Ndeuteronomio̱ 13
13
1Tsi ngo xota̱ chji̱ni̱e̱ꞌe̱én Néná kji̱ndi̱bá, kó tsi bo̱a̱ ka̱tso̱jnú nga ngo ni akakoo̱, ko̱jo tsi ngo kjo̱a̱ndikón xí sꞌe̱ ka̱ma ka̱tso̱yàjnú, 2kó tsi ja̱koxi̱ nga ka̱ma kui kjo̱a̱ndikoón, chónjnú yojojnú. Sꞌe̱ tsi jaskan ka̱tso̱yàjnú tsi̱ꞌe̱ nga ne xi nde yàjínjnú xi si̱ꞌantsjàjnúu̱, 3ngata̱ niꞌánsénjínjnúu̱. Nga ja̱koxi̱, Néná boá xi tsꞌénkjitꞌayàkónjnú, tsi̱ꞌe̱ nga sku̱i̱e̱ tsi tjójnú kui ngayeje kjo̱a̱niꞌánkjójnú, ko̱jo ngayeje xi kókónjnú. 4Jún chjiéngá ta̱kuítsí Néná xí si̱ꞌantsjàjnúu̱, kó ta̱kuítsí xi ko̱nda̱ꞌyáꞌénjnúu̱ ko̱jo xi ka̱maꞌniátakónjnú. 5Kó kjo̱a̱a̱ kui chji̱ni̱e̱ꞌén ndísoó, chjiéngá ti̱ꞌankꞌiènjnú, ngatꞌa̱ kuí boá xi tjítsꞌén nga jún ngiti̱ ko̱nda̱ꞌyáꞌénjínjnúu̱ Néná katsaki. Kó bo̱a̱ tsꞌén nga si̱ꞌankjiejnú kui ni xi ndajín xi tikónjinjnú. Néná boá xi katsꞌéndéjnú jún kjiꞌanga moso̱ ka̱majnú ki̱a̱ nangi Ejipto̱, kuíni nga ta̱kuítsí xi chjiéngá ko̱nda̱ꞌyáꞌénjnúu̱.
6-11Tsi tjín xí ka̱tso̱yàjnú tsi̱ꞌe̱ nga kje̱ꞌe ne si̱ꞌantsjàjnúu̱, tsi tiña ko̱jo tsi kjin chji̱a̱ni, ngata̱ niꞌánsénjínjnúu̱. Ta̱sá ti̱ꞌankꞌiènjnú kui xotaa̱, kó jún boá xi tjón ngatamajnú nga si̱ꞌankꞌiénjnú. Ngata̱ ni̱ma̱jín májnú, jmí ndasénjín tsi ntsꞌiejnú má, ko̱jo tsi ndí xíꞌínjnú, ko̱jo tsi ndí chjo̱ónjnú, ko̱jo ndatsi chjo̱ónjnú ma, ko̱jo tsi nda̱ xi ꞌniú nda yaꞌajnú. Ngata̱ niꞌánjetakónjínjnúu̱ kui ni xi ndajín xi katsꞌén, ta̱sá ndi̱jo̱ tjayàjnú nga si̱ꞌankꞌiénjnú. Kuí boá ni xi tsoboaá ta̱ꞌya xota̱ní xi sa̱ꞌínkjinjnú Néná xi chji̱a̱ni Israee̱l, ngatꞌa̱ kuí boá Néná xi tsꞌaxiénijnú nangi Ejipto̱, kó kuí boá xi katsꞌéndéjnú. Bo̱a̱ tsꞌén nga ko̱e̱ꞌéjnúu̱ ngo chi̱bo̱a̱ xi nda ngayeje xota̱ na̱xi̱ńdaá, kui xi chjiéngá stsa̱kjonní, kó nga ngiti̱ ka̱májiín sa̱ꞌín nginí kui jeé.
12-18Tsi ngo na̱xi̱ńdáꞌniú xi je katsjájnú Néná, kó tsi xota̱ xi ndajiín kui ngi̱ndiee̱ sa̱ꞌín nga xota̱ xi ngasee̱ sa̱ꞌíntsjaà ne xi nde yàjín ꞌyá kuií bo̱a̱, nda nda má ti̱ndyi̱séndi̱yàjnú ꞌyání bo̱a̱ xi bo̱a̱ sa̱ꞌiín. Tsi xcha̱ ngakixi̱i̱ kui nii̱, chjiéngá si̱ꞌankꞌiénjnú ngayeje xotaa̱ kui na̱xi̱ńdaá. Nga ngojín xi ꞌbíndo ngase nga̱sondie, ti̱ꞌankꞌiènjnú ngayeje cho̱o̱ nga. Ti̱ꞌankjatsón yejejnú na̱xi̱ńdaá, kó ki̱a̱ ngamasiee̱n kui na̱xi̱ńdaá tꞌíndojnú ngayeje ni xi kisꞌiee̱ kui xotaa̱. Kósꞌe̱ ki̱a̱ tꞌítíjnú kui nii̱ ngandaa̱ Néná, kó ngiti̱ niꞌándayajín kui na̱xi̱ńdáꞌniuú, ta̱sá ngatꞌíjñá jatson kjin.
Tsi ko̱nda̱ꞌyáꞌénjnúu̱ Néná, jmíni̱xtjin sa̱ꞌínxchánjo̱jnú. Ta̱sá sa̱ꞌíntjójnú, kó ngo na̱xi̱ńdá xí ꞌniú je sa̱ꞌínjnú, ngatꞌa̱ bo̱a̱ tsꞌén katsóyàtjoón xota̱ xi xchájnú. Tsi si̱ꞌankjatjosónjnú kui kjo̱a̱botíxoma xi tsꞌéntsjàjnúꞌun ngotꞌe̱, kó tsi si̱ꞌánjnú ngayeje ni nda xi tsꞌénbotixómájnú kuí, Néná ngatsjéni̱xtjin nga nda sa̱ꞌínjo̱jnú.
Currently Selected:
Ndeuteronomio̱ 13: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
