Xota̱ Éfeso̱ 3

Bi̱ tsꞌén íni̱jmì Pabloo̱ kjo̱a̱a̱ xá xi katseꞌeé ngandaa̱ xota̱ xi jundío̱jín

1Kó kuíni nga an, Pabloo̱, ndo̱bo̱a̱yà tikòn an ta̱ngatꞌanii̱ Kristo̱ Kjisoo̱, nganda tsa̱jún xi xota̱ xi jundío̱jínjnú. 2Jún jè kandaꞌyájnú nga Néná katsjána xá tsi̱ꞌe̱ nga xiyàjnúꞌun kjo̱a̱nda xi índa, nganda tsa̱jún. 3Néná akóna ni xi índa xi tjiꞌmaá ngasꞌe̱, xikótsꞌèn je katsꞌénꞌindó chiboajnúꞌun. 4Kjiꞌanga si̱ꞌanyajnú kui xo̱jo̱o̱n, xcha̱jnú nga nda makjínna ni xi índa Néná ngatꞌaa̱ Kristoo̱. 5Kui ni ꞌmaa̱, ngojín xota̱ xi akakoo̱ kje̱ꞌe ni̱xtjin, xikótsꞌèn ngotꞌe̱ A̱si̱énni̱xtjii̱n Néná akoó já apostro̱ tsjiee̱, ko̱jo jáchji̱ni̱e̱ꞌe̱én Néná. 6Kó kuí bí ni xi índaa̱: Nga xota̱ xi jundío̱jiín, ko̱jo kui sa̱ko̱ó ni xi Néná tsjaá ndií, kó nga ta̱ ngo tsí yojoo̱ Kristoo̱ ka̱ma ñá, kó nga nga jó tjiín nga sa̱ko̱ó ni xi Néná katsóyàtjón nga tsja̱á xota̱ xi sꞌijii̱n éntjatsi̱e̱e̱ Kristo̱ Kjisoo̱.

7Néná katsjáxána nga kꞌuini̱jmì án éntjatsi̱e̱e̱ kjo̱a̱a̱ kjo̱a̱ndaa̱, kui xi katseꞌéna ta̱ngatꞌanii̱ ngaꞌniuú Néná xí tjítsꞌénxájinna. 8An xí achichí chichí ngase an ngi̱jii̱n xota̱ tsjiee̱ Néná, ta̱nga an katseꞌéna kui kjo̱a̱ndaa̱ nga kꞌuini̱jmìi̱ xota̱ xi jundío̱jiín, éntjatsi̱e̱e̱ kjo̱a̱cho̱n tsiee̱ Kristoo̱ xi jmíjín xi makjín yejee̱. 9Kó nga boko cha̱n cha̱a̱n ngayeje xotaa̱ kókjiꞌi ni xi índa, kui ni xi tjiꞌmaá ndeskande kui ni̱xtjin jàn kui Néná xí katsꞌénda ngayeje ni xi tjiín. 10Kó bo̱a̱ tsꞌén ngotꞌe̱ ꞌne̱, xota̱ na̱ngo̱xi̱i̱ xi ku̱i̱ꞌíjñátsijen tsi̱ꞌe̱ nga ngayeje ngaꞌniú, ko̱jo xi botixómá xi tjín nkꞌa jàn, sku̱i̱e̱ kókjiꞌi to̱ko̱ya kjo̱a̱kjínkón xi tjiín Néná. 11Kui nii̱ xi índa tjón tjón Néná, ndeskande koó ngasꞌe̱, kó ngotꞌe̱ ꞌne̱ je jatjosón ngatꞌaa̱ Kristo̱ Kjisoo̱, kui xi Ndi̱a̱ná. 12Ndokꞌóchji̱nií Kristoo̱, ko̱jo nga sꞌijinná kuí, kuíni nga maꞌniátakón nga mongínchon tiñáa̱ Néná. 13Kó kuíni nga míꞌájnúꞌun, tsi̱ꞌe̱ nga ko̱yàjín takónjnú nga xcha̱jnú kui kjo̱a̱ni̱ma̱ xi tsꞌénfoaꞌatio an nganda tsa̱jún, ta̱sá kuí nii̱ xi kjo̱a̱jejnú ngatama.

Bi̱ tsꞌén tsíꞌatjé Pabloo̱ xota̱ na̱ngo̱xi̱ xi chji̱a̱ni na̱xi̱ńdáꞌniú Éfeso̱

14Ta̱ngatꞌanii̱ kui nii̱ nga bosien an tikóna ngindyi̱ko̱n Na̱ꞌmii̱ Ndi̱a̱ná Jesukristoo̱. 15Kui xi katsꞌénda ngayeje tji̱e̱ tsi tsi̱ꞌe̱ ndítsjie ki̱a̱ ndiꞌakꞌajmii̱, ko̱jo tsi tsi̱ꞌe̱ xota̱ kꞌi̱e̱ tꞌanangii̱. 16Míꞌáa̱ Néná tsi̱ꞌe̱ nga xikó kjiꞌi kjo̱a̱cho̱o̱n kjo̱a̱jee̱ nga tsja ngaꞌniuú ini̱ma̱jnú nga sa̱ꞌínkjién A̱si̱énni̱xtjii̱n. 17Tsi̱ꞌe̱ nga Kristoo̱ ngatꞌíjñajin ini̱ma̱jnú, ngatꞌa̱ nga sꞌijinjnú kuí. Kó nga jún kꞌuiéjnú tsie kjo̱a̱tjó xikoó ngo yá xí na̱nga̱ kijí ja̱ma̱a̱ ko̱jo nga ꞌniú ku̱i̱ndyionjnú. 18Bo̱a̱ tsꞌén jún ko̱jo ngayeje xota̱ tsjiee̱ Néná ka̱majnú, nga nda ka̱makjínjnú kókjiꞌi tiyá, ko̱jo kókjiꞌi ndojó, ko̱jo kókjiꞌi na̱nga̱, ko̱jo kó kjiꞌi nkꞌa kjo̱a̱tjoó Kristoo̱. 19Kó míꞌáa̱ Néná tsi̱ꞌe̱ nga xcha̱jnú kui kjo̱a̱tjoó Kristoo̱ xi foaꞌatjoón ngayeje kjo̱a̱kjíntakón, tsi̱ꞌe̱ nga Néná sꞌi̱jñajin ndo̱jò ndójo̱jnú.

20Nganiꞌántsjaà Néná kui xi achichí ngaꞌniú tjiín tsi̱ꞌe̱ nga tsꞌatio ngase ni xi sa̱ꞌín xi chji̱a̱ꞌáa̱ ko̱jo ni xi makjínná, xikó kjiꞌi kui ngaꞌniuú xí tsꞌénxájinná. 21Ngateꞌeé kjo̱a̱je Néná, ngi̱jii̱n xota̱ na̱ngo̱xi̱ xi tsi̱ꞌe̱ Kristo̱ Kjisoo̱, ngatsjéni̱xtjin. Bo̱a̱ kjiꞌi.

Currently Selected:

Xota̱ Éfeso̱ 3: MAIX

Highlight

Compare

Copy