱xi̱i̱ xi ꞌniú askjandáyaá, nga tsíchji̱a̱jo kui xi tikónsón ṉdi̱i̱, kó bi̱ katsoó:

–¡Jè kamáxchá ni xi tjitjíe̱ tꞌanangii̱, ti̱chéje̱ni ji ki̱cha̱ntꞌi̱u̱a̱a̱, ngatꞌa̱ jè jachó chi̱bo̱a̱a̱, jè kichjí!

16Kó kui xi tikónsón ṉdi̱i̱ katsꞌénkjaꞌa ki̱cha̱ntꞌi̱u̱a̱a̱ tꞌanangii̱, kó jaꞌáꞌyá ni xi kamáxchá kuí nga̱sondiee̱.

17Kó ingo ndítsjie jataxie na̱ngo̱xi̱ xi tikón ndiꞌakꞌajmii̱, kó ti̱ ngo ki̱cha̱ntꞌi̱u̱a̱ xi yojó tjiyátsjà. 18Kó ingo ndítsjie jatjoni ki̱a̱ nínga tikón ṉchandikoón, kui xi tjiín xá nga ko̱tíxomaa̱ ndiꞌií, kó ꞌniú tsíchji̱a̱jo kui ndítsjie xi yaꞌa ki̱cha̱ntꞌi̱u̱a̱ xi yojoó, kó bi̱ katsoó:

–¡Ti̱chéje̱ni ji ki̱cha̱ntꞌi̱u̱a̱ yojòo̱ én tostsi̱jè xi tjín tꞌanangii̱, ngatꞌa̱ jè kichjí tostsi̱je̱è!

19Kó kui ndítsjiee̱, katsꞌénkjaꞌa ki̱cha̱ntꞌi̱u̱a̱a̱ nga̱són tꞌanangii̱, kó tsatie tostsi̱jè xi tjitjíe̱ nínga maxchá tostsi̱je̱è kꞌi̱e̱ tꞌanangii̱, sꞌe̱ jaskan indyiá ngo ni xi ta̱nisién je, kui xi niꞌántsꞌingíni kui too̱, kó kui nii̱ xi bokó kjo̱a̱xcha̱án Néná. 20Kó kajnánié ndi̱tsee̱n na̱xi̱ńdaá, ki̱a̱ nínga kiniꞌántsꞌingí tostsi̱je̱è, kó kui ni xi tjingií nínga kjiꞌbóka ndáfoaa̱, jín jatjo, kó ngaskande nínga tikón ki̱cha̱ xi foaꞌa tsꞌoa ndi̱je̱e̱, ki̱a̱ kjin jachó kui jiín, kó ján úchán kilometro̱ nínga kixindyia.

Currently Selected:

Ni xi akakoo̱ 14: MAIX

Highlight

Compare

Copy