Josuee̱ 1
1
Néná tsangase ngo ngito̱ko̱ tja̱tsi̱e̱
1Jaskan ngije kꞌien mosoo̱ Néná xí kiꞌmí Moisee̱,#1:1 Xikó tsó ki̱a̱ Xki 27:18; Nde 1:38, Néná ja̱bo̱a̱ jè jaꞌájin Josuee̱ nga kui xi kꞌuijñá ngajoo̱ Moisee̱. Ngotꞌe̱ ꞌne̱, Néná tsꞌénbotixómaá nga kui xi kꞌuijñátjoón xota̱ na̱xi̱ńdaá, ko̱jo nga kui xi kjo̱jo ki̱a̱ tꞌanangi xi katsóyàtjoón Néná nga tsja̱á, tsi̱ꞌe̱ nga bo̱a̱ tsꞌén nga nda kjo̱jo xá xí ítsꞌi̱yanii̱ Néná nga jatjoni xotaa̱ ki̱a̱ nangi Ejipto̱. Néná tsíchji̱a̱jo Josuee̱, ndií Nuu̱n, nda̱ Moso̱ xi asíko̱jo Moisee̱, nga bi̱ katsoó:
2—Ngotꞌe̱ ꞌne̱, nga je kꞌien moso̱na Moisee̱, ti̱sítji̱n ji, kó ti̱tja̱tíje̱ ji ndejèꞌ Jorndaa̱n ngayeje kui xota̱ na̱xi̱ńdaá, tsi̱ꞌe̱ nga ji kꞌuíntjée̱n ki̱a̱ nangi xi an tsjàa̱ xota̱ Israee̱l. 3Án boá xi tsjajnúꞌun ngayeje tꞌanangi nínga tsja̱jon ndsa̱kojnú, xikó kixiàa̱n Moisee̱. 4Tsjajnúꞌun ngayeje tꞌanangi xi yaꞌanii̱ ndeskande nangi kixií, ko̱jo na̱xi̱ńdá Líbano̱, ngaskande ndejèꞌ Éufratee̱, ko̱jo ngayeje nangii̱ xota̱ Ee̱t, ngaskande Ndáchíkón Menditerráneoo̱, xtji̱e̱e̱n nínga ꞌbosꞌien tsꞌueé, xi tꞌanangi xi tsa̱jún ka̱ma.
5Kjiꞌanga tjín xí skjánjoo̱, jmíjín xi ka̱maa̱ sa̱ꞌiín, ngayeje ni̱xtjin nga ku̱i̱ndyin ji nga̱sondie, ngatꞌa̱ xikótsꞌèn nga asiko̱jo an Moisee̱, ti̱ bo̱a̱ ti̱ tsꞌén kosiko̱joo ji nga. Jmíni̱xtjin kꞌuijñámasiee̱n ko̱jo kꞌuijñáso̱bo̱a̱a̱, ngatsjéni̱xtjin nga skoon. 6Ta̱nga chjiéngá ti̱ꞌingaꞌní jí, ko̱jo chꞌokon ti̱ꞌin ji yojòo̱, ngatꞌa̱ jí boá xi si̱ꞌinkabìi̱ xota̱ na̱xi̱ńdá Israee̱l kui tꞌanangi xi sa̱ko̱ó, kui xi kixiyatjóo̱n xota̱ xi xchaá nga tsjàa̱. 7Ta̱ kuí tsi ni xi míꞌaá nga si̱ꞌingaꞌní jí, ko̱jo nga ꞌniú chꞌokon ti̱ꞌin ji yojòo̱, tsi̱ꞌe̱ nga nda chíi̱n nga bo̱a̱ si̱ꞌin ji, xikó tsó ngayeje kui kjo̱a̱kiti xi katsjaá moso̱na Moisee̱. Ngata̱ chiíjín niꞌínkjìi̱n yojòo̱, tsi̱ꞌe̱ nga nda ko̱e̱je̱e̱ ngayeje ni xi si̱ꞌin ji. 8Nga jmíni̱xtjin ꞌbíjñímasin ji nga si̱ꞌinye ji kui xo̱jo̱n kjo̱a̱kitii̱, kó nga ni̱xtjin ko̱jo nga ni̱xtji̱e̱n chjátꞌayé ji, tsi̱ꞌe̱ nga bo̱a̱ má si̱ꞌin ji xikó tsó ngayeje ni xi kjitꞌa, ngatꞌa̱ bo̱a̱ tsí tsꞌén nga nda ku̱i̱ńtje̱ ji, ko̱jo nga nda ka̱ma ngayeje ni xi si̱ꞌin ji.
9Án boá xi tsꞌénmíꞌaá nga si̱ꞌingaꞌní jí, ko̱jo nga chꞌokon si̱ꞌin ji yojòo̱, ngata̱ ndakinjín má ji, ti̱nde nga niꞌínkjiéjíntakín, ngatꞌa̱ án boá xi Nèe̱ ma an, kó án boá xi kjótsoꞌbájoo̱ ta̱ nínga kꞌuín jí.
Bi̱ tsꞌén índa yojoo̱ xotaa̱ nga kijí kjo̱a̱xchán
10Kósꞌe̱ Josuee̱ katsjaá ngo kjo̱a̱ já ngito̱ko̱o̱ na̱xi̱ńdaá, nga bi̱ katsoó:
11—Tangínjnú nínga síndo ndiꞌańjñoo̱ xotaa̱, kó bo̱a̱ tꞌínjnúu̱ xota̱ na̱xi̱ńdaá nga ngatꞌíndonda nichinie, ngatꞌa̱ ngotꞌe̱ ján ni̱xtjii̱n, ku̱i̱tja̱tió ndejèꞌ Jorndaa̱n, tsi̱ꞌe̱ nga ku̱i̱tjásꞌi̱e̱n, kó ka̱ma tsa̱ñá kuí tꞌanangi xi Néná tsꞌéntsjáná nga ki̱a̱ ku̱i̱ndyión.
12Kó Josuee̱ ti̱ tsíchji̱a̱jo xota̱ tji̱e̱e̱ Rubee̱n, ko̱jo xota̱ tji̱e̱e̱ Ngaa̱nd, ko̱jo xi masien xota̱ tji̱e̱e̱ Manasee̱, nga bi̱ katsoó:
13—Ngatjaꞌátsjienjnú én xí tsíchji̱a̱ Moisee̱, kui xi mosoo̱ Néná, nga bo̱a̱ katsójnú nga Nejnú boá xi sa̱ꞌin nga si̱ꞌankjaꞌyájnú, ko̱jo nga tsja̱ajnú kui tꞌanangii̱. 14Ínchjínjnú, ko̱jo ndíjnú, ko̱jo cho̱ xi tjínjnú, kꞌi̱e̱ ngatꞌíndora kꞌi̱e̱ kui nangi xi katsjájnú Moisee̱ xtji̱e̱e̱n nínga fotjo tsꞌueé ndejèꞌ Jorndaa̱n, ta̱nga jún, ngayeje jáxíꞌín xi ꞌniuú, ko̱jo xi chꞌokoo̱n, kui xi tjiín ni xi bixkánjoo̱, chjiéngá ku̱i̱tja̱tiójnú ndejeèꞌ, nga kongíntjónjnúu̱ ntsꞌiejnú tsi̱ꞌe̱ nga ko̱si̱ko̱jójnú. 15Ngaskande nga Néná tsja̱á nga sa̱ꞌínkjaꞌyá ntsꞌiejnú xikó katsꞌénjo̱jnú jún, kó ngije sa̱ko̱ó tꞌanangi xi Néná tsja̱á, ngaskande kjiꞌá tsí nga ka̱ma kongín nginíjnú tꞌanangi xi tsa̱jún, kui xi katsjájnú Moisee̱, mosoo̱ Néná, kꞌi̱e̱ xtji̱e̱nnii̱ ndejèꞌ Jorndaa̱n, nínga tjo tsꞌueé.
16Kósꞌe̱ kui xotaa̱, bi̱ katsoó Josuee̱:
—Si̱ꞌankjatjosónjne̱ ngayeje ni xi tichjiéꞌéjne̱ ji, kó kongínjne̱ ta̱ nínga ko̱na̱ngíyéjne̱. 17Ko̱nda̱ꞌyáꞌénjne̱ ji ngayeje ni xi séjne̱, xikótsꞌèn kandaꞌyáꞌénjne̱ Moisee̱, tji̱e̱nga Néná kjótsoꞌbájoo̱, xikótsꞌèn kistsoꞌbájo̱ Moisee̱. 18Ta̱ꞌyaní xi kitikjo̱a̱ sa̱ꞌín yojoo̱ kjo̱a̱a̱ ni xi tꞌísé ji, kó tsi ku̱i̱ntꞌiéꞌénjiín ngayeje ni xi ko̱ti̱xome ji, chjiéngá ko̱yà. Ta̱ kuí tsi ni xi ndyi̱chjiáꞌájne̱ ji nga ti̱ꞌingaꞌní jí, ko̱jo nga chꞌokon ti̱ꞌin ji yojòo̱.
Currently Selected:
Josuee̱ 1: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
