Énkjínkón 15
15
Xikó kjiꞌi chjií kjo̱a̱ni̱ma̱takoón
1Én xí ndaa̱, tsꞌénkjáꞌajenda kjo̱a̱tamaá,
ta̱nga én xí ndajiín, tsꞌéntamá ngasená.
2Ni xi chji̱a̱ xota̱ xi kjínkoón,
bokó kjo̱a̱kjíntakón xi tjiín,
ta̱nga ni xi chji̱a̱ xota̱ xi kitikjo̱a̱a̱,
ta̱soboá ni chi̱ni boá.
3Néná ta̱jñà ngi̱ndiení nínga tikón
nga tsꞌénkotsijee̱n xota̱ xi nda ko̱jo xi ndajín.
4Én xí nda ndokjo̱a̱a̱,
kuí boá xi xikoó yá xí tsjá kjo̱a̱mindyioo̱n,
ta̱nga én xí chꞌo tsoó, tsꞌéndásénná.
5Xota̱ kitikjo̱a̱a̱ tsꞌenjóꞌojín nga na̱ꞌmii̱ sa̱ꞌínchji̱ni̱e̱,
ta̱nga kui xota̱ xi tsꞌenjóꞌoo̱,
kuí boá xi nda sa̱ꞌínkjó ni xi sa̱ꞌín.
6Achichí ni ꞌbeé ndiꞌaa̱ xota̱ xi kixi̱i̱,
ta̱nga kjo̱a̱xti boá xi ꞌbeé kjo̱a̱a̱ to̱n xi tsꞌén xota̱ xi ꞌniú ndajiín.
7Kjiꞌanga chji̱a̱ xota̱ xi kjínkoón,
kjo̱a̱kjíntakón boá xi bokoyá,
¡ta̱nga xota̱ xi kitikjo̱a̱a̱ bo̱a̱jín tsꞌén tikón ini̱ma̱a̱!
8Chꞌórií Néná kjo̱a̱tjó xi tsꞌenkꞌásꞌién xota̱ xi ꞌniú ndajiín,
ta̱nga achichí tsjá maá nga ntꞌieé,
kjiꞌanga xota̱ xi kixi̱i̱ chji̱a̱a̱ Néná.
9Achichí chꞌoó Néná ndi̱yà xí tjimá xota̱ xi ꞌniú ndajiín,
ta̱nga achichí tsjá maá kjo̱a̱a̱ xota̱ xi ki̱a̱ fítji̱ngi kjo̱a̱kixi̱i̱.
10Tsjájín maá nga niꞌánchji̱ni̱e̱
xota̱ xi ꞌbijñámasien ndi̱yà xí ndaa̱,
ta̱nga xi sa̱ꞌínchꞌó kjo̱a̱niꞌánchji̱ni̱e̱e̱, ko̱yà boá.
11Tsi ngindyi̱ko̱n Néná be nga ki̱a̱ síndo kjo̱a̱bo̱yaa̱ ko̱jo nga̱tsjo̱ó,
ja̱ ti̱ bo̱a̱ ti̱ tsꞌén be ni xi tjíjin ini̱ma̱a̱ xotaa̱ nga.
12Xota̱ xi mojnókiee̱ tsjajín maá nga tjín xí sa̱ꞌínchji̱ni̱e̱,
ti̱nde ki̱a̱jín tsꞌénkámajo̱ xota̱ xi kjínkoón.
13Xota̱ xi tsjakjiꞌii̱ ini̱ma̱a̱, tsja tsꞌén bokó kje̱en,
ta̱nga xi oo̱n ini̱ma̱a̱, ndasen tsꞌén ꞌbíjñá a̱si̱énni̱xtjii̱n.
14Ini̱ma̱a̱ xota̱ xi makjiín ngo ni, kjo̱a̱kjínkoón boá xi nichiniee̱,
ta̱nga tsꞌoa xota̱ xi kitikjo̱a̱a̱, kjo̱a̱chi̱nii̱ boá xi nichiniee̱.
15Xota̱ xi ndasen tikoón,
ngayeje ni̱xtjii̱n nga ni̱xtjin xi ndajín maá kui,
ta̱nga xota̱ xi tsjakjiꞌii̱ ini̱ma̱a̱,
ngayeje ni̱xtjii̱n nga xikoó tsi sꞌué maá kui.
16Chjí ngasenii̱ nga xota̱ ni̱ma̱ ka̱má,
ta̱nga nga xcha̱ndikón Néná,
ta̱bo̱a̱jiín tsi xota̱ cho̱n ka̱má,
kósꞌe̱ achichí nda̱ ka̱máná nga ku̱i̱ndyión.
17Chjí ngasenii̱ ndeta̱ xka̱ xí xi̱ni̱e̱ tsi tjínná kjo̱a̱tjó,
ta̱bo̱a̱jiín tsi yojoo̱ cho̱yojo xi̱ni̱e̱ tsi chꞌóná xingi̱.
18Xota̱ xi achichí xtindaa̱, kjo̱a̱xti ꞌboxié,
ta̱nga xota̱ xi tsiekoo̱n, kuí boá xi tsꞌénkꞌíxió kjo̱a̱xtii̱.
19¡Xota̱ xi tsiꞌeé xikoó tsi ndaꞌyá tjiín ndi̱yà nínga fí!
Ta̱nga xota̱ xi kixi̱i̱, xikónií tsi ndi̱yàtié tiyá nínga fí!
20Ndí xí kjínkoón, kjo̱a̱tsja tsjaá na̱ꞌmii̱,
ta̱nga ndí xí kitikjo̱a̱a̱, tsꞌenchꞌó na̱aa̱n.
21Achichí tsjá maá kjo̱a̱kitikjo̱a̱a̱ xota̱ xi chi̱nii̱,
ta̱nga xota̱ xi kjínkoón, tsꞌendáyà yojoo̱.
22Nde ngojín ni xi ndatsꞌèn fotjo,
nínga jmíjín xi tsjá ngo kjo̱a̱botíxoma,
ta̱nga achichí nda fotjo,
kjiꞌanga kjín má xi tsjá kjo̱a̱botíxomaa̱.
23Achichí tsjá maá xotaa̱ nga be nga nda ni xi chji̱a̱,
kó achichí nda ngase maa̱ kjiꞌanga kuí má chi̱bo̱a̱a̱ nga tsjá ngo én.
24Ndi̱ya̱à kjo̱a̱mindyioo̱n xota̱ xi makjiín, xtji̱e̱e̱n nkꞌajmii̱ boá,
tsi̱ꞌe̱ nga ki̱a̱jín ko̱e̱je̱ xtji̱e̱e̱n ti̱xa̱na̱nga̱a̱ kjo̱a̱bo̱yaa̱.
25Néná tsꞌénkjátsón ndiꞌaa̱ xota̱ xi nkꞌakoo̱n,
ta̱nga kónrií tsindioó xoꞌbaa̱ ínchjín kꞌán xi je kꞌien xi̱ꞌii̱n.
26Achichí chꞌo maá Néná ni xi tsꞌénkjó xota̱ xi ꞌniú ndajiín,
ta̱nga achichí tsjá maá én nda xi chji̱a̱ xota̱ xi tsjiee̱.
27Xota̱ xi xki̱ꞌá xi tsie ngase ni mejeén,
kuí boá xi tsꞌénkjátsón xota̱ ndiꞌaa̱,
ta̱nga kui xi chꞌoo̱ nga to̱n chjábéngíni ngo ni,
kuí boá xi tsie ka̱maa̱ nga kꞌuijñá nga̱sondie.
28Ini̱ma̱a̱ xota̱ xi kixi̱i̱ tjón tsꞌénkjó ni xi ku̱i̱chji̱a̱,
ta̱nga tsꞌoa xota̱ xi ꞌniú ndajiín, ni xi ndajín boá xi chji̱a̱.
29Néná kjin tikónnii̱ xota̱ xi ꞌniú ndajiín,
ta̱nga ntꞌieé xota̱ xi kixi̱i̱ kjiꞌanga chji̱a̱a̱.
30Kjiꞌanga nda ndyi̱a̱ ndyikón, achichí tsjá maá ini̱ma̱ná,
kó nga ndaꞌyáa̱ ngo én xí nda, kuí nii̱ xi tsjangaꞌniúná.
31Xota̱ xi bosiénníjoón kjo̱a̱chji̱ni̱e̱ xi tsjá kjo̱a̱mindyioo̱n,
kuí boá xi ki̱a̱ nijan kꞌuijñájo̱ xota̱ xi kjínkoón.
32Xota̱ xi tsjajín maá nga niꞌánchji̱ni̱e̱e̱,
ti̱kuíní xi tjítsꞌénchꞌó ini̱ma̱a̱,
ta̱nga kui xi tsꞌenseén nga niꞌánchji̱ni̱e̱e̱,
kuí boá xi tjiín kjo̱a̱kjíntakón.
33Kjiꞌanga yandikón Néná,
kuí nii̱ xi ngo kjo̱a̱bokoyá xi kjínkón,
xota̱ xi mejeén nga xcha̱ndikón,
chjiéngá tjón mára ni̱ma̱kjo̱a̱ sa̱ꞌín yojoo̱.
Currently Selected:
Énkjínkón 15: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
