Ni xi akakoo̱ 12

Naa̱ ko̱jo cho̱ tamá xí yito to̱koo̱

1Kó kamáyà ndiꞌakꞌajmi jàn ngo chi̱bo̱a̱ xi ta̱nisién je: Ngo na̱ xi tjítsakjájón tsꞌueé xikoó tsi chi̱nga̱a̱, kó saá ngindie se kui naa̱ kisꞌijña, kó ngo korona̱ xi tjiín tiejó ńño kisꞌijñaa̱ to̱ko̱, 2kó kui naa̱ ndí yaꞌa, kó achichí askjandáyajo̱ tsi̱ndi̱o̱o̱ ndií, ngatꞌa̱ tsie kjo̱a̱ni̱ma̱ jaꞌatio nga je stse̱n ndií. 3Kó kamáyà ndiꞌakꞌajmi jàn ingo chi̱bo̱a̱: Ngo cho̱ tamá xí yito to̱ko̱ xi iní, xi tie ndi̱ja̱ tjiín, kó ngo korona̱ tjiꞌá nga ngo nga ngo to̱ko̱ xi yitoo̱, 4kó ńtsꞌen kui cho̱o̱ iskjiféni ngo nga ján bo̱a̱ kjiꞌi xikó kjiꞌi ma ńño xi tjín ndiꞌakꞌajmii̱, kó ki̱a̱ atítsojo nga̱soón tꞌanangii̱, kó kui cho̱ tamá xí yito to̱koo̱, ki̱a̱ kasasien kje̱n nínga tikón kui na̱ xi je stse̱n ndií, tsi̱ꞌe̱ nga skji̱ni̱e̱ kui ndií ngije katsen. 5Kó kui naa̱ ngo ndí xíꞌín kisꞌiee̱, kui xi tajá tsꞌén ko̱tíxomaa̱ ngayeje na̱xi̱ńdá xí tjín kuí nga̱sondiee̱, kó kachjeꞌéxiín ndií, kó tsangínjo̱ ngindyi̱ko̱n Néná xí botixómaá. 6Kó kui naa̱ tsanga nínga tikón nangi kixií, nínga Néná íjñandaa̱ ngo ngi̱ndie tsi̱ꞌe̱ nga ki̱a̱ ko̱e̱ꞌeé ni xi skji̱ni̱e̱ ngo mi̱ jó úchán ichítié ko̱jo tie ni̱xtjin.

7Kó jaskan ítsꞌi̱yanii̱ ngo kjo̱a̱xchán ndiꞌakꞌajmii̱: Ndítsjie ngito̱ko̱ xi ꞌmí Miyee̱, ko̱jo ndítsjie xi tjimájo̱ askjanjo̱ kui cho̱ tamá xí yito to̱koo̱. Kó kui cho̱ tamá xí yito to̱koo̱ nijan askjan ko̱jo ndítsjiee̱, 8ta̱nga kamájiín katsꞌeén, kó ngiti̱ jmí ngi̱ndie kisꞌiejiín kui cho̱o̱ ko̱jo ndítsjiee̱ ki̱a̱ ndiꞌakꞌajmii̱. 9Kó bo̱a̱ tsꞌén ikiyotji̱ngii̱ kui cho̱ tamá xí yito to̱koo̱ ki̱a̱ ndiꞌakꞌajmii̱, kui ye̱ xchaá xi ꞌmí xindajín ndiabloo̱ ko̱jo Satanaa̱, kui xi ꞌboṉcha̱jo ngayeje xotaa̱, kui cho̱o̱ ko̱jo ndítsjiee̱ ki̱a̱ akatítsojosón nga̱són tꞌanangii̱.

10Kó tsintꞌie an ngo nda̱ xi ꞌniú tsíchji̱a̱ ndiꞌakꞌajmii̱ xi bi̱ katsó:

–Jè jeꞌe kjo̱a̱ꞌnaxiéꞌaá, ko̱jo ngaꞌniuú, ko̱jo kjo̱a̱botíxomaa̱ Néná, ko̱jo xaá Kristoo̱, ngatꞌa̱ jè ikiyotji̱ngii̱ kui xi tsꞌénbongítaꞌin ntsꞌié, kui xi nga ni̱xtjin ko̱jo nga ni̱xtji̱e̱n nga yíngítaꞌin ngindyi̱ko̱n Néná. 11Kó kui ntsꞌié jè katsꞌeén ngatꞌaa̱ kui jín xí iskjitjón cho̱tsa̱nga̱a̱ ko̱jo kui én xí tsíchji̱a̱a̱, katsakjónjín nga xcha̱ja kjo̱a̱mindyioo̱n, ta̱sá kamámejeén nga ngaskande jesón. 12Kuíni nga tsjangatamaa̱ ndiꞌakꞌajmii̱, ko̱jo jún xi ki̱a̱ tindyiónjnú, ta̱nga ni̱ma̱ xò kuí xota̱ xi síndo tꞌanangii̱, ko̱jo xi síndo ngi̱jin ndáchíkoón, ngatꞌa̱ xindajín ndiabloo̱ je jachókónjnú nga ꞌniú tjitsꞌénxchán, kó nga je be nga ta̱ chiboa tsí ni̱xtjin tikoón.

13Kó kui cho̱ tamá xí yito to̱koo̱, nga kamábe nga je akjajmisón tꞌanangii̱, tsangatji̱ngii̱ kui na̱ xi je kisꞌiee̱ ngo ndí xíꞌiín. 14Kó kui naa̱ jó nga̱a̱ ja̱ xi ta̱nisién yiꞌi katseꞌeé, tsi̱ꞌe̱ nga kjo̱tji̱e̱n kje̱n kui ye̱e̱, nga ko̱e̱je̱ nínga tikón ngi̱ndiee̱ kui naa̱ ki̱a̱ nangi kixií, nínga ko̱e̱ꞌeé ni xi skji̱ni̱e̱ ján nó masien. 15Kó kui ye̱e̱ achichí ndáfoa katsꞌénkjasó, tsi̱ꞌe̱ nga ngo ndejèꞌ sa̱ꞌínda xi ko̱e̱je̱tjiboajo̱ kui naa̱. 16Kó tꞌanangii̱ asíko̱jo kui naa̱, ngatꞌa̱ ngo ti̱xa̱ iskjíxꞌá xikoó tsi tsꞌoa tꞌanangii̱, kó katjéjén kui ndejèꞌ xi katsꞌénkjasóni kui cho̱ tamá xí yito to̱koo̱. 17Kó ta̱ngatꞌanii̱ kui nii̱ nga kui cho̱ tamá xí yito to̱koo̱, achichí katsꞌénxchán kjo̱a̱a̱ kui xota̱chjo̱on, kó kijíkjánjo̱ ngayeje ndí xí ngasee̱ kui naa̱, kui xi ndyi̱ntꞌièꞌén nga ndyi̱tsꞌènkjátjosón kjo̱a̱botíxomaa̱ Néná ko̱jo kui xi ꞌniátakón ni xi katsꞌén Jesukristoo̱, 18kó kui cho̱ tamá xí yito to̱koo̱ ki̱a̱ kisꞌijñatꞌa ndáchíkoón.

Currently Selected:

Ni xi akakoo̱ 12: MAIX

Highlight

Compare

Copy