Lebitiko̱ 1
1
Kjo̱a̱tjó xi tsja ka̱maa̱ Néná nga si̱ꞌankꞌasꞌiee̱n
1Néná tsíchji̱a̱a̱ Moisee̱ ndeskande ki̱a̱ nínga tikón ndiꞌandikoón, kó bi̱ tsꞌén atíxomaa̱, 2tsi̱ꞌe̱ nga kui eén xi ka̱tso̱yaa̱ xota̱ Israee̱l:
Kjiꞌanga ngo jún xi sa̱ꞌínkꞌasꞌienna ngo kjo̱a̱tjó tsi̱ꞌe̱ nga ku̱i̱ꞌítí nganda tsa̱ꞌa̱n, ka̱má sa̱ꞌínkꞌasꞌienna ndií cho̱yojo, ko̱jo tsi ndií tindso̱, ko̱jo tsi ndií cho̱tsa̱nga̱.
3Tsi tjín xí ngo kjo̱a̱tjó xi ndií cho̱yojo sa̱ꞌínkꞌasꞌienna, chjiéngá kui cho̱o̱, ngo cho̱ xi xi̱ꞌin ko̱jo xi nda ngatama. Kó ki̱a̱ ngatjíjo̱ nínga bitjasꞌi̱e̱nnii̱ ndiꞌandikoón, 4-5kó ki̱a̱ ngatꞌíjñasoón tsja to̱ko̱ kui ndií cho̱yojoo̱, sꞌe̱ nga tsꞌenkꞌién ngijee̱. Bo̱a̱ tsꞌén nga tsja ka̱mana nga skjíbé án kui kjo̱a̱tjoó, kó sa̱ꞌinjetakóo̱n jeé.
Kó já chináꞌmii̱ sa̱ꞌínkꞌasꞌienna jiín kui ndí cho̱yojoo̱, sꞌe̱ jaskan ki̱a̱ nga kjitjónjón nga nijón nga̱ndee̱ kui ṉchandikoón. 6-9Kui xi sa̱ꞌínkꞌasꞌienna kui kjo̱a̱tjoó, chjiéngá ngatjaꞌáxiín tji̱xi̱ín kui cho̱o̱ ko̱jo kjín tjín ngatatieya. Kó nga fetꞌa ndáfoa ngatanijónni tsiꞌee̱ ko̱jo se, sꞌe̱ ngatsꞌénkꞌásꞌieén ngayeje kui cho̱o̱ chináꞌmii̱. Kui já chináꞌmii̱ ku̱i̱ꞌíndonda chikín nga̱soón ṉchandikoón, kósꞌe̱ ku̱i̱ꞌítsié ndiꞌí, kó ki̱a̱ ku̱i̱ꞌítí chikjaa̱n kui cho̱o̱, ko̱jo to̱ko̱, ko̱jo se, ko̱jo tsiꞌee̱, ko̱jo xinieé. Kuí boá kui nii̱ xi ngo kjo̱a̱tjó xi sije̱n, xi si̱ꞌankꞌasꞌien nganda tsa̱ꞌa̱n.
10Tsi tjín xí ngo ndií cho̱tsa̱nga̱ ko̱jo tsi ngo ndií tindso̱ sa̱ꞌínkꞌasꞌienna, ti̱ chjiéngá nga ngo cho̱ xi xi̱ꞌin ko̱jo xi nda ngatama nga. 11Ki̱a̱ nga tsꞌenkꞌién ki̱a̱ tꞌa ṉchandikoón, kó já chináꞌmii̱ ki̱a̱ nga kjitjónjón jiín kui cho̱o̱ nga nijón nga̱ndee̱ kui ṉchandikoón. 12-13Sꞌe̱ jaskan kui xi sa̱ꞌínkꞌasꞌienna kui kjo̱a̱tjoó ngatatieya kui cho̱o̱. Kó nga fetꞌa ndáfoa ngatanijónni tsiꞌee̱ ko̱jo se, sꞌe̱ ngatsꞌénkꞌásꞌieén ngayeje kui cho̱o̱ chináꞌmii̱. Kó ki̱a̱ ṉchandikoón ngatꞌítí chikjaa̱n kui cho̱o̱, ko̱jo to̱ko̱, ko̱jo se, ko̱jo tsiꞌee̱, ko̱jo xinieé. Kuí boá kui nii̱ xi ngo kjo̱a̱tjó xi sije̱n, xi si̱ꞌankꞌasꞌien nganda tsa̱ꞌa̱n.
14Kó tsi tjín xí sa̱ꞌínkꞌasꞌienna ngo kjo̱a̱tjó xi cho̱ xi tjiín tsja̱nga̱, chjiéngá tójo ko̱jo tsi ndií toṉña̱ xi sa̱ꞌínkjién. 15Kó chináꞌmii̱ ngatꞌijñá kui cho̱o̱ nga̱són ṉchandikoón, kó ki̱a̱ ngatꞌaxiékjo to̱ko̱, sꞌe̱ ngatꞌítí, kó jiín kui cho̱o̱ ki̱a̱ ngatjon nga̱ndee̱ kui ṉchandikoón. 16Jaskan ngatjaꞌáxiín chꞌiaà ko̱jo tsiꞌee̱, kó ki̱a̱ ngatꞌíndo nga̱ndee̱ ṉchandikoón, ki̱a̱ nínga mindyia ndisoo̱. 17Jaskan ngatatiengaa̱ kui cho̱o̱, ta̱nga jmí tsi kjo̱a̱ꞌáxiín nga̱a̱, kó jmí tsi jó tjín kꞌo̱xié. Kó nga fetꞌaa̱ kui chináꞌmii̱ ki̱a̱ ngatꞌítí nga̱són chikín xí tjítií kui cho̱o̱. Kuí boá kui nii̱ xi ngo kjo̱a̱tjó xi sije̱n, xi si̱ꞌankꞌasꞌien nganda tsa̱ꞌa̱n.
Currently Selected:
Lebitiko̱ 1: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
