Matioo̱ 6

Bi̱ tsꞌén akóyá Kjisoo̱ kjo̱a̱a̱ kótsꞌèn nga ni xi nda si̱ꞌán

1Ngata̱ ngindyi̱ko̱n xota̱jín niꞌánjnú kjiꞌanga ngo ni xi kixi̱ si̱ꞌánjnúu̱ ngo xota̱, tsi̱ꞌe̱ nga sku̱i̱e̱ nga nda ndyi̱niꞌánjnú, tsi bo̱a̱ si̱ꞌánjnú, Na̱ꞌminá xí tikón ndiꞌakꞌajmi jàn tsja̱ajínjnú ni xi je tikóndaa̱. 2Kó kuíni nga, kjiꞌanga ngo chji̱e̱ ko̱e̱ꞌéjnú, ngata̱ jmí tjio niꞌánkjaniejínjnú ngindyikónjnú, xikó tsꞌén xota̱ xi jókje̱n xi ngi̱ya ndiꞌa nínga ndokjo̱a̱ eén Néná ko̱jo ngi̱ya ndi̱yàtié chji̱a̱, tsi̱ꞌe̱ nga xotaa̱ sku̱i̱e̱ndikón, ja̱koxi̱ ni xi xiánjnúꞌun nga kui xotaa̱, jè tikoón ni xi sa̱ko̱ó. 3Kó kjiꞌanga ngo chji̱e̱ ko̱e̱ꞌé ji, nga sku̱i̱e̱jín ndse̱ skoón ni xi sa̱ꞌín ndse̱ xi kixi̱i̱, 4tsi̱ꞌe̱ nga kui chji̱e̱e̱ jmíjín xi sku̱i̱e̱, kó Na̱ꞌmíi̱ xi be ngayeje ni xi ꞌma niꞌaán, tsja̱á jí ni xi tsoboaá nga si̱ꞌin ji ngindyi̱ko̱n xotaa̱.

Bi̱ tsꞌén akóyá Kjisoo̱ kjo̱a̱a̱ kótsꞌèn ko̱ndókjo̱a̱a̱ Néná

(Rka 11:2-4)

5Kó kjiꞌanga ko̱ndókjoée̱ Néná, ngata̱ bo̱a̱jín niꞌín ji xikó tsꞌén xota̱ xi jókje̱e̱n, ngatꞌa̱ achichí tjó maá nga chji̱a̱a̱ Néná, nga mindyiakixi̱ ki̱a̱ ndiꞌa nínga ndokjo̱a̱ eén Néná ko̱jo nijon ndi̱yàtié, tsi̱ꞌe̱ nga ngayeje xota̱ xi sku̱i̱e̱, ja̱koxi̱ ni xi xiánjnúꞌun nga kui xotaa̱, jè tjisákó yejee̱ ni xi tsoboaá nga sa̱ko̱ó. 6Ta̱nga ji, kjiꞌanga ko̱ndókjoée̱ Néná, ngo ngi̱yaꞌma ti̱tjásꞌi̱n, tꞌíchjéꞌní jí nga̱ntjo̱a̱a̱, sꞌe̱ ndokjoée̱ Na̱ꞌmíi̱ xi tikón nínga ꞌmaa̱, kó kui Na̱ꞌmíi̱ xi be ni xi ꞌmaa̱, jè tikóndaa̱ ngo ni xi tsja̱á jí.

7Kó kjiꞌanga ko̱ndókjoée̱ Néná, ngata̱ ti̱ kui ti̱ kuijín ni ndokjo̱e̱ ji, xikoó xota̱ xi jundío̱jín, ngatꞌa̱ tsꞌénkjó kuí xotaa̱ nga kjiꞌá boá nga ku̱i̱ntꞌie̱é Néná kjiꞌanga tsie én xí chji̱a̱. 8Ngata̱ bo̱a̱jín niꞌánjnú xikoó kui xotaa̱, ngatꞌa̱ Na̱ꞌmijnú jè be ngayeje ni xi chjiénjnú, ngaskande ngindiee̱ nga jún chji̱a̱ꞌajnúu̱. 9Bi̱ tsꞌén ndókjo̱a̱jnúu̱ Néná:

Ji Na̱ꞌmi tsa̱ji̱n xi tindyin ji ndiꞌakꞌajmi jàn,

ngachjaninkꞌa jaꞌée̱n.

10Ngatama kꞌi̱e̱e̱ ngo ngi̱ndie xi ji ko̱ti̱xome.

Ngatama ni xi mejeén Jí kꞌi̱e̱ tꞌanangii̱,

xikó kjima ndiꞌakꞌajmi jàn.

11Te̱ꞌéjne̱ ngotꞌe̱ ni xi xi̱ni̱e̱ji̱n ndyiojón ndyiojón.

12Kó ti̱ꞌinjetakínjne̱ ni xi tjitjíe̱njne̱ ji̱n,

xikótsꞌèn niꞌánjetakónjne̱ ngayeje xota̱ xi tjitjieén tsa̱ji̱n.

13Kó ngata̱ boeꞌéndièjín ji nga chjátꞌayákónjne̱,

xín ti̱ꞌinkjeꞌejne̱ ni xi ndajín, ngatꞌa̱ jí tse̱ ngi̱ndie nínga botíxomaa̱,

ko̱jo ngaꞌniuú, ko̱jo kjo̱a̱jee̱, ngatsjéni̱xtjin. Bo̱a̱ kjiꞌi.

14Ngatꞌa̱ tsi si̱ꞌanjetakónjnúu̱ xota̱ xi chꞌo tjítsójnú, ti̱ bo̱a̱ ti̱ tsꞌén sa̱ꞌínjetakónjnú Na̱ꞌmijnú xi tikón ndiꞌakꞌajmii̱, 15ta̱nga tsi si̱ꞌanjetakónjínjnúu̱ xota̱ xi chꞌo tjítsójnú, ti̱ bo̱a̱ ti̱ tsꞌén Na̱ꞌmijnú sa̱ꞌínjetakónjínjnú ni chꞌo xi kiꞌmíjnú jún.

Bi̱ tsꞌén akóyá Kjisoo̱ kjo̱a̱a̱ nga niꞌán kjindiá

16Kó kjiꞌanga si̱ꞌankjaꞌájnú kjindiá yojojnú, ngata̱ bo̱a̱jín niꞌánjnú xikoó xota̱ xi jókje̱e̱n, ngatꞌa̱ kui xotaa̱, ndasen ꞌbijñá kje̱n tsi̱ꞌe̱ nga ngayeje xota̱ sku̱i̱e̱ nga kjindiá ndyi̱tsꞌènkjáꞌa yojoo̱, ja̱koxi̱ ni xi xiánjnúꞌun nga kui xotaa̱, jè tjisákoó ngayeje ni xi tsoboaá nga sa̱ko̱ó. 17Ta̱nga ji, kjiꞌanga si̱ꞌinkjeꞌe ji kjindiá yojòo̱, taníjín kje̱n ji, kó nangínjìn ndásíje̱n taki, 18tsi̱ꞌe̱ nga xotaa̱ sku̱i̱e̱jín nga kjindiá tiniꞌínkjeꞌe yojòo̱, ta̱ ngo tsí Néná xí Na̱ꞌmíi̱ xi ngatamabe, ngatꞌa̱ kui, ngayeje ni xi tjiꞌmaá xi be, kó kuí xí tsja̱á ni xi je tikóndaa̱ kui.

Bi̱ tsꞌén akóyá Kjisoo̱ kjo̱a̱a̱ kjo̱a̱cho̱o̱n ndiꞌakꞌajmii̱

(Rka 12:32-34)

19Ngata̱ jmí kjo̱a̱cho̱n ko̱jo ni xi chjí ꞌbíjñatjojínjnú kꞌi̱e̱ tꞌanangii̱, nínga xobií ko̱jo xtꞌaán sa̱ꞌínkjatsón, ko̱jo nínga chejeé sa̱ꞌín ngo ti̱xa̱, sꞌe̱ kjo̱jo. 20Ta̱sá nda tsi ki̱a̱ ndiꞌakꞌajmi jàn chja̱ꞌátjójnú kjo̱a̱cho̱n, nínga xobií ko̱jo xtꞌaán sa̱ꞌínkjatsónjín, kó nínga chejeé jmí ti̱xa̱ tsꞌénjín tsi̱ꞌe̱ nga kjo̱jo. 21Ngatꞌa̱ nínga tikón kjo̱a̱cho̱njnú, ti̱ ki̱a̱ kꞌuijñá ini̱ma̱jnú nga.

Bi̱ tsꞌén akóyá Kjisoo̱ kjo̱a̱a̱ ndiꞌíxoò yojoná

(Rka 11:34-36)

22Ndiꞌíxoò yojoná kuí xí ndyikón, kó kuíni nga, tsi nda ndyikin ji, ngayeje yojòo̱ nga kꞌuieé ndiꞌí, 23ta̱nga tsi ndajín ndyikin ji, ngayeje yojòo̱ nga kꞌuijñájñó. Kó tsi tíjín ndiꞌí xí tjiín yojòo̱, achichíra̱ ꞌniú jñó ka̱maa̱.

Bi̱ tsꞌén akóyá Kjisoo̱ kjo̱a̱a̱ kjo̱a̱cho̱o̱n

(Rka 16:13)

24Nde ngojín xota̱ xi jó ndi̱a̱ sa̱ꞌínseén, ngatꞌa̱ ngo chꞌo ka̱maa̱, kó xi ingoo̱ tjó ka̱maa̱, ko̱jo tsi ngo ndasen ka̱maa̱, kó xi ingoo̱ ndasénjín ka̱maa̱. Ka̱májín mosoo̱ Néná, ko̱jo mosoo̱ kjo̱a̱cho̱o̱n ka̱majnú.

Bi̱ tsꞌén akóyá Kjisoo̱ kjo̱a̱a̱ nga Néná koo̱n ndií

(Rka 12:22-31)

25Kuíni nga bi̱ xiánjnúꞌun: Ngata̱ nda̱jín májnú kjo̱a̱a̱ kjo̱a̱mindyionjnú, kjo̱a̱a̱ mí ni xi xi̱ni̱e̱jnú ko̱jo mí ni xi sꞌi̱o̱jnú, ko̱jo kjo̱a̱a̱ yojojnú, ko̱jo kjo̱a̱a̱ mí ńjño xi xcha̱jàjnú. A chjíjín ngasenii̱ kjo̱a̱mindyioo̱n ta̱bo̱a̱jiín nichiniee̱, kó a chjíjín ngasenii̱ yojoo̱ ta̱bo̱a̱jiín ńjño xi chajaá. 26Tsitsíjen chi̱bo̱a̱yajnúu̱ ni̱sie xi tjín nkꞌa jàn, nga jmí ni ꞌbítji̱e̱jín, ti̱nde jmí ni maxchájiín, ti̱nde jmí ni foaꞌátjójín ngi̱ndie nínga chjaꞌátjó ni xi maxchaá, ta̱nga Na̱ꞌminá xí tikón ndiꞌakꞌajmii̱ tsjaá ni xi kjinie. Kó a chjíjín ngasenii̱ jún ta̱bo̱a̱jiín ni̱siee̱. 27ꞌYání jún xi ka̱maa̱ nga masien metro̱ sa̱ꞌín nkꞌa ngase yojoo̱, ta̱ngatꞌanii̱ nga ꞌniú nda̱ ka̱maa̱.

28Kó míkjo̱a̱a̱ nga nda̱ ka̱majnú kjo̱a̱a̱ ńjño xi xcha̱jàjnú. Tsitsíjen chi̱bo̱a̱yajnúu̱ naxó xí tjín ngi̱jin kꞌijñaá, kótsꞌèn kjimaxchá, kó tsꞌénxájín ti̱nde jmí ńjño kjóyàjín, 29ta̱nga xiyàjnúꞌun nga nde nda̱ re Salomoo̱, ndatsi tsie kjo̱a̱je kisꞌiee̱, kamájiín tsajá ngo ńjño xikoó xi boajá naxoó. 30Kó tsi kui kꞌijñá xí ngotꞌe̱ tikón ngi̱jin kꞌijñaá, kó ndyiojón ngi̱yaa̱ ngo orjno̱ je kití, bo̱a̱ tsꞌén tsꞌénkajá ńjño Néná, ja̱ kókjiꞌi ngase ni xi sa̱ꞌín Néná kjo̱a̱a̱ jún. ¡Ánní nga tá chiboa sꞌijinjnú! 31Kó kuíni nga, ngata̱ nda̱jín májnú nga bi̱ kꞌuínjnú: Mí ni xi xi̱ni̱e̱, mí ni xi sꞌi̱o̱, mí ni xi xcha̱já. 32Ngatꞌa̱ ngayeje kui nii̱ xi mongase xota̱ xi jundío̱jín, ta̱nga jún tikónjnú ngo Na̱ꞌmi xi tikón ndiꞌakꞌajmi jàn xí je be mí ni xi chjiénjnú. 33Ta̱nga ta̱sá tjón mára ti̱ndyi̱séjnú nga si̱ꞌankjatjosónjnú kjo̱a̱botíxomaa̱ ko̱jo kjo̱a̱kixi̱i̱ Néná, kó ngayeje kui nii̱, ta̱ sꞌi̱sónrií nga sa̱kójnú. 34Kó kuíni nga, ngata̱ nda̱jín májnú kjo̱a̱a̱ ni xi ka̱ma ndyiojón, ngatꞌa̱ ndyiojoón kꞌuiérií ni xi nda̱ ka̱maa̱, jè ndakjiꞌi nga, nga ngo nga ngo ni̱xtjii̱n tjiín kjo̱a̱xti xi tsi̱ꞌe̱.

Currently Selected:

Matioo̱ 6: MAIX

Highlight

Copy