Xo̱jo̱n Salmoo̱ 145
145
Achichí kjo̱a̱je tjiín Néná
Ndabii̱ katsꞌénda kui só xi niꞌántsjànii̱ Néná.
1Án boá xi sa̱ꞌintsjaà Ne tsa̱ꞌa̱n, ko̱jo Re tsa̱ꞌa̱n,
ngatsjéni̱xtjin ko̱jo ta̱kjiꞌání nga nda tsꞌén kuichjiá an kjo̱a̱a̱ jaꞌée̱n.
2Ndyiojón ndyiojón nga nda tsꞌén kuichjiá an kjo̱a̱a̱ Ji,
kó ngatsjéni̱xtjin ko̱jo ta̱kjiꞌání nga sa̱ꞌintsjáa̱ Jaꞌée̱n.
3Achichí kjo̱a̱je xi tjiín Néná,
kó tsoboaári nga ꞌniú si̱ꞌantsjaa̱ Kui.
Kó kjo̱a̱je xi tjiín jmíjín xi makjiín.
4Xki̱ tji̱e̱, xki̱ tji̱e̱e̱ xota̱ xi sa̱ꞌíntsjaà ni xi kiniꞌín Ji,
kó ka̱tso̱ya ni yiꞌi xi kiniꞌín Ji.
5Sa̱ꞌinkjó án kjo̱a̱a̱ kjo̱a̱tsjakjiꞌi xi tjiín kjo̱a̱jèe̱ nga botíxome Ji,
ko̱jo kjo̱a̱a̱ ni xi fíndikónná xí kiniꞌín Ji.
6Ku̱i̱chji̱a̱ kjo̱a̱a̱ ngaꞌniú xí tjiín ni xi fíndikónná xí kiniꞌín Ji,
kó án boá xi xiyà an kjo̱a̱a̱ kjo̱a̱jèe̱.
7Ku̱i̱chji̱a̱ kjo̱a̱a̱ kjo̱a̱foaꞌátsjien xi tjiín kjo̱a̱ndàa̱,
kó tsja ka̱maa̱ nga si̱é kjo̱a̱a̱ kjo̱a̱kixi̱i̱.
8Achichí tjó ko̱jo ni̱ma̱takón tsꞌénjo̱ná Néná,
tsájín tsꞌénxchán, kó achichí kjo̱a̱ni̱ma̱takón tjiín.
9Néná nda tsꞌénjo̱ ngayeje xotaa̱,
kó ngayeje ni xi katsꞌén Kuí xi tjiín kjo̱a̱ni̱ma̱takoón.
10¡Ji Ne, ngayeje xi kiniꞌínde Ji xi ngatsꞌèntsjaà!
¡Kó xota̱ tsjiée̱ nda ngatíchji̱a̱ kjo̱a̱a̱ Ji!
11¡Ngatíchji̱a̱ kjo̱a̱a̱ kjo̱a̱je xi tjiín ngi̱ndie nínga botíxome Ji,
ngatíchji̱a̱ kjo̱a̱a̱ ngaꞌniú xí tjiín Jí.
12Tsi̱ꞌe̱ nga sku̱i̱e̱ xota̱ nga̱sondiee̱ ni xi tjiín ngaꞌniú xí kiniꞌín Ji,
ko̱jo kjo̱a̱je xi tjiín ngi̱ndie nínga botíxome Ji.
13Ngi̱ndie nínga botíxome Ji, ngatsjéni̱xtjin nga tikón,
kó kjo̱a̱botíxomáa̱, ta̱kjiꞌání nga kꞌuijñá.
14Néná boá xi bóꞌniú ngayeje xota̱ xi je mejeén ku̱i̱xo̱o̱,
kó kjininkꞌa ngayeje xi je kjife ngaꞌniuú.
15Ngayeje xotaa̱, Jí boá xi ndyi̱kotsijee̱n,
nga ndyi̱koya nga Ji xi ko̱e̱ꞌée̱ nichinie nga ni̱xtjii̱n má.
16Chjéxꞌé Jí ndse̱, kó niꞌínkjié Ji kjo̱a̱bojoó ngayeje xi síndo nga̱sondiee̱.
17Kixi̱ boá Néná kjo̱a̱a̱ ngayeje ndi̱yà xí tsi̱ꞌe̱,
kó tjiín kjo̱a̱ni̱ma̱takón kjo̱a̱a̱ ngayeje ni xi katsꞌénda.
18Achichí tiña tikoón Néná, ngayeje xota̱ xi chji̱a̱a̱ Kui,
ngayeje xota̱ xi ngayeje ini̱ma̱a̱ nga chji̱a̱a̱ Kui.
19Néná boá xi sa̱ꞌínkjatjosón ni xi ku̱i̱ꞌaa̱ xota̱ xi bendikón Kuí,
kó ku̱i̱ntꞌie̱é nga ni̱ma̱ ka̱tso̱ nga ku̱i̱chji̱a̱a̱, kó kꞌo̱xiéꞌá.
20Néná koón ngayeje xota̱ xi tjoó Kui,
ta̱nga sa̱ꞌínkjié boá ngayeje xota̱ xi ꞌniú ndajiín.
21Ndso̱ꞌba án sa̱ꞌíntsjaà Néná.
¡Ngayeje xota̱ nga̱sondiee̱, nda ngatíchji̱a̱ kjo̱a̱a̱ Jaꞌén tsjiee̱ Néná,
ngatsjéni̱xtjin, ko̱jo ta̱kjiꞌání!
Currently Selected:
Xo̱jo̱n Salmoo̱ 145: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
