Jenesii̱ 27

Bi̱ tsꞌén tsꞌenṉcha̱ Jakoo̱b

1Ngije ꞌniú kamáxchá Isaa̱, ngiti̱ tsijénjín kamaá, kó ngo ndi̱yà tsíchji̱a̱a̱ Esauu̱, ndií xi xchá, 2kó bi̱ katsoó:

—Ji xi̱ꞌin, jè ꞌniú xchá án, kó jè ta̱ bi̱ má tji̱e̱n kjo̱chó ni̱xtjin nga ko̱yà an. 3Kó mejénna nga chjábé jí yáchjonyáa̱ ko̱jo yáyojóo̱, kó tꞌen ji ngi̱jin kꞌijñá jàn, kó tꞌenni̱ꞌinkꞌínní ngo cho̱ xi ma chinie. 4Sꞌe̱ ti̱ꞌindení ngo ti̱bo̱a̱ ni xi nda chinie, ndibéje̱ní tsi̱ꞌe̱ nga skjíni̱e̱ an, kó bo̱a̱ tsꞌén sa̱ꞌinchikonñeé ngindiee̱ nga ko̱yà an.

5Kó na̱ Rebekaa̱ tsintꞌié ni xi katsoó Isaa̱ ndií xi ꞌmí Esauu̱, kó Esauu̱ kijí ngi̱jin kꞌijñá jàn nga kijítsꞌenkꞌién ngo cho̱, 6kósꞌe̱ na̱ Rebekaa̱ tsíchji̱a̱a̱ Jakoo̱b, kó bi̱ katsoó:

—Ji xi̱ꞌin, tsintꞌie an nga na̱ꞌmíi̱ tsíchji̱a̱jo ntsꞌie ji Esauu̱, kó tsíꞌaá, 7nga sa̱ꞌínkꞌieén ngo cho̱ xi ma chinie, kósꞌe̱ nga sa̱ꞌíndaa̱ ngo ti̱bo̱a̱ ni xi nda chinie, kósꞌe̱ tsja̱á kjo̱a̱niꞌánchikonñeé ngindiee̱ nga ko̱yà. 8Kó kuíni xi̱ꞌin, ndaꞌyé ndé ndéní, kó bo̱a̱ ti̱ꞌin ji ngayeje ni xi xiaán. 9Tꞌen ji nínga síndo cho̱ xi ndyi̱niꞌánxchá, kó jó ndí tindso̱ xi̱xi̱ xi xi̱ꞌin ndibéje̱ní, jè be an mí ni xi nda chiniee̱ na̱ꞌmíi̱, kó án sa̱ꞌindàa̱. 10Kósꞌe̱ ji kꞌuínje̱e̱ tsi̱ꞌe̱ nga skji̱ni̱e̱, kó bo̱a̱ tsꞌén ji sa̱ꞌínchikonñeé ngindiee̱ nga ko̱yà.

11Kó Jakoo̱b bi̱ katsoó na̱aa̱n:

—Ta̱nga ntsꞌié án Esauu̱ achichí tsja̱ yojoo̱ kó an bo̱a̱jín kjiꞌi an. 12Kó tsi sa̱ꞌínjo̱na na̱ꞌmina, ka̱makjiín nga tsꞌénꞌboṉcha̱jo an. ¡Kó ngindiee̱ nga sa̱ꞌínchikonñéna, ta̱sá chꞌo ka̱tso̱ kondra̱na!

13Kó na̱ Rebekaa̱ bi̱ katsoó Jakoo̱b:

—Ji xi̱ꞌin, ti̱ꞌin ji ni xi tꞌíxiaán, tꞌenchje̱ꞌé ji kui ndí cho̱o̱, kó ndibéje̱ní kꞌi̱e̱e̱, kó tsi chꞌo ka̱tso̱ na̱ꞌmíi̱ kondra̱ tse̱, ¡an ngatꞌákaniéna kui kjo̱a̱chꞌokjiꞌii̱!

14Kósꞌe̱ Jakoo̱b kijíkjaꞌá kui cho̱ xi kiꞌmií, sꞌe̱ kijíjoo̱ na̱aa̱n, kó kui xota̱chjo̱on katsꞌéndaa̱ ngo ti̱bo̱a̱ ni xi nda chinie xikó má tsꞌén tsjaa̱ kjinie Isaa̱. 15Kósꞌe̱ na̱ Rebekaa̱ tji̱e̱nmá kijí, kó iskjíbé ńjño tsjakjiꞌii̱ Esauu̱, kó katsꞌénkajá Jakoo̱b. 16Sꞌe̱ jaskan iskjíbé tji̱xi̱ín ndí tindsoo̱, kó kui yíꞌmáni tsja ko̱jo kjásén Jakoo̱b. 17Kó na̱ Rebekaa̱ katsꞌénkꞌasꞌiee̱n Jakoo̱b nichinie ko̱jo pan xi katsꞌénda. 18Kósꞌe̱ Jakoo̱b kijí nínga tikón na̱ꞌmii̱, kó bi̱ katsoó:

—Ji Na̱ꞌmi, a ka̱ma kjoaꞌa an.

—Ti̱tjè jí, —katsó Isaa̱—. ꞌYání nga jó ndína bo̱a̱ ji.

19—Esauu̱ boá an na̱ꞌmi, ndí tjóo̱n —katsó Jakoo̱b—. Jè bo̱a̱ katsꞌen an xikó kasení, ti̱sítji̱n ji kó ti̱ndyinde, chi̱ni ji cho̱ xi katsꞌenkꞌién an, tsi̱ꞌe̱ nga si̱ꞌinchikonñíní ngijee̱.

20Kósꞌe̱ Isaa̱ bi̱ katsoó ndií:

—A kó ta̱tra kiniꞌínkꞌín ji ngo cho̱ xi̱ꞌin.

—Jo̱o̱n, ngatꞌa̱ Ne xi tse̱ íjñá ngo cho̱ ngindyikón án —katsó Jakoo̱b.

21Kósꞌe̱ Isaa̱ bi̱ katsoó Jakoo̱b:

—Ja̱bíboeꞌé ji tsi̱ꞌe̱ nga sa̱ꞌinjoo̱, mejénna nga skuie cha̱n cha̱n an nga Esauu̱ ji.

22-27Kó Jakoo̱b kijíkóntiñaa̱ na̱ꞌmii̱, kó na̱ꞌmii̱ ngije katsꞌénjo̱, bi̱ tsꞌén asíyaá:

—A ja̱koxi̱ nga jí xi ndína Esauu̱ ji tsobo̱a̱. Ngatꞌa̱ tsja Esauu̱ boá, ta̱nga nda̱a̱ tsi̱ꞌe̱ Jakoo̱b boá.

—¡Jo̱o̱n na̱ꞌmi, Esauu̱ boá án! —Katsó Jakoo̱b.

Ta̱nga Isaa̱ kamábejín nga Jakoo̱b xi̱ꞌba̱, ngatꞌa̱ tsja bo̱a̱ má tsꞌén tsja̱ kamá xikoó tsi̱ꞌe̱ Esauu̱. Kósꞌe̱ Isaa̱ bi̱ katsó:

—Ji xi̱ꞌin, ndibéje̱boeꞌéní nichiniée̱, kó skjíni̱e̱ an cho̱ xi kiniꞌínkꞌín ji, tsi̱ꞌe̱ nga sa̱ꞌinchikonñeé.

Kó Jakoo̱b kijíjo̱ tiñaa̱ Isaa̱ kui nichiniee̱, sꞌe̱ iskjinie, kó katsjaá bino̱ nga, kó katsꞌe. Kó Isaa̱ ngije iskjinie nichiniee̱, bi̱ katsó:

—Ngotꞌe̱ ꞌne̱, xi̱ꞌin ndibéboeꞌé ji, kó ngo ndsó te̱ꞌée̱ na̱ꞌmíi̱.

Kó Jakoo̱b kijíkóntiñaa̱ na̱ꞌmii̱ kó katsjaá ngo ndsó tꞌanijon, kó Isaa̱ jaꞌándaá ńjñoo̱, kósꞌe̱ katsꞌénchikonñé nga bi̱ katsoó:

Ji xi̱ꞌin, bo̱a̱ má je̱n ji

xikó je̱n kui kꞌijñá xi Néná je katsꞌénchikonñé.

28¡Néná ngatsjaá tsie stsé,

kó ngatsjaá ngo tꞌanangi xi nda!

¡Nga tsjaá nga kꞌuieé tsie to ndso̱ko̱a̱n ṉño̱pan,

ko̱jo nga kꞌuieé tsie bino̱!

29¡Ngayeje xota̱ na̱xi̱ńdá xí

ngatamabendikoón!

¡Ngayeje xota̱ xingi̱ ji

ngatamabendikoón nga,

kó ngatamabe nga ji xi ngito̱ko̱ ji!

¡Ngatꞌíko̱jonii̱ xota̱ xi chꞌo ka̱tso̱o̱!

¡Kó ngatamachikonñé xi sa̱ꞌínchikonñeé ji!

30Kjiꞌá má ngije kamaá Isaa̱ nga katsꞌénchikonñé Jakoo̱b, ngije tsꞌénfotaxie ndiꞌa xi tji̱xi̱ín cho̱ kamándanii̱ nínga tikón na̱ꞌmii̱ nga jachó Esauu̱ nga kjoeꞌeni jno̱. 31Kó ti̱ katsꞌénda nichinie xi achichí nda chinie, sꞌe̱ kijíjoo̱ na̱ꞌmii̱, kó bi̱ katsoó:

—Ti̱sítji̱n ji na̱ꞌmi, kó ndibéchi̱ni̱ ji cho̱ xi katsꞌenkꞌién an, tsi̱ꞌe̱ nga ko̱e̱ꞌéní kjo̱a̱niꞌánchikonñée̱.

32Kósꞌe̱ tji̱e̱nmá bi̱ katsó na̱ꞌmii̱:

—ꞌYá jií bo̱a̱.

—¡Esauu̱ boá an na̱ꞌmi, ndíi̱ xí xchá! —Katsó Esauu̱.

33Kósꞌe̱ Isaa̱ jatsié se jatsié tsja, sꞌe̱ bi̱ katsó:

—Kósꞌe̱, ꞌyá kuií bo̱a̱ xi je jeꞌe kꞌi̱e̱e̱, xi je jeꞌejo̱na cho̱ xi katsꞌénkꞌién. Kó katsjána kó iskjíni̱e̱ an ngindiee̱ nga kjoéꞌe̱ ji, ngatꞌa̱ jè katsꞌenchikonñé an. ¡Kó kui kjo̱a̱niꞌánchikonñeé ngiti̱ ka̱májín kjoaꞌaxíi̱n!

34Nga tsintꞌié Esauu̱ ni xi katsó na̱ꞌmii̱, achichí ꞌniú askjandá ndasen, kó bi̱ katsoó na̱ꞌmii̱:

—¡Ti̱ ti̱ꞌinchikonñíní ko̱jo an nga na̱ꞌmi!

35Ta̱nga bi̱ katsó Isaa̱:

—Jè jeꞌe ntsꞌie ji, kó tsꞌenṉcha̱jona, kó kuíni nga kui je katsjáa̱ kjo̱a̱niꞌánchikonñé xi tsoboaá jí katsaki.

36Kó Esauu̱ bi̱ katsó:

—¡Kuíni nga Jakoo̱b ꞌmíni, ngatꞌa̱ nda̱ maña̱ boá! ¡Jè jó ndi̱yànií nga ꞌboṉcha̱jona! Nga tjón tjón iskjíbé kui kjo̱a̱nda xi tsoboána nga ndí tjón an, kósꞌe̱ ngotꞌe̱ ꞌne̱ iskjíbé kjo̱a̱niꞌánchikonñéna nga. Kó a ka̱májín si̱ꞌinchikonñíní ndatsa an nga.

37Kó Isaa̱ bi̱ katsoó Esauu̱:

—Mí xí ka̱ma sa̱ꞌin an kjo̱a̱a̱ ji xi̱ꞌin. ¡Jè bo̱a̱ kixian an nga kuí xí ko̱tíxomaa ji, ko̱jo nga kuí boá xi ngito̱ko̱ ka̱maa̱ ngayeje xota̱ xkjín, kó nga kui xotaa̱ xi sa̱ꞌínseén ni xi ka̱tso̱, kó jè bo̱a̱ kixian an nga tsie to ndso̱ko̱a̱n ṉño̱pan ko̱jo nga tsie bino̱ kꞌuieé!

38Kó Esauu̱ askjandá, kó ꞌniú tsíchji̱a̱ nga askjandáyà nga bi̱ katsó:

—Na̱ꞌmi, ¡ti̱ꞌinchikonñíní an nga! A ta̱ ngo tsí kjo̱a̱niꞌánchikonñé xi tjiín xi ma boeꞌé ji.

39Kósꞌe̱ Isaa̱ bi̱ katsoó:

Kjin ku̱i̱ndyinníi̱ ji tꞌanangi xi ndaa̱

ko̱jo stsé xi ꞌbókani nkꞌa jàn.

40Chjiéngá si̱ꞌinkjìn jí ki̱cha̱a̱

nga ko̱ꞌna̱xiéꞌé ji yojòo̱,

kó mosoo̱ ntsꞌie ka̱ma ji.

Ta̱nga ngije ka̱macho̱n ji,

jè ngiti̱ kuijín ntsꞌie ko̱tíxomanii.

Bi̱ tsꞌén Jakoo̱b tsangaa̱ Esauu̱

41Kó Esauu̱ achichí chꞌo kamaá Jakoo̱b ta̱ngatꞌanii̱ nga jaꞌáxiín kui kjo̱a̱niꞌánchikonñé xi katsjaá na̱ꞌmii̱, kó índa nga ngije ko̱yà na̱ꞌmii̱ sa̱ꞌínkꞌién ntsꞌi̱e̱. 42Nga tsintꞌié na̱ Rebekaa̱ ni xi índa Esauu̱, tsíchji̱a̱a̱ Jakoo̱b, kó bi̱ katsoó:

—Ntsꞌie ji Esauu̱ mején xoò sa̱ꞌínkꞌieén, kó ta̱ tsꞌénkoyarií nga bo̱a̱ sa̱ꞌín. 43Kó kuíni nga xi̱ꞌin, ndaꞌyéꞌínní ni xi xiaán, ta̱sá tꞌen ji ndiꞌaa̱ ntsꞌié án xi ꞌmí Labaa̱n kui xi tikón nangi Araa̱n, 44kó ki̱a̱ ti̱ndyin ji kjín ni̱xtjin ngaskande nga kjo̱a̱ꞌajenda kjo̱a̱xcha̱án ntsꞌie ji. 45Ngije xchi̱yaa̱ ni xi kiniꞌínje̱ ji, an sangiyaa én, tsi̱ꞌe̱ nga ka̱ma kji̱ndi̱bé nginí ji kꞌi̱e̱e̱. ¡Mejénjínna nga ta̱ ngo ni̱xtjin nga xcha̱ja nga jó ndína!

46Kósꞌe̱ na̱ Rebekaa̱, bi̱ kijítsoó Isaa̱:

—¡Jè tsꞌajonna ínchjín ititaa̱! Tsi kꞌi̱e̱ ku̱i̱xan Jakoo̱b kó tsi ngo kui ínchjiín ku̱i̱xanjo̱, ¡ta̱sá ngatꞌien an!

Currently Selected:

Jenesii̱ 27: MAIX

Highlight

Copy