Ndeuteronomio̱ 7
7
Ni xi májín niꞌán
1Kó bi̱ katsó ngasee̱ Moisee̱ kui xota̱ na̱xi̱ńdaá:
Néná tsja̱ndièjnú nga ku̱i̱tjásꞌi̱e̱njnú ki̱a̱ kui tꞌanangi xi tsja̱ajnú. Kó kꞌo̱xié ki̱a̱ kui ngi̱ndiee̱ yito to̱ko̱ya xota̱ na̱xi̱ńdá xi kjín ngase ma, ko̱jo xi tjín ngasee̱ ngaꞌniú, ta̱bo̱a̱jiín jún, kó kuí boá xi xota̱ Ee̱t, ko̱jo xota̱ Jerjee̱, ko̱jo xota̱ Amoo̱r, ko̱jo xota̱ Kanaa̱n, ko̱jo xota̱ Feree̱, ko̱jo xota̱ Ee̱b, ko̱jo xota̱ Jebuu̱. 2Ni̱xtjin nga Néná tsja̱ndiè nga jún xi ko̱ti̱xomájnúu̱ kui xota̱ na̱xi̱ńdaá, ngata̱ ni̱ma̱jín májnú, ti̱nde nga jmí ni ꞌbíndajo̱jínjnú, ¡ti̱ꞌankjie yejejnú! 3Ngata̱ boeꞌéndièjínjnú nga ngo ndí xíꞌínjnú, ko̱jo tsi ngo ndí ínchjínjnú ku̱i̱xanjo̱ xota̱a̱ kui na̱xi̱ńdaá. 4Ngatꞌa̱ ta̱ngatꞌanii̱ kui xotaa̱, nga ndí xíꞌínjnú ko̱jo tsi ndí ínchjínjnú sa̱ꞌíntsjaà kje̱ꞌe ne, kó ngiti̱ ku̱i̱ntꞌiéꞌénjiín Néná. Kó tsi bo̱a̱ ka̱ma, Néná achichí sa̱ꞌínxchánjo̱jnú jún, kó ta̱ ngotjón tsí sa̱ꞌínkjié yejejnú.
5Chjiéngá jún xi si̱ꞌankjatsónjnú ṉchandikoón kui xotaa̱, kó tꞌítíjnú ni xi ne ndyi̱tsoó, kuí má a̱sie̱én kui xi na̱ ne Astarteé ndyi̱tsoó.
Ngo na̱xi̱ńdá xi Néná jè jaꞌájin
6Jún boá ngo xtín xota̱ na̱xi̱ńdá xi ndikón. Néná je jaꞌájinjnú ngi̱jii̱n kjín xota̱ na̱xi̱ńdá xí tjín nga̱sondiee̱, tsi̱ꞌe̱ nga jún xi ka̱majnú xota̱ xi ꞌniú tjó ngasee̱ kui. 7Ta̱nga tsi Néná tjó ngasee̱ jún, jmí tsi kjo̱a̱a̱ nga jún boá ngo na̱xi̱ńdá xí ta̱nisién ndikón. Ta̱sá kjo̱a̱a̱ nga jún boá xi ngo xtín xota̱ na̱xi̱ńdá xi jmí ni chjíjiín ngi̱jii̱n ngayeje xi ngasee̱. 8Tsi Néná jè katsꞌéndéjnú nga moso̱ kamájnú ki̱a̱ nangi Ejipto̱, kjo̱a̱a̱ nga tjórií jún. Katsꞌénkjién ngaꞌniú jee̱ nga katsꞌeén nda̱ ree̱ nangi Ejipto̱, kó bo̱a̱ tsꞌén katsꞌénkjatjosón ni xi katsóyàtjoón xota̱ xi xcháná.
9Kuíni nga jún chjiéngá xcha̱ndikónjnú Néná, nga kuí boá xi Néná xí ja̱koxi̱i̱. Néná tsꞌénkjátjosón ni xi índajo̱ ngayeje xota̱ tji̱e̱ xi tsꞌéntjó, ko̱jo xi ntꞌiéꞌeén kjo̱a̱botíxomaa̱, 10ta̱nga nde kꞌo̱ndíyájiín nga sa̱ꞌínkjié xota̱ xi tsꞌenchꞌó. 11Kuíni nga chjiéngá ti̱ꞌankjatjosónjnú ngayeje kjo̱a̱botíxomaa̱.
Tsjá ꞌbéná kjiꞌanga ndaꞌyáꞌén
12Tsi ngatsjéni̱xtjin si̱ꞌankjatjosónjnú kui kjo̱a̱bokoyaá, ja̱ ti̱ Néná sa̱ꞌínkjatjosón kui ni nda xi índajo̱ xota̱ xi xcháná. 13Tsi ko̱nda̱ꞌyáꞌénjnú, Néná sa̱ꞌínchikonñéjnú, ko̱jo sa̱ꞌíntjójnú, kó ngo na̱xi̱ńdá xí ꞌniú je sa̱ꞌínjnú. Néná achichí tsjatsꞌèn sa̱ꞌínkꞌíndo ndí xí kꞌuiéjnú, kó tsie to ndso̱ko̱a̱n ṉño̱pan, ko̱jo tsie bino̱, ko̱jo tsie isti̱ tsja̱á. Kó kjín cho̱ tjié kꞌuieé nga kꞌuíndo ki̱a̱ tꞌanangi xi katsóyàtjoón xota̱ xi xcháná nga tsja̱á.
14Jmí ni̱xtjin kꞌuié ngase ingo xtín xota̱ na̱xi̱ńdá xi bo̱a̱ tsꞌén ka̱machikonñé xikoó jún. Ngojín xtín xota̱ xi ndi̱ ka̱ma, kó ngayeje cho̱ xi kꞌuieé, kꞌuieé ndí nga. 15Néná tsja̱ndièjín nga ngo jún xi ka̱maꞌoo̱n. Ta̱ꞌyaní xi sa̱ꞌínchꞌójnú, ti̱ bo̱a̱ ti̱ tsꞌén ka̱majeé xikótsꞌèn kamájeé xotaa̱ ki̱a̱ nangi Ejipto̱. Ta̱nga jún jmí ni ka̱májínjnú.
16Ndokꞌóchji̱nií ngaꞌniuú Néná nga jún achichí kjín xota̱ na̱xi̱ńdá xí si̱ꞌánjnúu̱ nga ku̱i̱xkánjo̱jnú. Ta̱nga ngatjaꞌátsjienjnú nga ni̱ma̱jín ka̱majnú kui xotaa̱, ta̱sá ti̱ꞌankjiejnú, ngindiee̱ nga jún ki̱a̱ nijan si̱ꞌantsjajo̱jnú nee̱.
17Bee̱ko̱n an nga ndyi̱niꞌánkjóra̱jnú nga kui xota̱ na̱xi̱ńdaá kjín ngase ma, ko̱jo nga tjín ngasee̱ ngaꞌniú ta̱bo̱a̱jiín jún, kó nga ka̱májínra̱ si̱ꞌánjnúu̱. 18Ta̱nga ngata̱ ndakonjínmájnú. Ngata̱ chíyájínjnú nga Néná katsꞌénjeé nda̱ ree̱ ko̱jo xotaa̱ nangi Ejipto̱. 19Ngayejejnú nga chistiko̱ kamájnú kjo̱a̱a̱ kui ngaꞌniú je xi akó Néná. Kamáyàjnú kjín kjo̱a̱ndikón xi katsꞌén nga tsꞌaxiéjnú ki̱a̱ nangi Ejipto̱, kó ti̱ bo̱a̱ ti̱ sa̱ꞌínjo̱ kui xota̱ na̱xi̱ńdá xi ndyi̱ndakónnijnú jún.
20Kó kui xota̱ xi kꞌuíndo ngase xi kꞌo̱ngii̱ kui xota̱ na̱xi̱ńdaá, Néná sa̱ngíyaá xo̱ꞌbo̱e̱ xi skji̱ni̱e̱e̱ tsi̱ꞌe̱ nga sa̱ꞌínkjié. Ngojín xi ka̱maa̱ ko̱ngaꞌmaa̱ kui kjo̱a̱botíjeé. 21Kuíni nga, ngata̱ ndakonjínmájnú. Néná ki̱a̱ kjótsoꞌbájo̱jnú, kó ngayeje xi be ngaꞌniuú Néná ngaskande fotsié má.
22Xikótsꞌèn kongín boaꞌájnú, bo̱a̱ tsꞌén Néná kjo̱a̱ꞌáxín boaꞌá xotaa̱ kui na̱xi̱ńdaá. Tsi ta̱ ngo ndi̱yà tsí nga si̱ꞌankjie yeje kui xotaa̱, cho̱ tamá xí tjín ngi̱jin kꞌijñaá nga ngo foaꞌatjiyajoo̱n kui ngindiee̱ sa̱ꞌínkjiéjnú jún. 23-24Ta̱nga Néná boá xi sa̱ꞌín nga jún xi si̱ꞌánjnúu̱ nga ku̱i̱xkánjo̱jnú kui xota̱ na̱xi̱ńdaá, kó inda inda si̱ꞌankjie ngaskande nga nde ingo kꞌuíndojín. ¡Ngojín kui xotaa̱ xi ka̱maa̱ sa̱ꞌínjnú! Jún boá xi si̱ꞌánjnúu̱ nga ku̱i̱xkánjo̱jnú ree̱, kó nde ingojín xi kjo̱a̱ꞌátsjiee̱n ngijee̱.
25Ngije kiniꞌánjnúu̱ nga ikixkánjo̱jnú kui xota̱ na̱xi̱ńdaá, chjiéngá kꞌuitíjnú a̱sie̱én ni xi ne ndyi̱tsoó. Kó bo̱a̱ tsꞌén nga jún ka̱májín ka̱maxke̱jnú ni to̱nsinié ko̱jo ni to̱ntiboa xi kjijon kui nii̱. Tsjájín maá Néná kuí nii̱. 26Kuíni nga, chjiéngá ꞌniú chꞌo ka̱majnú kui ni xi ne ndyi̱tsoó kui xotaa̱, kó ka̱májín ndiꞌajnú kongínjo̱jnú. Tsi bo̱a̱ si̱ꞌánjnú, ko̱jo jún si̱ꞌankjiejnú nga.
Currently Selected:
Ndeuteronomio̱ 7: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
