Eklesiastee̱ 1

Ngayeje nii̱ xi ta̱kjo̱a̱ndaní

1Én xi tsíchji̱a̱ Nda̱ xi Tsóyà Eén, kui xi ndií Ndabii̱, ree̱ na̱xi̱ńdáꞌniú Jerusalee̱n. 2Ta̱kjo̱a̱ndaní, ngayeje nii̱ xi ta̱kjo̱a̱ndaní, katsó Nda̱ xi Tsóyà Eén, ngayeje nii̱ xi ta̱kjo̱a̱ndaní:

3Mí chjínií kjo̱a̱a̱ ngayeje xá xí tsꞌén xotaa̱ kui nga̱sondiee̱.

4Ngo tji̱e̱e̱ xota̱ tsen, ngo tji̱e̱e̱ xota̱ ꞌme,

ta̱nga tꞌanangii̱ to̱kó bo̱a̱ tsꞌén tikón.

5Fotjo tsꞌueé, kó ꞌbosꞌien nginí,

sꞌe̱ monga má fí nginí ngi̱ndiee̱

nínga fotjoni nga kamángindyiojón.

6Tjo̱o̱ foaꞌatjiya xtji̱e̱e̱n na̱ngi,

kó foaꞌatjiya xtji̱e̱e̱n ta̱ꞌin,

to̱kó tsꞌénfoaꞌatjiya,

kó nga foaꞌatjiya, ma tja̱tsi̱e̱ya nginí.

7Ngayeje ndejeèꞌ ki̱a̱ fochó ngi̱jin ndáchíkoón,

kó ndáchíkoón jmíni̱xtjin sꞌikitsie,

ki̱a̱ nínga kjindibáni ndejeèꞌ ki̱a̱ fí nginí,

kó ki̱a̱ fí nginí tsi̱ꞌe̱ nga mongaya nginí ndi̱ya̱à.

8¡Achichí ꞌbojónná ngayeje nii̱,

kó nde jmíjín xi kó ka̱tso̱!

¡Nde ngojín xi fenda nga kotsijen!

¡Nde ngojín xi fenda nga ntꞌié!

9Ni xi je kamaá, ti̱kuíní xi ka̱ma nginí.

Ni xi je kamándaa̱, ti̱kuíní xi ka̱manda nginí,

kó jmíjín ngo ni xi tja̱tsi̱e̱ kui nga̱sondiee̱.

10Kjiꞌanga tjín xí bi̱ ka̱tso̱:

¡Kꞌi̱e̱ tikónna ngo ni xi tja̱tsi̱e̱!

Ta̱nga ngaskande kui nii̱ ja̱bo̱a̱ jè tikón,

ndeskande ngindiee̱ nga stse̱n ñá.

11Jmíjín ngo kjo̱a̱foaꞌátsjien kjo̱a̱a̱ ni xi je kamaá,

ti̱nde xota̱ xi jaskan stse̱én,

kjo̱a̱ꞌátsjienjiín ni xi ka̱ma.

Jmíjín ngo ni xi chjínií

12An, Nda̱ xi Tsóyà Eén, re xi chji̱a̱ni Israee̱l kamá an ki̱a̱ na̱xi̱ńdáꞌniú Jerusale̱n. 13Ngayejení ini̱ma̱na nga katsꞌenkjién án kjo̱a̱kjínkónna nga tsangasendi̱yà án ko̱jo nga iskjitꞌoyà an ngayeje ni xi niꞌán kui nga̱sondiee̱. ¡Kó achichí é kuí xá xí íjñáná Néná tsi̱ꞌe̱ nga si̱ꞌán! 14Askotsijèe̱n ngayeje xá xí niꞌán kui nga̱sondiee̱, kósꞌe̱ kamákjínna nga ngayeje kui nii̱ ta̱kjo̱a̱ndaní bo̱a̱, kó ta̱ tsꞌénboa tsíná. 15Jmíjín xi ka̱maa̱ sa̱ꞌínna̱xo̱ ngo ni xi ti̱ki̱e̱n, ti̱nde ka̱májín xꞌi̱a̱xki̱ ni xi ndo̱jòjín. 16Kósꞌe̱ bi̱ tsꞌén katsꞌenkjó án: Kꞌi̱e̱ tikón an nga je kamáxchá án, kó jè tjín ngasena kjo̱a̱kjínkón. Kji̱e̱sa ꞌbéjín ngase re xi kjínkón ngase kꞌi̱e̱ na̱xi̱ńdáꞌniú Jerusale̱n xikoó án, ti̱nde jmíjín xi kisꞌie ngasee̱ kjo̱a̱kjínkón ko̱jo kjo̱a̱kjíntakón. 17Kósꞌe̱ ja̱ ngayejení ini̱ma̱na nga kamámejénna skuie ngase ni xi yaꞌanii̱ kjo̱a̱kjínkoón, ko̱jo nga ka̱makjínna kjo̱a̱tsobeé, ko̱jo kjo̱a̱chi̱nii̱, ta̱nga ti̱ kamábe an nga kui nii̱ ta̱ tsꞌénboa tsíná. 18Nga ja̱koxi̱, tji̱e̱nga tsie ngase kjo̱a̱kjínkón tjínná, tsie ngase ma xtinda, tji̱e̱nga tsie ngase kjo̱a̱kjíntakón tjínná, tsie ngase kjo̱a̱xti ꞌbéná.

Currently Selected:

Eklesiastee̱ 1: MAIX

Highlight

Copy