Xo̱jo̱n Salmoo̱ 132
132
Ni xi Néná katsóyàtjón nga sa̱ꞌínjo̱ Ndabii̱
1Ji Ne, ngatjaꞌátsjiee̱n Ndabii̱ ko̱jo ngayeje kjo̱a̱ni̱ma̱ xi jaꞌatio,
2ngatjaꞌátsjiee̱n ni xi katsóyàtjoón Jí,
Ji xi Nee̱ Jakoo̱b Ji, Ji xi tjiín Ngaꞌniú.
3Nga ja̱koxi̱ kꞌosꞌi̱e̱njín an ndiꞌana,
ti̱nde kjuínnijíngíjín an ngi̱yaꞌmana ndiꞌana nínga tsꞌenkjaꞌyá an.
4Nga ja̱koxi̱ kjófe̱jín an,
ti̱nde kꞌuikjojín an ndyikón án,
5ngaskande nga sa̱kóna ngo ngi̱ndie tsi̱ꞌe̱ Néná,
nínga sa̱ꞌinda an Ndiꞌandikoón Nee̱ Jakoo̱b xi tjiín ngaꞌniuú.
6Kꞌi̱e̱ Efrata̱ kandaꞌyájne̱ kjo̱a̱a̱ koxa̱a̱ kjo̱a̱ꞌbíndaa̱,
kó ki̱a̱ kasakojne̱ ki̱a̱ na̱xi̱ńdáꞌniú Kiriaa̱t-Jearii̱n.
7Ku̱i̱tjásꞌi̱e̱n Ndiꞌandikoón Néná,
kó tjianki̱ndyiá tikóná ngi̱ndie se kui.
8¡Ji Ne, ja̱bíꞌi̱n, kó ndibé Jí kꞌi̱e̱ ngi̱ndie nínga niꞌínkjaꞌyé Ji,
ndibé Jí ko̱jo koxa̱a̱ kjo̱a̱ꞌbíndàa̱, kui xi bokó ngaꞌniú xí tjiín!
9¡Já chináꞌmìi̱, ngatajá ńjño xi bokó kjo̱a̱kixi̱i̱,
kó xota̱ na̱xi̱ńdá tsjiée̱, ꞌniú nga kjandayà tsjá!
10Ta̱ngatꞌanii̱ nga tjó kamaá mosòo̱ Ndabii̱,
ngata̱ niꞌínchꞌíjín Ji kui nda̱ xi ji kachjeꞌéjin Ji.
11Nga ja̱koxi̱ Néná katsjaá tsꞌoa Ndabii̱, kó ko̱e̱je̱jínni nga̱xto̱n.
Ngo xota̱ tji̱e̱e̱ xi sa̱ꞌin An nga kui xi ko̱tíxoma nínga botíxome ji.
12Tsi ndíi̱ sa̱ꞌínkjatjosón ni xi inda an ko̱jo kjo̱a̱kitina, Án boá xi kokoyáa̱,
kó ko̱jo ndií kui, ngatsjéni̱xtjin nga kui ko̱tíxoma ngi̱ndièe̱.
13Ngatꞌa̱ Néná boá xi jaꞌájin na̱xi̱ńdáꞌniú Sioo̱n,
kó kamámejeén nga ki̱a̱ sa̱ꞌín ndiꞌa nínga kꞌuijñá.
Kó bi̱ katsó kuí:
14Kꞌi̱e̱ bí nínga ngatsjéni̱xtjin kꞌuijñá ngi̱ndie nínga sa̱ꞌínkjaꞌyá An,
kꞌi̱e̱ bí nínga kotíjña̱ An, ngatꞌa̱ jè bo̱a̱ tsꞌén kamámejénna An.
15Achichí ꞌniú sa̱ꞌínchikonñé An nichinie xi kꞌuieé,
kó nda sa̱ꞌintsièe̱ xota̱ ni̱ma̱a̱ nga tsjáa̱ nichinie.
16Ńjño xi chajá nga ꞌnaxiéꞌáná sa̱ꞌinkajá An já chináꞌmii̱,
kó xota̱ na̱xi̱ńdá tsjiee̱ skja̱ndáyátsjá má.
17Ki̱a̱ boá nínga sa̱ꞌin An nga ku̱i̱ꞌíńtsꞌién ngo ꞌYo̱ xi kꞌuieé Ndabii̱,
kó ngo ndiꞌí xí tsꞌentsíjenná je tikóndana tsi̱ꞌe̱ kui nda̱ xi je jaꞌajin An.
18Kjo̱a̱soboá boá xi tsjáa̱ kondra̱a̱ kui,
ta̱nga Ndabii̱ boá xi kꞌuijñá ꞌna̱ ꞌna̱ Án koronaa̱.
Currently Selected:
Xo̱jo̱n Salmoo̱ 132: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
