Éksondo̱ 13

Bi̱ tsꞌén kisꞌiṉtso̱ma xota̱ Israee̱l nangi kixií

Bi̱ tsꞌén katsꞌén xota̱ Israee̱l sꞌueé pan xi jmí nisanjiín

1Néná tsíchji̱a̱jo Moisee̱, kó bi̱ katsoó: 2Ndí xíꞌín xi tjoón nga ngo xtín xota̱ ndiꞌa, án boá xi si̱ꞌankꞌasꞌienna. Ko̱jo ngayeje ndí tjoón cho̱ tjié xi tjiín xota̱ Israee̱l ti̱ an si̱ꞌankꞌasꞌienna nga.

3Kósꞌe̱ Moisee̱, bi̱ katsoó xota̱ Israee̱l:

Ngata̱chiíjín niꞌánchíyájnú kui ni̱xtjii̱n, kjiꞌanga Néná katsꞌénkjién ngaꞌniuú nga tsꞌaxiéná nangi Ejipto̱, nínga xota̱ moso̱ kamá ñá. Kuíni nga, ngotꞌe̱ ku̱i̱ꞌítsꞌi̱yani nga kamájín xi̱ni̱e̱jnú pan xi tjiín nisan. 4-5Néná katsóyàtjoón xota̱ xi xchájnú nga kui xi sa̱ꞌínkꞌasꞌiee̱n nangi Kanaa̱n, nínga kje̱ꞌe xota̱ síndo ngotꞌe̱. ¡Ki̱a̱ boá ngo nangi nínga ngatsjéni̱xtjin tsie nichinie tjín!

Kuí bí xi̱ꞌbi̱ sá xí tjoón noó. Ngije Néná katsꞌénkꞌasꞌienjnú kui tꞌanangi xi katsóyàtjón nga tsja̱ajnú, kó ngije ki̱a̱ je tindyiónjnú, kuí má kui saá nga xki̱ nó xki̱ nó nga chjiéngá si̱ꞌánjnú sꞌueé pan xi jmí nisanjiín. 6-7Yito ni̱xtjin xi̱ni̱e̱jnú pan xi jmí nisanjiín, kó ni̱xtjin xi ma yitoo̱ si̱ꞌánjnú ngo sꞌué nganda tsi̱ꞌe̱ Néná. Nga yito kui ni̱xtjii̱n ngojín xota̱ xi kꞌuieé pan xi tjiín nisan, ti̱nde ka̱májín kꞌuieé nisan ndiꞌaa̱.

8Ni̱xtjin xi ma yitoo̱, bi̱ kꞌuínjnúu̱ ndíjnú: Kui sꞌueé kiniꞌán ñá kjo̱a̱a̱ nga kiniꞌánkjaꞌátsjien ni xi katsꞌén Néná nga tsꞌaxiéná nangi Ejipto̱. 9Kui sꞌueé kuí boá xi ka̱ma xikoó ngo chi̱bo̱a̱ xi kjótꞌa ndsa̱jnú ko̱jo tsi xtjienjnú, kó kuí boá xi sa̱ꞌínkjaꞌátsjienjnú nga Néná katsꞌénkjién ngaꞌniuú nga tsꞌaxiéjnú nangi Ejipto̱, kuíni nga nga jmíni̱xtjin niꞌánchíyájnú kjo̱a̱botíxomaa̱ Néná. 10Ngatjaꞌátsjienjnú nga xki̱ nó si̱ꞌánjnú kui sꞌueé, ti̱ kui ni̱xtjin xi je ikꞌíjñaá nga ka̱ma.

11Kó ngije Néná katsꞌénkꞌasꞌienjnú nangi Kanaa̱n, kui ngi̱ndie xi katsoó xota̱ xi xchájnú, 12jún chjiéngá si̱ꞌankꞌasꞌienjnúu̱ ndí xíꞌínjnú xi tjón ko̱jo ndí xíꞌín xi tjón kꞌuieé cho̱ tjiéjnú, ngatꞌa̱ nga joó nga Néná tsoboaá. 13Kjiꞌanga ko̱e̱ꞌéjnú ngo kjo̱a̱tjó kjo̱a̱a̱ ndí tjón xi xi̱ꞌii̱n bórró chjo̱on, ka̱ma si̱ꞌankꞌasꞌienjnú ngo ndií cho̱tsa̱nga̱. Kó ti̱ chjiéngá bo̱a̱ si̱ꞌánjnú kjo̱a̱a̱ ndí xíꞌín xi tjónjnú nga.

14Kó kjiꞌanga ndíjnú ko̱síyájnú, míkjo̱a̱a̱ nga kui kjo̱a̱tjoó niꞌánjnú, bi̱ tꞌínjnúu̱: Néná katsꞌénkjién ngaꞌniuú nga tsꞌaxiéjne̱ nangi Ejipto̱ nínga xota̱ moso̱ kamájne̱. 15Nda̱ ree̱ kui nangii̱ achichí tajá kamá ini̱ma̱a̱, kó katsjandièjín nga kjo̱tjojne̱ katsaki. Kósꞌe̱ Néná atíjeé xota̱ Ejiptoo̱ nga katsꞌénkꞌién ndí xíꞌín xi tjoón ngayeje xtín xota̱, ko̱jo ndí tjoón ngayeje cho̱ tjié xi kisꞌiee̱ nga. Kuíni nga ñá niꞌánkꞌién ndí xíꞌín xi tjoón ngayeje cho̱ tjié, ngajoo̱ ndí xíꞌín xi tjónná nga ngo kjo̱a̱tjó niꞌánkꞌasꞌién. 16Kó kuí nii̱ xi xikoó tsi ngo chi̱bo̱a̱ ka̱majnú jún xi kjótꞌajnú ndsa̱jnú ko̱jo tsi xtjienjnú, tsi̱ꞌe̱ nga kjo̱a̱ꞌátsjienjnú nga Néná katsꞌénkjién ngaꞌniuú nga tsꞌaxiéná nangi Ejipto̱.

Bi̱ tsꞌén akoó Néná ndi̱yà nínga ko̱e̱je̱ xota̱ Israee̱l

17Ngije nda̱ ree̱ katsjandiè nga kjo̱tjoni nangi Ejipto̱ xota̱ Israee̱l, Néná má xi akoó ndi̱yà nínga chjiéngá ko̱e̱je̱ni. Ki̱a̱jín kijíjo̱ xtji̱e̱e̱n ndi̱yà nínga síndo xota̱ Filisteaa̱, ndatsi kuí boá kui ndi̱ya̱à xi tiña ngase maa̱. Ngatꞌa̱ katsꞌénkjó Néná nga tsi xota̱ Filisteaa̱ skjánjo̱ xota̱ Israee̱l, kó xota̱ Israee̱l stsa̱kjonní kó ko̱e̱je̱ꞌoyá nginí nangi Ejipto̱. 18Kuíni nga Néná ki̱a̱ kijíjo̱ xota̱ na̱xi̱ńdá Israee̱l xtji̱e̱e̱n ndi̱ya̱à nangi kixií, kui xi foaꞌatjiyajoo̱n Ndáchíkón Inií. Kó bo̱a̱ tsꞌén nga xota̱ Israee̱l jatjoni nangi Ejipto̱, 19kó Moisee̱ atíxomaa̱ kui xotaa̱ tsi̱ꞌe̱ nga kijíjo̱ ńdaa̱ Kosiee̱, ngatꞌa̱ ngindiee̱ nga ko̱yà Kosiee̱, bi̱ katsoó já ntsꞌi̱e̱: Beriíko̱n an nga ja̱koxi̱ boá nga Néná kji̱ndi̱bákasikójojnú, kó kjiꞌanga bo̱a̱ ka̱ma, tangínjo̱jnú ńdana.

20Kó xota̱ Israee̱l ítsꞌi̱yani nga kijí, kó ki̱a̱ jatjoni nangi Sukoo̱t, sꞌe̱ ki̱a̱ katsꞌénkjaꞌyá ki̱a̱ nangi Etaa̱n, nínga ꞌbítsꞌi̱yanii̱ nangi kixií. 21-22Kó Néná nde chií íjñá soboájín kui xotaa̱. Nga ni̱xtjii̱n ngo ṉdi̱ xi ja̱kjiꞌi yásé má kjiꞌi xi kitsjientjoón, kó nga jñoó ngo ndiꞌí xi ja̱kjiꞌi yásé má kjiꞌi xi katsꞌéntsijee̱n.

Currently Selected:

Éksondo̱ 13: MAIX

Highlight

Copy