Lebitiko̱ 7
7
Bi̱ tsꞌén si̱ꞌankꞌasꞌien ngo kjo̱a̱tjó tsi̱ꞌe̱ nga kjóndajo̱ Néná
1-2Kjo̱a̱tjó xi si̱ꞌankꞌasꞌien kjo̱a̱a̱ nga nda koaꞌa ngiñá an xotaa̱, ꞌniú ndikón. Kuíni nga kui cho̱ xi si̱ꞌankꞌasꞌienna, chjiéngá ki̱a̱ si̱ꞌankꞌien nínga bitjasꞌi̱e̱nnii̱ ndiꞌandikoón, kó jiín kui cho̱o̱ ki̱a̱ chjatjónjón nga nijón nga̱ndee̱ ṉchandikoón.
3-4Chináꞌmii̱ ki̱a̱ ku̱i̱ꞌítí nga̱són ṉchandikoón ńtsꞌen kui cho̱o̱, ko̱jo tsiꞌee̱, ko̱jo chjo̱ondáyaá, ko̱jo ngo chikjan chi̱nga̱ndaa̱, ko̱jo xinié xí kjijon ngayeje kui nii̱, ko̱jo xinié xí kjijon yojoyìtsꞌe̱n kui cho̱o̱.
5-6Kui kjo̱a̱tjoó ta̱ chináꞌmii̱ tsí xi ka̱ma skji̱ni̱e̱. Kuí boá kui nii̱ xi ngo kjo̱a̱tjó xi si̱ꞌankꞌasꞌien nganda tsa̱ꞌa̱n, kuíni nga chjiéngá ki̱a̱ ka̱ma skji̱ni̱e̱ kui nii̱ ki̱a̱ ngi̱ndie xi xá tikónni.
Ni xi tsoboaá nga skji̱ni̱e̱ já chináꞌmii̱
7-8Kjo̱a̱a̱ kjo̱a̱tjó xi si̱ꞌankꞌasꞌien tsi̱ꞌe̱ nga nda koaꞌa ngiñá an xotaa̱ ko̱jo nga ku̱i̱ꞌana kjo̱a̱niꞌánjetakón, ta̱ ngo tsí kjo̱a̱botíxoma xi tikónna, kó kuí bí xi̱ꞌbi̱: Ngo chikjan kui cho̱o̱ xi ꞌbítí nganda tsa̱ꞌa̱n ko̱jo tji̱xi̱ín xi tsi̱ꞌe̱ chináꞌmii̱ ka̱ma, kui xi sa̱ꞌínkꞌasꞌien kui kjo̱a̱tjoó ki̱a̱ ṉchandikoón. 9Kó ti̱ tsi̱ꞌe̱ chináꞌmii̱ ka̱ma kui kjo̱a̱tjó xi orjno̱ si̱ꞌanchjánni, ko̱jo xi si̱ꞌanxo, ko̱jo xi si̱ꞌantsjángí xinié. 10Tsi kje̱ꞌe ngase kjo̱a̱tjó xi ni xi maxchá jno̱, tsi isti̱ ko̱na̱ngíndá ko̱jo tsi kixí nga si̱ꞌankꞌasꞌien, chjiéngá ndse̱je̱n ko̱kjángaá xkjín já chináꞌmii̱ xi ngasee̱.
Bi̱ tsꞌén si̱ꞌankꞌasꞌien kjo̱a̱tjó tsi̱ꞌe̱ nga chji̱a̱ꞌá nga ndatsꞌèn ko̱jo nga tsjatsꞌèn ku̱i̱ndyión
11Kjo̱a̱tjó xi si̱ꞌankꞌasꞌien nga chji̱a̱ꞌana tsi̱ꞌe̱ nga nda ko̱jo nga tsjatsꞌèn kꞌuíndo xotaa̱, chjiéngá bi̱ tsꞌén si̱ꞌankꞌasꞌienna: 12Tsi xi sa̱ꞌínkꞌasꞌien kui kjo̱a̱tjoó, tsi̱ꞌe̱ nga tsja̱ana ndokꞌóchjì boá, chjiéngá ndso̱ko̱a̱n ṉño̱pan xi sa̱ꞌínkꞌasꞌienna, ko̱jo pan, ko̱jo ngayita̱ xi jmí nisanjiín. Ngayeje kui nii̱ chjiéngá tsie isti̱ ku̱i̱ndyiaa̱ nga si̱ꞌanda̱ꞌyo̱ni.
13Kui kjo̱a̱tjoó chjiéngá nijan si̱ꞌankꞌasꞌienna chiboa pan xi tjiín nisan. 14Kui kjo̱a̱tjoó án boá xi si̱ꞌankꞌasꞌienna, ta̱nga chináꞌmi xi sa̱ꞌínkꞌasꞌiee̱n, ka̱ma skjíbé chiboa kui nii̱.
15Yojoo̱ kui cho̱ xi tjíniꞌánkꞌasꞌiee̱n, ti̱kuíní ni̱xtjin nga tjíniꞌánkꞌasꞌien nga ka̱ma xi̱ni̱e̱. Ka̱májín chja̱ꞌátjó chií tsi̱ꞌe̱ nga kamángindyiojón xi̱ni̱e̱.
Kje̱ꞌe ngase kjo̱a̱botíxoma kjo̱a̱a̱ nga niꞌánkꞌasꞌiee̱n kjo̱a̱tjó Néná
16Tsi ngayeje kon xota̱ xi tjítsꞌénkꞌásꞌién kui kjo̱a̱tjoó, ko̱jo tsi kjo̱a̱a̱ nga sa̱ꞌínkjatjosón ngo ni xi katsóyàtjón nga sa̱ꞌín, yojoo̱ kui cho̱o̱ xi tjítsꞌénkꞌásꞌieén, chjiéngá ti̱kuii ni̱xtjii̱n nga ka̱ma xi̱ni̱e̱. Tsi kꞌuijñá ngi̱chí kui yojoo̱, ka̱má xi̱ni̱e̱ nga kamángindyiojón. 17Ta̱nga tsi to̱kó tsꞌangi ngi̱chií kui yojoo̱ tsi̱ꞌe̱ nga kamáńgi, chjiéngá kꞌuití xi̱ꞌba̱.
18Tsi tjín xí skji̱ni̱e̱ kui yojoo̱ nga kamáńgi, kui xi bo̱a̱ sa̱ꞌiín, sa̱ꞌínjé. Kó an ngiti̱ skjíbéjín an kui kjo̱a̱tjoó, ti̱nde ngiti̱ koaꞌaxki̱jín an, ngatꞌa̱ ngo xi chꞌo xiáa̱n.
19Ngayeje xota̱ xi tsjie tsoó yojoo̱, ka̱ma skji̱ni̱e̱ yojo. Ta̱nga tsi tjín ni xi tsjiejín tjíꞌmií xi si̱tꞌaa̱ kui yojoo̱, ka̱májín xi̱ni̱e̱ kui yojoo̱, chjiéngá kꞌuití.
20Tsi tjín xí tsjiejín tsoó yojoo̱, kó tsi skji̱ni̱e̱ yojo xi kiniꞌánkꞌasꞌienna kjo̱a̱tjó kjo̱a̱a̱ nga nda koaꞌa nginína ngo xota̱, chjiéngá ku̱i̱yòtjíngií kui na̱xi̱ńdaá kui xi bo̱a̱ katsꞌeén.
21Tsi tjín xí sa̱ꞌínjo̱ ngo ni xi tsjiejín tjíꞌmií, kó ti̱ kuí xí skji̱ni̱e̱ni yojo xi je kiniꞌánkꞌasꞌienna kjo̱a̱tjó nga kichjiáꞌá kjo̱a̱a̱ nga nda ko̱jo nga tsjatsꞌèn kꞌuijñá ngo xota̱, chjiéngá ku̱i̱yòtjíngií kui na̱xi̱ńdaá kui xi bo̱a̱ katsꞌeén.
Kjo̱a̱botíxoma kjo̱a̱a̱ xinieé ko̱jo jiín
22Néná ti̱ bi̱ ti̱ katsoó Moisee̱ nga, 23tsi̱ꞌe̱ nga sa̱ꞌínkꞌasꞌiee̱n xota̱ Israee̱l kui kjo̱a̱botíxomaa̱:
Jún ka̱májín xi̱ni̱e̱jnú xinieé cho̱yojo toro̱, ko̱jo tsi̱ꞌe̱ cho̱tsa̱nga̱, ko̱jo tsi̱ꞌe̱ tindso̱ chjo̱on. 24Xinieé kui cho̱ xi cho̱ tamá katsꞌénxi̱ nga katsꞌénkꞌién, ka̱ma si̱ꞌankjiénjnú ta̱ xikótsꞌèn mejénjnú, ta̱nga ka̱májín xi̱ni̱e̱jnú. 25Kui xota̱ xi skji̱ni̱e̱ xinieé kui cho̱ xi kiniꞌánkꞌasꞌien nganda tsa̱ꞌa̱n, chjiéngá ku̱i̱yòtjíngií kui na̱xi̱ńdaá.
26Ti̱nde ka̱májín xi̱ni̱e̱jnú jiín cho̱ xi tjiín nijón sé ko̱jo tsi cho̱ xi tjiín tsja̱nga̱. Jmí ndasénjín ta̱ nínga tindyiónjnú, 27ta̱ꞌya xota̱ní xi skji̱ni̱e̱ yojo xi tjiín jín, chjiéngá ku̱i̱yòtjíngií kui na̱xi̱ńdaá.
Ni xi tsoboaá já chináꞌmii̱
28Néná ti̱ bi̱ ti̱ katsoó Moisee̱ nga, 29tsi̱ꞌe̱ nga sa̱ꞌínkꞌasꞌiee̱n xota̱ Israee̱l kui kjo̱a̱botíxomaa̱:
Tsi tjín xí sa̱ꞌínkꞌasꞌienna ngo kjo̱a̱tjó tsi̱ꞌe̱ nga ku̱i̱ꞌa nga nda ko̱jo nga tsjatsꞌèn kꞌuijñá, ngo tjín kuí kjo̱a̱tjoó xi chjiéngá kuí má xi sa̱ꞌínkꞌasꞌien. 30Tsja má nga tsꞌenkꞌásꞌienni kui kjo̱a̱tjó xi ku̱i̱ti̱ nganda tsa̱ꞌa̱n, nijan ngatjeꞌejo̱ ni̱se̱e̱n, ko̱jo xinieé kui cho̱o̱ nga, kó ki̱a̱ kje̱n nínga tikón ṉchanna, ki̱a̱ ngatsꞌénkꞌásꞌiénna xi kótsꞌèn niꞌánkꞌasꞌien ngo kjo̱a̱tjó. 31-32Kósꞌe̱ chináꞌmii̱ ngatꞌítí xinieé kui cho̱o̱ ki̱a̱ nga̱són ṉchandikónna.
Kjo̱a̱a̱ kui kjo̱a̱tjoó, ni̱se̱e̱n kui cho̱o̱ tsi̱ꞌe̱ já chináꞌmii̱ ka̱ma, ta̱nga ti̱ꞌmi xí kixi̱i̱ kui cho̱o̱ chjiéngá kui chináꞌmi xi sa̱ꞌínkꞌasꞌien kui kjo̱a̱tjoó skjíbé, 33ngatꞌa̱ kuí boá kui nii̱ xi tsoboaá kjo̱a̱a̱ xá xí tsꞌén. 34Án boá xi je bo̱a̱ kixian an, nga ni̱se̱e̱n ko̱jo ti̱ꞌmi̱í kui cho̱o̱ ngatsjéni̱xtjin nga tsi̱ꞌe̱ chináꞌmii̱ ka̱ma. Ngayeje kui kjo̱a̱tjó xi sa̱ꞌínkꞌasꞌien xota̱ Israee̱l, ngatsjéni̱xtjin nga kui nii̱ xi stso̱bo̱a̱a̱ nga skjíbé já chináꞌmii̱.
Bi̱ tsꞌén fetꞌani ngayeje kjo̱a̱botíxomaa̱
35-36Ndeskande ni̱xtjin nga Moisee̱ katsjáxaá Aaroo̱n ko̱jo ndií nga kui xi ka̱ma chináꞌmii̱ Nee̱ xota̱ Israee̱l, bo̱a̱ tsꞌén kisꞌijña nga kui chikjaa̱n yojoo̱ cho̱ xi niꞌánkꞌasꞌiee̱n Néná, ngatsjéni̱xtjin nga tsi̱ꞌe̱ kui já chináꞌmii̱ ka̱ma. 37Kó ti̱ bo̱a̱ tsꞌén je kisꞌijña kótsꞌèn chjiéngá si̱ꞌankꞌasꞌien kui kjo̱a̱tjó xi ꞌbítí nganda tsi̱ꞌe̱ Néná, ko̱jo kui kjo̱a̱tjó xi ni xi maxchá jno̱, ko̱jo kui kjo̱a̱tjó xi niꞌánkꞌasꞌien nga nda chꞌiá nginí Néná, ko̱jo kui kjo̱a̱tjó xi niꞌánkꞌasꞌien kjiꞌanga boeꞌéxaá já chináꞌmii̱, ko̱jo kui kjo̱a̱tjó xi niꞌánkꞌasꞌien nga chjiáꞌaá Néná nga nda ko̱jo nga tsjatsꞌèn mindyión. 38Kuí bí kui kjo̱a̱botíxomaa̱ xi Néná katsjaá Moisee̱ ki̱a̱ na̱xi̱ Sinaii̱, tji̱e̱nga xota̱ Israee̱l kisꞌińdo ki̱a̱ nangi kixií.
Currently Selected:
Lebitiko̱ 7: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
