Malakiyaa̱ 1
1
Kjo̱a̱tjó xi kisꞌiee̱ Néná kjo̱a̱a̱ Jakoo̱b
1Kuí bí én xí Néná katsóyàtjoón xota̱ Israee̱l nga katsꞌénkjién nda̱chji̱ni̱e̱ꞌén xi ꞌmí Malakiyaa̱. 2Jè katsꞌentjójnúꞌun. Tsó Néná, ta̱nga jún bi̱ ꞌmíjnú:
Kótsꞌèn kiniꞌíntjéjne̱.
Kó bi̱ katsó Néná:
A mí tsí ntsꞌi̱e̱ Esauu̱ kamá Jakoo̱b, ta̱nga Jakoo̱b boá xi katsꞌentjó an, 3kó katsꞌenchꞌó an Esauu̱, kó ngi̱ndie kjiꞌitiya katsꞌen an kꞌijñaá, kó tꞌanangii̱, ngi̱ndiee̱ cho̱ chakaa̱l katsꞌen an.
4Kó ndatsi bi̱ ka̱tso̱ Endoo̱n:
Jè kamáni̱ma̱jne̱, ta̱nga chjanínkꞌá nginíjne̱ ni xi je ixóndoó.
Bi̱ tsó Néná xí tsi̱ꞌe̱ jájuún:
Kui skjinínkꞌá nginí, kó an ti̱ sa̱ꞌinkjatsón ngiñá an, kó ngi̱ndie nínga ndajín ka̱tso̱o̱ kui tꞌanangii̱, kó kuí boá kui nangii̱ xi ngatsjéni̱xtjin nga Néná sa̱ꞌínxchánní. 5Ti̱ júnní xi xcha̱jnú kui nii̱, kó bi̱ kꞌuínjnú:
Achichí yandikón jaꞌeén Néná, ngi̱ndie nínga foaꞌatjoón tsindioó nangi Israee̱l.
Én xí kiꞌmíyaà chináꞌmii̱
6Ngo ndí bendikón na̱ꞌmii̱, kó ngo moso̱ bendikón ndi̱a̱a̱. Jo̱o̱n, ja̱bo̱a̱ kjíꞌí, kó tsi an xi Na̱ꞌmi an, ñá tikón kjo̱a̱yandikónna, kó tsi an xi Ndi̱a̱ an, ñá tikón nga tjindákonna. Tsójnú Néná xí tsi̱ꞌe̱ jájuún, jún chináꞌmi, jún xi niꞌánchꞌójnú jaꞌénna, kó bi̱ ꞌmíjnú:
Kótsꞌèn nga ndyi̱niꞌánchꞌójne̱ jaꞌée̱n. 7Ja̱ kjo̱a̱a̱ nga nichinie xi ndándí ndyi̱niꞌánkꞌasꞌienjnú nga̱són ṉchanna, kósꞌe̱ bi̱ kiꞌmíjnú:
Kótsꞌèn nga ndyi̱yandikónjínjne̱ ji.
Ja̱ kjo̱a̱a̱ nga ndyi̱niꞌánkjójnú nga chꞌo boá ṉchanna. 8Kó kjiꞌanga ngo cho̱ xi ti̱ka̱ ndyi̱boeꞌéjnú tsi̱ꞌe̱ kjo̱a̱tjoó, a ndakjíꞌí kui nii̱. Ti̱ bo̱a̱ ti̱ kjiꞌinii̱ kjiꞌanga niꞌánkꞌasꞌiénjnú cho̱ xi fíkatsꞌoo̱, ko̱jo xi oo̱n, a ndakjíꞌí kui nii̱ nga. Ja̱ ti̱ꞌinkꞌasꞌinranìi̱ xota̱ xi botixómaá, kó, a tsjá ka̱maa̱ ni xi tiniꞌínje̱ ji kui, axa̱ a sa̱ꞌínjo̱ꞌo. Tsó Néná xí tsi̱ꞌe̱ jájuún.
9Ngotꞌe̱ ꞌne̱, ndókjo̱a̱jnúu̱ Néná, tsi̱ꞌe̱ nga ni̱ma̱ ka̱maa̱ jún, ta̱nga kótsꞌèn nga tsja ka̱maa̱ kjo̱a̱a̱ jún nga bo̱a̱ kjiꞌi ni xi niꞌánjnú. Tsó Néná xí tsi̱ꞌe̱ jájuún. 10ꞌYá juún bo̱a̱ xi ꞌbíchjá nga̱ntjo̱a̱a̱, ko̱jo tsi ꞌbítí ndiꞌí xí tsꞌentsíjee̱n ki̱a̱ nga̱són ṉchanna, kó nga ta̱kjo̱a̱ndaní kui xá xí tsꞌeén. Tsjájín mána ni xi niꞌánjnú jún, kó nde ngi̱ya ndsa̱jnú skjíbéjín an ni xi ko̱e̱ꞌéjnúꞌun. Tsó Néná xí tsi̱ꞌe̱ jájuún.
11Ngatꞌa̱ ndeskande nínga tjó tsꞌueé, kó ngaskande nínga ꞌbosꞌien, nga achichí yandikón jaꞌénna ngi̱jii̱n na̱xi̱ńdaá, kó ngayeje ngi̱ndie nga ꞌbítií nisije̱n jaꞌénna, ko̱jo niꞌánkꞌasꞌiee̱n kjo̱a̱tjó xi tsjie, ngatꞌa̱ je jaꞌénna ngi̱jii̱n na̱xi̱ńdaá. Tsó Néná xí tsi̱ꞌe̱ jájuún. 12Ta̱nga jún chꞌo ꞌmíjnúu̱ jaꞌénna, kjiꞌanga bo̱a̱ ꞌmíjnú nga ndándí ṉchanna, ko̱jo kjiꞌanga bo̱a̱ ꞌmíjnú nga jmí ni chjíjiín nichinie xi síndosoón.
13Kó ti̱ bi̱ ti̱ ꞌmíjnú nga:
¡Jè tsꞌajónjne̱ ngayeje kui nii̱! Kó niꞌánchꞌójnúꞌun. Tsó Néná xí tsi̱ꞌe̱ jájuún, kó kjindibájo̱jnúꞌun cho̱ chejé, ko̱jo cho̱ xi fíkatsꞌoo̱, ko̱jo cho̱ xi oo̱n, kó ki̱a̱ kiniꞌánkꞌasꞌiénjnú kjo̱a̱tjó. Kó, a skjíbé án ngi̱ya ndsa̱jnú kui nii̱. Tsó Néná. 14Ngatꞌíko̱jonii̱ xota̱ xi ꞌboṉcha̱a̱, kui xi tjiín cho̱ xi̱ꞌin xi nda kón ngi̱jii̱n cho̱o̱, kó tsóyatjón nga sa̱ꞌínkꞌasꞌienna, kósꞌe̱ cho̱ xi ndajiín tsꞌenkꞌásꞌienna ngijee̱. Ngatꞌa̱ án boá ngo Re xi nkꞌa xaá. Tsó Néná xí tsi̱ꞌe̱ jájuún. Kó jaꞌénna yandikón ngi̱jii̱n ngayeje na̱xi̱ńdaá.
Currently Selected:
Malakiyaa̱ 1: MAIX
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
