Xo̱jo̱n Salmoo̱ 68
68
Néná boá xi ngatsjéni̱xtjin tsꞌén
Só xi katsꞌénda Ndabii̱.
1¡Ye ꞌne̱ Ne, ti̱sítji̱n Ji, kó ti̱ꞌintsojoboe Ji kondra̱a̱!
¡Ti̱ꞌin ji nga ko̱ngandikón ngindyikin Ji, xota̱ xi chꞌoo̱ Ji!
2¡Ti̱ꞌin Ji nga xcha̱ja ndo̱jò ndójo̱, xikótsꞌèn chaja ṉdi̱i̱!
Ngatjie xikó má tsꞌén fe ndo̱ꞌo̱si̱e̱én ngi̱jin ndiꞌií.
Bo̱a̱ tsꞌén ngatjie xota̱ xi ꞌniú ndajiín ngindyi̱ko̱n Néná.
3Ta̱nga tsjangatamaa̱ xota̱ xi kixi̱i̱,
tsjangatamaa̱ ngindyi̱ko̱n Néná,
¡jo̱o̱n, ngakjínkꞌá má nga tsjangatamaa̱!
4Ndàjnúu̱ Néná. Ndàjnúu̱ salmo̱ nga si̱ꞌankjiénjnú Jaꞌeén.
Tꞌíjñandajnúu̱ ndi̱ya̱à Kui xi fotsoꞌbásón nga̱són ṉdi̱i̱.
¡Kuí boá xi ꞌmí Néná!
¡Tsjangatamajnú ngindyi̱ko̱n kui!
5Néná boá xi na̱ꞌmii̱ xota̱ xi síndo xꞌi̱a̱a̱n,
kó Kuí boá xi koo̱n ínchjín kꞌán xi je jesón xi̱ꞌii̱n,
kuí boá xi Néná, ki̱a̱ Ndiꞌandikón nínga tikón.
6Kuí boá kui Néná xí tsjaá ngo ndiꞌa xota̱ xi tjimásoón,
kó tsꞌéndé xota̱ xi síndo ndo̱bo̱a̱ya̱à, tsi̱ꞌe̱ nga nda ko̱e̱je̱e̱,
ta̱nga xota̱ xi ntꞌiéꞌénjiín, ki̱a̱ ꞌbíndo soboá ki̱a̱ tꞌanangi kixií.
7Ji Ne, kjiꞌanga kꞌintjée̱n xota̱ na̱xi̱ńdáa̱,
kjiꞌanga kisꞌińtje̱ Ji ki̱a̱ nangi kixií,
8tꞌanangii̱ jatsié, kó nkꞌajmii̱ katsꞌénkaꞌa stsé,
ngindyi̱ko̱n Néná xí chji̱a̱ni Na̱xi̱ Sinaii̱,
ngindyi̱ko̱n Néná, kui xi Nee̱ xota̱ Israee̱l.
9Ji Ne, Jí boá xi achichí stsé kanangiye Ji,
kó katseꞌéngaꞌní nginíi̱ tꞌanangi xi Ji katseꞌéjne̱.
10Kó xota̱ xi tse̱ ki̱a̱ kisꞌińdo kui tꞌanangii̱,
kui tꞌanangi xi ta̱ngatꞌanii̱ nga ndaxota̱ Ji nga ikꞌíjñinde Ji tsi̱ꞌe̱ xota̱ xi ni̱ma̱a̱.
11Néná boá xi katsjá ngo én.
¡Achichí kjín mi̱ ínchjín xí katsóyà kuí eén!
12Já ree̱ ko̱jo jájuún xi tsá xi boaꞌa ndyi̱monga.
Kó ínchjín xí kisꞌińdo ki̱a̱ ndiꞌaa̱, akjángá kjo̱a̱cho̱n xi jaꞌáxiín kondraa̱.
13Tji̱e̱nga jún ki̱a̱ katsjayojoféjnú ki̱a̱ ngi̱jin ndi̱jo̱ na̱xi̱i̱,
nga̱a̱ tójoo̱, to̱ntiboa kisꞌijonni,
kó to̱nsinié xi ꞌna̱a̱ kisꞌijon tsja̱nga̱a̱.
14Kjiꞌanga Néná xí tsi̱ꞌe̱ ngayeje ngaꞌniuú tsangatji̱ngii̱ já ree̱,
nchꞌàn ixó ki̱a̱ nangi soón na̱xi̱ Salmoo̱n.
15Na̱xi̱i̱ Néná boá na̱xi̱ Basaa̱n,
achichí nkꞌa na̱xi̱i̱ nangi Basaa̱n.
16Jún na̱xi̱ xi ꞌniú nkꞌa, ánní nga ma onkonjnú nga tsitsijenjnúu̱,
kui na̱xi̱ xi Néná jè jaꞌájin, nga ki̱a̱ kꞌuijñá Kuí,
ja̱koxi̱ boá nga Néná ki̱a̱ kꞌuijñá ngatsjéni̱xtjin.
17Achichí kjín mi̱ tosena̱ ma karro̱ xi tsꞌénkjién Néná tsi̱ꞌe̱ kjo̱a̱xcha̱án,
ndeskande ki̱a̱ na̱xi̱ Sinaii̱ ndibání Néná nga fí Ndiꞌandikoón.
18Kꞌinnijíngí Ji ki̱a̱ nínga nkꞌaa̱, nga kꞌinje̱ Ji xota̱ xi síndoꞌniuú,
ki̱a̱ kachjábé Jí kjo̱a̱tjó xi kiniꞌínkꞌasꞌíi̱n xota̱ nga̱sondiee̱,
kó ngaskande ko̱jo xota̱ xi kitikjo̱a̱a̱ katseꞌée̱ nga,
kó ki̱a̱ kixindyinjìi̱n kui xotaa̱ Ji Ne.
19¡Ngatamachikonñé Néná!
¡Néná xí ꞌboxiéꞌáná, ndyiojón ndyiojón boaꞌanijín chꞌiàná!
20Néná boá kui Néná xi ꞌboxiéꞌáná,
kó Kuí boá xi ꞌboxiéꞌáná ngi̱ya tsja kjo̱a̱bo̱yaa̱.
21Nga ja̱koxi̱ Néná boá xi sa̱ꞌínꞌoón to̱ko̱ xota̱ xi kondra̱a̱,
kui to̱ko̱ tjen toko xota̱ xi ngatsjéni̱xtjin nga ndyi̱tsꞌènjeé.
22Néná jè bi̱ katsó:
Án boá xi sa̱ꞌinkjindibáꞌóyá nginí An ndeskande nangi Basaa̱n,
kó sa̱ꞌinkjindibáꞌóyá nginí An ndeskande nínga na̱nga̱a̱ ndáchíkoón,
23tsi̱ꞌe̱ nga ndsa̱ki ji tsja̱jin jiín kondra̱a̱,
kó ngaskande ńñáa̱ xto̱mójón kui jiín.
24¡Jè ya xota̱ xi tjimátji̱ngii̱ Ji Ne!
Xota̱ xi tjimájo̱ Néna, kui xi Rena, nga ndyi̱fí Ndiꞌandikoón.
25Xota̱ xi siee̱ boá xi tjimátjón,
sꞌe̱ jaskan tjimá já xí tsꞌénkjánieé,
kó ki̱a̱ ngi̱jii̱n ndyi̱fí ínchjín xo̱ngò xí tsꞌénkjánié panderoo̱.
26¡Nda ndókjo̱a̱jnú kjo̱a̱a̱ Néná ki̱a̱ ngi̱jii̱n xota̱ xi matikoó,
ti̱ꞌantsjàjnúu̱ Néná jún xi xota̱ Israee̱l jún!
27Ki̱a̱ boá nínga tikón ngito̱ko̱ Benjaa̱, kui nda̱ xi kjindí ngasee̱,
ki̱a̱ nijan tikónjo̱ xota̱ xi ꞌniú yandikón xi chji̱a̱ni Jundáa̱,
ko̱jo xi chji̱a̱ni Sabuloo̱n, ko̱jo xi chji̱a̱ni Neftalii̱.
28Nèe̱ boá xi je íjñanda ngaꞌniú xí tjiín jí.
¡Ji Ne, take Ji nga bo̱a̱ kjiꞌi ni xi kiniꞌín Ji ngi̱jinjne̱ ngasꞌe̱!
29Ji Ne, ta̱ngatꞌanii̱ na̱ngo̱xi̱i̱ xi tikón ki̱a̱ na̱xi̱ńdáꞌniú Jerusale̱n,
nga já ree̱ kjo̱chójoo̱ ni xi tsjakon.
30Ti̱ꞌinxchínje̱ Ji kui xota̱ xi xikó maá cho̱ tamá xí síndo ngi̱ndyió na̱xi̱i̱,
kui xi xikó maá ngo xtín cho̱yojo toro̱,
ko̱jo kui xi xikó maá ndií cho̱yojo xi tsi̱ꞌe̱ na̱xi̱ńdaá,
kui xi ndyi̱tsjánié to̱ntiboaa̱.
¡Ti̱ꞌintsojoboe ji xota̱ na̱xi̱ńdá xí achichí tsjá maá kjo̱a̱xcha̱án!
31Nangi Ejipto̱ kji̱ndi̱báni xota̱ xi tjiín xaá,
kó nangi Etiopía̱ achichí tsá tsja̱á tsja Néná.
32¡Ngayeje jún xota̱ xi tꞌanangii̱ ndokjo̱a̱nijnú, ndàjnúu̱ Néná,
ndàjnúu̱ salmo̱ Néná!
33Kui xi fotsoꞌbásón nga̱soón nkꞌajmii̱, ndeskande ni̱xtjin xchá jàn.
¡Tsitsíjenjnú! Nga Kuí boá xi chji̱a̱, kó ꞌniú ndaꞌyaá nda̱a̱.
34¡Ti̱ꞌankiejnú yojojnú kjo̱a̱a̱ ngaꞌniú xí tjiín Néná!
¡Nga̱soón na̱xi̱ńdá Israee̱l ngatamaya kjo̱a̱yandikoón,
kó ngatamaya ngaꞌniuú ki̱a̱ nkꞌajmii̱!
35¡Ji Ne, achichí je yaa̱ nga tindyin Ji Ndiꞌandikóo̱n!
Néná xí tsi̱ꞌe̱ xota̱ Israee̱l kuí boá xi tsjaá ngaꞌniú xota̱ na̱xi̱ńdaá.
¡Ngatamachikonñé Néná!
Currently Selected:
Xo̱jo̱n Salmoo̱ 68: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
