Xota̱ Ebreoo̱ 9

Bi̱ tsꞌén tjibóko ni xi kamá ndiꞌańjñoo̱ Néná xi kisꞌijña nga̱sondiee̱

1Ngi̱yaa̱ kui kjo̱a̱ꞌbínda xi tjoón, Néná katsjá kjo̱a̱botíxoma, tsi̱ꞌe̱ nga xcha̱ kótsꞌèn si̱ꞌantsjaa̱ Kui, ki̱a̱ ngi̱ndie ndikón xí kisꞌijña kui nga̱sondiee̱. 2Ndiꞌańjñoo̱ Néná, bi̱ tsꞌén kisꞌijña: Nínga tjoón ngi̱ndie tsjie kiꞌmí, nínga kisꞌijña ni xi ꞌbítíyá ndiꞌí xí tsꞌentsíjee̱n, ko̱jo ki̱a̱ kisꞌijña yámíxa̱ nínga síndo pan xi je Néná kiniꞌánkꞌasꞌiee̱n. 3Kó nga̱xto̱n xi ma joó ńjño xi tji̱e̱e̱n, kisꞌijña ngi̱ndie nínga ta̱nisién ꞌniú ndikoón, 4nínga kisꞌijña ṉchandikón xí to̱nsinié nínga ikꞌítí ni sije̱e̱n, kó ti̱ ki̱a̱ kisꞌijña koxa̱a̱ kjo̱a̱ꞌbíndaa̱ xi to̱nsinié akjajon yeje. Ngi̱yaa̱ kui koxa̱a̱ kixindyia manaa̱, ko̱jo ki̱a̱ kisꞌiya yá xí tsaꞌa Aaroo̱n xi ja̱bo̱a̱ je íntsꞌién, ko̱jo yátie nínga kjitꞌa kjo̱a̱kitii̱, 5kó nga̱soón kui koxa̱a̱, ki̱a̱ kisꞌińdosón jó keruu̱b xi akó kjo̱a̱jee̱ Néná, kó nga̱a̱ ki̱a̱ yejénnié kui ngi̱ndie nínga Néná katsꞌénjetakón jeé xotaa̱. Ta̱nga ngotꞌe̱, ka̱májín tsie ngase ko̱ndókjo̱a̱ kjo̱a̱a̱ kui nii̱.

6Bi̱ tsꞌén kisꞌińdonda kui nii̱: Ngi̱ndie xi tjoón kui ngi̱ndie ndikoón, ki̱a̱ tsꞌasꞌien chináꞌmii̱ nga katsꞌénkjatjosón nga katsꞌéndikón Néná, 7ta̱nga ngi̱ndie xi ma joó, ta̱kuítsí chináꞌmi xi ꞌniú nkꞌa xaá xi ma ꞌbosꞌien, kó ta̱ ngo tsí ndi̱yà nga ngo noó, kó nga ꞌbosꞌien, chjiéngá jiín cho̱ ko̱a̱ꞌa̱, tsi̱ꞌe̱ nga sa̱ꞌínkꞌasꞌien kjo̱a̱tjó, kó ku̱i̱ꞌíchjítjé yojoo̱, kó ti̱ ku̱i̱ꞌíchjítjé jeé xota̱ na̱xi̱ńdá xi katsꞌénjeé nga, kui xi kamábejín tsi jé, ni xi katsꞌén, 8kó bo̱a̱ tsꞌén nga A̱si̱énni̱xtjii̱n Néná tsꞌénkjiín takón, nga tji̱e̱nga kisꞌijña ndiꞌańjño xi tjoón, kji̱e̱ bokójín ndi̱yà xí fochó nínga tikón ngi̱ndie xi ꞌniú ndikoón. 9Kui nii̱ xi bokóná ngotꞌe̱, nga chji̱e̱e̱ ko̱jo kjo̱a̱tjó xi niꞌánkꞌasꞌien nga kiniꞌándikón Néná, ka̱májiín sa̱ꞌín xikótsꞌèn chjiéngá sꞌi̱jii̱n kjo̱a̱kjíntakoón xota̱ xi bo̱a̱ tsꞌén tsꞌéndíkón Néná. 10Kui kjo̱a̱botíxomaa̱ kjo̱a̱a̱ nichiniee̱ niꞌyoó ko̱jo xikótsꞌèn tsꞌéntsjie yojoo̱ xotaa̱ ngindyi̱ko̱n Néná tsí bo̱a̱, kui kjo̱a̱botíxomaa̱ chjírií, ta̱nga ngaskande tsí nga Néná ko̱síkjo nii̱.

Bi̱ tsꞌén tjibóko ni xi katsꞌén jiín Kristoo̱

11Ta̱nga nga je tikón Kristoo̱, kui xi chináꞌmi xi ꞌniú nkꞌa xaá, mongase nganda tsa̱ñá ni xi ja̱koxi̱ nga nda. Kui tsꞌasꞌien ki̱a̱ ndiꞌańjño xi ꞌniú nda ngasee̱, xi jmí tsi tsja xota̱ xi katsꞌénda, ti̱nde jmí tsi kui nga̱sondiee̱ chji̱a̱ni, 12ta̱ ngo tsí ndi̱yà, ko̱jo ngatsjéni̱xtjin tsꞌasꞌien, ngi̱ndie nínga ta̱nisién ꞌniú ndikoón, kó jmí tsi tsi̱ꞌe̱ nga sa̱ꞌínkꞌasꞌiee̱n Néná jiín tindso̱ xi̱ꞌin, ko̱jo tsi jiín ndií cho̱yojo. Jín tsi̱ꞌe̱ boá xi katsꞌénkꞌasꞌien, kó bo̱a̱ tsꞌén íchjítjé jéná, tsi̱ꞌe̱ nga ngatsjéni̱xtjin katsꞌéndéná. 13Jiín cho̱yojo xi̱ꞌii̱n, ko̱jo jiín tindso̱ xi̱ꞌii̱n, ko̱jo ndisoo̱ cho̱yojo xi̱xi̱ ínchjín xi ꞌbítí ṉchandikoón, kui xi kachjatjónjón xota̱ xi ndándií, kisꞌiee̱ ngaꞌniú, tsi̱ꞌe̱ nga katsꞌéntsjie yojoo̱ xotaa̱ ngindyi̱ko̱n Néná. 14Tsi bo̱a̱ kamá, ja̱ tsie ngase ngaꞌniú tjiín jiín Kristoo̱. Kui xi ngatꞌaa̱ A̱siénni̱xtjin xi tikón ngatsjéni̱xtjii̱n nga Kristoo̱ katsjá ti̱kuii yojoo̱, xikoó ngo chji̱e̱ xi tsjie ngindyi̱ko̱n Néná, kó bo̱a̱ tsꞌén nga jiín Kristoo̱ boá xi tsꞌéntsjie kjo̱a̱kjíntakónná, tsi̱ꞌe̱ nga ngiti̱ si̱ꞌánjín ñá ni xi tsꞌenkꞌiénná, kó ta̱sá si̱ꞌantsjàa̱ kui Néná xí tikoón.

15Ngatꞌa̱ nga kꞌien Jesukristoo̱, katsꞌéndé xotaa̱ kjo̱a̱a̱ jé xí katsꞌén, kjiꞌanga chjí ngasee̱ kjo̱a̱ꞌbínda xi tjoón. Jesukristoo̱ boá xi katsjaá chjí kuí kjo̱a̱ꞌbínda tja̱tsi̱e̱e̱ Néná, kó ta̱ngatꞌanii̱ nga kꞌien kui, nga xota̱ xi je jaꞌájin Néná, sa̱ko̱ó kjo̱a̱ꞌnaxiéꞌá ngatsjéni̱xtjin xi katsó Néná nga tsja̱á. 16Tsi̱ꞌe̱ nga ka̱machjínií ngo xo̱jo̱n nínga kjitꞌa ngo ni xi si̱ꞌankꞌasꞌien ngije kꞌien ngo xota̱, chjiéngá tjón mára ko̱yà kui xota̱ xi katsꞌénda kui xo̱jo̱o̱n. 17Ngatꞌa̱ ngo xo̱jo̱n xi kjitꞌa ni xi si̱ꞌankꞌasꞌiee̱n ngije kꞌien ngo xota̱, chjíjiín tji̱e̱nga kui xi katsꞌéndaa̱, to̱kó tikón ngase nga̱sondie. 18Kuíni nga jín kamákjién, tsi̱ꞌe̱ nga ka̱machjínií kui kjo̱a̱ꞌbínda tjón xi íjñá Néná. 19Kó bi̱ katsꞌén Moisee̱, ngije katsóyaà kjo̱a̱botíxomaa̱ ngayeje xota̱ na̱xi̱ńdaá, iskjíbé ngo tsa̱nga̱ iní, ko̱jo ngo tjiaa̱ ngo yá xí ꞌmí isopo̱, kó katsꞌénkꞌandyi̱ni jiín cho̱yojo xi̱xi̱i̱, ko̱jo tsi̱ꞌe̱ tindso̱ xi̱ꞌin xi katsꞌénkꞌájinni ndáfoa, kó iskjitjónjón xo̱jo̱n kjo̱a̱kitii̱, ko̱jo ngayeje xota̱ na̱xi̱ńdaá. 20Sꞌe̱ bi̱ katsó Moisee̱: “Kuí bí kui jiín xí tsjaá chjí kjo̱a̱ꞌbínda xi Néná índajo̱jnú.” 21Kó Moisee̱, ti̱ bo̱a̱ ti̱ tsꞌén iskjitjónjón jín ndiꞌańjñoo̱, ko̱jo ngayeje ni xi niꞌánkjién nganiꞌántsjaà Néná ki̱a̱ na̱ngo̱xi̱i̱. 22Kjo̱a̱kitii̱ tsó nga tsi̱ꞌe̱ nga ka̱matsjie mején ngayeje nii̱ ngindyi̱ko̱n Néná, jiín xí bo̱a̱ tsꞌén. Kuíni nga chjiéngá jín xtjónní tsi̱ꞌe̱ nga ka̱majetakón jeé.

Bi̱ tsꞌén tjibóko nga Kristoo̱ katsꞌénkꞌasꞌien yojoo̱ nganda tsa̱ñá

23Kuíni nga ngi̱ndie ndikón xí tikón nga̱sondiee̱, xi katjoꞌótꞌani ndiꞌakꞌajmi jàn, kamáchjieén nga bo̱a̱ tsꞌén si̱ꞌantsjieni. Ta̱nga ni xi tjín ndiꞌakꞌajmi jàn, kamáchjiénrií ni xi nda ngase, ta̱bo̱a̱jiín kui kjo̱a̱tjó xi̱ꞌba̱ tsi̱ꞌe̱ nga si̱ꞌantsjieni. 24Ngatꞌa̱ Kristoo̱ jmí tsi tsꞌasꞌien ngi̱yaa̱ kui na̱ngo̱xi̱ ndikón xí katsꞌénda tsja xotaa̱, kui xi ta̱ ni xi katjoꞌótꞌa na̱ngo̱xi̱ ndikón xí ja̱koxi̱i̱ boá. Kristoo̱ boá xi ki̱a̱ má ndiꞌakꞌajmii̱ tsꞌasꞌien, tsi̱ꞌe̱ nga jachó ngindyi̱ko̱n Néná, kó kuí boá xi tsꞌénmíꞌá nganda tsa̱ñá. 25Kó jmí tsi tsꞌasꞌien ndiꞌakꞌajmi jàn, tsi̱ꞌe̱ nga kjín ndi̱yà sa̱ꞌínkꞌasꞌien yojoo̱ xikoó ngo chji̱e̱, xikó tsꞌén kuí chináꞌmi xi ꞌniú nkꞌa xaá nga xki̱ nó ꞌbosꞌien, kui ngi̱ya xi ta̱nisién tsjiee̱ Néná, nga tsꞌenkꞌásꞌién jín xí kuijín tsi̱ꞌe̱. 26Tsi bo̱a̱ kamá, Kristoo̱ achichíra̱ kjín ndi̱yà kꞌien, ndeskande koó nga kijítjatsꞌennii̱ kui nga̱sondiee̱, ta̱nga ngotꞌe̱ ꞌne̱, ngije kjifetꞌaa̱ ni̱xtjii̱n, Kristoo̱ ta̱ ngo tsí ndi̱yà jeꞌe, nga ti̱kuii katsjá yojoo̱ nga kiniꞌánkꞌién, tsi̱ꞌe̱ nga kjo̱a̱ꞌáxín jeé. 27Xikó tsꞌén tikón nga ngayeje xotaa̱, nga ta̱ ngo tsí ndi̱yà ko̱yà, sꞌe̱ jaskan Néná ka̱tso̱yà tsi nda ko̱jo tsi ndajín katsꞌén. 28Kuíni nga ti̱ bo̱a̱ ti̱ tsꞌén Kristoo̱, ta̱ ngo tsí ndi̱yà katsjá yojoo̱ nga kiniꞌánkꞌién, tsi̱ꞌe̱ nga kijíjo̱ jeé xotaa̱. Jaskan kji̱ndi̱bá nginí ingo ndi̱yà, ta̱nga jè ngiti̱ kjo̱a̱a̱ jeéjín nga kjo̱e̱ꞌe, kji̱ndi̱bá tsi̱ꞌe̱ nga kꞌo̱xiéꞌá xota̱ xi ndyi̱koyaa̱ kui.

Currently Selected:

Xota̱ Ebreoo̱ 9: MAIX

Highlight

Compare

Copy