Éksondo̱ 18

Jetroo̱ bi̱ tsꞌén jachókatsijee̱n Moisee̱

1-5Kjiꞌanga to̱kó tikón Moisee̱ nangi Ejipto̱, katsangiyaꞌoyá nginí na̱ Séfora̱ chjo̱ón nangi Mandiaa̱n. Kó ki̱a̱ Jetroo̱, kui nda̱ xi chiꞌyaá Moisee̱, kui xi chináꞌmii̱ kui ngi̱ndiee̱ kamá, kuí askoo̱n na̱ Séfora̱, tsa̱kji̱ín ko̱jo Ngersoo̱n ko̱jo Eliesee̱r kui xi ndíndee̱.

Ndí tjoón Moisee̱ Ngersoo̱n ítꞌajaꞌén Nda̱ xi xín nangi tsó kui jaꞌeén, ngatꞌa̱ ki̱a̱ kisꞌijña ngo nangi xi kuijín tsi̱ꞌe̱. Ndí xí ma joó, Eliesee̱r ítꞌajaꞌén Néná boá xi bosikójona tsó kui jaꞌeén, ngatꞌa̱ jaꞌátsjiee̱n nga kui Néná xi tsi̱ꞌe̱ na̱ꞌmii̱ asíko̱jo, kó kuí boá xi tsꞌaxiéꞌá kjiꞌanga nda̱ ree̱ nangi Ejipto̱ sa̱ꞌínkꞌién katsaki.

Kó Jetroo̱ ja̱bo̱a̱ jè be nga ngayeje ni xi katsꞌén Néná nganda tsi̱ꞌe̱ Moisee̱ boá, ko̱jo nga Néná boá xi tsꞌaxié xota̱ Israee̱l ki̱a̱ nangi Ejiptoo̱. Ta̱nga kjiꞌanga Jetroo̱ kintꞌié nga Moisee̱ ki̱a̱ tjítsꞌénkjaꞌyá nangi kixií, ki̱a̱ tꞌa na̱xi̱i̱ Néná, kamámejeén kijítji̱ngii̱ kui ko̱jo na̱ Séforaa̱ ko̱jo Ngersoo̱n ko̱jo Eliesee̱r. 6Kó Jetroo̱ bi̱ katsó én xí katsangiyaa̱ Moisee̱: An Jetroo̱ kui xi chiꞌyáa̱, ko̱jo chjo̱ón ko̱jo nga jó ndíi̱ ki̱a̱ ndyi̱mongínchonjne̱ ji.

7Kósꞌe̱ Moisee̱ jataxie nga kijíkjaꞌáyíndi̱yà chiꞌyaá, kó nga kamábe, kisꞌijñaxtien nga kamábendikón, katsjaá ngo ndsó tꞌanijon, kó ngije katsꞌéntinde xkjín, tsꞌasꞌien ndiꞌańjñoo̱ Moisee̱. 8Kó Moisee̱ katsóyaà chiꞌyaá ngayeje ni xi Néná katsꞌénjo̱ nda̱ ree̱ ko̱jo xota̱ Ejiptoo̱. Kó ti̱ katsóyaà ngayeje kjo̱a̱xti xi kisꞌiee̱ xota̱ Israee̱l ki̱a̱ ngi̱ya ndi̱ya̱à ndeskande nga jatjoni nangi Ejipto̱ ko̱jo kótsꞌèn nga Néná tsꞌaxiéꞌá kui xotaa̱.

9Kó Jetroo̱ achichí tsjá kamaá kjo̱a̱a̱ ngayeje ni nda xi Néná katsꞌénjo̱ xota̱ Israee̱l, 10kó bi̱ katsó Jetroo̱: ¡Nganiꞌántsjaà Néná kui xi Nee̱ xota̱ Israee̱l, kui xi tsꞌaxiéꞌájnú ngi̱ya tsja xota̱ Ejiptoo̱, ko̱jo ngi̱ya tsja nda̱ ree̱! 11Néná boá xi jaꞌáxínjnú ngayeje kui kjo̱a̱ni̱ma̱ xi katsꞌénkjaꞌatiójnú xota̱ Ejipto̱ xi nkꞌa kamaá yojoo̱. ¡Ngotꞌe̱ ꞌne̱, nga be an nga Nee̱ xota̱ Israee̱l xí tjín ngasee̱ ngaꞌniú ta̱bo̱a̱jiín ngayeje ne xi ngasee̱!

12Kósꞌe̱ Jetroo̱ tji̱e̱nmá katsꞌénkꞌasꞌiee̱n Néná ngo kjo̱a̱tjó xi ndií cho̱tsa̱nga̱, kó ti̱ katsꞌénkꞌasꞌien ngasee̱ kje̱ꞌe kjo̱a̱tjó. Jaskan ngije kamá kui nii̱ Aaroo̱n ko̱jo ngito̱ko̱o̱ xota̱ na̱xi̱ńdá Israee̱l jachókjiniejo̱ ṉño̱ chiꞌyaá Moisee̱ kje̱n ṉchandikoón Néná.

Bi̱ tsꞌén katsjáxaá Moisee̱ xota̱ xi ko̱síko̱jo

13Nga kamángindyiojón Moisee̱ kisꞌijñando nga tsintꞌieé kjo̱a̱xti xi jachókꞌíni̱jmi̱ì xota̱ Israee̱l tsi̱ꞌe̱ nga kui sa̱ꞌíndajin. Nga ngo ni̱xtjii̱n nga kixindyia kixi̱ xotaa̱ nga askoyaá nga sa̱kóndieè nga ku̱i̱chji̱a̱jo Moisee̱. 14Nga kamábe Jetroo̱ ni xi tjítsꞌén Moisee̱, bi̱ katsoó:

—Mí nii̱ bo̱a̱ xi tiniꞌín ji. Míkjo̱a̱a̱ nga, nga ngo ni̱xtjii̱n ndyi̱a̱kixi̱ kui xotaa̱ nga ndyi̱koyaa̱, kó ji ki̱a̱ tindyinde ji ki̱a̱a̱.

15-16Kó Moisee̱ bi̱ katsoó chiꞌyaá:

—Kꞌi̱e̱ foeꞌekónna xota̱ Israee̱l kjiꞌanga ngo kjo̱a̱xti tjiín ko̱jo kje̱ꞌe xota̱. An foeꞌetsóyàna kui kjo̱a̱xtii̱, tsi̱ꞌe̱ nga Néná xí ka̱tso̱yà ꞌyání xi tjiín ngakixi̱ kjo̱a̱a̱ kui nii̱. Kó án boá xi xiyàa̱ ni xi tsó Néná, kó bokoyáa̱ kjo̱a̱botíxomaa̱ ko̱jo kjo̱a̱kitii̱ Néná.

17Kósꞌe̱ Jetroo̱ bi̱ katsoó Moisee̱:

—Ndakjiꞌi kui nii̱, ta̱nga ndajínkjiꞌi xikótsꞌèn tiniꞌín ji kui nii̱, 18ngatꞌa̱ jè kjifenda ji kó ti̱ kjifenda kui xotaa̱ nga. Achichí é kuí xaá, kó ka̱májiín nga ji so̱bo̱e̱ si̱ꞌin. 19Ndaꞌyé ji kjo̱a̱kjínkón xi tsjaa, kó Néná ngatasikójoo. Jí boá xi chjiéngá kꞌuin jí ngindyi̱ko̱n Néná ngatꞌa̱ jí boá xi ngito̱ko̱o̱ xota̱ na̱xi̱ńdaá ji, kó chji̱e̱ꞌèe̱ Néná kótsꞌèn ka̱mandajin kui kjo̱a̱xtii̱. 20Takoyèe̱ kui xota̱ na̱xi̱ńdaá kjo̱a̱botíxomaa̱ Néná, kó takèe̱ kótsꞌèn nga nda kꞌuíndo ko̱jo nga sa̱ꞌínkjatjosón kjo̱a̱ꞌniú xí tjiín.

21Tsi̱ꞌe̱ nga ka̱maa̱ si̱ꞌin ji ngayeje kui nii̱, chje̱ꞌéjin ji jáxíꞌín ngi̱jii̱n xota̱ Israee̱l xi ka̱maa̱ ko̱síko̱joo̱. Ti̱ndyi̱sé ji xota̱ xi ka̱maa̱ sa̱ꞌín ngo xá, xi ntꞌiéꞌeén Néná, xi ndisojín, ko̱jo xi xke̱éto̱njín tsi̱ꞌe̱ nga kjo̱a̱ndaa̱ ngo xota̱ ko̱e̱je̱. Te̱ꞌée̱ xá nga ngito̱ko̱ ngatama, tjín xí nga tsꞌenseén ngo mi̱ xota̱, kje̱ꞌe xí nga tsꞌenseén úchán xota̱, kje̱ꞌe xí ichítié, kó kje̱ꞌe xí tie xota̱ nga tsꞌenseén nga ngo nga ngo. 22Kuí boá kui jaá xi ngatsjéni̱xtjin nga ngatintꞌieè ko̱jo nga tsꞌendájin kjo̱a̱xtii̱ xota̱ na̱xi̱ńdaá, ta̱nga ngayeje ni xi ꞌniú niꞌii̱n ji ngatjeꞌejoo, kó kuí xotaa̱ nga tsꞌendájin ni xi niꞌínjiín. Kó nga ko̱síko̱joo̱ kui jaá, ka̱ma xtja̱ xá é xí niꞌín ji. 23Tsi Néná xí tsja̱akjo̱a̱a̱, kó tsi ki̱a̱ kꞌuíntjíngí ji kjo̱a̱botíxoma xi tsꞌéntsjaa, xchíkjo̱a̱ári kui xaá, kó kui xota̱ na̱xi̱ńdaá tsja ka̱maa̱ ngije ko̱e̱je̱ nginí nínga síndo.

24Kó Moisee̱ katsꞌén ni xi atíxomaa̱ chiꞌyaá. 25Kó jaꞌájin Moisee̱ jáxíꞌín xi ka̱maa̱ ko̱síko̱jo, kó katsjáxaá nga kui xi sa̱ꞌíndajin kjo̱a̱xtii̱ xota̱ na̱xi̱ńdaá. Tjín xí ngo mi̱ xota̱ katsꞌénseén, tjín xí úchán katsꞌénseén, tjín xí ichítié katsꞌénseén, ko̱jo tjín xí tie xota̱ katsꞌénseén nga. 26Kó kui jaá ngatsjéni̱xtjin nga katsꞌénseén kjo̱a̱xtii̱ xotaa̱, ni xi ꞌniújín niꞌin, kó Moisee̱ íjñaá ni xi ꞌniú niꞌii̱n, tsi̱ꞌe̱ nga kui sa̱ꞌíndajin.

27Jaskan Moisee̱ katsꞌénkixotꞌa chiꞌyaá, kó Jetroo̱ kijí nginí nangii̱.

Currently Selected:

Éksondo̱ 18: MAIX

Highlight

Copy