Xki̱ 10
10
Tjio to̱ntiboaa̱
1Néná bi̱ katsoó Moisee̱:
2-8Chjábé jí ngo martiyo̱ kó jó tjio to̱ntiboa ti̱ꞌinde ji, kó kui tjioo̱ ta̱kuítsí chináꞌmi xi xota̱ tji̱e̱e̱ Aaroo̱n xi ka̱ma sa̱ꞌínkjanie. Takoyèe̱ xota̱ na̱xi̱ńdaá nga án boá xi tsꞌéntsjàa̱ kui kjo̱a̱botíxomaa̱: Kjiꞌanga sa̱ꞌínkjanie já chináꞌmii̱ nga jó kui tjioo̱, chjiéngá ka̱matikó ngayeje xotaa̱ ngindyikin ji ki̱a̱ nínga bitjasꞌi̱e̱nnii̱ ndiꞌandikoón. Kjiꞌanga ta̱ ngo tsí ndi̱yà kjo̱ni̱e̱ kui tjioo̱, chjiéngá ta̱ xota̱ ngito̱ko̱o̱ xota̱ tji̱e̱e̱ tsí xi ka̱matikó.
Ti̱ tjioo̱ boá xi si̱ꞌinkjìn jí nga ko̱ko̱ó ngo chi̱bo̱a̱ xotaa̱ kjiꞌanga sa̱ꞌíntíyaá yojoo̱ nga ko̱e̱je̱ra nínga ndyi̱fí. Kjiꞌanga jó ndi̱yà kjo̱ni̱e̱ tjioo̱, ko̱jo nga ꞌniú xchaꞌayaà, chjiéngá sa̱ꞌíntíyaá yojoo̱ nga ko̱e̱je̱ra nínga ndyi̱fí ngayeje xota̱ xi síndo ndiꞌaa̱ xtji̱e̱e̱n nínga fotjo tsꞌueé. Ngije kjo̱ni̱e̱ nginí ingo ndi̱yà tjioo̱, chjiéngá sa̱ꞌíntíyaá yojoo̱ nga ko̱e̱je̱ra nínga ndyi̱fí kui xi síndo xtji̱e̱e̱n na̱ngi. Kui nii̱, kuí bí xi kjo̱a̱kiti xi ngatsjéni̱xtjin si̱ꞌankjatjosónjnú.
9Kjiꞌanga kꞌuié ngo kjo̱a̱xchán, kó nga jún chjiéngá kongín ku̱i̱xkánjnú, ti̱ꞌankjaniéjnú tjioo̱, kó ngayeje ngaꞌniújnú nga chaꞌayàjnú. Kósꞌe̱ kjiꞌá boá nga an xi Nejnú kjo̱a̱ꞌátsjienna jún, kó kꞌoxiéꞌájnúꞌun ngi̱ya tsja kondra̱jnú.
10Ti̱ ti̱ꞌankjaniéjnú tjioo̱ nga ni̱xtjii̱n sꞌué, ko̱jo nga ꞌbítsi̱yanii̱ saá, ko̱jo nga si̱ꞌankꞌasꞌienjnúꞌun ngo kjo̱a̱tjó. Kjiꞌanga bo̱a̱ si̱ꞌánjnú, an kjo̱a̱ꞌátsjienna jún.
Nga jatjoni xota̱ Israee̱l ki̱a̱ na̱xi̱ Sinaii̱
11Kui ṉdi̱ xi tikón nga̱soón ndiꞌandikoón kjo̱a̱ꞌbíndaa̱, katjoninkꞌa ni̱xtjin kaa̱n sá xí ꞌmí sii̱b, nó xí ma joó.#10:11 Ngije jatjoni na̱xi̱ńdá Ejipto̱ xota̱ Israee̱l. 12-13Kui ni̱xtjii̱n, xota̱ Israee̱l jastjíe̱n kó kijítji̱ngii̱ kui ṉdi̱i̱ ki̱a̱ nangi kixií na̱xi̱ Sinaii̱, ngaskande nga jachó nangi kixií Paraa̱n, xikó má tsꞌén atíxomaa̱ Néná nga tsíchji̱a̱jo Moisee̱.
14-27Xtín xota̱ Israee̱l nga tsajátjoón já ngito̱ko̱o̱, bi̱ tsꞌén kisꞌińdonda nga kijí:
Xota̱ tji̱e̱e̱ Jundáa̱, ko̱jo Naasoo̱n kui xi ngito̱ko̱o̱,
Xota̱ tji̱e̱e̱ Isakaa̱r, ko̱jo Natanaee̱l kui xi ngito̱ko̱o̱,
Xota̱ tji̱e̱e̱ Sabuloo̱n, ko̱jo Eliaa̱b kui xi ngito̱ko̱o̱,
Xota̱ tji̱e̱e̱ Rubee̱n, ko̱jo Elisuu̱r kui xi ngito̱ko̱o̱,
Xota̱ tji̱e̱e̱ Simeoo̱n, ko̱jo Selumiee̱l kui xi ngito̱ko̱o̱,
Xota̱ tji̱e̱e̱ Ngaa̱nd, ko̱jo Eliasaa̱f kui xi ngito̱ko̱o̱,
Xota̱ tji̱e̱e̱ Efraii̱n, ko̱jo Elisamaa̱ kui xi ngito̱ko̱o̱,
Xota̱ tji̱e̱e̱ Manasee̱, ko̱jo Ngamaliee̱l kui xi ngito̱ko̱o̱,
Xota̱ tji̱e̱e̱ Benjaa̱, ko̱jo Ngindonii̱ kui xi ngito̱ko̱o̱,
Xota̱ tji̱e̱e̱ Ndaa̱n, ko̱jo Ayiesee̱r kui xi ngito̱ko̱o̱,
Xota̱ tji̱e̱e̱ Asee̱r, ko̱jo Pangiee̱l kui xi ngito̱ko̱o̱,
Xota̱ tji̱e̱e̱ Neftalii̱, ko̱jo Ayiraa̱ kui xi ngito̱ko̱o̱.
Ngi̱jii̱n xota̱ tji̱e̱e̱ Sabuloo̱n ko̱jo Rubee̱n kijíjin xota̱ tji̱e̱e̱ Ngersoo̱n ko̱jo Merarii̱. Kuí boá kui jaá xi tjínieé nga kꞌo̱xiékjo ndiꞌandikoón ko̱jo xi tsankꞌá nga kijíjo̱, ngatꞌa̱ ta̱kuítsí xi kamá katsꞌén kui xaá.
Ngi̱jii̱n xota̱ tji̱e̱e̱ Ngaa̱nd ko̱jo Efraii̱n kijíjin xota̱ tji̱e̱e̱ Koaa̱t. Kuí boá kui jaá xi tsaꞌa ngayeje ni xi kamáchjién ngi̱yaa̱ ndiꞌandikoón. Kó nga ngaskande nga̱xto̱n jàn kjindibáni kui jaá, ngije jachó ki̱a̱ ngi̱ndie nínga sa̱ꞌínkjaꞌyaá, jè kachjaninkꞌa nginí ndiꞌandikoón nga jachó.
28Ngatsjéni̱xtjin nga tjín nínga kijí xota̱ Israee̱l, bo̱a̱ tsꞌén kisꞌińdonda nga kijí.
Moisee̱ ko̱jo Obaa̱b
29Moisee̱ bi̱ katsoó Obaa̱b, nda̱ xi xkjín, kui xi ndií Reuee̱l, nda̱ xi chji̱a̱ni nangi Mandiaa̱n:
—Nangi xi Néná tsja̱ajne̱ ki̱a̱ ndyi̱mongínjne̱. Ja̱bíꞌi̱n, kó tꞌenje̱jne̱. Nda si̱ꞌanjo̱jne̱ ji, xikótsꞌèn Néná je bo̱a̱ katsó nga nda sa̱ꞌínjo̱jne̱ ji̱n.
30Ta̱nga Obaa̱b bi̱ katsoó Moisee̱:
—Jmí, ndokꞌóchji̱ì. Ta̱sá kjuín ngiñá an nangi nínga síndo xota̱ xi xingi̱ án.
31Kó Moisee̱ ti̱ bi̱ ti̱ katsó nginií:
—Jmí, ngata̱ ꞌbíjñímasínjínjne̱. Jí boá xi nda ye ji nangi kixií, kó jè yé ji nínga ka̱ma si̱ꞌankjaꞌyájne̱. 32Tsi kji̱ndi̱béje̱jne̱ ji, kó tsi ko̱kéjne̱ ndi̱yà, ka̱má ko̱e̱ꞌéchiboajne̱ ngayeje ni xi tsja̱ajne̱ Néná.
33Sꞌe̱ jatjoni na̱xi̱ Sinaii̱, kó ján ni̱xtjin kijíyise. Nga ján kui ni̱xtjii̱n nga xota̱ Israee̱l ndyi̱yaꞌankꞌá koxa̱a̱ kjo̱a̱ꞌbíndaa̱ nga ndyi̱mongase ngo ngi̱ndie nínga sa̱ꞌínkjaꞌyá. 34Kó nga ta̱jño̱ó, kjiꞌanga je ku̱i̱ꞌítsꞌi̱yani nga ko̱e̱je̱, ṉdi̱i̱ ki̱a̱ kisꞌijña nga̱són nkꞌaá kui xotaa̱, 35kó Moisee̱ bi̱ katsó:
¡Ne tsa̱ꞌa̱n, ti̱sítji̱n ji!
¡Ti̱ꞌin ji nga xota̱ kondraa̱
ngatanga ndikón!
¡Ti̱ꞌin ji nga xota̱ xi chꞌoo̱ ji
kjin ngatꞌíndonii̱ ji̱n!
36Kó kjiꞌanga tjín nínga kixindyia xió xota̱ xi ndyi̱yaꞌankꞌá kui koxa̱a̱, bi̱ katsó Moisee̱:
¡Ne tsa̱ꞌa̱n,
ngata̱ ꞌbíjñímasínjín ji xota̱ Israee̱l,
xota̱ na̱xi̱ńdáa̱ xi ta̱nisién ꞌniú kjín maá!
Currently Selected:
Xki̱ 10: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
