Xo̱jo̱n Salmoo̱ 118
118
Néná tjoó ñá
1Te̱ꞌéjnúu̱ ndokꞌóchji̱ì Néná, ngatꞌa̱ achichí ndaxota̱ kui.
Ngatꞌa̱ ngatsjéni̱xtjin nga tjiín kjo̱a̱ni̱ma̱takón.
2Bi̱ nga tsó ngotꞌe̱ xota̱ Israee̱l:
¡Ngatsjéni̱xtjin nga tjiín kjo̱a̱ni̱ma̱takón!
3Bi̱ nga tsó ngotꞌe̱ xota̱ tji̱e̱e̱ Aaroo̱n:
¡Ngatsjéni̱xtjin nga tjiín kjo̱a̱ni̱ma̱takón!
4Bi̱ nga tsó ngotꞌe̱ xota̱ xi bendikón Néná:
¡Ngatsjéni̱xtjin nga tjiín kjo̱a̱ni̱ma̱takón!
5Kjiꞌanga achichí nda̱ kamána, ni̱ma̱ kixian an nga tsíchji̱a̱a̱ Néná,
kó kuí katsꞌénsénna, kó katsꞌéndéna.
6Néná boá xi tikónjo̱na, kó stsakjonjín an,
ni xi ka̱maa̱ sa̱ꞌínjo̱na xota̱ nga̱sondiee̱.
7Néná boá xi tikónjo̱na, ki̱a̱ ngi̱jii̱n xota̱ xi bosikójona.
Kuíni nga ja̱koxi̱ boá nga skuie an, nga si̱ꞌankjie xota̱ xi chꞌoo̱ an.
8Chjí ngasenii̱ nga Néná xí ka̱maꞌniátakón,
ta̱bo̱a̱jiín tsi xota̱ nga̱sondiee̱.
9Chjí ngasenii̱ nga Néná xí ka̱maꞌniátakón,
ta̱bo̱a̱jiín tsi xota̱ xi yandikoón.
10Ngayeje na̱xi̱ńdaá, an jaꞌatjiyajonna,
ta̱nga nga ja̱koxi̱ Jaꞌeén Néná boá xi sa̱ꞌinkjièn án nga sa̱ꞌinkjié an.
11Jaꞌatjiyajonna, jo̱o̱n, jaꞌatjiyajonna,
ta̱nga nga ja̱koxi̱ Jaꞌeén Néná boá xi sa̱ꞌinkjièn án nga sa̱ꞌinkjié an.
12Jaꞌatjiyajonna xikó maá cho̱ndo̱ꞌo̱sièn,
ta̱nga kití ngi̱jin ndiꞌií, xikó maá ndaꞌyaá.
Néná boá xi asíko̱jona nga katsꞌée̱n.
13Katsangińña xchánna tsi̱ꞌe̱ nga kꞌo̱ka an,
ta̱nga Néná boá xi asíko̱jona.
14Néná boá xi ngaꞌniúna, kó kuí boá xi siée̱,
Néná boá xi kamá kui xi ꞌboxiéꞌána.
15¡Achichí tsjátjiín nga ndyi̱chji̱a̱ ki̱a̱ ndiꞌańjñoo̱ xota̱ xi kixi̱i̱, ko̱jo kjo̱a̱a̱ nga je jatjoꞌa!
¡Ngaꞌniuú Néná tsꞌén ni xi fíndikónná!
16¡Ngaꞌniuú Néná je nkꞌa katjoninkꞌa!
¡Ngaꞌniuú Néná tsꞌén ni xi fíndikónná!
17Ko̱yàjín an, ta̱sá kotíjña̱ ngase an,
kó kuichjiá an ni xi je katsꞌén Néná.
18Achichí ꞌniú atíjéna Néná,
ta̱nga katsꞌénkꞌasꞌiénjínna ngi̱ya tsja kjo̱a̱bo̱yaa̱.
19Chjáxꞌájnúꞌun nga̱ntjo̱a̱a̱ kjo̱a̱kixi̱i̱,
ki̱a̱ kꞌosꞌi̱e̱n an, kó sa̱ꞌintsjáa̱ Néná.
20Kuí bí xi̱ꞌbi̱ xi nga̱ntjo̱a̱a̱ Néná,
kó ki̱a̱ boá nínga kꞌo̱sꞌienni xota̱ xi kixi̱i̱.
21Sa̱ꞌintsjaà Ji Ne, ngatꞌa̱ je kandaꞌyéní,
kó Jí boá xi kamá Ji xi kꞌo̱xiéꞌána.
22Ndi̱jo̱ xi katsꞌénchꞌó já chji̱ni̱e̱xo̱ó,
kuí boá xi kamá ndi̱jo̱ ngaꞌniuú ndiꞌaa̱.
23Néná boá xi katsꞌén kui nii̱,
kó achichí fíndikoón ndyikón.
24Kuí bí kui ni̱xtjii̱n xi katsꞌénda Néná.
¡Tsjangatꞌiéná, kó tsjatsꞌèn ku̱i̱ndyión ngatꞌaa̱ Néná!
25ꞌNiú chjiáꞌájne̱ Ji Ne: ¡ꞌNa̱xiéꞌéjne̱ ngotꞌe̱!
ꞌNiú chjiáꞌájne̱ Ji Ne: ¡Te̱ꞌéndiè Ji nga nda ko̱e̱je̱jne̱!
26¡Ngatamachikonñé xi tsꞌéndibání Jaꞌeén Néná!
Ndeskande Ndiꞌaa̱ Néná ndyi̱niꞌánchikonñéjne̱.
27Kuí boá xi Néná, kó jè katsjáná ndiꞌií.
¡Tꞌítaꞌniújnú cho̱ xi si̱ꞌankꞌasꞌien nga ka̱ma sꞌué ndikoón,
ki̱a̱ nínga síndo ndi̱ja̱a̱ ṉchandikoón!
28Jí boá xi Néna Ji, kuíni nga tsjaa ndokꞌóchji̱ì,
Jí boá xi Néna Ji, kó Jí boá xi tsjaa kjo̱a̱je.
29Te̱ꞌéjnúu̱ ndokꞌóchji̱ì Néná, ngatꞌa̱ achichí ndaxota̱,
¡ngatꞌa̱ ngatsjéni̱xtjin nga tjiín kjo̱a̱ni̱ma̱takón!
Currently Selected:
Xo̱jo̱n Salmoo̱ 118: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
