Xki̱ 4
4
Xá xí katsꞌén xota̱ tji̱e̱e̱ Lebii̱
Xtín xota̱ ndiꞌa xi chji̱a̱ni Keaa̱t
1Néná bi̱ katsoó Moisee̱ ko̱jo Aaroo̱n:
2Ngo xo̱jo̱n tjatꞌajnú xki̱i̱ xota̱ tji̱e̱e̱ Lebii̱ xi chji̱a̱ni ngayeje xota̱ ndiꞌaa̱ Koaa̱t, ta̱nga chꞌi̱a̱xki̱jnú ñá xtín xota̱ ndiꞌa xi chji̱a̱ni. 3Chꞌi̱a̱xki̱jnú xi ndeskande kantié, kó ngaskande ichítié noó, kó nga ka̱maa̱ sa̱ꞌínxá ki̱a̱ ndiꞌandikoón. 4Xá xí sa̱ꞌín xota̱ tji̱e̱e̱ Koaa̱t ki̱a̱ kui ngi̱ndie ndikoón, kuí bí xi̱ꞌbi̱:
5Kjiꞌanga xota̱ na̱xi̱ńdaá ko̱tíkaya ndiꞌaa̱ tsi̱ꞌe̱ nga xín ngi̱ndie ko̱e̱je̱, Aaroo̱n ko̱jo ndií kjo̱a̱ꞌáxín ńjñoxo̱ꞌba̱ xi tji̱e̱n ki̱a̱ ngi̱ndie xi ꞌniú ndikoón, ko̱jo kui ńjñoo̱ xi ko̱óꞌmáni koxa̱a̱ kjo̱a̱ꞌbíndaa̱. 6Nga̱soón kui nii̱ ngatꞌíndosón tji̱xin tsjákoón cho̱o̱, kó nga̱soón kui nii̱ ngatásón ngo ńjño xi aso, sꞌe̱ jaskan ngatꞌíndoo̱ yá xí niꞌánkjién nga chínkꞌá nga tjín nínga mongínjo̱ kui koxa̱a̱.
7Nga̱soón kui yámíxa̱ nínga ꞌbíndosón pan xi an niꞌánkꞌasꞌienna, ko̱ósón ngo ńjño xi aso, kó nga̱soón kui ńjñoo̱ ku̱i̱ꞌíndo ti̱bo̱a̱a̱, ko̱jo chꞌa̱a̱, ko̱jo chi̱tsen xí to̱nsinieé, ko̱jo jarra̱ xi mindyia binoo̱. Ko̱jo ti̱ ki̱a̱ ngatꞌíndosón pan xi niꞌánkꞌasꞌien ndyiojón ndyiojón nga. 8Nga̱soón ngayeje kui nii̱ ngatásón ngo ńjño xi iní, kó tji̱xin xí tsjakoo̱n cho̱o̱ ngataꞌmáni ngijee̱. Sꞌe̱ jaskan ngatꞌíndoo̱ yá xí niꞌánkjién nga chínkꞌá nga tjín nínga mongínjo̱ kui koxa̱a̱.
9Sꞌe̱ skjíbé ngo ńjño xi aso, kó kui ko̱óꞌmáni ni xi ꞌbítíyá ndiꞌí xí tsꞌentsíjee̱n, ko̱jo ndiꞌí xí tsꞌentsíjee̱n, ko̱jo ni xi chjábéjo̱ni xꞌueé, ko̱jo ti̱bo̱a̱ tiee̱, ko̱jo ngayeje boso̱ xi niꞌánkjién xí mindyia istii̱. 10Ngayeje kui nii̱ xi tji̱xin xí tsjakoo̱n cho̱o̱ kjoꞌmáni, sꞌe̱ jaskan ngatꞌíndoo̱ nga̱soón yá xí niꞌánkjién nga chínkꞌá nga tjín nínga mongínjo̱ kui nii̱.
11Ngo ńjño xi aso ngataꞌmáni ṉchandikón xí to̱nsinieé, sꞌe̱ tji̱xin xí tsjakoo̱n cho̱o̱ ngatásoón, sꞌe̱ jaskan ngatꞌíndoo̱ yá xí niꞌánkjién nga chínkꞌá nga tjín nínga mongínjo̱ kui koxa̱a̱. 12Sꞌe̱ nga kjíbé ngayeje ni xi machjién ki̱a̱ ndiꞌandikoón, kó ngo ńjño xi aso ngatindyiá, kó tji̱xin xí tsjakoo̱n cho̱o̱ ngataꞌmáni, sꞌe̱ jaskan nga̱soón jó yá ngatásón nga ko̱e̱je̱jo.
13Sꞌe̱ ngatsꞌéntsjiejón ndiso xi tjiín ṉchandikoón, sꞌe̱ ngo ńjño xi iní ꞌniú ngataꞌmáni, 14kó nga̱soón kui nii̱ ngatꞌíndo ngayeje ni xi niꞌánkjién nganiꞌántsjaà Néná xikoó: Ni xi mindyia xꞌueé, ko̱jo ki̱cha̱yojoó, ko̱jo ki̱cha̱chꞌa̱a̱, ko̱jo tasa̱ yiꞌii̱. Kó tji̱xin xí tsjakoo̱n cho̱o̱ ngataꞌmáni ngayeje kui nii̱, sꞌe̱ jaskan ngatꞌíndoo̱ yá xí niꞌánkjién nga chínkꞌá nga tjín nínga mongínjo̱ kui nii̱.
15Ngije ka̱maa̱ Aaroo̱n ko̱jo ndií nga ku̱i̱ꞌítsakjájón ngayeje ni xi machjién ki̱a̱ ndiꞌandikoón Néná, kó ngije ko̱e̱je̱, nangíyé ji ndií Koaa̱t tsi̱ꞌe̱ nga kui xi ko̱a̱ꞌa̱nijín ngayeje kui nii̱. Ta̱nga chjiéngá skoón nga ta̱xkiya sa̱ꞌínjo̱jín ngo ni xi ndikoón, ngatꞌa̱ ko̱yà tsí bo̱a̱ sa̱ꞌín. Kuí bí kui xaá xi sa̱ꞌín xota̱ tji̱e̱e̱ Koaa̱t ki̱a̱ ndiꞌandikoón.
16Eleasaa̱, ndií chináꞌmi Aaroo̱n, kuí boá xi sku̱i̱e̱ kjo̱a̱a̱ isti̱ xi ku̱i̱ndyiaa̱ ni xi ꞌbítíyá ndiꞌí xí tsꞌentsíjee̱n, ko̱jo nisijee̱n, ko̱jo kjo̱a̱tjó xi ngatsjéni̱xtjin si̱ꞌankꞌasꞌienna, ko̱jo isti̱ xi nanginjon xotaa̱ nga boeꞌéxaá. Kó ti̱ kuí boá xi skoón ndiꞌandikoón, ko̱jo ngayeje ni ndikón xí niꞌánkjién ngi̱yaa̱ kui ngi̱ndiee̱.
17Néná bi̱ katsoó Moisee̱ ko̱jo Aaroo̱n:
18Ngata̱ boeꞌéndièjínjnú nga xota̱ ndiꞌaa̱ Koaa̱t xcha̱jajin ngi̱jii̱n xota̱ tji̱e̱e̱ Lebii̱. 19Tsi̱ꞌe̱ nga xota̱ ndiꞌaa̱ Koaa̱t ko̱yàjín nga sa̱tíjeé kjo̱a̱a̱ nga ni xi ndikón sa̱ꞌínjo̱, chjiéngá kui nii̱ xi sa̱ꞌín: Aaroo̱n ko̱jo ndií boá xi ka̱tso̱yaa̱ mí nii̱ bo̱a̱ xi sa̱ꞌín, kó mí nii̱ bo̱a̱ xi ko̱a̱ꞌa̱nijín nga ngo nga ngo. 20Bo̱a̱ tsí tsꞌén nga kꞌo̱sꞌienjín nga skotsíjee̱n ni xi ndikoón, kó ko̱yàjín ngijee̱.
Xtín xota̱ ndiꞌa xi chji̱a̱ni Ngersoo̱n
21Néná bi̱ katsoó Moisee̱:
22Ngo xo̱jo̱n tjatꞌe ji ngayeje xota̱ xi chji̱a̱ni xtín xota̱ ndiꞌaa̱ Ngersoo̱n. 23Chꞌi̱e̱xki̱ ji xi ndeskande kantié, kó ngaskande ichítié noó, kó nga ka̱maa̱ sa̱ꞌínxá ki̱a̱ ndiꞌandikoón. 24Kuí bí kui xaá xi sa̱ꞌín:
25Kuí boá xi ko̱a̱ꞌa̱ ńjño kortinaa̱ ndiꞌandikoón, ko̱jo tji̱xin tsjákoón cho̱o̱ xi kjiꞌmani, ko̱jo ńjño kortinaa̱ nínga bitjasꞌi̱e̱nnii̱, 26ko̱jo ńjño kortinaa̱ ndi̱tsee̱n, ko̱jo ńjño kortinaa̱ nínga bitjasꞌi̱e̱nnii̱ ndi̱tsen xi foaꞌatjiyajoo̱n ndiꞌandikoón ko̱jo ṉchandikoón, ko̱jo ńꞌniuú, ko̱jo ngayeje ni xi machjién nga niꞌántsjána.
27-28Aaroo̱n ko̱jo ndií boá xi ka̱tso̱yaa̱ xota̱ tji̱e̱e̱ Ngersoo̱n ngayeje ni xi sa̱ꞌín ki̱a̱ ndiꞌandikoón, ko̱jo ngayeje ni xi ko̱nkꞌá. Kó Itamaa̱r, ndií chináꞌmi Aaroo̱n boá xi ko̱si̱e̱ntjoón.
Xtín xota̱ ndiꞌa xi chji̱a̱ni Merarii̱
29Ngo xo̱jo̱n tjatꞌe ji ngayeje xota̱ xi chji̱a̱ni xtín xota̱ ndiꞌaa̱ Merarii̱. 30Chꞌi̱e̱xki̱ ji xi ndeskande kantié, kó ngaskande ichítié noó, kó nga ka̱maa̱ sa̱ꞌínxá ki̱a̱ ndiꞌandikoón. 31Kuí bí kui xaá xi sa̱ꞌín: kuí boá xi ko̱nkꞌá yátiee̱, ko̱jo yándojoó, ko̱jo yáseé, ko̱jo ngindiee̱ yáseé ndiꞌandikoón. 32Kó ti̱ kuí boá xi ko̱nkꞌá yásé xi chji̱a̱ni ndi̱tsen xi foaꞌatjiyajoo̱n ndiꞌandikoón, ko̱jo ngindiee̱ kui yáseé, ko̱jo yáyojó xi mindyianijiín, ko̱jo ńꞌniuú, ko̱jo ngayeje ni xi machjieén kjiꞌanga niꞌántsjána. Jí boá xi chjiéngá kꞌuiyé cha̱n cha̱a̱n nga ngo nga ngo ni xi chjiéngá ko̱a̱ꞌa̱. 33Kuí bí kui xaá xi sa̱ꞌín ngayeje xota̱ tji̱e̱e̱ Merarii̱, kó Itamaa̱r boá xi ko̱si̱e̱ntjoón.
Moisee̱ ko̱jo Aaroo̱n tsintꞌiéꞌeén Néná
34-49Kó Moisee̱ ko̱jo Aaroo̱n katsꞌén ni xi Néná atíxomaa̱ nga sa̱ꞌín, kó nijan kamá já ngito̱ko̱o̱ xota̱ na̱xi̱ńdaá nga íxki̱, ko̱jo nga ítꞌa xo̱jo̱n ngayeje xota̱ tji̱e̱e̱ Lebii̱. Ngo xo̱jo̱n ítꞌa ngayeje xtín xota̱ ndiꞌa xi chji̱a̱ni xota̱ tji̱e̱e̱ Koaa̱t, ko̱jo Ngersoo̱n, ko̱jo Merarii̱. Tsaꞌaxki̱ xi ndeskande kantié, kó ngaskande ichítié noó, ko̱jo xi ka̱maa̱ sa̱ꞌínxá ki̱a̱ ndiꞌandikoón. Bi̱ kjiꞌi kamá kui xotaa̱:
Xota̱ xi chji̱a̱ni Koaa̱t: Jó mi̱ yito úchán ichítié jáxíꞌín kamá.
Xota̱ xi chji̱a̱ni Ngersoo̱n: Jó mi̱ jun úchán ko̱jo kantié jáxíꞌín kamá.
Xota̱ xi chji̱a̱ni Merarii̱: Ján mi̱ jó úchán jáxíꞌín kamá.
Jin mi̱ ún úchán ichítié ko̱jo kantié kamá ngayejee̱. Kó bo̱a̱ tsꞌén Moisee̱ katsóyaà nga ngo nga ngo mí ni xi chjiéngá sa̱ꞌín, kó mí ni xi ko̱a̱ꞌa̱nijín. Xikó má katsoó Néná nga sa̱ꞌín.
Currently Selected:
Xki̱ 4: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
