Xki̱ 15
15
Kjo̱a̱tjó xi kiniꞌánkꞌasꞌiee̱n ko̱jo cho̱ xi kiniꞌánkꞌieén Néná
1Néná bi̱ tsꞌén atíxomaa̱ Moisee̱:
2Bi̱ tꞌíi̱n xota̱ Israee̱l: Ngije síndo ki̱a̱ na̱xi̱ńdá xi an tsjàa̱, tsi̱ꞌe̱ nga ki̱a̱ je kꞌuíndo, chjiéngá bi̱ tsꞌén sa̱ꞌínkꞌasꞌien kjo̱a̱tjoó:
3Ka̱ma kjo̱jo cho̱yojoo̱ ko̱jo cho̱ xi tsꞌénxchá tsi̱ꞌe̱ nga kjo̱a̱tjó sa̱ꞌín ko̱jo nga sa̱ꞌínkꞌién, sꞌe̱ ku̱i̱ꞌítí nganda tsa̱ꞌa̱n, ti̱ ka̱ma tsja tsi ngayeje kon ngo kjo̱a̱tjó, ko̱jo tsi tsi̱ꞌe̱ nga sa̱ꞌínkjatjosón ngo ni, ko̱jo tsi ngo kjo̱a̱tjó xi niꞌánkꞌasꞌien nga ma ngo sꞌué. Bo̱a̱ tsꞌén nga tsja mana kjo̱a̱tjó xi niꞌánkꞌasꞌienna.
4-5Xki̱ nga ngo ndií cho̱tsa̱nga̱ sa̱ꞌínkꞌasꞌien, chjiéngá ngo litro̱ bino̱ ko̱jo jó kilo̱ ndso̱ko̱a̱n ṉño̱pan xi ndaa̱ xi kiniꞌánda̱ꞌyo̱ni ngo litro̱ istii̱ toꞌolibo̱ nijan sa̱ꞌínkꞌasꞌien. 6-7Tsi ngo cho̱tsa̱nga̱ xi jaꞌatji ndi̱ja̱a̱ xi sa̱ꞌínkꞌasꞌien, chjiéngá tsꞌatio ngo litro̱ bino̱ kjo̱chójo̱ ko̱jo nijón kilo̱ ndso̱ko̱a̱n ṉño̱pan xi tsꞌatio ngo litro̱ isti̱ kiniꞌánda̱ꞌyo̱ni. Bo̱a̱ tsꞌén nga tsja mana kjo̱a̱tjó xi niꞌánkꞌasꞌienna.
8-10Kjiꞌanga kꞌuitíjnú ngo cho̱yojo toro̱ nganda tsa̱ꞌa̱n, ko̱jo tsi ngo kjo̱a̱tjó si̱ꞌankꞌasꞌienjnúꞌun tsi̱ꞌe̱ nga kꞌuié nginíná kjo̱a̱xió, ko̱jo tsi tsi̱ꞌe̱ nga si̱ꞌankjatjosónjnú ngo ni xi kiꞌmíyatjónjnú, chjiéngá jó litro̱ bino̱, ko̱jo jun kilo̱ ndso̱ko̱a̱n ṉño̱pan xi nda, xi kiniꞌánda̱ꞌyo̱ni jó litro̱ isti̱ xi si̱ꞌankꞌasꞌienjnúꞌun. Bo̱a̱ tsꞌén nga tsja mana kjo̱a̱tjó xi niꞌánkꞌasꞌienna.
11-16Kó bo̱a̱ tsꞌén chjiéngá si̱ꞌankꞌasꞌienjnúꞌun kjo̱a̱tjó ngayeje jún, kó ti̱ bo̱a̱ ti̱ ngatsꞌén xota̱ xi xín nangi xi síndo síndojinjnú, kjiꞌanga si̱ꞌankꞌasꞌienjnúꞌun: cho̱yojo toro̱, ko̱jo cho̱tsa̱nga̱ xi jaꞌatji ndi̱ja̱a̱, ko̱jo ndií cho̱tsa̱nga̱, ko̱jo ndií tindso̱. Kó chjiéngá ngatsjéni̱xtjin nga bo̱a̱ tsꞌén si̱ꞌankꞌasꞌienna kui kjo̱a̱tjoó.
17Sꞌe̱ jaskan Néná bi̱ tsꞌén atíxomaa̱ Moisee̱:
18Bo̱a̱ tꞌíi̱n xota̱ Israee̱l nga kjiꞌanga kjo̱chó kui na̱xi̱ńdá xí an tsjàa̱, 19kó nga ku̱i̱ꞌítsꞌi̱yanii̱ cha̱a̱n nga ko̱tie to ndso̱ko̱a̱n ṉño̱paa̱n ko̱jo nga skji̱ni̱e̱, chjiéngá ku̱i̱ꞌíjñátꞌaxín ngo tjín xí tsa̱ꞌa̱n ka̱ma. 20-21Ngatsjéni̱xtjin nga an tjón ngatsjána to ndso̱ko̱a̱n ṉño̱pan xi tjón sa̱ꞌíntsjiee̱, ko̱jo pan xi tjón sa̱ꞌínchjaán.
Kjo̱a̱tjó xi si̱ꞌankꞌasꞌien tsi̱ꞌe̱ nga ka̱majetakón jeé
22-23Tsi bo̱a̱jín sa̱ꞌín ni xi ndeskande koó ni̱xtjin xi tjón kixiyàa̱ nga sa̱ꞌín nga tsíchji̱a̱jo an Moisee̱, chjiéngá kui ni xi̱ꞌbi̱ sa̱ꞌín tsobo̱a̱:
24-26Tsi ngayeje xota̱ na̱xi̱ńdaá xi tsintꞌiéꞌénjínna, ta̱nga tsi xá katsꞌénjín, chjiéngá ngo cho̱yojo toro̱ sa̱ꞌínkꞌién, kó ku̱i̱ꞌítí ndo̱jò ndójo̱. Chjiéngá ko̱jo to ndso̱ko̱a̱n ṉño̱pan ko̱jo bino̱ nijan sa̱ꞌínkꞌasꞌienna. Kó chjiéngá ko̱jo ngo tindso̱ nijan sa̱ꞌínkꞌasꞌienna kui kjo̱a̱tjoó, tsi̱ꞌe̱ nga sa̱ꞌinjetakóo̱n jeé. Bo̱a̱ tsꞌén nga tsja mana kjo̱a̱tjó xi niꞌánkꞌasꞌienna. Chináꞌmii̱ boá xi sa̱ꞌínkꞌasꞌienna kjo̱a̱tjoó, tsi̱ꞌe̱ nga an sa̱ꞌinjetakóo̱n jeé ngayeje xota̱ Israee̱l, ko̱jo jeé ngayeje xota̱ xi xín nangi chji̱a̱ni xi ki̱a̱ síndojinjnú.
27Tsi ta̱ ngo tsí má xota̱ xi ta̱ xá katsꞌénjín nga tsintꞌiéꞌénjínna, chjiéngá ngo ndií tindso̱ xi chjo̱on sa̱ꞌínkꞌasꞌienna. 28Chináꞌmii̱ boá xi sa̱ꞌín kui nii̱, kó kuí boá xi sa̱ꞌínkꞌasꞌien kjo̱a̱tjoó kui xotaa̱, kó an sa̱ꞌinjetakóo̱n. 29Kuí bí xi̱ꞌbi̱ xi kjo̱a̱kiti ka̱maa̱ xota̱ xi jmí tsi xá tsꞌénjéní, kó kui kjo̱a̱kitii̱ chjínií tsi̱ꞌe̱ xota̱ Israee̱l ko̱jo xota̱ xi xín nangi chji̱a̱ni xi síndojinjnú. 30-31Ta̱nga tsi kui xotaa̱ je be ni xi mejénna, kó tsi xá katsꞌénjéní, kui xotaa̱, ndajín katsꞌén kondra̱na kó chjiéngá si̱ꞌankjie ngi̱jii̱n xota̱ na̱xi̱ńdána.
Kjo̱a̱botíjé xí sa̱ko̱ó xota̱ xi ntꞌiéꞌénjiín
32Kjiꞌanga to̱kó síndo xota̱ Israee̱l ki̱a̱ nangi kixií, kamábe nga ngo nda̱ xi tsꞌénfoaꞌátikó chikín nga ni̱xtjin xoto̱. 33Kósꞌe̱ kui nda̱a̱ ki̱a̱ tsangínjo̱ ngindyi̱ko̱n Moisee̱ ko̱jo Aaroo̱n ko̱jo ngayeje xota̱ na̱xi̱ńdaá. 34Kó nga nde bejín mí ni xi sa̱ꞌínjo̱ kui nda̱a̱, ndo̱bo̱a̱yà yíꞌyá nga askoyaá nga Néná ka̱tso̱yaa̱ ni xi si̱ꞌanjo̱. 35Kó Néná bi̱ tsꞌén atíxomaa̱ Moisee̱: ꞌNa̱xiéjnú kui nda̱a̱ ki̱a̱ ngi̱ndie nínga síndo ndiꞌaa̱ xotaa̱, kó ngayeje xota̱ xi ngasee̱ ndi̱jo̱ ngatꞌaya ngaskande nga sa̱ꞌínkꞌién.
36Kó bo̱a̱ katsꞌén xota̱ Israee̱l.
Ńchjoón ńjñoo̱
37Jaskan Néná bi̱ tsꞌén atíxomaa̱ Moisee̱:
38Bo̱a̱ tꞌíi̱n xota̱ Israee̱l nga kui ko̱jo xota̱ tji̱e̱e̱, nga chjiéngá ngatsjéni̱xtjin ku̱i̱ꞌíjñaá ngo ńchjón tsjéje̱ koán nga̱ndee̱ ńjño xi ko̱a̱ja̱. 39Kó bo̱a̱ tsꞌén nga kjiꞌanga sku̱i̱e̱ kui ńchjoón, kjo̱a̱ꞌátsjiee̱n nga chjiéngá ku̱i̱ntꞌiéꞌén ngayeje ni xi je kixiáa̱n. Bo̱a̱ tsí tsꞌén nga ku̱i̱ntꞌiéꞌénna, kó ki̱a̱jín ko̱e̱je̱tji̱ngi ni xi mejeén kui nga sa̱ꞌín, ti̱nde ki̱a̱jín ko̱e̱je̱tji̱ngi ni xi tsꞌénkjó tsi̱ꞌe̱ nga sa̱ꞌínkjinna yojoo̱. 40Ngatjaꞌátsjiee̱n nga chjiéngá sa̱ꞌín ngayeje ni xi xiaan, kó ta̱ án tsí xi ku̱i̱ntꞌiéꞌénna nga kꞌuíndo. 41Án boá xi Nee̱ an, kó án boá xi tsꞌaxié an ki̱a̱ nangi Ejipto̱, tsi̱ꞌe̱ nga kui xi xota̱ na̱xi̱ńdána ka̱ma. Kó ta̱ án tsí xi chjiéngá ku̱i̱ntꞌiéꞌénna.
Currently Selected:
Xki̱ 15: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
