Énkjínkón 9
9
Kjo̱a̱kjínkoón ko̱jo kjo̱a̱kitikjo̱a̱a̱
1Kjo̱a̱kjínkoón xikónií tsi ngo ndiꞌa katsꞌénda
kó yito yásé índoo̱.
2Kó xikónií tsi ti̱ katsꞌénda ngo sꞌué,
nínga katsjá yojo xi chinie ko̱jo bino̱ xi nda ngasee̱.
Kó ngije tikónda yámíxa̱a̱,
3katsangiya chji̱ni̱e̱ꞌe̱én xí ínchjiín,
ki̱a̱ xtji̱e̱e̱n nínga nkꞌaa̱ na̱xi̱ńdaá,
tsi̱ꞌe̱ nga ndeskande ki̱a̱a̱ bi̱ ka̱tso̱ nga skja̱ndáyà:
4Jún ndí i̱xtikjindí xo̱ngò xi kji̱e̱ jmí ni májínjnú,
ndibáchonjnúꞌun kꞌi̱e̱e̱,
jún xi niꞌánkjójínjnú ni xi niꞌánjnú,
5ndibá chi̱ni̱e̱jnú ni chiniena,
ndibá tꞌi̱o̱jnú bino̱ xi je tikóndana.
6Tꞌíjñámasiénjnú kjo̱a̱chi̱nii̱,
tsi mejénjnú nga ku̱i̱ndyionjnú,
kó ki̱a̱ tangíntji̱ngíjnú ndi̱ya̱à kjo̱a̱kjíntakoón.
7Xota̱ xi tsꞌénchjíni̱e̱ xota̱ xi mojnókiená, chꞌo ꞌmií,
xota̱ tsꞌénchjíni̱e̱ xota̱jeé, niꞌánchꞌó.
8Ngata̱ niꞌínxchínje̱jín ji xota̱ xi mojnókiená,
tsi̱ꞌe̱ nga sa̱ꞌínchꞌójiín,
ta̱sá xota̱ xi kjínkoón xi ti̱ꞌinchji̱ni̱ ji,
kó tjó sa̱ꞌiín kuí.
9Takoyèe̱ xota̱ xi kjínkoón,
kó tsie ngase kjo̱a̱kjínkón kꞌuieé,
takoyèe̱ xota̱ xi kixi̱i̱,
kó tsie ngase ni xi ka̱maa̱ kui.
10Ngayeje xota̱ xi mejeén nga xota̱ xi kjínkón ka̱ma, tjón mára ngatamabendikón Néná.
Kjiꞌanga yà kuí Néná xí tsjiee̱,
kuí nii̱ xi bokó nga tjínná kjo̱a̱kjíntakón.
11Ngatꞌa̱ án boá xi sa̱ꞌin an
nga kjín ngase ni̱xtjin ku̱i̱ndyin ji nga̱sondie,
kó kjín ngase nó ka̱maa̱.
12Tsi xota̱ xi kjínkón ji,
jí boá xi nda ka̱maa̱,
ta̱nga tsi xota̱ xi kitikjo̱a̱a̱ ji,
jí boá xi tsie kjo̱a̱ni̱ma̱ ku̱i̱tja̱tí ji.
13Kjo̱a̱kitikjo̱a̱a̱, xikónií ngo xota̱chjo̱on xí see̱n én,
xi chi̱ni ko̱jo xi jmí kjo̱a̱soboájiín boá.
14Kjiꞌanga ndiꞌaa̱ tikón,
ki̱a̱ ꞌbíjñaxtio nga̱ntjo̱a̱a̱,
kó kjiꞌanga na̱xi̱ńdáꞌniuú tikón,
ki̱a̱ ꞌbíjñá nínga ngayeje xi sku̱i̱e̱,
15kó chji̱a̱a̱ xota̱ kixi̱ tjimá xi foaꞌa kui ndi̱ya̱à:
16Jún ndí i̱xtikjindí xo̱ngò xi kji̱e̱ jmí ni májínjnú,
ndibáchonjnúꞌun kꞌi̱e̱e̱,
jún xi niꞌánkjójínjnú ni xi niꞌánjnú,
17¡Nda ngase ꞌyó, ndáfoa xi niꞌánchejeé!
¡Nda ngase chinie pan xi chinie nínga ꞌmaa̱!
18Ta̱nga kui xota̱ chi̱nii̱ nde bejín
nga ndiꞌaa̱ kjo̱a̱bo̱ya boá kui ndiꞌaa̱,
¡nde bejín xota̱ xi je jachó ki̱a̱a̱,
nga jè ngi̱yaa̱ ti̱xa̱nga̱tsjo̱ó je síndo!
Currently Selected:
Énkjínkón 9: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
