Ndeuteronomio̱ 22
22
1Tsi tjín xí sku̱i̱e̱ nga tsoꞌbá kichajá cho̱yojo toroo̱, ko̱jo tsi cho̱tsa̱nga̱a̱ xota̱ tꞌa ndiꞌaa̱, chjiéngá ngatasikójo, kó ngatjíjo̱ nginií. 2Tsi kjin tikón kui xota̱ tꞌa ndiꞌaa̱, ko̱jo tsi jmíjín xi be ꞌyá xí tsi̱ꞌe̱ kui cho̱o̱, chjiéngá ndiꞌaa̱ ngatjíjo̱, kó ki̱a̱ nga koo̱n kui cho̱o̱ ngaskande nga kjo̱chóngase ndi̱a̱ xi tsi̱ꞌe̱ kui cho̱o̱. 3Ti̱ bo̱a̱ ti̱ sa̱ꞌín tsi ngo bórró sa̱ko̱ó, ko̱jo tsi ngo ńjño xi fotꞌa nga̱xtón, ko̱jo tsi ta̱jmì niní xi xcha̱ja xi kui sa̱ko̱ó.
4Tsi tjín xí sku̱i̱e̱ ngi̱ya ndi̱ya̱à, nga ngo xota̱ tꞌa ndiꞌaa̱ tjítsꞌénkjastjíe̱n ngo cho̱yojo toro̱ ko̱jo tsi ngo bórró xí kjiꞌijña tꞌanangii̱, chjiéngá ngatasikójo nga sa̱ꞌínkjastjíe̱n kui cho̱o̱. ¡Tasíko̱jojnú ngayeje xotaa̱!
5Já xíꞌiín ka̱májín ńjñoo̱ ínchjín ko̱a̱ja̱, ti̱nde ínchjiín ka̱májín ńjñoo̱ jáxíꞌín ko̱a̱ja̱. Achichí chꞌo maá Néná kjo̱a̱a̱ xota̱ xi bo̱a̱ tsꞌeén.
6Tsi tjín xí sa̱ko̱ó ngo ndo̱bo̱a̱a̱ ni̱sie nkꞌaa̱ ngo yá ko̱jo tsi ki̱a̱ tꞌanangii̱, kó tsi ki̱a̱ tikón na̱aa̱n kui cho̱o̱ nga kjiꞌitaꞌin kui chjo̱o, ka̱májín skjíbé ngayejee̱. 7Ngatsjandieè nga ko̱e̱je̱ na̱aa̱n, ta̱nga ka̱má nga kjíbé ndií. Bo̱a̱ ti̱ꞌánjnú, kó kjín nó tsjatsꞌèn ku̱i̱ndyionjnú.
8Tsi tjín xí sa̱ꞌínda ngo ndiꞌa tja̱tsi̱e̱, chjiéngá ngo xó ngatsꞌéndaa̱ nga ngo foaꞌatjiyajoo̱n nkꞌaa̱ tsi̱ꞌe̱ nga jmíjín xi ki̱a̱ kꞌo̱kangí sꞌe̱ ko̱yà. Kó bo̱a̱ tsꞌén nga xota̱ ndiꞌaa̱, sꞌi̱niéjín ngo jé kjo̱a̱a̱ nga tjín xí ko̱yàtaꞌii̱n.
9Tsi tjín xí tikoón ngo ngi̱ndie nínga tjitjíe̱ tostsi̱je̱è, ka̱májín kje̱ꞌe xojmá ku̱i̱ꞌítji̱e̱ ki̱a̱a̱. Tsi bo̱a̱ sa̱ꞌín, ka̱májín skji̱ni̱e̱ to xi ki̱a̱ ka̱maxchaá, ngatꞌa̱ chjiéngá chináꞌmii̱ sa̱ꞌínkꞌasꞌiee̱n ngayejee̱.
10Kjiꞌanga si̱ꞌanxájnú ngo kꞌijñá, ka̱májín nijan ko̱kján tꞌanangii̱ ngo cho̱yojo toro̱ ko̱jo ngo bórró.
11Ńchjón xi ka̱mandani ńjño xi xcha̱jàjnú, ka̱májín si̱ꞌankꞌájii̱n ńchjón xi tsa̱nga̱a̱ ko̱jo ńchjón xí linoo̱.
12Ńjño xi fotꞌa nga̱xtón xi si̱ꞌankjiénjnú chjiéngá ńchjón kꞌuíndoo̱ nga nijón nijon.
Kjo̱a̱bixaa̱n ko̱jo nga tsjayojojo̱ xingi̱
13Tsi ngo nda̱ xi ku̱i̱xan, kó kjojñájo̱ chjo̱ón, ta̱nga tsi jaskan ngiti̱ ka̱mamejénjiín. 14Kó tsi tsi̱ꞌe̱ nga ngiti̱ kꞌuijñájo̱jín ngase, bo̱a̱ ka̱tso̱ nga kui xota̱chjo̱on, je kje̱ꞌe xí je jajñajo̱ ngindiee̱ nga ku̱i̱xanjo̱, 15-17kjiꞌá boá nga na̱ꞌmii̱ kui naa̱, ngatjíkoón já xaá na̱xi̱ńdaá. Ki̱a̱ ngatakó ńjñotjibé xi katsꞌénkjién kuí naa̱ ni̱xtji̱e̱n xi tjón nga ixán, xikoó tsi ngo chi̱bo̱a̱ xi ko̱kó nga kui tsa̱kji̱ín kji̱e̱ ngojín xi fojñajo̱. Na̱ꞌmii̱ kui naa̱ bi̱ ka̱tso̱o̱ já xaá: Án boá xi katsjandiè an nga kui nda̱a̱ xi ixánjo̱ tsa̱kjìnna. Kó ngotꞌe̱ ꞌne̱ je ngiti̱ mejénjiín, kó bo̱a̱ tjítsó nga kje̱ꞌe xò xí je kisꞌiejo̱ ngindiee̱ nga kui ku̱i̱xanjo̱. Ta̱nga kꞌi̱e̱ tikón kꞌi̱e̱e̱ ngo chi̱bo̱a̱ nga bo̱a̱jín kjiꞌi ni xi tjítsó.
18Kósꞌe̱ já xaá ko̱tíjeé kui nda̱a̱ nga ko̱ꞌon ngo ńꞌniú ta̱ngatꞌanii̱ nga índiso kondraa̱ chjo̱ón. 19Kó kui nda̱a̱, chjiéngá ku̱i̱ꞌíchjií na̱ꞌmii̱ kui naa̱ úchán to̱ntiboa nga bo̱a̱ kjiꞌi machjí kjiꞌanga yandikónjín ngo na̱ Israee̱l. Kó ka̱májín ku̱i̱ꞌíjñámasien, ta̱sá kꞌuijñájo̱ ngatsjéni̱xtjin ngijee̱.
20Ta̱nga tsi ja̱koxi̱ nga kui naa̱ je kje̱ꞌe xí jajñajo̱ ngindiee̱ nga ku̱i̱xan, 21já xí chji̱a̱ni kui na̱xi̱ńdáꞌniuú nga tꞌaxiéni ndiꞌaa̱ na̱ꞌmii̱, kó ki̱a̱ ngatꞌaya ndi̱jo̱ nga sa̱ꞌínkꞌién. Kuí nii̱ xi tsoboaá nga ka̱maa̱ ngo xota̱ xi ndajín tsꞌén ki̱a̱ na̱xi̱ńdá Israee̱l, ko̱jo nga ta̱ngatꞌanii̱ kui nga ngo xtín xota̱ xi kjo̱a̱soboá foaꞌa. Tsi kui nii̱ xi si̱ꞌánjnú, bo̱a̱ tsꞌén nga si̱ꞌanchajajnú ni xi ndajín ki̱a̱ na̱xi̱ńdájnú.
22Tsi tjín xí kjojñájo̱ chjo̱ón kje̱ꞌe nda̱. Kjiꞌanga bo̱a̱ ka̱ma, kui naa̱ ko̱jo kui nda̱ xi bo̱a̱ katsꞌeén chjiéngá nga joó nga si̱ꞌankꞌien. Kó bo̱a̱ tsꞌén nga kju̱i̱e̱ ni xi ndajín ki̱a̱ Israee̱l.
23-24Tsi tjín xí sa̱ko̱ó ngo na̱ xi je kichjiáꞌá nga kje̱ꞌe nda̱ ku̱i̱xanjo̱, kó tsi kjojñájo̱ kui naa̱, kó tsi ki̱a̱ na̱xi̱ńdáꞌniuú nínga bo̱a̱ kamá, kó tsi kui naa̱ jmíni̱xtjin askjandáyà nga tsíꞌá nga tjín xí ko̱síko̱jo, chjiéngá nga joó nga kongínjo̱ ngindyi̱ko̱n já xaá, tsi̱ꞌe̱ nga já xaá xi bo̱a̱ ka̱tso̱ nga ndi̱jo̱ nga niꞌánkꞌiénni nga joó. Ko̱ti̱je̱é kui nda̱a̱ ngatꞌa̱ ndajín katsꞌénjo̱ chjo̱ón kje̱ꞌe nda̱, kó kui naa̱ ko̱ti̱je̱é ngatꞌa̱ tsíꞌájín nga tjín xí ko̱síko̱jo kjo̱a̱a̱ ni xi kamátaꞌin. Tsi bo̱a̱ si̱ꞌánjnú, ni xi ndajiín xcha̱ja ki̱a̱ na̱xi̱ńdájnú.
25-27Ta̱nga tsi jmí tsi ki̱a̱ na̱xi̱ńdáꞌniú nínga bo̱a̱ kamá, tsi nínga jno̱o̱, kó tsi kui nda̱a̱ kjo̱a̱ꞌniú katsꞌén kui naa̱ tsi̱ꞌe̱ nga kisꞌiejo̱. Yà jàn tsí kui naa̱ askjandáyà nga tsíꞌá nga tjín xí ko̱síko̱jo, ta̱nga nde jmíjínra̱ xi tsintꞌieé. Kjiꞌá boá nga jmí ni si̱ꞌanjo̱jín kui naa̱, ta̱nga chjiéngá si̱ꞌankꞌien kui nda̱a̱. Ni xi katsꞌén xikónií tsi ngo nda̱ katsꞌénkꞌién xota̱ tꞌa ndiꞌaa̱.
28Tsi ngo nda̱ sa̱ko̱ó ngo na̱ xi kji̱e̱ jmí xi̱ꞌin fojñajo̱jín kó tsi kui nda̱a̱ sa̱ꞌiín kjo̱a̱ꞌniú nga kjojñájo̱. Tsi tjín xí sku̱i̱e̱ kó tsi kui naa̱ kji̱e̱ jmíjín xi tsjaá tsꞌoa nga ku̱i̱xanjo̱, 29kui nda̱a̱ chjiéngá ku̱i̱ꞌíchjií na̱ꞌmii̱ kui naa̱ ngo chjí xí ichítié to̱ntiboa, kósꞌe̱ chjiéngá ku̱i̱xanjo̱ ngijee̱. Kó nga kjo̱a̱soboá katsjaá nga kjo̱a̱ꞌniú katsꞌeén nga jajñajo̱, jmíni̱xtjin ka̱ma nga ku̱i̱ꞌíjñá ngije ixánjo̱.
30Ngojín xi kjojñájo̱ chjo̱ón na̱ꞌmii̱. Xi bo̱a̱ sa̱ꞌiín, tsꞌénbendikónjín na̱ꞌmii̱.
Currently Selected:
Ndeuteronomio̱ 22: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
