Xki̱ 8
8
Ni to̱nsinié xi ꞌbítíyá ndiꞌí xí tsꞌentsíjee̱n
1Néná bi̱ katsoó Moisee̱: 2-3Bo̱a̱ tꞌíi̱n Aaroo̱n nga kjiꞌanga ku̱i̱ꞌítí nga yito kui ndiꞌí xí tsꞌentsíjee̱n, chjiéngá ki̱a̱ ngatꞌíndosón nga̱soón ni xi ꞌbítíyá ndiꞌí xí tsꞌentsíjee̱n, ki̱a̱ ka̱maa̱ nga xtji̱e̱e̱n kje̱e̱n nga tsꞌentsíjen kui ndiꞌií.
Kó Aaroo̱n bo̱a̱ tsꞌén íjñá kui ni xi ꞌbítíyá ndiꞌí xí tsꞌentsíjee̱n, xikó má katsoó Néná nga atíxomaa̱ Moisee̱ nga sa̱ꞌín. 4Ni xi ꞌbítíyá ndiꞌí xí tsꞌentsíjee̱n to̱nsinié boá xi kamándani. Kó ndeskande nkꞌa jàn ngaskande ngindie jàn nga ja̱ kon naxó kón ni xi ikꞌíndoo̱ nga ta̱soboá martiyo̱ xí ikꞌíniénii̱ nga kiniꞌánda. Néná bo̱a̱ tsꞌén tsíꞌaá Moisee̱ nga sa̱ꞌínda kui nii̱.
Nga katseꞌéxaá xota̱ tji̱e̱e̱ Lebii̱ nga sa̱ꞌínxátꞌaa̱ Néná
5Jaskan Néná bi̱ katsoó Moisee̱:
6Tꞌíndetꞌaxín ji xota̱ tji̱e̱e̱ Lebii̱, kó ti̱ꞌintsjie ji. 7Chjiéngá bi̱ si̱ꞌinje̱ ji: Chjatjájìn ndáfoa xi tsꞌéntsjie xotaa̱, kósꞌe̱ jaskan ngatꞌijoón ngayeje yojoo̱, kó ngataniè ńjñoo̱. Bo̱a̱ tsꞌén nga je kamátsjie.
8Jaskan nga kjíbé ngo cho̱yojo toro̱ ko̱jo ndso̱ko̱a̱n ṉño̱pan xi ndaa̱ xi isti̱ kiniꞌánda̱ꞌyo̱ni. Kó bo̱a̱ tsꞌén sa̱ꞌínkꞌasꞌien kjo̱a̱tjoó ni xi maxchá jno̱o̱, ko̱jo kui cho̱yojo toro̱ xi niꞌánkꞌasꞌien tsi̱ꞌe̱ nga niꞌánjetakón jeé.
9Jaskan ndokjoée̱ xota̱ tji̱e̱e̱ Lebii̱ ko̱jo xota̱ na̱xi̱ńdá xí ngasee̱, kó bo̱a̱ tꞌíi̱n nga ngatjí ki̱a̱ tiña nínga tikón ndiꞌandikoón. 10-18Kó ki̱a̱ je kꞌuíndo Aaroo̱n ko̱jo xota̱ tji̱e̱e̱, nga kui xi ngito̱ko̱o̱ xota̱ na̱xi̱ńdaá, kó Aaroo̱n bi̱ sa̱ꞌín nga tsja̱axaá nga xá xí tsa̱ꞌa̱n sa̱ꞌín:
Xota̱ Israee̱l ku̱i̱ꞌíjñasoón tsja to̱ko̱ xota̱ tji̱e̱e̱ Lebii̱, sꞌe̱ jaskan kui jaá ku̱i̱ꞌíjñasoón tsja to̱ko̱ nga jó kui cho̱yojo xo̱ngo̱ò. Ngo kui cho̱yojo xo̱ngo̱ò xi si̱ꞌankꞌien tsi̱ꞌe̱ nga kjo̱a̱tjó xi ka̱majetakón jeé ka̱ma, kó xi ingoo̱ kꞌuití ndo̱jò ndójo̱ nganda tsa̱ꞌa̱n. Bo̱a̱ tsꞌén si̱ꞌintsjie ji xota̱ tji̱e̱e̱ Lebii̱. Kó ngije kamá kui nii̱, jè síndonda tsi̱ꞌe̱ nga ta̱ xána xi sa̱ꞌín ki̱a̱ ndiꞌandikoón.
Xota̱ tji̱e̱e̱ Lebii̱ án tsa̱ꞌa̱n ka̱ma, ngatꞌa̱ xota̱ Israee̱l boá xi sa̱ꞌínkꞌasꞌienna ngajoo̱ ndí xí tjoón. Kjiꞌanga katsꞌenkꞌién an ndí tjoón xtín xota̱ Ejiptoo̱, bo̱a̱ kixian an nga ngayeje ndí tjoón xtín xota̱ Israee̱l an tsa̱ꞌa̱n ka̱ma, ko̱jo ngayeje ndí tjoón cho̱ xi tjiín nga. Kó nga ngajoo̱ kui ndí xí tjoón, nga xota̱ tji̱e̱e̱ Lebii̱ xi katsꞌenjo̱ꞌo an.
Kó kuíni nga, tꞌíndetꞌaxín ji xota̱ tji̱e̱e̱ Lebii̱ ngi̱jii̱n xota̱ Israee̱l xi ngasee̱, tsi̱ꞌe̱ nga ngatsjéni̱xtjin kꞌuíndo nga ta̱ xána tsí xi sa̱ꞌín.
19Án boá xi ꞌbíndo an xota̱ tji̱e̱e̱ Lebii̱ ngi̱ya tsja Aaroo̱n ko̱jo ndií, xikoó tsi ngo kjo̱a̱tjó xi tsjá xota̱ Israee̱l, tsi̱ꞌe̱ nga kui xi sa̱ꞌínxá ki̱a̱ ndiꞌandikoón. Kuí boá xi sa̱ꞌínkꞌasꞌien kjo̱a̱tjoó xota̱ Israee̱l tsi̱ꞌe̱ nga sa̱ꞌinjetakóo̱n jeé. Kó bo̱a̱ tsí tsꞌén nga jmí ni xi ndajín ka̱maa̱ kjiꞌanga tjín xí ꞌniú sa̱ꞌíntiñaa̱ yojoo̱ ki̱a̱ ndiꞌandikoón.
20-22Kó Moisee̱ ko̱jo Aaroo̱n ko̱jo ngayeje xota̱ Israee̱l, katsꞌénkjatjosón ngayeje ni xi Néná atíxoma kjo̱a̱a̱ xota̱ tji̱e̱e̱ Lebii̱. Kó xota̱ tji̱e̱e̱ Lebii̱ kamátsjie, anié ńjñoo̱, sꞌe̱ jaskan Aaroo̱n má xi kijíjo̱ ngindyi̱ko̱n Néná nga katsꞌénkꞌasꞌien xikoó ngo kjo̱a̱tjó. Jaskan ngije kamá kui nii̱, xota̱ tji̱e̱e̱ Lebii̱ ítsꞌi̱yanii̱ nga katsꞌén xaá Néná ki̱a̱ ndiꞌandikoón, kó ngatsjéni̱xtjin nga Aaroo̱n, ko̱jo xota̱ tji̱e̱e̱ xí atíxomaa̱ nga ngo ni katsꞌén.
23Néná bi̱ katsoó Moisee̱:
24-26Nga kjo̱chó kan ún noó xota̱ tji̱e̱e̱ Lebii̱ kjiꞌa ka̱ma sa̱ꞌínxá ki̱a̱ ndiꞌandikoón, kó ngaskande nga kjo̱chó xi ichítié noó nga ka̱ma ku̱i̱ꞌíjñámasien kui xaá. Ngije ka̱ma ichítié noó, ka̱ma ko̱síko̱jo chináꞌmi xi kjindií nga skoón ndiꞌandikoón, ta̱nga ka̱májín kje̱ꞌe xá sa̱ꞌín.
Currently Selected:
Xki̱ 8: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
