Jenesii̱ 41

Bi̱ tsꞌén tseꞌéchi̱nii̱ nda̱ ree̱

1Ngije jaꞌa jó nó, ngo chi̱ni tseꞌeé nda̱ ree̱ nangi Ejiptoo̱, nínga ki̱a̱ sikóntꞌa ndejèꞌ Niloo̱, 2kó ta̱ nijan má kamábe nga ndyi̱fotjojin ngi̱jin ndáfoaa̱ yito cho̱yojo xi achichí tsjákón, xi ꞌniú yiꞌi, kó ki̱a̱ tsakjién ndi̱xcho̱ tꞌa ndejeèꞌ. 3Kó ti̱ kamábe nga ndyi̱fotjojin ndejeèꞌ ngi yito cho̱yojo xi ata̱ chꞌokon, xi achichí xkꞌién, kó ki̱a̱ kixindyiatꞌa nínga síndo cho̱yojo xi achichí tsjákoón. 4Kó ta̱niján má, ¡kui cho̱yojo xi ata̱ chꞌokoón ko̱jo xi xkꞌieén iskjinie nga yito cho̱yojo xi achichí tsjákoón!

Kó kjiꞌá má jaꞌaá nda̱ ree̱. 5Ta̱nga ti̱ kisꞌifé nginí, kó ti̱ tseꞌéchi̱ni nginií ingo ndi̱yà, nínga kamábe ngo xka̱a̱ to ndso̱ko̱a̱n ṉño̱pan, xi yito ńtín jatjoo̱ xi kisꞌikitsié maá to ndso̱ko̱a̱n ṉño̱pan ko̱jo xi achichí tsjákón kamá. 6Kó jaskan kamábe nga jatjoo̱ kui xka̱a̱ to ndso̱ko̱a̱n ṉño̱paa̱n ngi yito ńtín xí ata̱ ni̱ma̱kón, kó tjo̱ xí chji̱a̱ni nangi kixií katsꞌénchjaán. 7¡Kó kui ńtín xí ata̱ ni̱ma̱koón iskjinie kui ńtín xí achichí tsjákoón xi kisꞌikitsié maá to ndso̱ko̱a̱n ṉño̱pan!

Kó kjiꞌá má jaꞌaá nda̱ ree̱, kó kamákjiín nga chi̱ni boá kui nii̱. 8Kó nga kamángindyiojoón achichí nda̱ kamaá, kó katsangiyakjaꞌá ngayeje xota̱ xi kotꞌasón xi chji̱a̱ni nangi Ejipto̱, ko̱jo ngayeje xota̱ xi kjínkón, kó kui nda̱ ree̱ katsóyaà ni xi tseꞌéchi̱nii̱, ta̱nga nde ngojín kui xotaa̱ xi katsóyaà mí ni xi mejeén tsó kui chi̱ni xi katseꞌeé nda̱ ree̱. 9Kósꞌe̱ nda̱ ngito̱ko̱o̱ já xí tjón kotꞌa bino̱ xi ꞌbi nda̱ ree̱ tsíchji̱a̱jo ree̱, nga bi̱ katsoó:

—¡Ngotꞌe̱ ꞌne̱, nga be an nga achichí nga ndajín an xota̱! 10Ngo ndi̱yà nga kiniꞌínxchínje̱jne̱ an ko̱jo nda ngito̱ko̱o̱ já xí tsꞌénda paa̱n, kó kanangisꞌinjne̱ ndo̱bo̱a̱yà nínga askonjne̱ ngito̱ko̱o̱ já xí koón já xí síndo ndo̱bo̱a̱ya̱à. 11Ngo ni̱xtji̱e̱n tseꞌéchi̱nijne̱ nga jójne̱. 12Kó ki̱a̱ nijan kisꞌijñajo̱jne̱ ndo̱bo̱a̱yà ngo nda̱ ebreo̱ xo̱ngò xi moso̱ katsꞌén nda̱ ngito̱ko̱o̱ já xí koón já xí síndo ndo̱bo̱a̱ya̱à, kó kuí kiꞌmíyàjne̱ chi̱nijne̱, kó katsóyàjne̱ mí ni xi mejeén tsó chi̱nijne̱ nga ngo nga ngojne̱. 13¡Kó bo̱a̱ má kamá ngayeje ni xi katsójne̱! An katseꞌé nginí xána, kó nda̱ xi ingoo̱ ji katseꞌékjo̱e̱ ji nga kiniꞌánkꞌién.

14Kósꞌe̱ nda̱ ree̱ katsangiyakjaꞌá Kosiee̱, kó ta̱tra kaꞌnaxié ndo̱bo̱a̱yà. Kosiee̱ íjoón tsja̱ꞌaa̱, asíkjo ńjñoo̱, sꞌe̱ kijíkoón nda̱ ree̱. 15Kó nda̱ ree̱, bi̱ katsoó Kosiee̱:

—Ngo chi̱ni tseꞌéna, kó nde ngojín xi tsóyàna mí ni xi mejeén tsó, ta̱nga jè kiꞌmíyàna nga ngije xò ndaꞌyé ji ngo chi̱ni, ꞌmíyé xò ji ni xi mejeén tsó.

16Kósꞌe̱ Kosiee̱, bi̱ katsoó nda̱ ree̱:

—Jmíjínna an kui ngaꞌniuú, ta̱nga Néná tjínrií, kó ka̱márií ka̱tso̱yaa̱ ni xi mejeén xche̱ ji nda̱ ree̱.

17Kósꞌe̱ nda̱ ree̱, bi̱ katsoó Kosiee̱:

—Ngi̱jin chi̱nina ki̱a̱ tikón kixi̱ an tꞌa ndejèꞌ Niloo̱. 18Kó ta̱niján má kamábe an nga ngi̱jin ndejeèꞌ jatjojin yito cho̱yojo xi yiꞌi xi achichí tsjákón xi ndyi̱kjién ndi̱xcho̱ tꞌa ndejeèꞌ. 19Kó nga̱xto̱n kui cho̱o̱ kamábe an nga jatjojin ngi̱jin ndáfoaa̱ ngi yito cho̱yojo xi achichí xkꞌién xi ata̱ chꞌokon. ¡Kji̱e̱ ngo ndi̱yà be an cho̱yojo xi bo̱a̱ kon ngayeje na̱xi̱ńdá Ejipto̱! 20Kó kui cho̱yojo xi xkꞌién xí ata̱ chꞌokoón iskjinie nga yito kui cho̱yojo xi achichí yiꞌii̱ xi tjón jatjokjaà. 21Xkꞌién kó chꞌokon kamá, kó ndatsi je iskjinie kui cho̱yojo xi yiꞌii̱, ¡nde kamáyàjín ngatꞌa̱ to̱kó bo̱a̱ tsꞌén xkꞌién kamá xikoó nga tjón tjón!

Kó kjiꞌá má jaꞌána. 22Jaskan ti̱ tseꞌé nginína ingo chi̱ni, nínga kamábe an nga kjimaxchá yito ńtiín to ndso̱ko̱a̱n ṉño̱pan xi achichí tsjákón kamá, kó kisꞌikitsié maá to, kó ta̱ ngo tsí yá xí kjifotjoo̱ kui ńtiín. 23Jaskan ti̱ jatjo nginií ti̱ kui yaá ngi yito ńtín xi ata̱ ni̱ma̱kón kamá, ntꞌié kamá, kó tjo̱ xi ndibání xtji̱e̱e̱n nangi kixií katsꞌénxí. 24Kó kui ńtín xí ata̱ ni̱ma̱koón iskjinie kui ńtín xí achichí tsjákoón. Ngayeje kui nii̱ jè kixiyàa̱ ngayeje já xí kotꞌasoón, ta̱nga nde ngojín xi kamaá katsóyàna ni xi mejeén tsó kui chi̱nii̱.

25Kósꞌe̱ Kosiee̱, bi̱ katsoó nda̱ ree̱:

—Nga jó kui chi̱ni xi katseꞌeé nda̱ re, ta̱ ngo tsí má. Néná tsꞌénbokoó ni xi mejeén sa̱ꞌín. 26Nga yito kui cho̱yojo xi achichí tsjákoón, yito nó boá, kó ti̱kuíní ni xi mejeén tsó nga yito kui ńtín xí achichí tsjákoón, nga jó kui chi̱nii̱ ta̱ ngo tsí má. 27Kó ti̱ nga yito kui cho̱yojo xi xkꞌién ko̱jo xi ata̱ chꞌokoón xi jatjojinni ndáfoaa̱, ti̱ yito nó boá nga, kó nga yito kui ńtín xi ata̱ ni̱ma̱koón, kui xi kixíꞌniuú ko̱jo xi katsꞌénchjaán tjo̱ xi ndibání xtji̱e̱e̱n nangi kixií, kuí boá xi tsóyà nga yito nó ka̱ma kjindiá.

28Néná mejeén nga xche̱ ji ni xi mejeén sa̱ꞌín nda̱ re. 29Nga tjón tjón ndibá yito nó nga achichí ni xi ka̱maxchá kꞌi̱e̱ nangi Ejiptoo̱, 30-31sꞌe̱ jaskan kji̱ndi̱bá yito nó nga jmí nichinie kꞌuiéjín, nga bo̱a̱ ka̱ma ta̱ꞌyajín xi kjo̱a̱ꞌátsjiee̱n ngayeje ni tsie xi kisꞌie ngasꞌe̱ nangi Ejipto̱, ngatꞌa̱ kui kjindiá ꞌniuú sa̱ꞌínkjié kui na̱xi̱ńdaá. 32Kó nga jó ndi̱yà tseꞌeé kui chi̱nii̱ nda̱ ree̱, kuí nii̱ xi mejeén tsó nga Néná bo̱a̱ kjiꞌi ni xi sa̱ꞌín, kó nga jè tsá ka̱ma kui nii̱.

33Kuíni nga chjiéngá ngotꞌe̱ ꞌne̱ nda̱ re, ngo nda̱ ti̱ndyi̱sé ji xi chji̱ni̱e̱ ko̱jo xi kjínkón, tsi̱ꞌe̱ nga kui kꞌuijñátjoón na̱xi̱ńdaá. 34Kó ti̱ bo̱a̱ xiaan ji nga nda̱ re, nga kꞌuíndetjén ji xota̱ kui na̱xi̱ńdaá xi kjo̱a̱ꞌátikó ngo nga ún tjiín ngayeje ni xi ka̱maxchá kui xi yito nó nga tsie ni ka̱maxchaá. 35Nga yito kui nó nda xi ndibaá, bo̱a̱ tꞌíi̱n nda̱ re, nga ngatjaꞌátikó kó ngatjaꞌátjó xki̱ na̱xi̱ńdá ngayeje nichinie ko̱jo to ndso̱ko̱a̱n ṉño̱pan xi ka̱maxchaá. 36Kó bo̱a̱ tsꞌén kui nichiniee̱ xtjo̱ꞌátjó, ki̱a̱ ka̱maa̱ kjiꞌanga ka̱ma kui kjindiá xí yito noó ki̱a̱ na̱xi̱ńdá Ejipto̱, kꞌuié nichinie, kó kui kjindiaá jmí ni sa̱ꞌínjiín kui na̱xi̱ńdaá.

37Kó nda̱ ree̱ ko̱jo já mosoo̱ nda kamaá ni xi katsó Kosiee̱, 38kó nda̱ ree̱ bi̱ katsoó mosoo̱: Ngojín ndiè sa̱kóná ingo nda̱ xi ꞌniú kjínkón ngase xikoó kui nda̱ xo̱ngo̱ò. 39-41Kósꞌe̱ nda̱ ree̱, bi̱ katsoó Kosiee̱:

—Néná boá xi akoó ngayeje kui nii̱ ji, kó kuí nii̱ xi tsó nga jmíjín ingo nda̱ xi chji̱ni̱e̱ ko̱jo xi kjínkón ngase xikoó ji. Kuíni nga ngotꞌe̱ ꞌne̱, jí boá xi ko̱ti̱xome ji ndiꞌa nínga botixoma an, ko̱jo ngayeje na̱xi̱ńdána, kó chjiéngá nga ngayeje xota̱ xi chji̱a̱ni Ejipto̱ ji ku̱i̱ntꞌiéꞌeén, kó ta̱ an tsí xi ꞌniú ngase nkꞌa ka̱ma xána nga̱soón xá tse̱, ngatꞌa̱ án boá xi nda̱ ree̱.

42Kósꞌe̱ jaskan nda̱ ree̱ jaꞌáxín sti̱ngaro xi tjiyaá tsja xi tsꞌénkjién nga beꞌeé xo̱jo̱n xi tsangiya, kó tsja Kosiee̱ íyaá. Sꞌe̱ katsjákjo̱a̱ nga katseꞌeé Kosiee̱ ńjño xi nda tsi̱ꞌe̱ nga ko̱a̱ja̱, kó ti̱ katsjaá ngo ni xi jmeyá kjásen xí to̱nsinié nga, 43kósꞌe̱ tsíꞌaá Kosiee̱ nga ki̱a̱ nijan ko̱e̱je̱yajo̱ karroo̱ nda̱ ree̱, nga kui xi je nda̱ xtitjoón, kó kui nda̱ ree̱, bi̱ katsoó xotaa̱ ngindyi̱ko̱n Kosiee̱: ¡Chjáxꞌájnú ndi̱yà! Kó Kosiee̱ kasakoxaá nga kui xi ko̱tíxomaa̱ ngayeje nangi Ejipto̱. 44Kó nda̱ ree̱ bi̱ katsoó Kosiee̱: Ndatsi an xi nda̱ ree̱ an, ta̱nga ngojín xota̱ xi ta̱xkiya sa̱ꞌín ngo ni tsi jijín xi ko̱e̱ꞌékjo̱e̱e̱.

45Kósꞌe̱ nda̱ ree̱ asíkjoo̱ jaꞌeén Kosiee̱ kó Safenat Panea̱ ítꞌajaꞌén, kó na̱ Asenaa̱t, tsa̱kji̱ín nda̱ xi ꞌmí Potiferaa̱ kui xi chináꞌmii̱ Oo̱n katsjaá nga kui xi chjo̱ón Kosiee̱ ka̱ma. Jaskan ngije kamá kui nii̱, Kosiee̱ kijíkatsijee̱n ngayeje nangi Ejipto̱.

Bi̱ tsꞌén katseꞌéxaá Kosiee̱ nga atíxoma nangi Ejipto̱

46Kjiꞌanga kamá kantié noó Kosiee̱ katsꞌénkixotꞌa nda̱ ree̱ ngatꞌa̱ kijíkatsijee̱n ngayeje nangi Ejipto̱. 47Kó nga yito kui nó xí tsie ni katsjá tꞌanangii̱, achichí ni kamáxchá ngayeje nangi Ejipto̱, 48kó Kosiee̱ jaꞌátikó ngayeje nichinie nga yito kui noó, kó jaꞌátjó kui nii̱ xki̱ na̱xi̱ńdá xikó kjiꞌi to ndso̱ko̱a̱n ṉño̱pan kamáxchá kuí tꞌanangii̱. 49Kó Kosiee̱ jaꞌátikó to ndso̱ko̱a̱n ṉño̱pan xikó maá tsi tsomií ndáchíkoón xí jaꞌátikó, ngaskande ngiti̱ kamájín ikꞌíxki̱ to ndso̱ko̱a̱n ṉño̱paa̱n, ngatꞌa̱ jmíjín xi kamaá tsaꞌa xki̱ ngayeje kui nii̱.

50Kó jó ndí kisꞌiee̱ Kosiee̱ ngindiee̱ nga kjindibá kui kjindiaá, ndí xí yeꞌé na̱ Asenaa̱t. 51Kó ndí tjoón Kosiee̱ Manasee̱ ítꞌajaꞌén ngatꞌa̱ bi̱ katsó: Néná boá xi katsꞌén nga kichíyána ngayeje kjo̱a̱xtina ko̱jo ndiꞌaa̱ na̱ꞌmina. 52Kó ndií xi ma jó Efraii̱n ítꞌajaꞌén ngatꞌa̱ bi̱ katsó: Néná boá xi katsjána ndí kꞌi̱e̱ nangi nínga achichí kjo̱a̱ni̱ma̱ jaꞌa an.

53-54Kó xikó má katsó Kosiee̱ nga ka̱ma, bo̱a̱ má kamá, yito nó jaꞌa nga ta̱nisién nda kamá nangi Ejipto̱. Kósꞌe̱ kjindibá yito nó nga kisꞌie kjindiaá. Kó kisꞌie kjindiá ngayeje na̱xi̱ńdá, ta̱ ngo tsí nangi Ejipto̱ nínga kisꞌie nichinie. 55Ngije kisꞌie kjindiá ngayeje nangi xi síndo ki̱a̱ Ejipto̱, xota̱ na̱xi̱ńdaá kui ngi̱ndiee̱ kijíkoón nda̱ ree̱ tsi̱ꞌe̱ nga tsíꞌaá nichinie. Kó nda̱ ree̱ bi̱ katsoó: Tangínchonjnúu̱ Kosiee̱ kó ti̱ꞌánjnú ni xi ka̱tso̱jnú kui nda̱a̱.

56Kó ngije ítsꞌi̱yanii̱ nga kamá kui kjindiá ngayeje kui na̱xi̱ńdaá, Kosiee̱ iskjíxꞌá kui ndiꞌa yiꞌi nínga kixindyia ni xi ma chiniee̱, kó atíñaá to ndso̱ko̱a̱n ṉño̱pan xota̱ Ejiptoo̱. 57ꞌNiú kamá kui kjindiaá nga ngayeje xota̱ xi tjín kjín na̱xi̱ńdá xi jachó nangi Ejipto̱ nga jachókꞌatsiee̱ nichinie Kosiee̱.

Currently Selected:

Jenesii̱ 41: MAIX

Highlight

Copy