Éksondo̱ 3

Néná bi̱ tsꞌén katsjáxaá Moisee̱

1Kó Moisee̱ askoo̱n cho̱tsa̱nga̱a̱ Jetroo̱, chiꞌyaá, kui xi chináꞌmii̱ nangi Mandia̱n. Kó ngo ndi̱yà Moisee̱ kijíjo̱ kui cho̱tsa̱nga̱a̱ xtji̱e̱e̱n nangi kixií, kó jachó ngaskande na̱xi̱i̱ Néná kui xi ꞌmí na̱xi̱ Oree̱b. 2Kó ndítsjie xi Néná jatjokjaà ki̱a̱ ngi̱jii̱n ngo yásarsa̱ xi tjítíngá. Kó Moisee̱ achichí kijíndikoón nga kui yaá tjítíngá, ta̱nga kjifejín. 3Kó bi̱ katsó: ¡Ánní nga bo̱a̱ kjima kon! ¡Kjuínkátsijenmáráa̱, ki̱a̱ ka̱maa̱ nga skuie an, míra̱ kjo̱a̱a̱ nga kjifejín kon kui ndí yaá!

4Nga kamábe Néná nga Moisee̱ kijíkatsijen boaꞌá ki̱a̱a̱, ꞌniú tsíchji̱a̱jo nga bi̱ katsoó:

—¡Ta̱si̱n ji ki̱a̱a̱ Moise̱!

Kó Moisee̱ bi̱ katsó:

—¡Mí xí kjima Ndi̱a̱!

5Kó Néná bi̱ katsoó:

—¡Ngata̱ ndibéboeꞌéjín ji ngase! ¡ꞌNa̱xié ji tji̱xíndiée̱, ngatꞌa̱ ngindyikón án boá nínga tasín ji, kó ndikón kuí ngi̱ndiee̱! 6Án boá xi Nee̱ xota̱ xi xcháa̱, Án boá xi Nee̱ Abraa̱n, Nee̱ Isaa̱ ko̱jo Nee̱ Jakoo̱b.

Nga tsintꞌié kuí nii̱ Moisee̱, kamámejénjiín askotsijee̱n Néná ngatꞌa̱ katsakjónní, kó ta̱sá yíꞌmá kje̱n. 7-9Ta̱nga Néná, bi̱ katsó ngasee̱:

—Jè kamábe an kjo̱a̱ni̱ma̱ xi ndyi̱foaꞌatio xota̱ na̱xi̱ńdána, ngatꞌa̱ xota̱ Ejiptoo̱, moso̱ je katsꞌén. Jè tsintꞌièe̱ nga ndyi̱kjandayà nga ndyi̱míꞌá nga kosiko̱jo an, kó ti̱ jè kamábe an nga já ngito̱ko̱o̱ ꞌniú ndajín ndyi̱tsꞌènjo̱, kuíni nga jè jéꞌe̱kòo̱n tsi̱ꞌe̱ nga kꞌoxiéꞌá an ngi̱ya tsja xota̱ Ejiptoo̱, kósꞌe̱ kjuínjo̱ an ngo ngi̱ndie xi nda ko̱jo xi tiyá, ¡ngo ngi̱ndie nínga ꞌniú tjín nichinie! Kó nangi Kanaa̱n boá kui ngi̱ndiee̱, nínga síndo xota̱ na̱xi̱ńdá xi nde kji̱e̱ bejínna. 10Kuíni nga ti̱ndyinde ji, ngatꞌa̱ ki̱a̱ sangiyáa nínga tikón nda̱ ree̱ nangi Ejipto̱, tsi̱ꞌe̱ nga ji xi ko̱ꞌna̱xié ji xota̱ na̱xi̱ńdána ki̱a̱a̱.

11Kó Moisee̱ bi̱ katsoó Néná:

—Kó ꞌyání an, nga an kon xi kjuinkóo̱n nda̱ ree̱, kósꞌe̱ bi̱ xiáa̱n: Án boá xi kꞌoxié an xota̱ Israee̱l kꞌi̱e̱e̱.

12Kó Néná bi̱ katsoó:

—¡Moise̱, án boá xi kjótsoꞌbájoo̱ ngatsjéni̱xtjin! Kó tsi̱ꞌe̱ nga xche̱ ji nga an xi tsꞌéntsangiyaa, ngo chi̱bo̱a̱ tsjaa: Ngije kaꞌnaxié ji xota̱ Israee̱l, ngayeje jún kuí má kui na̱xi̱i̱ si̱ꞌandikónjnúꞌun.

13Kó Moisee̱ bi̱ katsoó Néná:

—Kó tsi kjuín an nínga síndo xota̱ Israee̱l, kó nga bi̱ xiáa̱n: Néná, kui xi Nee̱ Abraa̱n, Nee̱ Isaa̱ ko̱jo Nee̱ Jakoo̱b boá xi katsangiyana tsi̱ꞌe̱ nga kꞌuijñándéjnúꞌun, bi̱ra̱ ka̱tso̱na: Ja̱ kó ꞌmí kui nee̱. Kósꞌe̱, kó xiáa̱n ngijee̱.

14-16Kósꞌe̱ Néná bi̱ katsoó Moisee̱:

—Bo̱a̱ tꞌíi̱n nga Án boá kui Ne xi tikón ngatsjéni̱xtjii̱n, kó Án boá xi ꞌmína AN XI AA̱N, bo̱a̱ tꞌíi̱n ngayejee̱ nga Án boá xi Nee̱ Abraa̱n, Nee̱ Isaa̱ ko̱jo Nee̱ Jakoo̱b, kui xi xota̱ xi xchájnú.

Kuíni nga tꞌen ji nangi Ejipto̱, kó tꞌítikí jí ngayeje xota̱ ngito̱ko̱o̱ xota̱ Israee̱l, kó bo̱a̱ tꞌíi̱n nga an, Nee̱ kui xotaa̱, ki̱a̱ jatjokjaà ji, kó nga jè kamábe an kjo̱a̱ni̱ma̱ xi ndyi̱foaꞌatio ki̱a̱ nangi Ejipto̱. 17Kó bo̱a̱ tꞌíi̱n nga án boá xi sa̱ꞌindé án, nga kꞌoxiéꞌá an kjo̱a̱a̱ kjo̱a̱ni̱ma̱ xi ndyi̱foaꞌatio ki̱a̱ nangi Ejipto̱, kó nga ki̱a̱ kjuínjo̱ an nangi Kanaa̱n, nínga síndo xota̱ na̱xi̱ńdá xi nde kji̱e̱ bejínna. ¡Ngo ngi̱ndie nínga tsie nichinie tjín!

18Jè be an nga xota̱ ngito̱ko̱o̱ xota̱ Israee̱l sa̱ꞌínseén ji, kuíni nga ji ko̱jo kui xotaa̱ tangínchonjnúu̱ nda̱ ree̱ nangi Ejipto̱, kó bi̱ tꞌínjnúu̱: Nda̱ re, Nejne̱ jè jèꞌekónjne̱ kó te̱ꞌéndièjne̱ nga kongínjne̱ nangi kixií, ngo ngi̱ndie nínga ján ni̱xtjin fí ndsa̱ko, ki̱a̱ ka̱maa̱ nga ki̱a̱ si̱ꞌantsjajne̱ Nejne̱ ko̱jo ki̱a̱ si̱ꞌankꞌasꞌienjne̱ kjo̱a̱tjó.

19Jè be an nga nda̱ ree̱ nangi Ejiptoo̱ tsja̱ndièjín nga kjo̱tjojnú kui ngi̱ndiee̱, ta̱nga án boá xi sa̱ꞌìi̱n kjo̱a̱ꞌniú. 20Kó an sa̱ꞌinkjièn án ngaꞌniúna, kó kjín ni xi fíndikónná xí sa̱ꞌin an xi sa̱ꞌínkjié kui xota̱ Ejiptoo̱, kósꞌe̱ kjiꞌá boá nga tsja̱ndiè nga kjo̱tjojnú kui ngi̱ndiee̱. 21Kó ti̱ án boá xi sa̱ꞌin an nga kui xota̱ Ejiptoo̱ tsja̱ajnú kjín ni, kó nga kjo̱tjojnú nangi Ejipto̱ jmí tsi sa̱ꞌínkjítiyajnú. 22Ngayeje ínchjín xí chji̱a̱ni Israee̱l ko̱e̱je̱koo̱n ínchjín Ejipto̱ xi tiña síndonii̱ xkjín, kó ku̱i̱ꞌaa̱ ni to̱nsinié ko̱jo ni to̱ntiboa xi bóndani yojoo̱, ko̱jo ńjño xi sa̱ꞌínkajá ndií xi chjo̱ón ko̱jo xi xi̱ꞌin, kó kui ínchjín Ejiptoo̱ tsja̱á ni xi ku̱i̱ꞌaa̱, kó bo̱a̱ tsꞌén nga xota̱ Ejiptoo̱ ngiti̱ jmí ni xi chjí kꞌuiéjiín ngijee̱.

Currently Selected:

Éksondo̱ 3: MAIX

Highlight

Copy