Ndeuteronomio̱ 20
20
Kjo̱a̱kitii̱ kjo̱a̱a̱ kjo̱a̱xcha̱án
1Moisee̱ bi̱ katsó ngasee̱ xota̱ na̱xi̱ńdaá:
Kjiꞌanga kongínjnú kjo̱a̱xchán, ngata̱ ndakonjínmájnú. Ndatsi kondra̱jnú ꞌniú ngase ko̱jo tsi kjín ngase ma, ko̱jo tsi kjín ndi̱je̱, ko̱jo karroo̱ kjo̱a̱xchán tjiín, jmí ndasénjín, ngatꞌa̱ ñá tikónná ngo Néná xi katsꞌéndéná ki̱a̱ nangi Ejipto̱.
2Ngindiee̱ nga ku̱i̱xkánjnú, já chináꞌmii̱ bi̱ ka̱tso̱o̱ jájúnná: 3Ndaꞌyájnúꞌun jún xota̱ Israee̱l, ngotꞌe̱ ku̱i̱xkánjo̱jnú kondra̱jnú, ta̱nga ngata̱ ndakonjínmájnú. ¡Xín ti̱ꞌankjaꞌájnú kjo̱a̱tsiendikoón, kó xota̱ chꞌokon ti̱ꞌánjnú yojojnú! 4Néná boá xi skjánjo̱ kondra̱ná, kó kuí boá xi sa̱ꞌín nga ñá si̱ꞌán.
5-6Sꞌe̱ jaskan xota̱ ngito̱ko̱o̱ jájuún, bi̱ ka̱tso̱o̱ jájuún:
Tsi tjín jún xi je katsꞌénda ngo ndiꞌa, kó tsi kji̱e̱ ꞌbíjñayàjín, ko̱jo tsi je ítji̱e̱ tostsi̱je̱è, kó tsi kji̱e̱ kjiniéjín kui too̱, ta̱sá ngatjíꞌoyá nginí ndiꞌaa̱. Ngatꞌa̱ tsi ta̱ kꞌi̱e̱ ko̱yà ngi̱jii̱n kui kjo̱a̱xcha̱án, kó kje̱ꞌe boá xi kꞌuijñá ndiꞌaa̱ ko̱jo xi skji̱ni̱e̱ tostsi̱je̱è.
7Tsi tjín jún xi je katsꞌénkjó nga kui ni̱xtjii̱n ku̱i̱xan, ta̱sá ngatjíꞌoyá nginí ndiꞌaa̱, kó ngatixan. Ngatꞌa̱ tsi ta̱ kꞌi̱e̱ ko̱yà ngi̱jii̱n kui kjo̱a̱xcha̱án, kó kje̱ꞌe boá xi ku̱i̱xanjo̱ na̱ xi ku̱i̱xanjoo̱.
8Kó tsi tjín xi tsiendikón, ta̱sá ngatjíꞌoyá nginí ndiꞌaa̱ ngotꞌe̱ má, tsi̱ꞌe̱ nga ku̱i̱ndyiándikónjiín xi ngasee̱.
9Jaskan ngije kamá kui nii̱, já ngito̱ko̱o̱ jájuún kꞌuíndotjoón jájuún, kósꞌe̱ ku̱i̱ꞌítsꞌi̱yanii̱ nga ko̱e̱je̱ kjo̱a̱xcha̱án. 10Ngije tindyiontiñájnú ki̱a̱ na̱xi̱ńdáꞌniú nínga ku̱i̱xkánjnú, tjón mára tꞌíndajo̱jnú kui xotaa̱ tsi̱ꞌe̱ nga kꞌuiéjnú kjo̱a̱xió. 11Tsi kui xota̱ xi síndo ki̱a̱ na̱xi̱ńdáꞌniuú sa̱ꞌín jo̱ꞌo ni xi kꞌuínjnú, kó tsi sa̱ꞌínkꞌasꞌienjnú, kui xotaa̱ moso̱jnú ka̱ma. 12Ta̱nga tsi sa̱ꞌínjo̱ꞌojín, kjiꞌá boá nga jún ti̱tjatjíyajónjnúu̱ kui na̱xi̱ńdáꞌniuú, kósꞌe̱ ti̱xkánjo̱jnú ngijee̱.
13-14Ngije Néná je katsjájnú nga jún xi kiniꞌánjnúu̱ kui xotaa̱, ti̱ꞌankꞌiènjnú ngayeje jáxíꞌiín, ta̱nga nga jmí ni niꞌánjo̱jínjnú ínchjiín, ko̱jo jákjíndí xíꞌiín, ko̱jo jákjíndí ínchjiín, ko̱jo cho̱ xi tjiín. Bo̱a̱ tsꞌén nga moso̱jnú ka̱ma kui xotaa̱, kó ngayeje ni xi sa̱kójnú ki̱a̱ na̱xi̱ńdáꞌniuú, tsa̱jún ka̱ma.
15-18Chjiéngá ti̱ bi̱ ti̱ si̱ꞌanjo̱jnú ngayeje na̱xi̱ńdáꞌniú xi ku̱i̱xkánjo̱jnú, ko̱jo xi kjin síndonii̱ nangi nínga tindyiónjnú. Na̱xi̱ńdáꞌniú xi síndo ki̱a̱ tꞌanangi xi Néná tsja̱ajnú, chjiéngá si̱ꞌankꞌien ngayeje xota̱ Ee̱t, ko̱jo xota̱ Amoo̱r, ko̱jo xota̱ Kanaa̱n, ko̱jo xota̱ Feree̱, ko̱jo xota̱ Ee̱b, ko̱jo xota̱ tji̱e̱e̱ jebuseoo̱. Nde ngojín kui xotaa̱ xi kꞌuíndo ngase nga̱sondie, ngatꞌa̱ tsi kꞌuíndo, kuí boá xi ko̱kóyájnú tsi̱ꞌe̱ nga kje̱ꞌe ne si̱ꞌantsjàjnúu̱. ¡Kó kui nii̱, ngo jé xí achichí nga ndajín xi si̱ꞌan kondraa̱ Néná! ¡Achichí chꞌokjiꞌi kui nii̱! Kó Néná jè atíxománá nga chjiéngá si̱ꞌankjatsón kuí nii̱, nga xikoó tsi ngo kjo̱a̱tjó xi ko̱e̱ꞌeé nganda tsi̱ꞌe̱.
19-20Ingo ni ngase, kjiꞌanga kjín ni̱xtjin ka̱majnú nga ku̱i̱xkánjo̱jnú xotaa̱ ngo na̱xi̱ńdáꞌniú, kó tsi tsi̱ꞌe̱ nga si̱ꞌánjnúu̱, chjiéngá ku̱i̱chájnú yá xí kjiꞌi ki̱a̱a̱, ta̱kuítsí yá xí jmí to xi ma chinie tsjájín xi ti̱chájnú. Nga bichájínjnú yá xí tsjá to xi ma chinie, ngatꞌa̱ too̱ kui yaá ka̱má kuí xi̱ni̱e̱ kui ni̱xtjii̱n. Kó ingo ngase ni, yaá ka̱májiín kꞌo̱xiéꞌá yojoo̱ xikoó ngo xota̱, ngatꞌa̱ ta̱ yá tsí bo̱a̱.
Currently Selected:
Ndeuteronomio̱ 20: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
